Ke Talia mo te Fiafia Kae Tuku Atu mo te Loto Kātoa
A IEOVA, te ‵tou Tamana faka-te-lagi, e isi se mea e manavase mai ei a ia ki a tatou. E fakatalitonu mai ne te Muna a te Atua me e atafai tonu eiloa a ia ki ana tavini katoa. (1 Petelu 5:7) E tasi te auala e fakaasi mai ei ne Ieova tena atafai ko te tukumaiga o auala kese‵kese ke fesoasoani mai ki a tatou ke tavini atu ki a ia mo te fakamaoni. (Isaia 48:17) Kae maise eiloa māfai ko fe‵paki tatou mo fakalavelave kolā e fai ei tatou ke loto mafatia, e fiafia a Ieova ke fakaaoga faka‵lei ne tatou a fesoasoani kolā ko oti ne fakatoka ne ia. E fakaasi mai i te Tulafono a Mose a te munatonu tenā.
Mai lalo i te fakatokaga o te Tulafono, ne tuku mai ne Ieova a te fesoasoani mo te alofa ki “tino fakaa‵lofa,” e pelā mo tamaliki ko ‵mate olotou mātua, fafine ko ‵mate olotou avaga, mo tino mai nisi fenua. (Levitiko 19:9, 10; Teutelonome 14:29) E iloa ne ia me i nisi o ana tavini e ma‵nako ki se fesoasoani mai i olotou taina tapuaki. (Iakopo 1:27) Tela la, e se ‵tau o ‵teke atu ana tavini ki te fesoasoani mai i tino kolā e fakamalosi ne Ieova ke tuku atu a vaegā fesoasoani penā. Kae kafai foki eiloa e talia ne tatou te fesoasoani, e ‵tau o fai penā mo te kilokiloga tonu.
Kae e ‵tau o masaua me e fakaasi mai i te Muna a te Atua me e maua foki ne tino o te Atua a te avanoaga ke fesoasoani atu. Masaua a te tala e uiga ki te “fafine mativa” telā ne lavea ne Iesu i te faletapu i Ielusalema. (Luka 21:1-4) Kāti ne maua ne ia a mea aoga mai i fakatokaga alofa a Ieova mō fafine kolā ko ‵mate olotou avaga e pelā mo te mea ne taku mai i te Tulafono. Kae e tiga eiloa koi mativa a ia, ne masaua eiloa te fafine tenā ko mate tena avaga, e se pelā me se tino ne maua ne ia se fesoasoani, kae e pelā me se tino telā ne fesoasoani atu. Ko tena uiga fesoasoani ne maua ei ne tou fafine a te fiafia me e pelā mo muna a Iesu, “e sili atu te manuia [io me ko te fiafia] o te tino telā e tuku atu fua ana mea i lō o te tino telā e talia ne ia.” (Galuega 20:35) I te mafaufau ki te munatonu, e mafai pefea o fakamasani koe ki “te tuku atu” kae ke maua i ei te fiafia?—Luka 6:38.
‘Se a Taku Mea ka Avatu ma Ieova mo Taui Atu Tena Aga‵lei?’
Ne mafaufau penei a te faisalamo: “Se a taku mea ka avatu ma te Aliki [ko Ieova] mo taui atu tena aga‵lei ki a au?” (Salamo 116:12) Ne a mea aoga ne maua ne ia? Ne fesoasoani atu a Ieova ki a ia i te taimi ne “mataku kae manavase” ei a ia. E se gata i ei, a ia ne “fakasao ne te Aliki [ko Ieova] mai te mate.” Nei la, ko manako a ia o toe “taui” atu ki a Ieova ona ko tena fakasaoga. Ne a mea ne mafai o fai ne te faisalamo? Ana muna: “Ka avatu ei ne au ki a ia a mea kolā ne tauto au ki ei.” (Salamo 116:3, 4, 8, 10-14) Ne fakaiku aka ne ia ke tausi ana tautoga kolā ne fai ki a Ieova kae ke fakataunu foki ana tiute.
E mafai foki o fai ne koe a te mea tenā. E pefea la? Mai i te tautali atu fua ki se olaga telā e fetaui ‵lei mo tulafono mo akoakoga fakavae a te Atua i taimi katoa. Tela la, ke fakamautinoa aka me e tumau eiloa te fai o tau tapuakiga ki a Ieova mo fai te ‵toe mea tāua i tou olaga kae ke talia foki te agaga o te Atua ke takitaki ei koe i au mea katoa e fai. (Failauga 12:13; Kalatia 5:16-18) E tonu, e se mafai lele eiloa ne koe o toe taui katoatoa atu ki a Ieova a mea katoa ko oti ne fai ne ia mō koe. Kae koi fai eiloa i ei ke ‘fiafia malosi a Ieova’ ke lavea atu me e tuku atu koe mo tou kātoa ke tavini atu ki a ia. (Faataoto 27:11) Ko tafaga la te gali ke fakafiafia atu ki a Ieova i te auala tenei!
