Te Lalolagi Fou ​—⁠Ka Nofo Atu Koe i ei?

“Ko iloa aka nei ne au me i te mea sili e tau o fai ne tatou ko te fakafia‵fia i te olaga tenei koi ola tatou i ei. E tau mo tatou katoa o kai kae inu kae fakafiafia ki mea ne maua ne tatou mai o‵tou galuega. Ko te meaalofa a te Atua tena.”​—⁠FAILAUGA 3:​12, 13.

1. Kaia e mafai ei ne tatou o fia‵fia ki mea kolā ka ‵tupu i aso mai mua?

E MA‵NATU aka a tino e tokouke me e se alofa kae fakasauā mai te Atua Malosi Katoatoa. Kae ko te tusi siki mai luga nei ko te munatonu mai i tena Muna fakaosofia. E fetaui te manatu tenā mo te manatu me i a ia ko “te Atua fiafia,” kae ne tuku atu ne ia ‵tou mātua muamua ki te palataiso i te lalolagi nei. (1 Timoteo 1:​11, NW; Kenese 2:​7-9) Kafai e ‵sala aka ne tatou se mainaga e uiga ki fakanofonofoga kolā ne folafola mai ne te Atua me ka maua ne ana tino, e se ‵tau o ofo tatou ke iloa atu me ka maua ne tatou a fiafiaga tumau i fakanofonofoga konā.

2. Ne a nisi mea e fakamoemoe koe ki ei?

² I te suā mataupu, ne onoono tatou ki tusi siki e tolu mai i tusi siki e fa kolā e ‵valo mai ei ne te Tusi Tapu a “te lagi fou mo te lalolagi fou.” (Isaia 65:17) E tasi te valoaga tonu tenā ne tusi ki lalo i te Fakaasiga 21:⁠1. A fuaiupu kolā e ‵soko atu ki ei e fakamatala mai ei te taimi telā ka ‵fuli malosi ei ne te Atua Malosi Katoatoa a fakanofonofoga i te lalolagi nei ke ‵lei atu. Ka ‵solo keatea ne ia a loimata o te fanoanoa. Ka se toe mate se tino i te olaga matua, ka se toe ai se masaki, io me ne fakamaseiga fakafuasei. Ka galo atu te fanoanoa, te tagi, mo te logo‵mae. Ko tafaga la te gali o te fakamoemoega tenā! E mata, e mafai o tali‵tonu eiloa tatou me ka oko mai te taimi tenā? Kae ne a mea e ‵tupu ki a tatou i te taimi nei ona ko te fakamoemoega tenā?

Pogai ke Tali‵tonu ki ei

3. Kaia e mafai ei ne tatou o fakatuaga ki folafolaga a te Tusi Tapu e uiga ki aso mai mua?

³ Onoono ki nisi pati i te Fakaasiga 21:⁠5. E siki mai i ei a pati a te Atua tela e sagasaga i tena nofogaaliki faka-te-lagi, ana muna: ““Nei, ko fakafou ne au a mea katoa!” E ‵lei atu te folafolaga tenā a te Atua i lō so se faka‵pulaga e uiga ki te ‵tutokotasi o se fenua, so se fakavae mō te saolotoga, io me ko so se fakamoemoega o tino ki aso mai mua nei. E tonu ‵kisi eiloa te folafolaga tenā mai i te Tino telā e fai mai te Tusi Tapu me “e se mafai o loi.” (Tito 1:⁠2) Ia, kāti e manatu aka koe me e lava loa ke mafau‵fau fua tatou ki te fakamoemoega gali tenā kae ke fakatuaga ki te Atua. Kae e isi aka foki a nisi mea e mafai ne tatou o fai. E uke atu a nisi mea e mafai o tau‵loto tatou ki ei e uiga ki aso mai mua nei.

4, 5. Ne a valoaga i te Tusi Tapu ko oti ne mafau‵fau tatou ki ei kae e mafai o fakamalosi aka i ei te ‵tou loto fiafia e uiga ki mea kolā ka ‵tupu?

