E Alofa Atafai a Ieova ki Ana Tavini Ma‵tua

“Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia.”​​—EPELU 6:​10.

1, 2. (a) Se a te mea e masaua ne koe māfai e lavea ne koe se tino ulu sinā? (e) Se a te kilokiloga a Ieova ki Kelisiano ma‵tua?

KAFAI e lavea ne koe a tino ma‵tua i te fakapotopotoga kolā ko sinā olotou ulu, e mata, e masaua ne koe i ei se tala mai te tusi ko Tanielu i te Tusi Tapu? I se fakaasiga telā ne tuku atu ne Ia ki a Tanielu, ne fakaasi mai ne Ieova te Atua a ia eiloa e pelā me e sinā tena ulu. Ne tusi mai Tanielu: “Ne kilokilo atu eiloa au, lavea atu eiloa ne au a nofogaaliki ko aumai o tuku i olotou koga. A Ia telā e ola ki te se gata mai e sagasaga i te nofogaaliki e tasi. A ona gatu ko ‵kena pelā mo te kiona, ka ko ona laulu pelā eiloa mo vulu ‵gali.”​​—Tanielu 7:9.

² E masani eiloa o ‵kena a te ‵lanu o te vulu. Tela la, e fakasino atu eiloa a te ulu sinā mo te tulaga o “Ia telā e ola ki te se gata mai” ki te matua o te Atua mo te lasi o tena poto, ne tulaga kolā e ‵tau o fakaasi atu ne tatou ki ei te āva lasi. Se a la te kilokiloga a Ieova, telā e ola ki te se-gata-mai, ki tāgata mo fāfine ma‵tua kae fakamaoni? E fai mai te Muna a te Atua me i “te ola loa ko te taui o tino amio‵tonu; a te ulu sina ko te kalauna ‵malu tenā.” (Faataoto 16:31) E tonu, kafai ko sinā te ulu o se Kelisiano fakamaoni, e gali eiloa te mea tenā i te kilokiloga a te Atua. E mata, e ‵pau tau kilokiloga mo Ieova e uiga ki ou taina mo tuagane ma‵tua?

Kaia e Tāua Malosi ei Latou?

3. Kaia e tāua malosi ei ki a tatou a taina tali‵tonu ma‵tua?

³ E aofia i tavini ma‵tua kae fagasele konā a te Atua ko tino o te Potukau Pule o Molimau a Ieova, toeaina āsiāsi i aso mua mo aso nei, paenia loto finafinau, mo tino talai ma‵tua o te Malo​​—ko taina mo tuagane kolā e tavini atu mo te fakamaoni i ‵tou fakapotopotoga. Kāti e iloa ne koe a nisi tino kolā ne talai atu ne latou te tala ‵lei mo te loto finafinau i te fia o tausaga kae ne fakamalosi atu eiloa olotou fakaakoakoga ‵lei ki talavou ke fai ne latou ne ‵fuliga ki olotou olaga. Ko oti ne tauave ne nisi taina tali‵tonu ma‵tua a tiute ‵mafa kae loto kufaki i fakasauāga ona ko te tala ‵lei. E loto fakafetai malosi eiloa a Ieova mo “te tavini fakamaoni kae poto” mō olotou tusaga katoa kolā ne fai i aso mua mo aso nei ki te galuega o te Malo.​​—Mataio 24:45.

4. Kaia e ‵tau ei o āva kae ‵talo tatou mō Kelisiano ma‵tua?

⁴ E ‵tau o maua ne vaegā tavini fakamaoni kae ma‵tua penā a te fakaaloalo mo te āva mai nisi tavini a Ieova te Atua. A te ‵tonuga loa, e ‵soko tasi ne te Tulafono a te Atua telā ne tuku ki a Mose, a te amanaia mo te āva ki tino ma‵tua mo te mataku ki a Ieova. (Levitiko 19:32) E ‵tau o ‵talo faeloa tatou mō tino fakamaoni konei kae fakafetai atu ki a Ieova mō olotou galuega a‵lofa e uke ne fai. Ne ‵talo te apositolo ko Paulo mō ana taina ga‵lue pele, talavou mo tino ma‵tua.​​—Faitau te 1 Tesalonia 1:​2, 3.

