Ko Pili Mai te Faka‵saoga e Auala i te Malo o te Atua!
“Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.”—MATAIO 6:10.
1. Se a te mataupu tāua ne akoako atu ne Iesu?
ITE taimi ne fai ei ne Iesu Keliso tena Lauga i luga i te mauga, ne aofia ne ia i ei se ‵talo fakaakoako telā ne fakaasi mai ei te mataupu tāua telā e akoako atu ne ia. Ne akoako ne ia ana soko ke ‵talo ki te Atua, penei: “Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.” (Mataio 6:9-13) Ne “malaga Iesu i loto i fa‵kai ‵lasi mo fa‵kai fo‵liki, o takutaku atu te Tala ‵lei e uiga ki te Malo o te Atua.” (Luka 8:1) Ne fakamalosi atu a Keliso ki ana soko: “Ke mua koutou o ‵sala tena Malo mo tena amiotonu; kae ka fakaopoopogina atu a mea katoa konā ki a koutou.” (Mataio 6:33) I te taimi e sukesuke ei koe ki te mataupu tenei, ke onoono ki auala e mafai ei o fakaaogā ne koe a manatu i ei i tau galuega talai. E pelā me se fakaakoakoga, ke mafaufau ki te auala e mafai ei ne koe o tali a fesili konei: E pefea te tāua o te fekau o te Malo? Se a te mea telā e ‵tau o faka‵sao a tino mai ei? Kae ka faka‵sao pefea ne te Malo o te Atua a tino mai i ei?
2. E pefea te tāua o te fekau o te Malo?
2 Ne ‵valo mai a Iesu: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.” (Mataio 24:14) E tāua ‵ki eiloa a te tala ‵lei e uiga ki te Malo o te Atua. Ko te ‵toe fekau tāua eiloa i te lalolagi! I fakapotopotoga e silia atu i te 100,000 a Molimau a Ieova i te lalolagi kātoa, kāti e nofo ki se fitu miliona a tavini a te Atua e aofia i se galuega talai lasi, mai te fakailoa atu ki nisi tino me ko oti ne fakatu aka te Malo. A te fakatuga o te Malo tenei e fai pelā me se tala ‵lei, me e fakauiga i ei me ko oti ne fakatu aka ne te Atua se malo i te lagi telā ka pule katoatoa atu ki mea i te lalolagi. Mai lalo i te Malo tenā, ka fai i ei a te loto o Ieova i te lalolagi nei e pelā foki mo te lagi.
3, 4. Ne a mea ka ‵tupu māfai ko fakataunu te loto o te Atua i te lalolagi nei?
3 Ne a mea ka ‵tupu ki tino māfai ko fakataunu te loto o te Atua i te lalolagi nei? Ka fai ne Ieova ke “se toe iai ne loimata i olotou mata. Ka se toe iai se mate, se fanoanoa, se tagi io me se ‵mae.” (Fakaasiga 21:4) Ka se toe ma‵saki io me ‵mate atu a tino ona ko te agasala mo te tulaga sē ‵lei katoatoa. Ka maua ne tino ‵mate, kolā e masaua ne te Atua se avanoaga ke ola ki te se-gata-mai, me ne folafola mai te Tusi Tapu, penei: “Me i tino ‵lei mo tino sē ‵lei, ka faka‵tu mai katoa mai te mate.” (Galuega 24:15) Ka se toe ai ne taua, masaki, io me ko te fiakai, kae ka ‵fuli eiloa te lalolagi mō fai se palataiso. Ke oko foki loa ki manu fakama‵taku i aso nei ka maua ne latou se vā filemu mo tino e pelā foki mo nisi manu.—Salamo 46:9; 72:16; Isaia 11:6-9; 33:24; Luka 23:43.
4 Ona ko fakamanuiaga ‵gali penā kolā e māfua mai i te pulega o te Malo, e se tioa eiloa o fai mai penei a te valoaga i te Tusi Tapu e uiga ki te olaga i te vaitaimi tenā: “Ka ko latou kolā e loto maulalo, ka fai mo latou te fenua, kae ka maua ne latou te manuia mo te filemu katoatoa.” Kae e pefea la a tino faka‵tupu fakalavelave? E ‵valo mai te Tusi Tapu: “E se toe leva nei, ka ‵galo atu ei a tino amio ma‵sei.” Kae ko tino “kolā e fakatuanaki ki te Aliki, ka fai mo latou te fenua.”—Salamo 37:9-11.