Ke Fesoasoani Atu ki te ‵Lei o te Fakapotopotoga
E seai eiloa se fakalotolotolua me ka lotomalie koe me ne maua ne koe a mea aoga mai te fakapotopotoga Kelisiano i auala e uke. E auala i te fakapotopotoga, ko oti eiloa ne tuku mai ne Ieova a meakai faka-te-agaga e lava kae ‵toe. Ne maua ne koe a te munatonu telā ne fakasaoloto ei koe mai i mea fakalotu ‵se mo te pouliga faka-te-agaga. (Ioane 8:32) I fakatasiga a te fakapotopotoga, tamā fono, mo fono i atufenua kolā ne fakatoka ne “te tavini fakamaoni kae poto,” ne maua ne koe a te poto telā ka takitaki atu ei ki te ola se-gata-mai i te lalolagi palataiso e aunoa mo te ‵mae mo logo‵maega. (Mataio 24:45-47) E mata, e mafai o kamata o lau aka ne koe a mea aoga katoa ko oti ne maua ne koe—mo mea ka maua ne koe—e auala i te fakapotopotoga a te Atua? Ne a mea kāti e toe taui atu ne koe ki te fakapotopotoga?
Ne tusi mai a te apositolo ko Paulo: “Ko ‵soko tasi ei a vaega kese‵kese o te foitino, ka ko taofi ‵mau te foitino katoa ne sokoga katoa o te foitino kolā ne faite. Tela la, kafai e ga‵lue katoa a vaega o te foitino e pelā eiloa mo te lotou faitega, ko tona uiga ko tupu ake o ola te foitino kātoa i te alofa.” (Efeso 4:15, 16) E tiga eiloa e fakasino atu muamua te tusi siki tenā ki te potukau o Kelisiano fakaekegina, e aoga foki te akoakoga fakavae i ei ki Kelisiano katoa i aso nei. E tonu, e mafai ne tino katoa i te fakapotopotoga o fesoasoani atu ki te ‵lei mo te atiakaga o te fakapotopotoga. Ne a auala e mafai ei o fai latou penā?
E mafai o fai ne tatou a te mea tenei mai te taumafai ke fai tatou mo pogai o fakamalosiga mo te malosi faka-te-agaga ki nisi tino i taimi katoa. (Loma 14:19) E mafai foki o fesoasoani atu tatou ki te ‘tupuakega o te foitino’ mai te atiakaga o fuataga o te agaga o te Atua i ‵tou faifaiga katoa ki ‵tou taina tali‵tonu. (Kalatia 5:22, 23) E se gata i ei, e mafai o ‵kilo atu tatou ki avanoaga ke “fai te mea ‵lei ki tino katoa, kae fakasilisili ki a latou kolā e i loto i te kāiga Kelisiano.” (Kalatia 6:10; Epelu 13:16) A tino katoa i te fakapotopotoga-taina mo tuagane, tamaliki mo tino ma‵tua e mafai o ‵kau atu ki te ‘atiakega o te foitino kātoa i te alofa.’
E se gata i ei, e mafai o fakaaoga ‵tou taleni, malosi, mo kope ke ‵kau atu ki te galuega fakaola tino telā e fai ne te fakapotopotoga. “Ne maua ne koutou a te mea tenā e aunoa mo se ‵togi,” ko muna a Iesu Keliso. Ne ‵tau o ‵saga atu pefea tatou ki ei? “Fakaaoga atu foki ki tino e aunoa mo se taui,” ko ana muna. (Mataio 10:8) Tela la, ke ‵kau katoatoa atu ki te galuega tāua ko te talaiatuga o te Malo mo te faiga o soko. (Mataio 24:14; 28:19, 20) E mata, e se lava tou atamai ke fai te mea tenei? Masaua te fafine mativa ko mate tena avaga telā ne fakamatala mai ne Iesu. Ne tuku atu katoa ne tou fafine ana mea ne ‵toe. Kae ne fai mai a Iesu me ne uke atu ana mea ne fai i lō nisi tino. Ne tuku atu ne ia a mea katoa e mafai ne ia o tuku atu.—2 Kolinito 8:1-5, 12.
Ke Talia a Mea e Maua ne Koe mo se Kilokiloga ‵Lei
E tiga eiloa te feitu tenā, kāti e isi ne taimi e mafai ei o maua ne koe se fesoasoani mai i te fakapotopotoga. Ke mo a ma fakatamala koe ke talia so se fesoasoani e mafai o tuku atu ne te fakapotopotoga i te taimi e fakafesagai atu ei koe ki mea faiga‵ta o te olaga masei tenei. Ko oti ne tuku mai ne Ieova a tagata kolā e fetaui ‵lei kae atafai ke ‘tausi te lafu’—ke fesoasoani atu māfai ko fe‵paki koe mo tofotofoga mo fakalavelave faiga‵ta. (Galuega 20:28) A toeaina mo nisi tino i te fakapotopotoga e fia fakamafanafana, ‵lago atu, kae puipui ne latou a koe i taimi faiga‵ta.—Kalatia 6:2; 1 Tesalonia 5:14.