5. E aogā pefea ki a tatou a te ‵kau fakatasi mo tino tapuaki ma‵tua a Ieova?

⁵ E se gata i ei, e mafai o maua ne tino katoa i te fakapotopotoga a mea aogā mai te ‵kau fakatasi mo Kelisiano ma‵tua. E auala i te faiga o sukesukega, iloiloga, mo mea ne ‵tupu ki a latou, ko oti ne maua mai i ei ne tino tapuaki fakamaoni kae ma‵tua a Ieova a te iloaga tāua ‵ki. Ne tauloto latou ke fakaasi atu te kufaki mo te loto malamalama, kae ko te akoako atu o mea konā ki tupulaga fakamuli ifo se mea fakafiafia kae fakalotomalie foki. (Salamo 71:18) Talavou, ke poto koutou kae ke maua ne koutou a mea aogā mai te iloaga tenei e pelā eiloa mo te aogā o taumafaiga e fai ke ‵soni aka a vai mai se vaikeli ‵poko.​​—Faataoto 20:5.

6. E mafai pefea o fakaasi atu ne koe ki tino ma‵tua me e fakatāua malosi ne koe latou?

⁶ E mata, e fakaasi atu ne koe ki tino ma‵tua me e fakatāua ne koe latou e pelā eiloa mo te fakatāua ne Ieova latou? A te auala e tasi e mafai ei ne koe o fai penā ko te fakailoa atu ki a latou a te lasi o tou alofa mō latou ona ko te lotou fakamaoni mo te auala e fakatāua ne koe olotou manatu. E se gata i ei, mai te ola e ‵tusa mo au mea ne tauloto mai i a latou, e fakaasi atu ei ne koe me amanaia tonu koe ki a latou. E mafai o masaua ne Kelisiano ma‵tua e tokouke a fakatakitakiga ‵poto ne maua ne latou mai toeaina ma‵tua kae fakamaoni mo te mauaga o mea aogā i olotou olaga ona ko te lotou ola e ‵tusa mo fakatakitakiga konā.a

Fakaasi Atu te Alofa Atafai i Auala Aogā

7. Ko oi e tuku atu ne Ieova ki ei te tiute tāua ke tausi ki tino ma‵tua?

⁷ E tuku atu ne te Atua ki kāiga o tino ma‵tua a te tiute tāua ke tausi atu ki a latou. (Faitau te 1 Timoteo 5:​4, 8.) E fiafia eiloa a Ieova māfai e fakataunu ne kāiga olotou tiute ki te tausiga o olotou kāiga kolā ko ma‵tua, e fakaasi atu ei me e atafai eiloa latou ki tino ma‵tua e pelā eiloa mo ia. E ‵lago atu te Atua ki kāiga konei kae fakamanuia atu ki a latou mō olotou taumafaiga mo te taliaga o mea faiga‵ta.b

8. Kaia e ‵tau ei o amanaia tonu a fakapotopotoga ki Kelisiano ma‵tua?

⁸ I se auala tai ‵pau, e fiafia foki a Ieova māfai ko fesoasoani atu a fakapotopotoga ki tino ma‵tua kae fakamaoni kolā e ma‵nako ki se fesoasoani kae e seai ne kāiga tali‵tonu io me ne tino i olotou kāiga e fia tausi atu ki a latou. (1 Timoteo 5:​3, 5, 9, 10) E fakaasi atu i ei ne fakapotopotoga me e ‘tasi latou i mafaufauga mo lagonaga, e fakatau a‵lofa e pelā me ne tautaina, kae fakatau atafai’ foki ki tino ma‵tua. (1 Petelu 3:8) Ne fakaasi faka‵lei mai ne Paulo te lotou amanaia tonu ki tino ma‵tua i te fakapotopotoga i ana pati me kafai e ‵mae se vaega e tasi o te foitino, “ka ‵mae a vaega katoa” i ei. (1 Kolinito 12:26) A te saga tonu atu mo te alofa ki tino ma‵tua e fakaasi mai ei te uiga o pati fakatonutonu a Paulo: “Fesoasoani o fakatauamo fakatasi otou amoga; kafai e fai ne koutou penā, ko tausi ne koutou a te tulafono a Keliso.”​​—Kalatia 6:2.