⁴ Ke toe mafaufau ki mea kolā ne fakamaoni aka ne te suā mataupu e uiga ki folafolaga a te Tusi Tapu e uiga ki te lagi fou mo te lalolagi fou. Ne ‵valo mai ne Isaia se vaegā fakanofonofoga fou penā, kae ne fakataunu mai tena valoaga i te ‵fokiatuga o te kau Iutaia ki te lotou fenua kae ne toe fakatu aka ne latou te tapuakiga tonu i konā. (Esela 1:​1-3; 2:​1, 2; 3:​12, 13) E mata, konā fua a mea kolā ne fakasino atu ki ei te valoaga a Isaia? Ikai! E ‵tau o fakataunu mai a mea kolā ne ‵valo mai ne ia i se auala e sili atu i se taimi leva mai tua ifo o ana aso. Kaia e iloa ei ne tatou te mea tenā? Ona ko mea kolā e fai‵tau tatou ki ei i te 2 Petelu 3:13 mo te Fakaasiga 21:​1-5. E fakasino atu a fuaiupu konā ki te lagi fou mo te lalolagi fou kolā ka aogā ki Kelisiano i te lalolagi kātoa.

⁵ E pelā mo mea kolā ko oti ne fakaasi atu, e fakaaogā fakafa ne te Tusi Tapu a te tugāpati ko te “lagi fou mo te lalolagi fou.” Ko oti ne onoono tatou ki fuaiupu e tolu kae ne maua ne tatou i ei a nisi tala fakamalosi loto. E ‵valo manino mai ne te Tusi Tapu me ka ‵ta fakapalele ne te Atua a amioga ma‵sei mo nisi pogai aka o logo‵maega, kae i konā loa, ka toe fakamanuia atu a ia ki tino i te fakanofonofoga fou telā ne folafola mai ne ia.

6. Ne a mea e ‵valo mai ne te fa o valoaga e uiga ki “te lagi fou mo te lalolagi fou”?

⁶ Ke na onoono nei tatou ki te ‵toe fuaiupu telā e maua i ei te tugāpati ko “te lagi fou mo te lalolagi fou,” i te Isaia 66:​22-24: “ ‘Muna a te Aliki, ‘E pela eiloa mo te lagi fou mo te lalolagi fou e fakatumau ne au ki toku mana, e pena foki te otou gafa mo te otou igoa ka fakatumau ne au. I Kaiga Fiafia katoa o te Masina Tu, pela foki i Sapati katoa, a tino o malo katoa ka o‵mai o tapuaki mai ki a au i Ielusalema. Kafai ko olo latou, kae ka lavea ne latou a foitino mate o tino kola e teke mai ki a au. A ilo kola e olo o kai olotou foitino ka se mafai o mate, pena foki a te afi tela e sunu ei latou ka se mafai o mate. Ka takalialia a tino katoa i a latou.’ ”

7. Kaia e ‵tau ei mo tatou o fakaiku aka me e isi se fakataunuga o te Isaia 66:​22-24 i aso mai mua nei?

⁷ Ne fai se fakataunuga o te valoaga tenā ki tino Iutaia kolā ne toe ‵nofo atu i te lotou fenua, kae e isi aka foki se isi fakataunuga. Ne ‵tau o fai te mea tenā i te fia o tausaga mai tua ifo o te taimi telā ne tusi ei te lua o tusi a Petelu mo te tusi ko Fakaasiga, me ne fakasino atu te avā tusi konā ki “te lagi fou mo te lalolagi fou.” E mafai ne tatou o fakamoemoe ke fai te fakataunuga sili kae katoatoa tenā i te fakanofonofoga fou. Ke na mafaufau malie aka ki nisi fakanofonofoga kolā ka maua ne tatou i ei.

