Ne Pokotia Pefea Koe Ona ko te Munatonu e Uiga ki Seoli?

A TINO kolā e akoako ne latou me i seoli se koga e fakapuapuaga ei a tino e fakamalosi aka ne latou se kilokiloga matagā e uiga ki a Ieova te Atua mo ana uiga. E tonu, e fai mai te Tusi Tapu me i te Atua ka fakaseai ne ia tino amio ma‵sei. (2 Tesalonia 1:​6-9) Kae ko te kaitaua amiotonu e se ko te uiga fakavae o te Atua.

E se amio masei io me amio fakasaua te Atua. Ne fesili mai a ia: “I tau faka‵tau, au e fiafia o kilokilo ki se tino masei ke mate?” (Esekielu 18:23) Kafai e se fiafia te Atua ki te ‵mate o tino amio ma‵sei, e mafai pefea o fiafia a ia ke kilokilo atu faeloa ki tino konei e fakapuapuaga?

A te uiga fakavae o te Atua ko te alofa. (1 Ioane 4:8) E tonu, “e aga‵lei a [te Atua] ki tino katoa, e alofa a ia ki mea katoa a ia ne fai.” (Salamo 145:9) Tela la, e manako te Atua ke a‵lofa foki tatou ki a ia.​​—Mataio 22:​35-​38.

Te Mataku ki Seoli io me ko te Alofa ki te Atua​​—Se a te Mea e Fakamalosi Aka ei Koe?

A te akoakoga me i tino e logo‵mae i seoli e fakamalosi aka i ei te mataku valea ki te Atua. E ‵kese mai i ei, a te tino telā e tauloto ki te munatonu e uiga ki te Atua kae alofa ki a ia ka fakamalosi aka eiloa tena mataku ‵tau ki te Atua. E fai mai te Salamo 111:10: “A te auala e maua ei te poto, ko te mataku ki te Aliki; e fai ne ia a fakamasinoga ‵tonu ki tino katoa kolā e faka‵logo ki ana fakatonuga.” A te mataku tenei ki te Atua e se ko te mataku valea fua, kae ko te āva mo te fakaaloalo katoatoa ki te Mafuaga. E fakamalosi aka ei i a tatou se mataku ‵tau ke se fakafanoanoa eiloa ne tatou a ia.

Ke mafaufau ki auala ne pokotia ei a Kathleen, telā ko 32 ana tausaga kae ne fakaaoga muamua sāle ne ia a vailakau tapu, i te taimi ne iloa ei ne ia a te munatonu e uiga ki seoli. Ne fakavae eiloa tena olaga ki fakafiafiaga, faifaiga fakasaua, te takalialia ki a ia eiloa, mo faifaiga finalalolagi. Ne fai ‵tonu mai a ia: “Kafai ne kilo atu au ki taku tama fafine ko tasi tena tausaga e mafaufau sāle au penei, ‘Kilo mai ki aku mea e fai ki ei. Ka ‵sunu eiloa au i seoli ona ko te mea tenei.’” Ne taumafai Kathleen o fakagata aka te fakaaogaga o vailakau tapu, kae ne seki mafai ne ia. “Ne fia fai au pelā me se tino ‵lei,” ko ana pati, “kae ne fakafanoanoa faeloa a mea kolā e ‵tupu ki toku olaga e pelā foki mo te lalolagi. Ne foliga mai me seai se pogai e ‵tau ei o fai pelā me se tino ‵lei.”

Ne fetaui fakamuli a Kathleen mo Molimau a Ieova. “Ne iloa aka ne au me e seai se afi i seoli. Ne fetaui ‵lei eiloa a fakamaoniga kolā ne fakaasi mai i te Tusi Tapu,” ko pati a Kathleen. “A te iloa atu me ka se ‵sunu au i seoli se fakatapūga lasi ‵ki ki a au.” Kae ne iloa foki ne ia te folafolaga a te Atua me ka ola ki te se-gata-mai a tino i se lalolagi telā e seai ne amioga ma‵sei i ei. (Salamo 37:​10, 11, 29; Luka 23:43) “Ko maua eiloa ne au se fakamoemoega tonu​​—ke ola ki te se-gata-mai i te Palataiso!” ko ana pati.

E mata, ne mafai o taofi aka ne Kathleen te fakaaogaga o vailakau tapu e aunoa mo te mataku i a ia ma ‵sunu i te afi i seoli? Ne fai mai tou fafine: “Kafai ko umiti malosi au ki vailakau tapu, ne ‵talo atu au ki a Ieova te Atua o akai atu ki a ia mō se fesoasoani. Ne mafaufau au ki tena kilokiloga ki faifaiga lai‵lai penā, kae ne seki manako au o fakafanoanoa atu ki a ia. Ne tali mai eiloa a ia ki aku ‵talo.” (2 Kolinito 7:1) A te mataku ma fakafanoanoa atu ki te Atua ne fesoasoani ki a Kathleen ke saoloto mai i mea kolā ne umiti sāle a ia ki ei.

E tonu, a te atiakaga o te alofa ki te Atua mo te mataku ‵tau ki a ia​​—kae e se ko te mataku ma fakapuapuaga i seoli​—e mafai o fakamalosi aka ei tatou ke fai te loto o te Atua ko te mea ke maua te fiafia tumau. Ne tusi mai te faisalamo: “Amutia a latou kolā e faka‵logo [“ma‵taku,” NW] ki te Aliki, ko latou kolā e ola i ana fakatonuga.”​​—Salamo 128:1.

[Fakamatalaga o te Ata i te itulau e 9]

Ko Oi Ka Fakasaoloto Mai Seoli?

A ‵fuliga i nisi Tusi Tapu e faka‵numi fua i ei a tino mai te ‵fuliga ne latou o pati Eleni e lua kolā e ‵kese​​—ko te Geʹen·na mo Haiʹdes​—ki te pati fua e tasi ko “seoli.” E fakasino atu a te pati Geʹen·na i te Tusi Tapu ki te fakaseaiga katoatoa, e aunoa mo se fakamoemoega ke toe fakatu aka. E ‵kese mai i ei, a latou kolā i Haiʹdes, io me ko Heitisi, e isi se lotou fakamoemoega ke toe faka‵tu aka.

Tela la, mai tua o te mate mo te toetu o Iesu, ne fakatalitonu atu te apositolo ko Petelu ki ana tino fakalogo‵logo me i a Iesu “ne seki tuku tiakina . . . i Seoli.” (Galuega 2:​27, 31, 32; Salamo 16:10) A te pati telā ne ‵fuli ki “seoli” i te fuaiupu tenei ko te pati Haiʹdes i te ‵gana Eleni. Ne seki fanatu Iesu ki se koga e fakapuapuagatia ei ki te afi. A Heitisi io me ko “seoli,” ko te tānuga. Kae e se ko Iesu fua te tino ne fakasaoloto ne te Atua mai Heitisi.

E fai mai te Tusi Tapu e uiga ki te toetuga: “A te mate mo Seoli ne tuku ake foki ne laua a lā tino ‵mate.” (Fakaasiga 20:​13, 14) A te faka‵maga o “seoli” mai tino ‵mate e fakauiga loa ki te faka‵tuakaga ki te ola o tino katoa kolā e mafaufau te Atua me e ‵tau o faka‵tu aka. (Ioane 5:​28, 29; Galuega 24:15) Ma‵faga o fakamoemoega gali mō aso mai mua​​—ke lavea atu a te toe‵tuga o ‵tou tino pele mai te tānuga! Ka fai eiloa ne Ieova, te Atua alofa katoatoa, a te mea tenei.