9. Ne a fakalavelave e mafai o oko atu ki se tino ona ko te olaga matua?

⁹ Ne a fakalavelave e fe‵paki mo tino ma‵tua? E fi‵ta vave a tino e tokouke. E mafai o mafau‵fau latou me ko se mafai eiloa ne latou o fai a mea masani i te olaga e pelā mo te āsi atu ki te tokitā, te ‵togiga o mea, te ‵fuluga o te fale mo te fakatokaga o mea‵kai. Ona ko te lotou olo aka o ma‵tua, e galo sāle foki te lotou fia‵kai mo te fia inu, kae mafau‵fau latou me e se ‵tau o ‵kai io me inu latou e pelā mo te masani. E penā foki i te feitu faka-te-agaga. Ona ko te gasolo aka o ma‵tua, ko mafai o faigata ke lavea io me ke fakalogologo faka‵lei latou ki polokalame faka-te-agaga, kae e mafai foki o fai a te fakatoka o fano ki fakatasiga Kelisiano e pelā me se mea fakafi‵ta. Ne a la mea e mafai o fai ne nisi tino ki vaegā tino ma‵tua penā?

Auala e Mafai o Fesoasoani Atu ei Koe

10. Ne a mea e mafai o fai ne toeaina ke fakamautinoa aka ei me e maua ne tino ma‵tua a fesoasoani aogā?

¹⁰ I fakapotopotoga e uke, e gali ‵ki te fakaakoakoga e lavea atu e uiga ki te tausiga o tino ma‵tua. E fesoasoani atu a taina mo tuagane ki a latou i te ‵togimaiga o mea, te kuka mo te ‵fuluga o te fale. E fesoasoani atu foki latou ki tino ma‵tua ke fai olotou sukesukega, ke fakatoka mō fakatasiga, kae ke tumau foki i te kau atu ki te galuega talai. E ‵kau fakatasi atu a Molimau talavou ki a latou kae ave sāle foki ne latou i olotou mea fakateletele. Kafai ko se mafai o tiakina ne tino ma‵tua olotou fale, e mafai o fakalogo‵logo latou ki polokalame i fakatasiga e auala i telefoni, io me puke te polokalame ke fakalogo‵logo fakamuli latou ki ei. Kafai e mafai, e fakamautinoa aka ne toeaina me isi ne fakatokaga aogā e fai ke fesoasoani atu ki manakoga o tino ma‵tua i te fakapotopotoga.c

11. Fakamatala mai te auala ne fesoasoani atu ei se kāiga ki se taina matua.

¹¹ E mafai foki o fakaasi atu ne Kelisiano taki tokotasi te uiga talimālō mo te alofa kaimalie. Mai tua o te matega o te avaga a se taina e tokotasi, ne seki toe mafai o ‵togi ne ia a te fale ke nofo a ia i ei e aunoa mo te tupe fesoasoani a tena avaga. Ne fai ne laua se akoga faka-te-Tusi Tapu mo se kāiga​​—te tamana, te mātua mo tama‵liki fāfine talavou e tokolua​​—telā e lasi ‵ki te lotou fale. Ne tuku atu ne latou a potu e lua ke nofo i ei a ia. I tausaga e 15, ne ‵kai fakatasi latou, fia‵fia fakatasi kae fakatau fakaasi atu foki te alofa. E uke mea aogā ne maua ne tama‵liki mai te lasi o tena fakatuanaki mo tena atamai, kae ne aogā foki ki a ia a ‵kaufakatasiga fia‵fia penā. Ne nofo a te taina matua tenei mo latou ke oko ki te taimi ne mate atu ei a ia kae ko 89 ana tausaga. Koi fakafetai atu eiloa a te kāiga tenei ki te Atua mō fakamanuiaga ne maua ne latou mai te ‵kau fakatasi mo tou tagata. Ka maua eiloa ne latou ‘te lotou taui’ mai te fesoasoani atu ki se soko o Iesu Keliso.​​—Mataio 10:42.d

12. Ne a mea e mafai o fai ne koe ke fakaasi atu ei tou alofa tonu ki taina mo tuagane ma‵tua?

¹² Kāti e se mafai o fesoasoani atu koe ki se taina io me se tuagane matua e pelā mo te kāiga tenei, kae kāti e mafai o fesoasoani atu koe o ave a nisi tino ma‵tua ki fakatasiga e pelā foki mo te galuega talai. E mafai foki o ‵kami ne koe latou ki tou fale kae ke aofia foki latou māfai e olo atu koutou o ta‵fao i se koga. E mafai o āsi atu koe ki a latou maise māfai ko ma‵saki io me ko se mafai o oloolo sāle. Kae sili i ei, e mafai kae ‵tau foki o fai ne koe latou e pelā me ne tino kolā ko ma‵tua ‵lei. Kafai koi ‵lei olotou mafaufau, e ‵tau eiloa o aofia a Kelisiano ma‵tua i te faiga o fakaikuga ki mea kolā e pokotia latou i ei. Ke oko foki eiloa ki tino kolā ko se ‵lei olotou mafaufau e mafai eiloa o iloa ne latou me ne fakaasi atu ki a latou te fakaaloalo mo te āva.