5. Ne a mea ka ‵tupu ki te olaga tenei?
5 Ko te mea ke taunu te mea tenei, e ‵tau o fakaseai atu a te olaga tenei fakatasi mo pulega fai taua, lotu, mo mea fakapisinisi katoa. Kae tenā eiloa te mea ka fai ne te malo faka-te-lagi. Ne fakamalosi atu ki te pelofeta ko Tanielu ke ‵valo mai penei: “I te taimi o takitaki konā [konei e pule nei], kae ka fakatu ne te Atua o te lagi a te malo [i te lagi] telā ka se toe gata mai. Ka se toe mafai o takavale a te malo tenā. Ka fakatakavale ne ia a malo katoa konā [e pule nei], kae ka tumau ki te se gata mai.” (Tanielu 2:44) Ka pule mai ei a te Malo o te Atua—se malo fou faka-te-lagi—ki te fakanofonofoga fou i te lalolagi. Ka isi se “lagi fou mo te lalolagi fou, e ‵nofo i ei a te amiotonu.”—2 Petelu 3:13.
Te Lasi o te Manakoga mō se Faka‵saoga i Aso Nei
6. E fakamatala mai pefea ne te Tusi Tapu a te masei o te lalolagi fakafoufou tenei?
6 I te taimi ne ‵teke atu ei a Satani, Atamu mo Eva ki te Atua, kae fakaasi atu ei te lotou fia pule ifo ki a latou eiloa e uiga ki te mea tonu mo te mea sē tonu, ne kamata eiloa o oko atu a te kāiga o tino ki se tulaga fakamataku. Mai mua o te Lolo lasi, kāti i tausaga e silia i te 1,600 mai tua ifo, ne gasolo aka eiloa “te amio ma‵sei o tino katoa i te lalolagi, mo te lai‵lai o olotou mafaufauga.” (Kenese 6:5) I se 1,300 tausaga mai tua ifo, ne lavea ne Solomona te gasoloakaga o masei te tulaga o tino, telā ne tusi mai ei a ia: “E fakaamutia au ki tino kolā ko oti ne ‵mate kae ko ‵galo atu; me ko ‵lei atu latou i tino konei koi ola nei. Kae e silia atu te ‵lei o tino kolā e seki fa‵nau mai lele eiloa ki te lalolagi, kolā e seki lavea eiloa ne latou a uiga ma‵sei konei e fai i te lalolagi.” (Failauga 4:2, 3) I se 3,000 tausaga mai tua ifo ko oko mai ei ki ‵tou aso nei, kae koi tumau eiloa i te ma‵sei o amioga.
7. Kaia ko manakogina malosi ei se faka‵saoga mai te Atua i aso nei?
7 E tonu la me ko leva ne iai a amioga ma‵sei i te lalolagi, kae ko manakogina malosi ke maua te faka‵saoga e auala i te Malo o te Atua i ‵tou aso nei i lō taimi mua. Ne silia atu te ma‵sei o te tulaga o mea i te 100 tausaga ko ‵teka atu, kae koi tumau eiloa te lotou gasolo o nā ma‵sei atu. E pelā mo te lipoti mai te Worldwatch Institute: “E fakatolu taimi te tokouke o tino ne ‵mate i taua i [te 20] senitenali i lō taua katoa mai te senitenali muamua T.A. ki te 1899.” Talu mai te 1914, e silia atu mo te 100 miliona a tino ne ‵mate i taua! E fakaasi mai ne se encyclopedia e tasi me ne oko atu ki se 60 miliona o tino ne ‵mate i te Taua i te Lua. Ona ko te mea ko mafai o maua i nisi atufenua a meatau fakaniukelea, ko mafai foki i ei ne tino o fakaseai atu se vaega lasi o te aofaki o tino i te lalolagi. Kae faitalia te gasolo aka ki mua o poto o mea tau saienisi mo mea fakatokitā, koi ‵mate atu eiloa a tama‵liki e toko lima miliona i tausaga takitasi ona ko te fia‵kai.—Ke onoono ki te mataupu e 9 o te tusi ko te Ne a Mea e Akoako ‵Tonu Mai i te Tusi Tapu?
