Tapuakiga a Kāiga—E Tāua ‵ki mō te Faka‵saoga!
MAFAUFAU la ki te fakamataku o “te taua i te aso lasi o te Atua e o ia te Malosi Katoatoa”! (Fakaasiga 16:14) Ne tusi mai a te pelofeta ko Mika i pati fakatusa, penei: “Ko mauga eiloa ka liuvai . . . ; ka ifo latou ki vanu e pelā me ne vai e ‵tafe i se mauga.” (Mika 1:4) Ne a ikuga fakama‵taku mō latou kolā e se tavini atu ki a Ieova? E fai mai te Muna a te Atua: “I te aso tenā, a foitino o tino kolā ne tamate ne te Aliki ka tafola valevale mai i te suā mata o te lalolagi ke oko ki te suā mata.”—Ielemia 25:33.
Ona ko vaegā fakailoaga penā ke fakaeteete, a ulu o kāiga—kolā e fai a tino e tokouke i ei mo fai ne mātua e seai ne avaga—ke fesili ifo ki a latou eiloa e uiga ki olotou tama‵liki kolā ko ma‵tua ‵lei ke fakasako‵sako mo latou, ‘E mata, ka ‵sao atu latou i Amaketo?’ E fakatalitonu mai te Tusi Tapu me ka ‵sao atu latou māfai e gasue‵sue kae ma‵losi foki latou i te feitu faka-te-agaga e ‵tusa eiloa mo te lotou ma‵tua.—Mataio 24:21.
Te Tāua o te Taimi mō Tapuakiga a Kāiga
E pelā me se mātua, ke fakamautinoa aka me e fai ne koutou a mea katoa e mafai ne koutou o fai ke puti aka otou tama‵liki “i te olaga ‵lei mo akoakoga” a Ieova. (Efeso 6:4) E tāua ‵ki eiloa te sukesuke ki te Tusi Tapu fakatasi mo au tama‵liki. E ma‵nako tatou ke fai ‵tou tama‵liki e pelā mo Kelisiano i Filipi, kolā ne fakamālō atu a Paulo mō te lotou faka‵logo mo te loto fiafia ki a Ieova. Ne tusi atu a ia: “Taugasoa pele, e pelā mo te otou faka‵logo mai ki a au i aso ne fakatasi ei tatou, se mea e ‵tau ke faka‵logo mai koutou ki a au, ka koi galo au mai i a koutou. Ga‵lue mo te ma‵taku mo te polepole, ko te mea ke katoatoa te otou fakaolataga.”—Filipi 2:12.
E mata, e faka‵logo au tama‵liki ki tulafono a Ieova māfai e se nofo atu koe i olotou tafa? Kae e a māfai ko ‵nofo atu i te akoga? E mafai pefea o fesoasoani atu koe ki au tama‵liki ke tali‵tonu ki te poto telā e maua i tulafono a Ieova ko te mea ke puipuigina ei latou māfai e se nofo atu koe i olotou tafa?
E aoga ‵ki eiloa a te tapuakiga a kāiga ki te atiakaga o te fakatuanaki o tau tamaliki i te feitu tenei. Tela la, ke na mafau‵fau tatou ki mea tāua e tolu kolā e fai ei ke iku manuia te sukesukega ki te Tusi Tapu a tou kāiga.
Ke Fai Faeloa
E fakaasi mai i te Tusi Tapu me e ‵kami sāle a tama faka-te-agaga a te Atua ke olo atu ki ana mua i nisi taimi mautinoa. (Iopu 1:6) Ke fai foki penā ki au tama‵liki. Ke fakatoka se aso mo se taimi mautinoa mō te Tapuakiga a te Kāiga i te afiafi, kae taofi ‵mau ki ei. E se gata i ei, ke filifili aka foki se isi taimi ‵lei ko te mea ke mafai o toka ki fakalavelave ‵tupu fakafuasei.
Kafai ko ‵teka atu a nai masina, ke mo a ma talia se kilokiloga me se mea ‵lei ke se fai te sukesukega i nisi taimi. Masaua, me i au tama‵liki ko au toe akoga faka-te-Tusi Tapu tāua ‵ki eiloa. Kae e manako a Satani ke ‵po aka latou. (1 Petelu 5:8) Kafai e se fai ne koe a te Tapuakiga a te Kāiga ko te mea ke onoono ki te televise io me ko nisi mea sē aoga, ka manumalo eiloa a Satani.—Efeso 5:15, 16; 6:12; Filipi 1:10.
