Kāiga Kelisiano—“Ke Toka Koutou”

“Ke toka koutou me i a au te Tama a te Tagata, ka vau i se itula e seki fakamoemoegina ne koutou.”—LUKA 12:40.

1, 2. Kaia e ‵tau ei o faka‵logo tatou ki te fakamalosiga a Iesu ke “toka” faeloa tatou?

“KAFAI e vau au te Tama a te Tagata i toku ‵malu fakatupu,” o ‵vae keatea a “tino katoa,” se a te mea ka tupu ki a koe mo tou kāiga? (Mataio 25:​31, 32) Kafai e tupu a te mea tenei i se itula telā e seki fakamoemoegina, se mea tāua ‵ki ke faka‵logo tatou ki te fakamalosiga a Iesu ke “toka” tatou!​—Luka 12:40.

² Ne fakamatala mai i te mataupu muamua a te auala e mafai ei ne tino taki tokotasi i te kāiga o fesoasoani ki te kāiga kātoa ke tumau i te mataala i te feitu faka-te-agaga mai te fakatāua ne latou olotou tiute taki tokotasi. Ke na onoono nei tatou ki nisi auala e mafai ei ne tatou o fesoasoani atu ki te ‵lei o ‵tou kāiga i te feitu faka-te-agaga.

Ke “Kilokilo Faeloa ki Mea ‵Lei”

3, 4. (a) Se a te mea e ‵tau o fakaeteete i ei a kāiga Kelisiano? (e) Se a te uiga ke “kilokilo faeloa ki mea ‵lei”?

³ Ko te mea ke toka mō te oko mai o Keliso, e ‵tau o fakaeteete a kāiga ke mo a ma sē ‵saga atu latou ki mea kolā e fetaui mo te tapuakiga tonu. E ‵tau o puipui latou mai te fulitua atu e auala i mea kolā e fakalavelave atu ki a latou. Ona ko te fia maumea se matasele telā ne ‵poa ne ia a kāiga e tokouke, e ‵tau o mafau‵fau tatou ki pati a Iesu e uiga ki te “kilo‵kilo faeloa ki mea ‵lei.” (Faitau te Mataio 6:​22, 23.) E pelā me se moli telā e mafai o fakamaina mai ki ‵tou auala kae fai ei ke sa‵sale tatou kae sē ‵siga, e mafai o fakamaina tatou ne ‵tou mata fakatusa ko ‘‵tou loto’ ko te mea ke mo a ma pa‵ku tatou.​—Efeso 1:​18.

⁴ Ko te mea ke lavea ‵lei ne se tino se mea, e ‵tau o ‵lei te mata kae ke mafai o kilo atu ki se mea. E seai eiloa se ‵kese mo te mata fakatusa o te loto. A te mauaga o se kilokiloga faigofie e fakauiga eiloa me e ‵saga tonu atu tatou ki se mea e tasi. I lō te ola i se olaga telā e fakavae ki mea faka-te-foitino kae manavase malosi ki te tausiga o te kāiga i te feitu faka-te-foitino, e ‵saga tonu atu ‵tou mata ki mea faka-te-agaga. (Mataio 6:​33) E fakauiga a te mea tenei me e lotoma‵lie tatou ki ‵tou mea faka-te-foitino kae fakamuamua te galuega a te Atua i ‵tou olaga.​—Epelu 13:5.

5. E fakaasi mai pefea ne se tamaliki fafine me ne “kilokilo faeloa” io me ne saga tonu atu a ia ki te taviniga ki te Atua?

⁵ E mafai o maua a ikuga ‵lei māfai e fakamasani a tama‵liki ke fakafaigofie a olotou kilokiloga! Mafaufau ki te fakaakoakoga o se tamaliki fafine i te fenua o Ethiopia. Ne ‵lei ‵ki a ia i te akoga telā i te otiga o ana akoakoga, ne maua ne ia se avanoaga ke faka‵soko ana akoakoga. Kae mai tena saga tonu atu ki te taviniga ki a Ieova, ne seki talia ne ia te avanoaga tenā. Fakamuli ifo, ne ofo atu ki a ia se galuega telā e nofo ki te 3,000 [US$4,200] tupe eulopa tena ‵togi i se masina​—se aofaki lasi māfai e fakatusa ki peofuga masani o tino i tena fenua. Kae ne “kilokilo faeloa” io me ne saga tonu atu a ia ki te galuega faka-paenia. Ne seki manako a ia o fai‵pati mo ana mātua e uiga ki te sē talia ne ia te galuega tenā. E pefea a lagonaga o ana mātua i te taimi ne iloa ei ne lāua te mea ne fai ne te lā tama? Ne fakaasi atu ne lāua me e fia‵fia lāua ki tou fafine!

6, 7. Se a te mea fakamataku e ‵tau o ‘matapula‵pula tatou ki ei’?

⁶ E fakaasi manino mai i pati a Iesu kolā ne fakamau i te Mataio 6:​22, 23 a te fakailoaga ke fakaeteete i te kaimanako. Ne faka‵kese ne Iesu a te pati “mata e ‵lei” mai “mata e sē ‵lei.” A te “mata e sē ‵lei” e fakauiga ki te matakanokano io me ko te kaimanako. (Mataio 6:​23, Tusi Tapu Tauloto.) E pefea a lagonaga o Ieova e uiga ki te matakanokano io me ko te kaimanako? “Ona ko koutou ko tino o te Atua, tela la, se mea sē ‵tau ke faipatigina koutou e fina lalolagi, e amio sē ‵tonu mo te kaimanako,” ko muna a te Tusi Tapu.​—Efeso 5:3.