8. Se a te mea ko oti ne fakamautinoa mai i te fia afe o tausaga ne pule ei a tino?
8 Ne seki manuia a taumafaiga a tino ke faka‵lei aka a amioga ma‵sei. Ne seki fakataunu aka eiloa ne fakapotopotoga fakapolitiki, fakapisinisi mo fakapotopotoga fakalotu i te lalolagi nei a te manakoga fakavae o tino ko te filemu, te manuia mo te ola ‵lei. I lō te faka‵leiga o fakalavelave ‵lasi kolā e fe‵paki mo tino i taimi nei, ne fakaopoopo atu fua ne fakapotopotoga konei a fakalavelave e uke ki tino. E tonu, ko oti ne fakamaoni mai ne te fia afe tausaga ne pule i ei a tino, a te ‵tonu o pati konei: “Te Aliki, e iloa ne au me e seai se tino e pule i tena ikuga; e seai se tino e pule i tena ola.” (Ielemia 10:23) E tonu, a “tino kolā e ‵nofo i se tulaga malalo, e nofo puapuagā i te pulega a tino ma‵luga.” (Failauga 8:9) E se gata i ei, “e iloa ne tatou i mea katoa ne faite, ne ma‵nava fi‵ta.”—Loma 8:22.
9. Ne a tulaga e fakamoemoe a Kelisiano ‵tonu ke lavea ne latou i “aso fakaoti” konei?
9 E uiga ki ‵tou taimi nei, ne ‵valo mai te Tusi Tapu: “Ka isi ne taimi faiga‵ta i aso fakaoti.” Mai tua o tena fakamatalaga e uiga ki te tulaga o aso fakaoti mai lalo i te pulega a tāgata, e fai mai penei te valoaga tenā: “Ka ko tino amio ma‵sei mo te fakaloiloi tino, ka kamata eiloa latou mai te masei o fakasolo o na ma‵sei atu.” (Faitau te 2 Timoteo 3:1-5, 13.) Tenā eiloa te mea e fakamoe‵moe ki ei a Kelisiano, me i “te lalolagi kātoa ko i lalo i te pule a te Tino Masei,” ko Satani. (1 Ioane 5:19) Kae se tala fakafiafia me ko pili o faka‵sao ne te Atua a tino kolā e a‵lofa ki a ia. Ka faka‵sao eiloa latou mai te lalolagi nei, telā e gasolo eiloa o na masei atu.
Te Faka‵saoga Mautinoa Fua e Tasi
10. Kaia e fai ei a Ieova e pelā me ko te Tino fua e tokotasi e mafai o faka‵sao ne ia a tino?
10 I te taimi e folafola atu ei ne koe te tala ‵lei, fakamatala atu ki tino me i a Ieova ko te Tino fua e tokotasi e mafai o faka‵sao ne ia tatou. Ko ia fua tokotasi e maua ne ia te malosi mo te manakoga ke faka‵sao ne ia ana tavini mai so se tulaga sē ‵lei. (Galuega 4:24, 31; Fakaasiga 4:11) E mafai eiloa o mautinoa i a tatou me ka faka‵sao faeloa ne Ieova ana tino kae fakataunu ana fuafuaga, me ko oti ne tauto mai a ia: “A te mea ne fuafua ne au e taunu eiloa. . . . E penā foki te muna telā e faipati ne au - e se mafai o se fakataunu.”—Faitau te Isaia 14:24, 25; 55:10, 11.
11, 12. Se a te mea ko oti ne fakamautinoa atu ne te Atua ki ana tavini?
11 Ko oti ne fakamautinoa mai ne Ieova me ka faka‵sao ne ia ana tavini māfai ko fakamasino ne ia a tino amio ma‵sei. I te ugaatuga ne ia a te pelofeta ko Ielemia ke faipati atu mo te loto toa ki tino fai agasala matagā, ne fai atu a te Atua: “Sa ma‵taku.” Kaia? “Me i a au e fakatasi atu ki a koe o puipui [io me fakasao] koe.” (Ielemia 1:8) I se auala tai ‵pau, i te taimi ko pili ei o fakaseai ne Ieova a Sotoma mo Komolo, ne uga atu ne ia a agelu e tokolua ke ‵taki ne laua a Lota mo tena kāiga keatea mo te kogā koga tenā. “Ne faka‵to ifo ne te Aliki te afi ki luga i fa‵kai o Sotoma mo Komolo.”—Kenese 19:15, 24, 25.