Ke Aoga a Mea Kolā e Sukesuke ki ei
A te Tapuakiga a te Kāiga i afiafi e ‵tau o sili atu i lō te tauloto ki manatu ‵tonu. Taumafai ke aoga a mea kolā e sukesuke ki ei. E pefea la? I nisi taimi, ke filifili aka a mataupu kolā e aoga ki tulaga faiga‵ta ko fe‵paki mo tau tamaliki i aso io me ko vaiaso mai mua. E pelā me se fakaakoakoga, kaia e se aofia ei a fakaakoakoga o pati ke fai atu i te galuega talai? E fia‵fia eiloa a tama‵liki o fai a mea kolā e iloa ‵lei ne latou o fai. A te fakaakoakoga o fakamatalaga mo te mafaufau ki auala e fakafesagai atu ei ki manatu ‵teke ka fesoasoani atu ki a latou ke momea aka te lotou loto tali‵tonu i te taimi e ‵kau atu ei ki vaega kese‵kese o te galuega talai o te Malo.—2 Timoteo 2:15.
E mafai foki o fai a fakaakoakoga kolā ka fesoasoani atu ki au tama‵liki ke fakafesagai atu ki fakamalosiga ma‵sei mai i taugasoa. A te mataupu e 15 o te tusi ko te Questions Young People Ask—Answers That Work, Te Tusi i te 2, e mafai o fakaaoga mo fai se fakavae mō te sukesukega a te kāiga. A te pokisi telā e fakaulutala penei “Peer Pressure Planner” i te itulau e 132 mo te 133 e tuku mai i ei a manatu fesoasoani kae e tuku atu i ei a avanoaga ki au tama‵liki ke tuku mai a tali kolā e mafau‵fau latou me e ‵lei. A te fakamatalaga i te fakaotiga o te itulau e 133,: “Rehearse your responses with a parent or a mature friend” e fakamalosi atu ki talavou ke fakaakoako mo olotou mātua ki olotou pati e fai. E a māfai e fai a vaegā fakaakoakoga penā mo fai se vaega o te Tapuakiga a te Kāiga i afiafi i nisi taimi?
E tuku mai ne te sukesukega a te kāiga se avanoaga ke faka‵mafa atu ne mātua a te aoga o fakamoemoega faka-te-agaga. I te feitu tenei, a te Young People Ask, Te Tusi i te 2, e maua i ei a fakamatalaga tafasili i te aoga i te mataupu e 38, telā e fakaulutala penei “What Will I Do With My Life?” I te taimi e sukesuke ei ki te mataupu, fesoasoani atu ki tau tamaliki ke iloa ne ia me kafai e fakavae ne se tino a tena olaga ki te tavini atu ki a Ieova ko te ‵toe auala ‵lei ke tau‵tali atu ki ei. Ke ati aka i te loto o tau tama a te manakoga ke paenia, ke tavini atu i te Peteli, ke kau atu ki te Akoga Fakamasani mō Tavini Fakafaifeau, io me kausaki atu ki nisi vaega o te taviniga tumau.
Se fakamasauaga ke fakaeteete: Se mea ‵lei ke masaua me i nisi mātua kolā e ma‵nako ke maua ne olotou tama‵liki a toe mea ‵lei, e ‵saga malosi atu fua ki mea e ma‵nako latou ke fai ne olotou tama‵liki kae e se fakamālō atu ki mea ‵lei kolā ko fai nei ne latou. E tonu, se mea ‵lei ke fakamalosi au tama‵liki ke fai ne latou a vaegā fakamoemoega ‵lei penā, e pelā mo te taviniga i te Peteli mo te galuega fakamisionale. Kae mai i te faiga penā, ke fakaeteete ke mo a ma fakaitaita ne koe tau tamaliki ki ou fakamoemoega kae fai ei a ia ke loto vāivāi. (Kolose 3:21) Ke masaua faeloa me i tau tama e ‵tau o alofa ki a Ieova mai i tena loto eiloa—kae e se ko te mea e manako koe ki ei. (Mataio 22:37) Tela la, ke ‵sala faeloa ki auala ke fakamālō atu ki tau tama mo mea ‵lei ko fai ne ia, kae ‵teke atu ki te manakoga ke saga atu faeloa ki mea kolā e se fai ne ia. Ke ati aka te loto fakafetai mō mea katoa ko oti ne fai ne Ieova. Ko fai ei ke saga tonu atu te loto o tau tama ki te aga‵lei o Ieova.
Ke Gali te Faiga o te Sukesukega
A te tolu o vaega tāua mō te manuia o te Tapuakiga a te Kāiga i afiafi ko te faiga ke gali. E mafai pefea o fai ne koe a te mea tenei? Kāti i se taimi e tasi e mafai o fakalogologo koe ki se kaseti io me onoono ki vitio kolā ne fakatoka ne Molimau a Ieova. Io me e mafai o fai‵tau fakatasi koutou ki se vaega o te Tusi Tapu, kae ‵tofi aka a tino taki tokotasi i te kāiga ke fai‵tau.
