Auala e Mafai ei o Malamalama Koe i te Tusi Tapu—3. Ke Talia te Fesoasoani o Nisi Tino

I te taimi ne faimalaga atu ei a Edward John Eyre i se malaga loa i loto i te koga lavaki ko Nullarbor, ne akoako a ia ne tino i te koga tenā e uiga ki te aumaiga o vai ki tua mai i fakatupugā one mo lakau ko eucalyptus. Fakamuli ifo, ona ko te talia ne ia o te fesoasoani mai tino kolā e malamalama i te olaga i te koga tenā, ne sao ei a Eyre mai te mate.

E FAKAASI mai i te tala tenei me e manakogina te fesoasoani o se tino telā e apo atu i a koe i te faiga o se galuega faigata. E penā foki loa māfai ko fakatoka koe o faitau ki te Tusi Tapu.

Ne seki fakamoemoe a Iesu ke malamalama ana soko i te Tusi Tapu e aunoa mo se fesoasoani mai nisi tino. I se taimi e tasi, ne “‵tala ei ne ia olotou mafaufau ke maina i [te] Tusi.” (Luka 24:45) Ne iloa ne Iesu me e ‵tau o maua ne tino kolā e fai‵tau ki te Tusi Tapu se fesoasoani ko te mea ke malamalama latou i ana akoakoga.

E Maua Mai i ai te Fesoasoani?

Ne fakatonu atu a Iesu ke tuku atu ne ana soko ‵tonu te fesoasoani tenei. A koi tuai o fanaka a ia ki te lagi, ne fakatonu atu a Iesu: “Tela la, olo atu koutou ki fenua katoa ke fai a tino i ei mo oku soko; . . . Akoako atu foki latou ke faka‵logo ki mea katoa kolā ne fakatonu atu ne au ki a koutou.” (Mataio 28:19, 20) A te ‵toe galuega tāua a Kelisiano ko te faiga o akoakoga, kolā e aofia i ei a fakamatalaga e uiga ki te auala e fakaaoga ei a fakatakitakiga fakavae i te Tusi Tapu i aso takitasi. E fesoasoani atu a Kelisiano ‵tonu ke malamalama a nisi tino i te Tusi Tapu.

Mai tua malie ifo o te tukuatuga ne Iesu o te fakatonuga tenā ki ana soko kae tupu se mea fakaofoofogia. E fai mai te tala i te Tusi Tapu e uiga ki se ofisa a te tupu o Aitiope telā e faitau ne ia se vaega o te valoaga a Isaia. Ne faitau tou tagata ki se vaega telā ne seki malamalama a ia i ei. E ‵tusa mo te fakaasiga i te Tusi Tapu, konei eiloa a fuaiupu ne ‵numi a ia i ei: “E pelā mo se mamoe telā ko ave o ta, e pelā foki mo se tamā mamoe telā e se fakalogoa i te taimi e ‵kati i ei fakaa‵tea ona fulufulu. E seai eiloa sena pati ne fai. Ne fakamasiasigina, kae ne seki fai a te fai meatonu ki a ia. E seai eiloa se tino e mafai ne ia o taku mai e uiga mō tino i tona gafa, me i tona olaga i te lalolagi tenei ko oko mai ki tena fakagataga.”—Galuega 8:32, 33; Tusi Tapu Tauloto, Isaia 53:7, 8.

Ne fesili atu te ofisa tenā ki a Filipo, se Kelisiano telā ne lasi tena iloa i te Tusi Tapu: “Fakamolemole, taku mai ki a au me ko oi te tino tenei e faipati ki ei te pelofeta, ko ia me se tino ake fakaatea?” (Galuega 8:34) Ko oti ne fanatu te Aitiope fakamaoni tenei ke tapuaki atu i Ielusalema, kae kāti ne ‵talo atu ke maua ne ia se fakatakitakiga. E manino ‵lei me ne faitau a ia mo te fiafia mo te loto maulalo. Kae ne seki maina eiloa te ofisa tenā i fuaiupu konā. Ne fakamolemole atu a ia mo te loto maulalo ki a Filipo mō se fesoasoani. Ne otia malosi tou tagata i te fakamatalaga a Filipo ke fai a ia mo fai se Kelisiano.—Galuega 8:35-39.