12 Ke oko foki eiloa ki te lalolagi kātoa, e mafai ne Ieova o faka‵sao a tino kolā e fai ne latou tena loto. I te taimi ne fakaseai atu ei ne ia te lalolagi masei i aso mua i te Lolo, “ka ko tino kolā ne fakaola ne ia ko Noa telā ne folafola atu ne ia te amiotonu, mo nisi tino ake ei e tokofitu.” (2 Petelu 2:5) Ka faka‵sao foki ne Ieova a tino amio‵tonu māfai ko fakaseai atu ne ia te lalolagi masei tenei. Tela la, e fai mai penei tena Muna: “‵Fuli mai ki te Aliki, koutou katoa tino loto maulalo o te fenua . . . Ke fai ne koutou a te mea tonu, kae olo atu koutou mo te loto maulalo ki mua o te Aliki. E se taumate ka ‵sao mai koutou mai te fakasalaga i te aso e fakaasi ei ne te Aliki tena ita.” (Sefanaia 2:3) Ona ko te fakamaseiga tenā i te lalolagi kātoa, ‘ka ‵nofo a tino amio‵tonu i te lalolagi, kae ka tapale keatea a tino amio ma‵sei.’—Faataoto 2:21, 22.
13. Ka faka‵sao aka pefea a tavini a Ieova kolā ko oti ne ‵mate?
13 E tokouke a tavini a te Atua ko oti ne ‵mate atu ona ko masaki, fakasauāga mo nisi pogai aka. (Mataio 24:9) Kae ka faka‵sao aka pefea a latou konei? E pelā mo te mea ne sae aka muamua, “i tino ‵lei mo tino sē ‵lei, ka faka‵tu mai katoa mai te mate.” (Galuega 24:15) Ko tafaga la te fakamafanafana mai ke iloa atu me e seai se mea e mafai o taofi ne ia a Ieova mai te faka‵saoga o ana tavini!
Se Malo Amiotonu
14. Kaia e tali‵tonu ei tatou me i te Malo o te Atua se malo amiotonu?
14 E mafai o fakamatala atu ne koe i tau galuega talai me i te Malo faka-te-lagi o Ieova e amiotonu. E tonu eiloa te mea tenei me e fakaata mai i ei a uiga fakaofoofogia o te Atua, e pelā mo te faimeatonu, te amiotonu mo te alofa (Teutelonome 32:4; 1 Ioane 4:8) Ko oti ne tuku atu ne te Atua a te Malo ki lima o Iesu Keliso, ko te ‵toe tino ‵lei eiloa ke pule i te lalolagi. Ko oti foki ne fuafua ne Ieova ke fili se toko 144,000 o Kelisiano fakaekegina mai te lalolagi ke olo atu ki te lagi ke pule fakatasi mo Keliso ki te lalolagi.—Fakaasiga 14:1-5.
15. Taku mai te ‵kese o te pulega a te Malo o te Atua mo pulega a tino.
15 Ko tafaga la te ‵kese o te pulega a Iesu mo te toko 144,000 mo pulega a tino sē ‵lei katoatoa! A takitaki o te olaga nei ne tino ma‵sei kae avatu ne latou a tino kolā e ‵nofo mai lalo i te lotou pulega ki taua, kae iku atu ei ki te tamatega o te fia miliona o tino. E se tioa eiloa o polopoloki mai te Tusi Tapu ke se tali‵tonu tatou ki tino, “me seai se tino ola e mafai o fakaola ne ia a koe”! (Salamo 146:3) Kae ko Keliso ka pule mai eiloa mo te alofa! Ne fai mai a Iesu: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malologa. Ke amo ne koutou taku amoga, kae fakaakoako mai ki a au, me i a au e filemu kae loto maulalo; e maua foki i ei ne koutou a te tokagamalie otou agaga. Me amogofie taku amoga, kae māmā foki.”—Mataio 11:28-30.
Ko Pili o Palele Atu a Aso Fakaoti!
16. Ka palele atu pefea a aso fakaoti konei?
16 Ko oko atu a te lalolagi tenei ki aso fakaoti, io me ko “te gataga o te lalolagi,” talu mai te tausaga e 1914. (Mataio 24:3) E se leva nei, kae ka oko mai a te mea telā ne taku ne Iesu me ko te ‘fakalavelave lasi.’ (Faitau te Mataio 24:21.) A te ‵toe fakalavelave lasi tenā ka fakaseai katoatoa atu ne ia a te lalolagi a Satani. Kae e kamata pefea a te fakalavelave lasi? Kae e oti atu pefea?
17. Se a te mea e fakaasi mai i te Tusi Tapu e uiga ki te kamataga o te fakalavelave lasi?
17 Ka oko fakapoi mai a te fakalavelave lasi. E tonu, a te “Aso o te Aliki” ka oko fakavave mai māfai e “fai ake pelā tino: ‘Ko tokagamalie a mea katoa mo te manuia.’ ” (Faitau te 1 Tesalonia 5: 2, 3.) Ka tupu eiloa te fakalavelave lasi telā ne ‵valo mai i te taimi telā e mafau‵fau ei a tino me ko pili o faka‵lei aka ne latou a olotou fakalavelave e uke. A te fakaseaiga fakavave o ‘Papelonia te Sili,’ te emupaea o lotu ‵se, ka fakapoi atu eiloa ki tino o te lalolagi. Ka ofo malosi eiloa a tupu mo nisi tino māfai ko oko mai te fakamasinoga ki Papelonia te Sili.—Fakaasiga 17:1-6, 18; 18:9, 10, 15, 16, 19.