E se Mafai Eiloa o Puli i a Ieova Au Galuega

13. Kaia e tāua ei ke fakaasi atu te amanaia tonu ki lagonaga o Kelisiano ma‵tua?

¹³ E tāua ‵ki ke fakaasi atu te amanaia tonu ki lagonaga o tino ma‵tua. Se mea masani mō tino ma‵tua ke loto māfatia malosi ona ko te sē mafai ne latou o fai nei a mea kolā ne mafai o fai muamua i te taimi koi tai fo‵liki kae ma‵losi ei latou. E pelā me se fakaakoakoga, ne kamata o masaki malosi se tuagane, telā ne tavini fakamaoni ki a Ieova i se 50 tausaga kae ne galue foki e pelā me se paenia, kae ne fakafaigata ei ke kau atu a ia ki fakatasiga. Kafai e fakatusa ne ia ana galuega ne fai i aso mua mo te tulaga ko oko nei a ia ki ei, ne kamata o tagi tou fafine. Ne punou ifo tena ulu, kae fai atu mo ana loimata e ma‵ligi penei, “Ko seai nei soku aogā.”

14. Ne a fakamalosiga e mafai o maua ne tavini ma‵tua a Ieova mai tusi i te salamo?

¹⁴ Kafai koe se tino matua, e mata, ko oti ne oko atu ki a koe a lagonaga fakalogo‵mae penā? Io me isi ne taimi ne mafaufau koe me ko tiakina koe ne Ieova? Kāti ne penā foki a lagonaga o te faisalamo i aso fakamuli o tena olaga, me ne fakamolemole atu a ia ki a Ieova: “Ke se tiakina au ne koe i a au ko toeaina; sa tiakigina au manafai au ko vāivāi. . . . Au nei ko matua, mo toku ulu foki ko sinā, sa tiakina mai au!” (Salamo 71:​9, 18) E tonu, e se mafai o tuku tiaki ne Ieova a te tino ne ‵fatu ne ia te salamo tenā, kae ka se tuku tiaki foki ne Ia a koe. I te suā salamo, ne fakaasi mai ne Tavita tena loto talitonu ki te fesoasoani o te Atua. (Faitau te Salamo 68:19.) Kafai koe se Kelisiano matua kae fakamaoni, e mafai eiloa o talitonu koe me e ‵kau fakatasi atu eiloa a Ieova ki a koe kae ka tumau a ia i te fesoasoani atu i aso takitasi.

15. Ne a mea e mafai o fesoasoani atu ki tino ma‵tua ke tumau olotou kilokiloga ‵lei?

¹⁵ E se mafai o galo i te mafaufau o te Atua a mea katoa a koutou, Molimau a Ieova ma‵tua, ne fai kae koi fai eiloa nei mō tena vikiga. E fai mai te Tusi Tapu: “Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia.” (Epelu 6:​10) Tela la, ‵kalo keatea mai te atiakaga o mafaufauga sē ‵lei, e pelā mo te mafaufauga ‵se me kafai ko matua koe, ko se toe aogā eiloa koe mō Ieova. Taumafai o sui a mafaufauga sē aogā ki mafaufauga aogā. Ke fiafia ki fakamanuiaga ko maua ne koe mo te fakamoemoega mō aso mai mua! E maua ne tatou se ‘fuafuaga mo se fakamoemoega’​​—ko toe mea ‵lei eiloa​​—kae e fakamautinoa mai eiloa ne te ‵tou Mafuaga a mea konei. (Ielemia 29:​11, 12; Galuega 17:31; 1 Timoteo 6:​19) Ke mafaufau faeloa ki tou fakamoemoega, fakamalosi tou loto mo tou mafaufau, kae ke mo a eiloa ma manatu māmā koe ki te tāua o tou aofia i loto i te fakapotopotoga!e

16. Kaia ne mafaufau ei se taina matua me ko se ‵tau o tavini atu a ia pelā me se toeaina, kae ne fakamalosi atu pefea te potukau o toeaina ki a ia?

