Se Talitonuga Lauiloa

“Ne moemiti masei faeloa au me e ‵sunu atu au i seoli! Ne moemiti au me ko ‵pei atu au ki te afi kae ala aka au mo te pakalaga. Ona ko te mea tenā, ne taumafai malosi eiloa au ke se fai se agasala.”​​—Arline.

E TALITONU koe me i seoli se koga e fakapuapuagatia ei a tino agasala? Tenā loa te mea e tali‵tonu ki ei a tino e tokouke. E pelā mo te mea ne iloa aka i se savea ne fai ne se tino poto i te Iunivesiti o St. Andrews i Sikotilani, i te 2005, me e tasi-vae-tolu o faifeau Sikotilani e tali‵tonu me i tino kolā e ‵vae keatea mai te Atua ka fakalogo‵mae i te “feitu faka-te-mafaufau ki te se-gata-mai i seoli.” E tali‵tonu te tasi-vae-lima me i tino kolā e olo ki seoli ka logo‵mae i te feitu faka-te-foitino.

Ko salalau atu ki fenua e uke a te talitonuga e uiga ki seoli. E pelā mo te sukesukega ko te Gallup telā ne fai i te Iunaite Sitete i te 2007, ne iloa aka me i te 70 pasene o tino ne fakasautala aka e tali ‵tonu ki seoli. Ke oko foki eiloa ki fenua kolā e se ma‵losi i mea tau lotu, e tali‵tonu a tino i ei ki seoli. Ne maua aka i te sukesukega ko te Gallup telā ne fai i te 2004 i Kanata, me e ‵tusa mo te 42 pasene o tino e tali‵tonu ki seoli. Kae e 32 pasene o tino i Peletania e tali‵tonu me i seoli se koga tonu.

Akoakoga a Faifeau

E tokouke a faifeau ko oti ne fakagata aka ne latou te akoakoga me i seoli se koga tonu telā e fakapuapuagatia ei a tino ki te afi. Kae e fakamalosi aka ne latou se fakamatalaga tai ‵pau mo te mea telā e fakamatala mai i te Catechism of the Catholic Church, telā ne ‵lomi i te 1994. E fai mai te tusi tenā: “A te fakasalaga ‵mafa i seoli ko te ‵vae keatea mai te Atua ki te se-gata-mai.”

Kae e tiga i ei, koi tali‵tonu eiloa a tino e tokouke me i seoli se koga o logo‵maega i te feitu faka-te-mafaufau io me ko te feitu faka-te-foitino. E fai mai a tino kolā e akoako ne latou te talitonuga tenei me e fakavae te vaegā talitonuga tenā ki te Tusi Tapu. E fai mai a R. Albert Mohler, te pelesitene o te Southern Baptist Theological Seminary, penei: “Se manatu tonu eiloa mai te Tusi Tapu.”

Kaia e Tāua ei a te Mea e Talitonu Koe ki ei?

Kafai e tonu me i seoli se koga e fakapuapuaga ei a tino, e ‵tau eiloa o mataku koe ki ei. Kae kafai e se tonu te akoakoga tenei, e faka‵numi kae sona fakalogo‵mae fua ne takitaki lotu kolā e akoako ne latou te akoakoga tenei a mafaufau o tino kolā e tali‵tonu ki ei. E taku fakamasei foki ne latou i ei te Atua.

Se a te mea e akoako mai i te Tusi Tapu e uiga ki te mataupu tenei? Ka fakaaoga i mataupu kolā e ‵soko mai a Tusi Tapu i te ‵gana Tuvalu ke tali aka ei a fesili e tolu konei: (1) Ne a mea e ‵tupu ki se tino māfai ko mate? (2) Ne a mea ne akoako mai ne Iesu e uiga ki seoli? (3) E mafai pefea o pokotia koe i te munatonu ne tauloto ne koe e uiga ki seoli?