8, 9. (a) E “fakatumau” pefea a tino o te Atua? (e) Se a te uiga tāua o te valoaga me ka tapuaki atu a tavini a Ieova “i Kaiga Fiafia katoa o te Masina Tu, pela foki i Sapati katoa”?

⁸ Ne fai mai te Fakaasiga 21:4 me ka se toe ai se mate. E fetaui tonu te fakamatalaga i te Isaia mataupu e 66 mo te mea tenā. E matea atu ne tatou mai i te fuaiupu e 22 me e iloa ne Ieova me i te lagi fou mo te lalolagi fou e tumau loa, e seai sena gatamaiga. E se gata i ei, ka tumau foki ana tino; kae ka “fakatumau” ne ia latou i ana mua. A mea kolā ko oti ne fai ne te Atua mō ana tino filifilia e tuku mai i ei se pogai ke malosi te ‵tou loto tali‵tonu. E fe‵paki sāle a Kelisiano ‵tonu mo fakasauāga matagā, mo taumafaiga malosi ke ‵ta fakapalele ei latou. (Ioane 16:2; Galuega 8:⁠1) Kae ke oko eiloa ki fili ma‵losi o tino o te Atua, e pelā mo te tupu Loma ko Nelo mo Hitila, ne seki mafai eiloa ne latou o ‵ta fakapalele a tino fakamaoni o te Atua, kolā e tauave ne latou tena igoa. Ne fakatumau ne Ieova a tena fakapotopotoga o tino, kae e mafai eiloa o tali‵tonu tatou me ka fakatumau foki ne ia te fakapotopotoga tenā ke oko ki te se-gata-mai.

⁹ E penā foki loa, ka tumau eiloa a tino fakamaoni ki te Atua e pelā me ne vaega o te lalolagi fou, ko te fakapotopotoga o tino tapuaki ‵tonu i te lalolagi fou, me e avatu eiloa ne latou te tapuakiga tonu ki te Atua telā ne māfua mai i a ia a mea katoa. Ka se fai valevale io me e sōnafai fua te tapuakiga tenā. Ne fakatonu atu te Tulafono a te Atua, telā ne avatu ne Mose ki te kau Isalaelu, ke fai a nisi vaega o te tapuakiga i masina takitasi, telā ne fakamailoga ki te masina tu, penā foki loa mo nisi mea i vaiaso katoa, telā ne fai i Sapati takitasi. (Levitiko 24:​5-9; Numela 10:10; 28:​9, 10; 2 Nofoaiga Tupu 2:⁠4) Tela la, e fakasino atu te Isaia 66:23 ki te tapuakiga ki te Atua telā e fai faeloa, i vaiaso katoa mo masina katoa. Ka se toe ai ne tino e se tali‵tonu ki te Atua io me ne tino ‵lotu fakaloiloi. “Ka o‵mai o tapuaki mai ki a” Ieova a tino katoa.

10. Kaia e mafai ei ne koe o talitonu me ka se fakamakosu faeloa ne tino amio ma‵sei te lalolagi fou?

¹⁰ E fakatalitonu mai te Isaia 66:24 me ka se toe fakamakosu te filemu mo te amiotonu i te lalolagi fou. Ka se fakamakosu ne tino ma‵sei. Masaua, me ne fai mai te 2 Petelu 3:7 me ka oko mai “te aso e fakamasino kae fakamasei ei a tino amio masei.” E se amio Atua a tino kolā ka fakapalele atu i ei. Ka se toe pa‵kia a tino amio ‵lei, e se pelā mo mea kolā e ‵tupu sāle i taua a tino, ko taua kolā e sili atu te tokouke o tino o te fenua e ‵mate i ei i lō sotia. E fakatalitonu mai te Famasino Sili me i tena aso ka fakaseai atu ei a tino amio ma‵sei.