18. Ka saga atu pefea a Ieova ki te taua a Satani e fai ki luga i Ana tino?
18 I se taimi tāua o te olaga, “ka isi ne fakailoga i te la, te masina mo fetu,” kae ka “lavea atu i te lagi a te fakailoga o te Tama a te Tagata.” Ko mafai ei ne tatou o “‵tu kae ‵kilo ki luga, me ko pili mai te otou fakaolataga.” (Luka 21:25-28; Mataio 24:29, 30) Ka taua atu eiloa a kautau a Satani, io me ko Koka ki tino o te Atua. Kae e uiga ki tino kolā e taua atu ki ana tavini fakamaoni, ne fai mai a Ieova: “So se tino e fakapakia ne ia se tino i a koutou, ko fakapakia ne ia te mea tafasili i te tāua i toku loto.” (Sakalia 2:8) Tela la, ka se manuia eiloa a taumafaiga a Satani ke fakaseai atu latou. Kaia? Me ka saga fakavave mai eiloa a te Aliki Sili ko Ieova o faka‵sao ana tavini.—Esekielu 38:9, 18.
19. Kaia e mafai ei o tali‵tonu tatou me ka fakaseai ne kautau a te Atua a te fakanofonofoga a Satani?
19 Kafai ko saga atu a te Atua ki atufenua konā, ‘ka iloa ei ne latou i a au ko Ieova.’ (Esekielu 36:23) Ka uga mai ne ia ana kautau—te fia afe o agelu kolā e takitaki ne Keliso Iesu—ke fakaseai ne latou te ‵toega o te fakanofonofoga a Satani i te lalolagi. (Fakaasiga 19:11-19) Kafai e masaua ne tatou me ne tamate fua ne se agelu e tokotasi i se po e tasi a “te selau valusefulu lima afe” fili o te Atua, e mafai eiloa o tali‵tonu tatou me ka faigofie fua ki te kautau o te lagi ke fakaseai atu so se vaega o te fakanofonofoga a Satani i te lalolagi māfai ko kamata te fakalavelave lasi i Amaketo. (2 Tupu 19:35; Fakaasiga 16:14, 16) Ka saisai a Satani mo ana temoni i loto i se afe tausaga. Fakamuli ifo, kae ka fakaseai atu ei latou.—Fakaasiga 20:1-3.
20. Ne a mea ka fakataunu ne Ieova e auala i tena Malo?
20 Ka ‵fulu faka‵ma a te lagi mo te lalolagi mai amioga ma‵sei katoa, kae ka ola eiloa a tino amio‵tonu i te lalolagi tenei ki te se-gata-mai. Ko fakamaoni atu ei i a Ieova ko te Tino Sili telā e faka‵sao ne ia a tino. (Salamo 145:20) E auala i te Malo, ka fakamaluga aka i ei tena pulega, faka‵malu i ei tena igoa tapu, kae fakataunu ei tena fuafuaga mō te lalolagi. Ke na fiafia eiloa koe ki tau galuega talai i te taimi e folafola atu ei ne koe te tala ‵lei tenei kae fesoasoani atu ki tino “loto ‵lei kolā ka mafai o maua te ola se-gata-mai” ke iloa ne latou me ko pili mai te faka‵saoga e auala i te Malo o te Atua!—Galuega 13:48.
E Masaua ne Koe?
• Ne faka‵mafa mai pefea ne Iesu te tāua o te Malo?
• Kaia ko manakogina malosi ei se faka‵saoga i aso nei i lō aso mua?
• Ne a mea e fakamoe‵moe tatou ke ‵tupu i te fakalavelave lasi?
• Ne fakamaoni mai pefea ne Ieova a ia e pelā me ko te Tino Sili telā e faka‵sao ne ia a tino?
[Fakamatalaga o te Ata i te itulau e 19]
Kafai ne faka‵sao ne Ieova a Noa mo tena kāiga, e mafai foki ne Ia o faka‵sao tatou
[Fakamatalaga o te Ata i te itulau e 20]
Ka fai ne Ieova ke “se toe iai ne loimata . . . se toe iai se mate.”—Fakaasiga 21:4.