E isi ne mataupu i Te Faleleoleo Maluga mo te Awake!, kolā e tuku mai i ei se fakavae tafasili i te ‵lei mō sau‵talaga a te kāiga. E pelā mo te mea e mafai o fakaaoga ne koe i te itulau e 31 o te mekesini ko te Awake!, telā e fakaulutala penei “How Would You Answer?” I lomiga katoa o The Watchtower mō tino katoa, e aofia i ei se mataupu mō sukesukega penei “For Our Young People.” E mafai o fakaaoga a mataupu konei mo se fakasologa o mataupu mō tama‵liki tagata mo fafine telā e fakaulutala penei “Teach Your Children.”
A mataupu fakasolo o te “Young People Ask” i te Awake! ka aoga ‵ki ki mātua o talavou, e pelā foki mo te Young People Ask, te Tusi i te 2. Kafai e fakaaoga te tusi tenā, ke mo a ma fakaseaoga a te pokisi “What Do You Think?” i te fakaotiga o mataupu takitasi. E sili atu te aoga o te pokisi tenā i lō te ‵toe mafaufau fua ki manatu tāua. A fesili i te pokisi tenā e mafai o fakaaoga e pelā me se fakavae mō te sau‵talaga a te kāiga.
Ke fakaeteete ke mo a ma ‵fuli te sukesukega a te kāiga ki te faimālō atu o te tamaliki ke tali mai ne ia se fakasologa loa o fesili. E pelā me se mea e tasi, ke mo a ma faimālō tau tamaliki ke faitau mai ne ia ki luga a mea ko oti ne tusi ne ia ki itulau kolā e fakaulutala penei “My Journal” io me ko so se vaega o te tusi telā e ‵tau o tusi ne te tamaliki ana manatu totino. I te vaega ko te “A Note to Parents,” e fai mai te tusi i te itulau e 3: “Ke fakamalosi atu ki au tama‵liki ke fakamaoni latou i olotou mea e tusi ki olotou tusi, ke mo a ma taumafai ke iloa ne koe a mea konā. Fakamuli loa, e mafai o fai atu ne latou ki a koe a fakalavelave kolā ne tusi ne latou ki lalo.”
Kafai e fakatumau ne koe te faiga o te tapuakiga a te kāiga ke aoga kae fakafiafia, ka fakamanuia eiloa ne Ieova otou taumafaiga. Ka fesoasoani atu te taimi fakapito tenei o te kāiga ki te fakatumauga o ou tino pele i te ola ‵lei mo te malosi i te feitu faka-te-agaga.
[Pokisi i te itulau e 21]
Ke Fakaaoga a Auala Kese‵kese
“I te taimi e suke‵suke ei māua mo ma tamaliki fa‵fine, e suke‵suke matou ki te mataupu ke fakatoka ei mō fakatasiga a te fakapotopotoga kae oti aka ko fai ei māua ki ma tama‵liki fafine ke ‵lomi ne latou se ata telā e fakamatala fakatoetoe mai i ei te mataupu kātoa. I nisi taimi e fai ne matou se koniseti ki tala i te Tusi Tapu io me e fakaakoako matou mō fakamatalaga ke fai atu i te galuega talai. E taumafai eiloa maua o fakafetaui aka a te sukesukega ki olotou tausaga, ke gali, aoga, kae fakafiafia foki.”—J. M., Iunaite Sitete.
“Ke fesoasoani atu ki se tamaliki tagata a taku akoga faka-te-Tusi Tapu ke malamalama i te faigata ke fakaaoga a peluga tusi i taimi o te Tusi Tapu, ne ‵lomi ne maua a te tusi o Isaia mai tua o te ‵sologa keatea o mataupu mo fuaiupu i ei. Ne fakapikipiki ne maua a itulau katoa kae faka‵piki atu a fakaotiga takitasi ki se paipa. Oti aka, ne taumafai te tamaliki ke fai ne ia te mea telā ne fai ne Iesu i te sunako i Nasaleta. E fai mai te tala i te Luka 4:16-21 me ‘ne ‵tala ne [Iesu] te Tusi [o Isaia], kae ne maua ne ia’ a te fuaiupu telā ne ‵sala a ia ki ei. (Isaia 61:1, 2) Kae i te taimi ne fakaakoako ei te tamaliki tagata o fai foki penā, ne faigata eiloa ke maua ne ia te koga e tu ei a te Isaia 61 mai te fakaaogaga o te peluga tusi loa e aunoa mo mataupu mo fuaiupu i ei. Ona ko tena ofo i te poto o Iesu i te fakaaogaga o te peluga tusi, ne fai atu te tamaliki tagata mo te ofo: ‘Ko oko eiloa i te ‵fai o Iesu.’”—Y. T., Tiapani.
[Ata i te itulau e 20]
A te fakaakoako ki pati e ‵tau o fai e mafai o fesoasoani atu ki au tama‵liki ke ‵teke atu ki fakamalosiga ma‵sei mai i taugasoa
[Ata i te itulau e 21]
Ke taumafai o fai te Tapuakiga a te Kāiga i te afiafi ke gali