Valoaga mō ‵Tou Aso Mai Mua

I ANA pati e uiga ki mea ka ‵tupu i aso mai mua ki tino mo te lalolagi, ne tusi mai te apositolo ko Petelu: “Ka ko te Atua, ko oti ne folafola mai ne ia te lagi fou mo te lalolagi fou, e nofo i ei a te amiotonu, kae tenei eiloa e fakatalitali tatou ki ei.” (2 Petelu 3:13) A te folafolaga e uiga ki te “lalolagi fou mo te lagi fou” ne tuku mai muamua e auala i te pelofeta ko Isaia. (Isaia 65:17; 66:22) I te fakasino atu ki te valoaga tenei, ne fakaasi mai ne Petelu me ne seki fakataunu katoatoa te folafolaga tenei i ana aso.

Mai tua ifo, kāti i te 96 T.A., e auala i te Fakaasiga telā ne tuku atu ki te apositolo ko Ioane ne soko tasi i ei a te “lalolagi fou” tenā mo fakamanuiaga kolā ka maua mai lalo i te Malo o te Atua. (Fakaasiga 21:1-4) Ko fakataunu mai eiloa nei a pati a Iesu e pelā foki mo te apositolo ko Paulo e uiga ki te tulaga o te lalolagi mai mua faeloa o oko mai te Malo o te Atua. Tela la, e mafai o fakamoe‵moe tatou me ko pili o fakafou ne te Malo tenā a te lalolagi. Se a te vaegā olaga ka maua i te lalolagi fou? E fakaasi mai i te tusi ko Isaia a mea konā.

Fakamanuiaga i te Lalolagi Fou

Te Filemu i te Lalolagi mo te ‵Kaufakatasi i te Tapuakiga. “Ka tuki ne latou olotou pelu ke fai mo mea fakamalū laukele ka ko olotou tao ke fai mo naifi ‵vele vao. Ka se toe taua eiloa a malo, se toe fakatoka eiloa mō se taua.”—Isaia 2:2-4.

Ka Fealofani a Tino mo Manu. “A kuli vao mo mamoe ka ‵nofo tasi mo te filemu, pelā foki a lepoti ka takatokato fakatasi mo tamā kouti. A tamā pulumakau mo tamā leona ka ‵kai fakatasi, kae ka tausi latou ne tama‵liki fo‵liki. A pulumakau mo ulosa ka ‵kai fakatasi, penā foki a tamā pulumakau mo tamā ulosa, ka takatokato fakatasi mo te filemu. A leona ka ‵kai ki mouku pelā mo pulumakau. . . . Ka seai eiloa se mea fakamataku kae masei i luga i Siona, te mauga tapu o te Aliki. A te laukele ka ‵fonu i te malamalama i uiga o te Aliki, e pelā mo te tai telā e ‵fonu i te suatai.”—Isaia 11:6-9.

Ka Lava Kae ‵Toe a Meakai mō Tino Katoa. “Ka fakatoka ne te Aliki Malosi se ‵kaiga i konei, i luga i te Mauga o Siona, mo malo katoa o te lalolagi—se ‵kaiga o mea‵kai tafasili i te ‵gali mo uaina tafasili foki i te ‵gali.”—Isaia 25:6.

Ka se Toe ai se Mate. “A te Aliki Sili ka fakagata ne ia te mate ke se toe ai eiloa! Ka ‵solo ne ia a loimata mai i mata o tino katoa, kae ave keatea te masiasi telā ne fakapuapuagā ei ona tino i te lalolagi kātoa. Ko te Aliki eiloa tenā ne faipati!”—Isaia 25:8.

Ka Toe‵tu a Tino ‵Mate. “A tino o te ‵tou fenua kolā ne ‵mate, ka toe ola mai! A olotou foitino ka toe ola mai. A tino katoa kolā e moe i olotou tānuga ka ala aka ki luga kae usu pese mo te fia‵fia. . . . A tino kolā ko leva ne ‵mate, . . . ka toe fakaola ne te Aliki.”—Isaia 26:19.

Te Mesia se Famasino Amiotonu. “E se fakamasino ne ia a tino i olotou foliga io me ko muna faipati a latou; ka fakamasino ne ia a tino ma‵tiva mo te tonu katoatoa, kae puipui foki ne ia te saolotoga o tino fakaa‵lofa.”—Isaia 11:3, 4.

Ka ‵Lei a Tino ‵Kivi mo Tino ‵Tuli. “A tino ‵kivi ka lavea ne latou a mea, mo tino taliga‵tuli ka lagona ne latou a mea.”—Isaia 35:5.

Ka ‵Fua Mai a Lakau i Toafa. “A te toafa ka ‵lifu, mo pulalakau ka ma‵tala i te vao. A te toafa ka usu pese kae ka‵laga mo te fia‵fia.”—Isaia 35:1, 2.

Se Lalolagi Fou. “Ko toe faite nei ne au se lalolagi fou [se potukau fou o tino amio ‵tonu] mo ne lagi ‵fou [se pulega faka-te-lagi fou]. A mea ne ‵tupu i aso ko ‵teka ka se toe manatua eiloa. Ke ‵lifu kae fia‵fia koutou ki te se gata mai i mea ne faite ne au. . . . A tino [kolā ka ‵nofo atu i te lalolagi fou a te Atua] ka faite olotou fale ko ‵nofo ei i ei—ka se toe fakaaogā eiloa ne nisi tino fakaa‵tea. Ka ‵toki olotou togāvine kae inu fia‵fia i te uaina mai i olotou togāvine konā, kae se toe inu ne nisi tino fakaa‵tea. A oku tino ka ola leva e pelā me ne lakau. Ka fakaaogā faka‵lei eiloa ne latou mo te fia‵fia a fua o olotou galuega. A te galuega e fai ne latou ka iku manuia, ka ko olotou tama‵liki ka se toe fetaui mo ne puapuagā. Ka fakamanuia ne au a latou pelā foki a tino e ‵tupu mai i a latou, i taimi katoa konei mai i mua. Koi tuai o oti a talosaga a latou ki a au, ka ko leva ne tali atu au ki a latou.” “Muna a [Ieova], ‘E pelā eiloa mo te lagi fou mo te lalolagi fou e fakatumau ne au ki toku ‵mana, e penā foki te otou gafa mo te otou igoa ka fakatumau ne au.’”—Isaia 65:17-25; 66:22.

Valoaga e Uiga ki Mea ‵Gali i Aso Mai Mua

E se maua fua i te tusi ko Isaia a valoaga e uiga ki fakamanuiaga ka maua i aso mai mua. E ‵fonu te Tusi Tapu i valoaga kolā e fakamatala mai i ei a mea fakaofoofogia kolā ka fakataunu ne te Atua e auala i tena Malo mai lalo i a Keliso.a E mata, e fia ola koe i se vaegā palataiso penā? E mafai eiloa o ola koe i ei! Ke sukesuke aka ne koe me ne a mea e akoako ‵tonu mai ne te Tusi Tapu e uiga ki fuafuaga ‵lei a te Atua mō aso mai mua, kae ke tauloto koe ki te auala e mafai o aofia koe i ei. Ka fia‵fia eiloa a Molimau a Ieova o fesoasoani atu ki a koe.

[Fakamatalaga mai lalo]

[Fakamatalaga o te Ata i te itulau e 8]

Ka fealofani a tino i te lalolagi e pelā foki mo manu

[Fakamatalaga o te Ata i te itulau e 9]

Ka toe ola mai a tino ‵mate

[Fakamatalaga o te Ata i te itulau e 10]

Ka fai te lalolagi kātoa mo fai se palataiso