11. Se a te mea telā e fakaasi mai ne Isaia me ka tupu ki so se tino telā e ‵teke atu ki te Atua mo tena tapuakiga?

¹¹ Ka matea atu ne tino amio‵tonu kolā ka ‵sao me e tonu ‵kisi te muna fakapelofeta a te Atua. E ‵valo mai i te fuaiupu e 24 me i “foitino mate o tino kola e teke” ki a Ieova ka fai mo fai ne fakamaoniga o ana fakamasinoga. Kāti e ‵poi a nisi tino i pati ‵toko kolā ne fakaaogā ne Isaia i ei. Kae e fetaui ‵lei a pati konā mo mea kolā ne ‵tupu i aso mua. Ne fakaputu sāle aka a kaiga i tua o ‵pui o Ielusalema, kae i nisi taimi ne ‵pei atu foki a foitino ‵mate o tino solitulafono kolā ne fakaiku aka me e se ‵tau o tanu faka‵lei.a Se mea vave o fakapalele atu a kaiga mo foitino ‵mate konā ne lafu ilo mo te afi i konā. E fakaasi mai eiloa ne te ata telā ne fakamatala mai ne Isaia me e mautakitaki eiloa te fakamasinoga ki tino amio ma‵sei.

Mea Kolā ne Folafola Mai ne Ia

12. Ne a nisi mea e fakaasi mai ne Isaia e uiga ki te olaga i te lalolagi fou?

¹² Ne fakamatala mai ne te Fakaasiga 21:4 a nisi mea kolā ka se maua i te fakanofonofoga fou telā ka oko mai. Kae ne a mea ka maua atu i aso konā? Ka fai pefea te olaga i konā? E mata, e mafai o maua ne tatou a nisi fesoasoani ‵tonu e uiga ki ei? Ao. E fakamatala fakavaloaga mai ne te Isaia mataupu e 65 a fakanofonofoga kolā ka maua ne tatou māfai e talia ne Ieova ke ola tatou i te taimi e faite ei ne ia i se auala katoatoa a te lagi fou mo te lalolagi fou. A latou kolā e manuia ka maua ne latou se koga tumau i te lalolagi fou kae ka se gasolo atu o ma‵tua kae ‵mate i ei. E fakatalitonu mai penei te Isaia 65:20: “A tamaliki ka se toe mate foliki, a tino katoa ka ola eiloa ki te gataga o te olaga o te tagata. A latou kola ko oko ki te taki selau e fai pela me koi fo‵liki fua. A tino e mate kae seki oko ki te taki selau e fakaasi ei i a latou e fakasala ne au.”

13. E fakatalitonu mai pefea ne te Isaia 65:20 e uiga ki te tokagamalie telā ka maua ne tino o te Atua?

¹³ I te fakataunuga muamua o te mea tenei i tino o Isaia, ne fakauiga i ei me e seai se mea masei ka oko atu ki pepe i te fenua tenā. Ka se o‵mai te kau fili, e pelā mo te mea telā ne fai ne te kau Papelonia, o ave keatea a pepe, io me tamate a tamataene ma‵losi. (2 Nofoaiga Tupu 36:​17, 20) I te lalolagi fou telā ka oko mai, ka tokagamalie kae saogalemu a tino kae ka fia‵fia foki latou ki te ola. Kafai e fakaiku aka se tino ke ‵teke atu a ia ki te Atua, ka se talia ke tumau a ia i te ola. Ka ave keatea ne te Atua a ia. E a māfai ko selau a tausaga o te tino agasala telā e ‵teke atu? Ka mate a ia “koi foliki” māfai e fakatusa ki te ola telā e seai sena gatamaiga.​—⁠1 Timoteo 1:​19, 20; 2 Timoteo 2:​16-19.

14, 15. Ona ko mea kolā e fakaasi mai i te Isaia 65:​21, 22, ne a faifaiga ‵gali e fakamoemoe koe ke fai?

