TALI KI FESILI MAI TE TUSI TAPU

E mata, e mafai eiloa o malamalama te tino i te Tusi Tapu?

A te Tusi Tapu ko te Muna a Atua. E pelā eiloa me se tusi ne aumai i se tamana alofa. (2 Timoteo 3:16) I loto i te Tusi Tapu, e fakamatala mai ne te Atua a te auala e mafai ei ne tatou o fakafiafia a ia, te pogai e talia ei ne ia amioga ma‵sei, mo mea ka fai ne ia mō tino i te taimi mai mua. Kae ko oti ne ‵fuli ‵se ne faiakoga o lotu a akoakoga mai i te Tusi Tapu; kae ko te ikuga, e mafau‵fau a tino e tokouke me ka sē mafai lele latou o malamalama i te Tusi Tapu.​—Galuega 20:29, 30.

E manako a Ieova te Atua ke iloa ne tatou a te munatonu e uiga ki a ia. Ona ko te pogai tenā, ko oti ne tuku mai ne ia se tusi telā e mafai o malama‵lama tatou i ei.​—Faitau te 1 Timoteo 2:3, 4.

E mafai pefea koe o malamalama i te Tusi Tapu?

I tafa o te tukumaiga o te Tusi Tapu, e fesoasoani mai a Ieova ke malama‵lama tatou i ei. Ne uga mai ne ia a Iesu ke akoako tatou. (Luka 4:16-21) Ne fesoasoani atu a Iesu ki ana tino fakalogo‵logo ke malama‵lama i Tusitusiga Tapu, mai i te fakamaina faka‵lei atu o fuaiupu takitasi.​—Faitau te Luka 24:27, 32, 45.

Ne fakatu ne Iesu a te fakapotopotoga Kelisiano ko te mea ke tumau a te faiga o te galuega telā ne kamata ne ia. (Mataio 28:19, 20) I aso nei, e fesoasoani atu a soko fakamaoni o Iesu ki tino ke malama‵lama i mea kolā e akoako mai i te Tusi Tapu e uiga ki te Atua. Kafai e fia malamalama koe i te Tusi Tapu, e fia‵fia eiloa a Molimau a Ieova o fesoasoani atu ki a koe.​—Faitau te Galuega 8:30, 31.