E tumau eiloa a Molimau a Ieova i te faiga o te galuega telā ne fai faeloa ne Filipo mo nisi Kelisiano i aso mua. E aunoa mo se ‵togi, e fesoasoani atu a Molimau ki tino i atufenua e silia atu i te 235 ke malamalama latou i mea kolā e akoako ‵tonu mai i te Tusi Tapu. E fai ne latou te mea tenā mai te sukesuke ki mataupu takitasi mai te Tusi Tapu. E aofia i te auala tenei te iloiloga o mea kolā e fakaasi mai i te Tusi Tapu e uiga ki mataupu takitasi i ei.a—Ke onoono ki te pokisi ko te “Tali Fakamalie Loto ki Fesili Faka-te-Tusi Tapu.”

“Ne Maua a Tali ki Aku Fesili Katoa”

A Steven, Valvanera, mo Jo-Anne, kolā ne fakaasi atu i te mataupu muamua, ne kamata o suke‵suke mo Molimau a Ieova ki te Tusi Tapu. “A te mea telā ne ofo malosi au i ei me e faigofie o maua te tali mai te fakatusatusaga fua o akoakoga fakavae io me ko tala mai te Tusi Tapu,” ko pati a Steven. “A koi tuai o fai taku akoga faka-te-Tusi Tapu, e seai eiloa se tino ne fakaasi mai ne ia te auala e fai ei te mea tenā. Ko oko eiloa te lasi o te fakatapūga ke iloa atu i te Tusi Tapu e se se tusi o kinauga mo manatu kese‵kese e uke.”

E penā foki a Valvanera. “E fetaui ‵lei a mea katoa i ei,” ko ana pati. “E se fai mai fua te lotu me e ‵tonu a mea i ei, kae e isi eiloa ne fakamatalaga ‵tonu mō mea katoa konā.” E fai mai a Jo-Anne: “Ona ko te mea ne maua a tali ki aku fesili katoa mai te Tusi Tapu, ko oko eiloa te lasi o toku āva ki te Tino telā i a ia te tusi tenā—me e maua i ei a tali ‵tonu ki fesili a tino katoa.”

E mata, e iloa ne koe se Molimau a Ieova? Kaia e se fesili atu ei koe ki a ia ke fakaasi atu te auala e fai ei se sukesukega penei? Kafai e seai se Molimau a Ieova e iloa ne koe, fakamolemole ke tusi atu sau tusi ki se fakatuatusi i te itulau e 4 i te mekesini tenei. Mai te fesoasoani o te agaga tapu o te Atua, te talia o manatu i ei, fakatasi mo te fesoasoani mai se isi tino telā e apo i te Tusi Tapu, e se faigata eiloa ke malamalama koe i te Muna a te Atua. E mafai eiloa o malamalama koe i te Tusi Tapu!

[Fakamatalaga mai lalo]

[Pokisi/​Ata i te itulau e 8]

Tali Fakamalie Loto ki Fesili Faka-te-Tusi Tapu

Konei a nisi mataupu kolā e fakaaoga ne Molimau a Ieova i te faiga o olotou sukesukega faka-te-Tusi Tapu:

• Se a te fuafuaga a te Atua mō te lalolagi?

• Ko fea nei a tino ‵mate?

• Ko ‵nofo nei tatou i “aso fakaoti”?

• Kaia e talia ei ne te Atua a logo‵maega?

• E mafai pefea o fai ne au toku kāiga ke fia‵fia?

[Ata i te itulau e 7]

Ko te mea ke malamalama i te Tusi Tapu . . . ‵talo ke maua ne koe te agaga o te Atua, faitau kae talia a manatu i ei, kae ke talia te fesoasoani mai nisi tino