¹⁶ Ke mafaufau ki a Johan, telā ko 80 ana tausaga kae e ‵tau o tausi faka‵lei ki tena avaga fakamaoni, telā ko masaki malosi nei, ko Sannie.f Ne fakasolosolo a tuagane i te fakapotopotoga o tausi a Sannie ko te mea ke mafai o kau a Johan ki fakatasiga mo te galuega talai. Fakamuli fua nei, ne loto vāivāi malosi a Johan kae kamata o mafaufau me ko se ‵tau o toe fai a ia pelā me se toeaina i te fakapotopotoga. Ne fesili atu tou tagata mo loimata i ana mata: “Se a te aogā o toku fai pelā me se toeaina? Ko se toe ai se mea e mafai o fai ne au i te fakapotopotoga.” Ne fakamautinoa atu ana taina toeaina ki a ia me e tāua ‵ki tena atamai mo ana faka‵tauga ‵lei. Ne fakamalosi atu latou ke tumau a ia pelā me se toeaina faitalia me foliki fua tena tusaga e mafai o fai. Ne fakamalosi atu a mea konā ki a Johan, ke tumau ei a ia i te tavini atu e pelā me se toeaina, kae e maua i ei ne te fakapotopotoga a fakamanuiaga.

E Atafai Tonu Mai Eiloa a Ieova

17. Se a te fakamalosiga e tuku mai i te Tusi Tapu mō Kelisiano ma‵tua?

¹⁷ E fakamaina faka‵lei mai i te Tusi Tapu me e mafai o fua malosi mai a tino ma‵tua i te feitu faka-te-agaga faitalia a fakalavelave o te olaga matua. Ne folafola mai te faisalamo, penei: “A latou pelā me ne lakau ne ‵toki i te fale o te Aliki, . . . e tiga eiloa te leva o te olaga o latou, kae fua mai faeloa. E lau usiusi kae malosi i taimi katoa.” (Salamo 92:​13, 14) A te apositolo ko Paulo, telā kāti ne fepaki mo se logo‵maega i te feitu faka-te-foitino ne ‘seki loto vāivāi e tiga eiloa te gasolosolo malie o vāivāi tena foitino.’​​—Faitau te 2 Kolinito 4:​16-​18.

18. Kaia e ‵tau ei o maua ne tino tali‵tonu ma‵tua mo olotou tausi a te fesoasoani mai nisi tino?

¹⁸ E fakamaoni mai i tala e uke i aso nei me e mafai eiloa o tumau a tino ma‵tua i te “fua mai faeloa.” Kae ko mea faiga‵ta e pelā mo masaki mo te tulaga matua e mafai eiloa o fakavāivāi atu, ke oko foki eiloa ki a latou kolā e isi ne tino i olotou kāiga e a‵lofa o tausi atu ki a latou. E mafai foki eiloa o fi‵ta malosi a tino tausi. E maua eiloa ne te fakapotopotoga a te tauliaga mo te tiute ke fakaasi atu te lotou a‵lofa mō tino ma‵tua konei mo tino kolā e tausi ki a latou. (Kalatia 6:​10) A te vaegā fesoasoani tenā e fakaasi atu ei me e se fai atu fua tatou ki vaegā tino penā ‘ke maua ne gatu e pei ei koutou, kae ke ‵kai ma‵kona foki koutou’ e aunoa mo te tukuatuga o fesoasoani aogā ki a latou.​​—Iakopo 2:​15-​17.

19. Kaia e mafai ei o ‵kilo atu a Kelisiano ma‵tua kae fakamaoni ki aso mai mua mo te loto tali‵tonu?

¹⁹ E mafai eiloa o ‵fuli ne te olaga matua a galuega e mafai o fai ne se Kelisiano, kae e se mafai o ‵fuli ei a te lasi o te alofa o Ieova mō ana tavini fakamaoni kolā ko ma‵tua. E ‵kese mai i ei, e tāua ‵ki eiloa a Kelisiano fakamaoni taki tokotasi konei i tena kilokiloga, kae ka se tuku tiaki eiloa ne ia latou. (Salamo 37:28; Isaia 46:4) Ka tausi kae takitaki ne Ieova latou i te taimi ko ma‵tua ei.​​—Salamo 48:14.

[Fakamatalaga mai lalo]

Ka Tali Mai Pefea ne Koe?

• Kaia e fakatāua ei ne koe a Kelisiano ma‵tua?

• E mafai pefea o fakaasi atu ne tatou a te alofa ki tino tali‵tonu ma‵tua?

• Ne a mea e mafai o fesoasoani atu ki tavini ma‵tua a Ieova ke maua ne latou se kilokiloga ‵lei?

[Fakamatalaga o te Ata i te itulau e 22]

E fakatāua malosi ne tino i te fakapotopotoga a tino ma‵tua