¹⁴ E se uke a fakamatalaga a Isaia e uiga ki te auala e ave keatea ei te tino telā e agasala mo te matafatu. Kae e fakamatala mai eiloa ne ia a fakanofonofoga kolā ka maua i te olaga i te lalolagi fou. Taumafai ke fakaataata i tou mafaufau me i a koe e nofo atu i konā. Kāti ka mafaufau muamua koe ki mea i ou tafa. Tenā loa te mea ne faipati Isaia ki ei i te fuaiupu e 21 mo te 22: “A tino ka faite olotou fale ko nofo ei i ei​—⁠ka se toe fakaaoga eiloa ne nisi tino fakaatea. Ka toki olotou togāvine kae inu fiafia i te uaina mai i olotou togāvine kona, kae se toe inu ne nisi tino fakaatea. A oku tino ka ola leva e pela me ne lakau. Ka fakaaoga faka‵lei eiloa ne latou mo te fiafia a fua o olotou galuega.”

¹⁵ Kafai e se iloa ne koe o fakatu se fale, io me ke fai se fātoaga, e fakauiga eiloa te valoaga a Isaia me kāti ka fakaakoga koe ki vaegā mea penā. E mata, e loto malie koe ke tauloto ki vaegā mea penā māfai e fesoasoani atu a faiakoga apo ki a koe, kāti ko ou tuakoi a‵lofa kolā ka fesoasoani atu ki a koe? Ne seki fai mai a Isaia me ka fakaaogā a pola kae e se ko fāmalama kilasi i tou fale ko te mea ke maua ne koe te savili gali io me ka fakaaogā ne koe a fāmalama kilasi ona ko tau kolā ka fulifuli faeloa. E mata, ka fakatu ne koe se fale telā e se pāpā te tuāfale ko te mea ke fakasali keatea te vaiua mo te kiona? Io me ka foliga pāpā te tuāfale ona ko te tau​—⁠e pelā mo fale i fenua o te Tusi Tapu​—⁠kae ka maopoopo fakatasi koutou mo tou kāiga i ei ke ‵kai ki meakai ‵gali kae ke fai foki a sautalaga ‵gali?​—⁠Teutelonome 22:8; Neemia 8:⁠16.

16. Kaia e mafai ei ne koe o fakamoemoe me ka loto malie faeloa koe i te lalolagi fou?

¹⁶ E se tāua malosi ke iloa a fakamatalaga likiliki konā, kae e sili atu i te tāua ke iloa ne koe me ka maua ne koe tou fale. Ko tou fale mō koe eiloa​—⁠e se pelā mo aso nei, kāti ko fi‵ta valevale koe i te fakatuga o se fale kae e maua fua ne te suā tino a mea aogā i ei. E fai mai foki te Isaia 65:21 me ka ‵toki ne koe a lakau kae ka kai foki koe ki fuataga kolā e maua mai i ei. E manino eiloa, me e fakamatala fakatoetoe mai i konā a tulaga kolā ka maua sāle i konā. Ka fiafia malosi koe ki au taumafaiga, ki fua kolā e maua mai i au galuega. Ka fai ne koe a mea konā i se olaga leva ‵ki​—⁠“e pela me ne lakau.” E tonu ‵ki, me ‘ka fakafou a mea katoa’ i ei!​—⁠Salamo 92:​12-14.

17. Se a te folafolaga telā e fakamalosi atu ki mātua?

¹⁷ Kafai koe se mātua, ka otia tou loto i pati konei: “A te galuega e fai ne latou ka iku manuia, ka ko olotou tamaliki ka se toe fetaui mo ne puapuaga. Ka fakamanuia ne au a latou pela foki a tino e tupu mai i a latou, i taimi katoa konei mai i mua. Koi tuai o oti a talosaga a latou ki a au, ka ko leva ne tali atu au ki a latou.” (Isaia 65:​23, 24) E a ko oti ne lagona ne koe a “puapuaga”? E se ‵tau o laulau mai ne tatou te fia o fakalavelave o tama‵liki kolā e mafai o puapuaga i ei a mātua mo nisi tino aka. Kae ko oti foki ne matea atu ne tatou a mātua kolā ko to ‵saga atu ki olotou galuega, olotou faifaiga, mo olotou fakafiafiaga kae ko se uke a taimi e ‵nofo fakatasi latou mo olotou tama‵liki. Kae e ‵kese a Ieova, me e fakatalitonu mai a ia me e lagona kae talia foki ne ia ‵tou manakoga, kae e iloa foki ne ia a mea konā a koi tuai o taku atu ne tatou.