Tela la, ke fakamautinoa aka ne koe me kafai e maua ne koe a nisi fesoasoani kolā e manakogina, ke talia ne koe mo se kilokiloga ‵lei. Ke talia faeloa mo te loto fakafetai a te fesoasoani telā e maua ne koe. Ke ‵kilo atu ki vaegā fesoasoani penā mai taina tali‵tonu e pelā me se fakaasiga o te alofa tauanoa o te Atua. (1 Petelu 4:10) Kaia e tāua ei a te mea tenā? Me e se ma‵nako tatou o fai pelā mo tino e tokouke i te lalolagi—e talia ne latou a mea e aunoa mo te loto fakafetai.
Ke Paleni ‵Lei Kae Uiga Faigofie
I tena tusi ki te fakapotopotoga i Filipi, ne tusi atu a Paulo e uiga ki a Timoteo: “Me e seai ake se tino i konei e ‵pau mo ia, i te fiafia o galue fakamaoni mo te otou ‵lei.” Kae ne toe fai mai a Paulo: “A tino katoa ko ‵kilo faeloa ki mea e ‵lei ei latou, ka ko se fia‵fia ki a Iesu Keliso.” (Filipi 2:20, 21) Ona ko te kilokiloga tāua tenā a Paulo, e mafai pefea o ‵kalo keatea tatou mai i te “‵kilo faeloa ki mea e ‵lei ei” tatou?
E se ‵tau lele eiloa o faimālō kae fakamoe‵moe tatou ke fakamāumāu a taimi e uke o nisi tino i te fakapotopotoga ke fesoasoani mai ki ‵tou fakalavelave. Kaia e se ‵tau ei o fai penā? Mafaufau ki te mea tenei: E seai se fakalotolotolua, me ka fia‵fia malosi tatou māfai e fesoasoani mai se taina i te feitu faka-te-foitino ko te mea ke mafai o fakafesagai atu tatou ki se fakalavelave tupu fakafuasei. Kae e mata, ka ma‵nako faeloa tatou ki se vaegā fesoasoani penā mai i a ia i taimi katoa? Ikai, e se penā loa. I lō te fai penā, e ‵tau o paleni ‵lei kae uiga faigofie tatou i mea kolā e fakamoe‵moe tatou ki ei ke tuku mai ne latou e pelā mo olotou taimi, faitalia eiloa me e fia‵fia faeloa latou o fesoasoani mai ki a tatou. E sili atu i ei, faitalia me ne a mea e fai ne taina tali‵tonu ke fesoasoani mai ke fakafesagai atu tatou ki taimi faiga‵ta, e ma‵nako eiloa tatou ke fai latou penā mo te loto fia‵fia.
E seai se fakalotolotolua me ka toka kae loto fia‵fia faeloa a taina mo tuagane Kelisiano o fesoasoani atu ki a koe. Kae kāti e se mafai ne latou o fesoasoani atu i mea katoa. Kafai e tupu te mea tenā, ke masaua me ka fesoasoani atu a Ieova ki a koe, e pelā mo te mea ne fai ne ia ki te faisalamo, i so se tofotofoga e fepaki mo koe.—Salamo 116:1, 2; Filipi 4:10-13.
Tela la, ke mo a ma fakatamala koe o talia mo te fiafia so se fesoasoani mai i a Ieova ki a koe—maise eiloa i taimi faiga‵ta mo fakalavelave. (Salamo 55:22) E manako a ia ke fai ne koe a te mea tenā. Kae e manako foki a ia ke fai koe mo fai se tino telā e “tuku ana mea mo te loto malie.” Tela la, ke “fai a te mea telā ko iku i [tou] mafaufau” ke tuku atu so se mea e ‵tusa mo ou fakanofonofoga ke ‵lago atu ki te tapuakiga tonu. (2 Kolinito 9:6, 7) I te faiga tenā, ka mafai ei ne koe—o talia a te fesoasoani e maua mo te loto fakafetai kae pelā foki mo te tuku atu mo te loto kātoa.
[Pokisi/Ata i te itulau e 30]
‘Se a taku mea ka avatu ma Ieova mo taui atu tena aga‵lei ki a au?’—Salamo 116:12
▪ Ke ‵sala atu ki avanoaga ke “fai te mea ‵lei ki tino katoa”
▪ Ke fai mo pogai o fakamalosiga mo te malosi faka-te-agaga ki nisi tino
▪ Ke kau katoatoa atu ki te galuega ko te faiga o soko ki te mea e mafai o fai ne koe e ‵tusa mo ou fakanofonofoga