Te 2 o Tala ‵Kai: Ka Fakapuapuaga a Tino Amio Ma‵sei i Seoli
Ne māfua mai i fea a te tala ‵kai tenei? “Mai i tino ‵poto katoa i Eleni, a te tino telā ne lasi tena fakamalosiga ki talitonuga masani e uiga ki Seoli ko Palato.”—Histoire des enfers (Tala Fakasolopito e Uiga ki Seoli), telā ne tusi ne Georges Minois, i te itulau e 50.
“Mai i te kogāloto o te 2 senitenali T.A., ne kamata ei o tali‵tonu a Kelisiano kolā ne maua ne latou a nisi akoakoga i Eleni ki te tāua ke fakaasi atu te lotou fakatuanaki i se auala telā e tai ‵pau mo te kilokiloga a tino ‵poto konā . . . Ne talia malosi ne latou a akoakoga a Palato.”—The New Encyclopædia Britannica (1988), Volume 25, te itulau e 890.
“E fakamaoni atu i akoakoga a te Lotu a te fakapuapuagatia ki te se-gata-mai i seoli. I te taimi eiloa e ‵mate ei a agaga o tino amio ma‵sei, ka olo atu ki seoli, te koga telā ka logo‵mae ei latou i te fakasalaga ki ‘te afi se-gata-mai.’ A te fakasalaga ‵mafa eiloa i seoli ko te ‵vae keatea ki te se-gata-mai mai te Atua.”—Catechism of the Catholic Church, te lomiga i te 1994, te itulau e 270.
Ne a pati a te Tusi Tapu? “E iloa ne tino ola me i a latou ka ‵mate, kae seai se mea a tino ‵mate e iloa, . . . e seai se galuega io me se mafaufauga io me se iloa io me se poto i Seoli, te koga e olo ki ei koutou.”—Failauga 9:5, 10, Revised Standard Version.
A te pati Epelu ko Sheol, telā ne fakasino atu ki te “koga ‵nofo tumau o tino ‵mate,” ne ‵fuli ki “seoli” i nisi tusitusiga o te Tusi Tapu. Se a te mea e fakaasi mai ne te tusi siki tenei e uiga ki te tulaga o te tino mate? E mata, e fakapuapuaga latou i Seoli ko te mea ke fakamagalo ei olotou mea ‵se? Ikai, me e “seai se mea a tino ‵mate e iloa.” Tenā eiloa te pogai ne fakamolemole atu ei a te tagata mua ko Iopu i te taimi ne logo‵mae ei a ia i se masaki matagā ki te Atua: “Puipui mai ne koe a au i seoli [faka-Epelu, Sheol].” (Iopu 14:13; Douay-Rheims Version) Se a te uiga o tena fakamolemole māfai a Seoli se koga e fakapuapuaga ei a tino ki se-gata-mai? I te kilokiloga a te Tusi Tapu, a seoli ko te tanuga masani o tino katoa, te koga telā e fakagata i ei a fuafuaga katoa.
E mata, e se tenei te uiga o seoli telā e sili atu i te ‵tonu kae fetaui foki mo te Tusi Tapu? Kae se a te uiga masei kae fakatakalialia e mafai o fai i ei te Atua o te alofa ke fakapuapuaga ne ia se tino ki te se-gata-mai? (1 Ioane 4:8) Kafai a te afi i seoli se akoakoga ‵se, kae e a la te ola i te lagi?
Ke fakatusa ki fuaiupu konei i te Tusi Tapu: Salamo 146:3, 4; Galuega 2:25-27; Loma 6:7, 23
TE MANATU TONU:
E se fakasala ne te Atua a tino i seoli
[Te Fakamatalaga o Ata itulau e 5]
Barrators—Giampolo/The Doré Illustrations For Dante’s Divine Comedy/Dover Publications Inc.