Mea e Tauloto ne Tatou Mai i a Iesu
E Uiga ki te Fakamoemoega o Tino ‵Mate
E tokotolu a tino ne faka‵tu aka ne Iesu, telā e fakaasi mai i ei me e isi se fakamoemoega o tino ‵mate. (Luka 7:11-17; 8:49-56; Ioane 11:1-45) Ke malamalama i te fakamoemoega o tino ‵mate, e ‵tau o maina muamua tatou me ne oko mai pefea te mate.
Kaia e Ma‵saki Kae ‵Mate ei Tatou?
Kafai ne fakamagalo ne Iesu agasala a tino, ne faka‵lei foki olotou ma‵saki. E pelā mo te taimi ne avatu ei se tagata e masaki faka‵mate ki a Iesu, ne fai atu a ia: “‘Tefea te mea e faigofie, ko te fai atu pelā, ‘Ko magalo au agasala,’ io me ko te fai atu pelā, ‘Tu ki luga o sasale’? Kiloke, ka fakamaoni atu ne au ki a koutou, i te mea a te Tama a te Tagata e pule i te fakamagaloga o agasala i te lalolagi nei.’ Telā, fai atu ei a Iesu ki te tagata e masaki faka‵mate, ‘Tu ki luga, puke tou moega, kae fano ki tou fale!’” (Mataio 9:2-6) Tela la, ne oko mai a ma‵saki mo te mate ona ko te agasala. Ne mafua mai eiloa te tulaga agasala o tatou i te tagata muamua, ko Atamu.—Luka 3:38; Loma 5:12.
Kaia ne Mate ei Iesu?
Ne seki agasala eiloa Iesu. Tela la, ne seki ‵tau o mate a ia. Ona ko tena mate mō tatou, ne ‵togi ei ne Iesu a ‵tou agasala. Ne fai atu a ia me i tena toto ka fakamaligi mō te “tokoukega e fakamagalo ei agasala.”—Mataio 26:28.
Ne fai mai foki Iesu: “E pelā mo te Tama a te Tagata, e seki vau au ke tavini mai a tino ki a au, kae ke tavini atu au; ke tuku atu foki a toku ola [“e pelā me se togiola,” NW] mō tino e tokouke.” (Mataio 20:28) Ne taku ne Iesu ki te “togiola” a te togi telā ne fakasaoloto ei nisi tino mai te mate. Ne fai mai foki Iesu: “Au ne vau ko te mea ke maua ne latou te ola, kae ke maua malosi eiloa ne latou.” (Ioane 10:10) Ke malamalama katoatoa i te fakamoemoega o tino ‵mate, e ‵tau foki o iloa ne tatou te tulaga o latou i te vaitaimi nei.
Ne a Mea e ‵Tupu Māfai ko Mate se Tino?
I te taimi ne mate ei te taugasoa o Iesu ko Lasalo, ne fakamatala atu ne Iesu a mea e ‵tupu māfai ko mate se tino. Ne fai atu a ia ki ana soko: “‘A te taugasoa o tatou ko Lasalo e moe, kae ka fano au [ki Petania] o ‵fagu ake ke ala.’ . . . Kae ne taofi pelā ona soko, i te pati a Iesu e fakauiga fua ki te moe o Lasalo. Telā, faipati tonu atu ei a Iesu, ‘A Lasalo ko mate.’” Tela la, ne fakamaina atu ne Iesu me i tino ‵mate e ‵moe fua, e seai se lotou mea e iloa.—Ioane 11:1-14.
Ne fakatu aka ne Iesu tena taugasoa ko Lasalo mai tua o aso e fa ne mate ei. Kae e seai ne pati a Lasalo ne fai mai i te Tusi Tapu e uiga ki te taimi tenā. I te taimi ne mate ei a Lasalo, ne seai eiloa sena mea ne iloa.—Failauga 9:5, 10; Ioane 11:17-44.
Se a te Fakamoemoega o Tino ‵Mate?
Ka toe ola mai a tino ‵mate mo te fakamoemoega ke ola ki te se-gata-mai. Ne fai mai Iesu: “Ko oko mai eiloa te taimi e lagona ei a tena leo [o Iesu] ne latou katoa kolā e i loto i tānuga, kae ka ulu mai ei latou ki tua.”—Ioane 5:28, 29.
A te fakamoemoega tenei se fakaasiga o te alofa o te Atua. Ne fai mai Iesu: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.”—Ioane 3:16; Fakaasiga 21:4, 5.
Ke maua nisi fakamatalaga, ke onoono ki te mataupu e 6 o te tusi ko te Ne a Mea e Akoako ‵Tonu Mai i te Tusi Tapu?*
[Fakamatalaga o te Ata i te itulau e 11]
Ne ‵lomi ne Molimau a Ieova.