18. Kaia e mafai ei ne koe o fakamoemoe ke fiafia ki manu i te lalolagi fou?

¹⁸ Kafai e mafaufau koe ki mea kolā ka fiafia koe ki ei i te lalolagi fou, ke na fakaataata i tou mafaufau te ata tenei e fakamatala mai ne te muna fakapelofeta a te Atua: “A kuli vao mo tama mamoe ka kai fakatasi; a leona ka kai ki kausaito e pela mo pulumakau, ka ko gata ka se toe fakama‵taku. Ka se toe ai se mea fakamataku io me masei i luga i Siona, toku mauga tapu.” (Isaia 65:25) Ko oti ne taumafai a tino ‵lomi ata ke ‵lomi ne latou te ata tenā, kae ko te mea tenei e se se tala fāgogo telā e fai valevale ne se tino. Ka tonu ‵ki te ata tenā. Ka ‵nofo filemu a tino kae ka filemu foki te va o tino mo manu. Ko oti ne fakamāumāu ne saienitisi mo tino kolā e fia‵fia ki manu a toe tausaga ‵lei i olotou olaga ke tauloto e uiga ki nāi vaegā manu, io me se manu e tasi fua. Kae e ‵kese mo te mea tenā, ke na mafaufau malie aka ki te fia o mea ka mafai ne koe o tauloto ki ei māfai e se toe sōna ma‵taku a manu ki tino. I konā loa, ka mafai ne koe o fakapilipili atu ki manu lele mo tamā manu fo‵liki i te togāvao​—⁠e tonu, ka kilokilo atu koe ki ei, ka tauloto koe ki nisi mea i ei, kae ka fiafia foki koe ki manu konā. (Iopu 12:​7-9) Ka se fakamataku ke fai penā, me e seai se mea fakamataku i ei mō tino io me ko manu. Muna a Ieova: “Ka se toe ai se mea fakamataku io me masei i luga i Siona, toku mauga tapu.” E ‵kese ‵ki a mea konā mai i mea kolā e matea ne tatou me e ‵tupu i aso nei!

19, 20. Kaia e ‵kese malosi ei a tino o te Atua mo te tokoukega o tino i aso nei?

¹⁹ E pelā mo te mea telā ko oti ne taku atu, e se mafai eiloa ne tino o ‵valo tonu mai a mea kolā ka ‵tupu, faitalia te manava‵se o tino e uiga ki te meleniuma fou. Ko ‵fiu, ‵segi kae fanoa‵noa i ei te tokoukega o tino. Ne tusi mai penei a Peter Emberley, te pule o te iuniveseti e tasi i Kanata: “Ko fe‵paki nei a tino [ma‵tua] e tokouke mo fesili tāua i te olaga nei. Ko oi au? Ne a mea e kausaki tonu au ki ei? Se a te fakamoemoega mō te suā kautama? Ko samanaki eiloa a tino kolā ko kamata o ma‵tua ke maua se tokagamalie mo mea aogā ‵tonu i olotou olaga.”

