E Mata, e Mafai o Malamalama i te Tusi Tapu?

“E fai‵tau te motou kāiga ki te Tusi Tapu i Aso Sa katoa. E se fiafia sāle au ki ei. E talitonu au me i te Tusi Tapu ko te Muna a te Atua, kae e faigata o malamalama au i te ukega o aku mea e faitau.”—Setefano, Peletania.

“I te taimi ko 17 ei oku tausaga, ne taumafai au o faitau ki te Tusi Tapu kātoa. Ne faigata o malamalama au i ei, telā ne tiaki ei ne au.”—Valvanera, Sepania.

“Ne faitau fakatasi au ki te Tusi Tapu, me e pelā me se Katolika, e talitonu au me e ‵tau eiloa o faitau au ki ei. E tolu tausaga kae palele taku faitauga! Kae ne seki malamalama eiloa au i te ukega o mea i ei.”—Jo-Anne, Ausetalia.

KOI lauiloa eiloa a te Tusi Tapu i te lalolagi. E lasi atu tena fakatau ki tua i lō nisi tusi, kae e mafai o maua ne tino e tokouke, i ‵gana e uke atu, mo auala kese‵kese i lō aso mua. Kae ko tino e tokouke kolā e isi ne olotou Tusi Tapu e faigata o malamalama i ei. E mata, e penā foki koe?

E Mata, e Manako te Atua ke Malamalama Tatou i Tena Muna?

“Me i Tusitusiga Tapu katoa ne aumai mai te Atua,” ko pati i te Tusi Tapu. (2 Timoteo 3:16) E tonu, ko Ieova te Atua ne tuku mai ne ia te Tusi Tapu. E mata, e manako a ia ke malamalama tatou i tena Muna? Io me manako fua a ia ke malamalama i ei a nāi tino e pelā mo faifeau mo tino ‵poto i te Tusi Tapu kae e se ko tino katoa?

Ke mafaufau ki te fakasologa o tusi siki konei mai te Tusi Tapu:

“A te fakatonuga tenei e avatu ne au i te aso nei e se faigata, e mafai eiloa ne koutou o fai.”—Teutelonome 30:11.

“A te fakamatalaga o au akoakoga e maua mai ei te mainaga, e aumai ne ia te poto ki a latou kolā e seai se atamai.”—Salamo 119:130.

“I te taimi eiloa tenā, ne faka‵fonu a Iesu ne te agaga tapu ki te fiafia, kae fai ake: ‘Toku Tamana, te Aliki o te lagi mo te lalolagi! Au e fakafetai atu ki a koe, i te mea ko fakaasi ne koe ki tino seki akoakogina, a mea kolā ne ‵funa ne koe mai tino ‵poto mo tino kolā ne a‵koga.”—Luka 10:21.

E tonu, e manako eiloa te Atua ke malamalama koe i tena Muna! Kae e tiga eiloa te feitu tenā, e faigata ki tino e tokouke ke malamalama i te tusi tenei. Se a te mea e mafai o fesoasoani mai? E fakaasi mai i mataupu e ‵soko mai a manatu e tolu kolā e mafai o fesoasoani atu ki a koe ke malamalama i te Tusi Tapu.