²⁰ Kāti e maina koe me kaia e fai ei penā a nisi tino e tokouke. Kāti e taumafai eiloa latou o sala aka se fiafiaga i te olaga nei i te faiga o mea kolā e fia‵fia malosi latou ki ei io me i te faiga o fakafiafiaga ‵gali. Kae e se iloa ne latou a mea kolā ka ‵tupu i aso mua, telā e se se mea tāua, sē tokagamalie io me se se fakamoemoega mautinoa i te olaga nei. Kae ke fakatusa aka te tulaga tenā mo ‵tou fakamoemoega i te olaga nei, e tusa loa mo mea kolā ko oti ne fai‵pati tatou ki ei. E iloa ne koe me i te lagi fou mo te lalolagi fou kolā ne folafola mai ne Ieova, ka mafai eiloa ne tatou o ‵kilo atu ki mea i ‵tou tafa kae fai atu tatou mo ‵tou loto kātoa, ‘E tonu, ko oti ne fakafou aka ne te Atua a mea katoa!’ Ka pefea te ‵tou fiafia ki ei!

21. Se a te manatu i te Isaia 65:25 telā e ‵pau mo te Isaia 11:⁠9?

²¹ E se se manatu fakamaualuga ke fakaataata i tou mafaufau me i a koe e nofo atu i te lalolagi fou a te Atua. E ‵kami mai, kae fakamalosi mai foki ne ia tatou ke na tapuaki atu nei ki a ia i te munatonu kae ke fakatoka tatou ki te taimi ‘ka se toe ai ei se mea fakamataku io me se mea masei i luga i tena mauga tapu.’ (Isaia 65:25) E mata, e iloa ne koe, me ko oti foki ne fai ne Isaia se fakamatalaga e tai ‵pau, kae ne aofia i ei se mea telā e tāua ki te mauaga ne tatou o te ola i te lalolagi fou? E fai mai penei te Isaia 11:9: “Ka seai eiloa se mea fakamataku kae masei i luga i Siona, te mauga tapu o te Aliki. A te laukele ka fonu i te malamalama i uiga o te Aliki [ko Ieova], e pela mo te tai tela e fonu i te suatai.”

22. Ona ko te ‵tou sukesuke ki valoaga e fa i te Tusi Tapu, se a te mea e ‵tau o fakamalosi mai ki a tatou ke fai?

²² “Te malamalama i uiga o te Aliki [ko Ieova].” Kafai e fakafou ne te Atua a mea katoa, ka maua ne tino katoa i te lalolagi a te malamalama tonu e uiga ki a ia mo tena loto. Ka aofia i ei a mea kolā e sili atu i lō te tau‵loto ki manu kolā ne faite ne ia. E aofia i ei tena Muna fakaosofia. E pelā mo te uke o mea kolā ne maua ne tatou mai i te sukesuke ki valoaga e fa kolā e faipati ki “te lagi fou mo te lalolagi fou.” (Isaia 65:17; 66:22; 2 Petelu 3:13; Fakaasiga 21:⁠1) E isi ne pogai ‵lei ke faitau ei koe ki te Tusi Tapu i aso katoa. E a, e aofia te mea tenā i au faifaiga masani? Kafai e se penā, ne a ‵fuliga e mafai ne koe o fai ko te mea ke faitau koe ki nisi muna a te Atua i aso takitasi? Ka se maua fua ne koe i ei te fiafia ke fakamoemoe ki te olaga i te lalolagi fou, kae ka maua foki ne koe a fiafiaga i te taimi eiloa tenei, e pelā eiloa mo te fiafia o te faisalamo.​—⁠Salamo 1:​1, 2.

[Fakamatalaga fakaopoopo]

Ka Tali Mai Pefea ne Koe?

• Kaia e iloa ei ne tatou me e ‵valo mai ne te Isaia 66:​22-24 a mea kolā ka ‵tupu i aso mai mua nei?

• Ne a mea e fakamoemoe malosi koe ki ei kolā e aofia i te valoaga i te Isaia 66:​22-24 mo te Isaia 65:​20-25?

• Ne a pogai e maua ne koe ke talitonu ei ki mea ‵lei kolā ka ‵tupu i aso mai mua?

[Ata i te itulau e 15]

Ne ‵valo mai ne Isaia, Petelu, mo Ioane a nisi mea e uiga ki “te lagi fou mo te lalolagi fou”