⁷ E tiga eiloa e faigofie ke lavea atu te kaimanako i nisi tino, e faigata eiloa ke lavea atu a te uiga tenei i a tatou. Tela la, se mea poto ke faka‵logo tatou ki te polopolokiga a Iesu: “Ke matapula‵pula koutou, kae fakaeteete i te matakanokano.” (Luka 12:15) E fai eiloa penā mai te iloilo ne tatou a tatou eiloa ke lavea atu a mea kolā e ati aka ne tatou i ‵tou loto. E ‵tau o mafaufau faka‵lei a kāiga Kelisiano e uiga ki taimi mo tupe kolā e fakamāumāu ne latou ki fakafiafiaga, tafaoga, mo te ‵sala atu ki kope faka-te-foitino.

8. Kafai e mafau‵fau tatou o ‵togi se mea, e mafai pefea o ‘matapula‵pula’ tatou i te feitu tenā?

⁸ A te ‵togiga o se mea e uke atu a mea e aofia i ei i lō te filifili fua o se mea telā e mafai o ‵togi ne koe io me ikai. Mafaufau ki vaegā manatu konei: ‘E mata, ka fakaaoga faeloa ne au a te mea tenei i aso katoa kae tausi faka‵lei ki ei? E pefea te leva ka iloa ei ne au o fakaaoga faka‵lei a te mea tenei?’ Koutou e talavou, ke mo a ma tō tali‵tonu ki fakasalalauga e uiga ki vaegā gatu ‵fou mo nisi mea aka kolā e ‵togi ‵mafa. Ke maua te loto pulea. Mafaufau la ki te auala ka pokotia ei tou kāiga kolā e fakatoka mō te oko mai o te Mesia māfai ko ‵togi a te mea tenā. Ke na fakatuanaki ki te folafolaga tenei a Ieova: “E se tiakina lele eiloa ne au koutou, e se tuku tiaki lele eiloa ne au a koutou.”​—Epelu 13:5.

Kausaki Atu ki Fakamoemoega Faka-te-Agaga

9. Ka fesoasoani atu pefea a te kausaki atu ki fakamoemoega faka-te-agaga ki te kāiga?

⁹ A te suā auala e fakamalosi aka ei ne kāiga a te lotou fakatuanaki mo te ‵lei o te kāiga kātoa i te feitu faka-te-agaga, ko te fakatokaga o fakamoemoega faka-te-agaga kae kausaki atu ki ei. Ka fesoasoani atu a te mea tenei ke fakaiku aka ne te kāiga a te lotou ga‵solo ki mua i te taviniga ki a Ieova kae filifili aka foki a galuega kolā e ‵tau o fakatāua ne latou i olotou olaga.​—Faitau te Filipi 1:​10.

10, 11. E pelā me se kāiga, ne a fakamoemoega faka-te-agaga e ‵tau o kausaki atu ki ei, kae ne a fakamoemoega i aso mai mua e ‵tau o fakatoka ne koe?

¹⁰ A te fakatokaga o tamā fakamoemoega aoga ke kausaki atu ki ei a te kāiga e maua mai i ei a mea aoga e uke. Mafaufau la ki te fakamoemoega ke sau‵tala ki te tusi siki mō te aso i aso katoa. A tali kolā e fai ne tino i te kāiga e mafai o fesoasoani atu ki te ulu o te kāiga ke lavea ne ia te lasi o te lotou a‵lofa ki a Ieova mo te munatonu. A te fakamoemoega ke faitau ki te Tusi Tapu i aso katoa fakatasi mo te kāiga e maua i ei se avanoaga gali ke momea aka te atamai o tama‵liki i te fai‵tau e pelā foki mo te lotou malamalama i te fekau i te Tusi Tapu. (Salamo 1:​1, 2) Kae e mata, e se fakamoe‵moe tatou ke momea aka te ‵lei o ‵tou ‵talo e fai? A te atiakaga o fuataga o te agaga i se auala tai lasi atu e mafai o fai e pelā me se fakamoemoega gali ke kausaki atu ki ei. (Kalatia 5:​22, 23) Kae e a māfai e ‵sala atu tatou ki auala e fakaasi atu ei a lagonaga atafai ki tino kolā e fetaui mo tatou i te galuega talai? A te taumafai ke fai penā e pelā me se kāiga e mafai o fesoasoani atu ki tama‵liki ke atafai, kae ka ati aka foki ne latou se manakoga ke tavini atu e pelā me ne paenia tumau io me ne misionale.

¹¹ Kaia e se sau‵tala ei ki nisi fakamoemoega kolā e mafai o kausaki atu ki ei tou kāiga? E mata, e mafai o fakatoka ne tou kāiga se fakamoemoega ke fakamāumāu a taimi e uke i te galuega talai? E mata, e taumafai koe ke mo a ma manavase e uiga ki te talai atu i telefoni, i te auala, io me ko sitoa? Kae e a te ga‵lue i koga kolā e lasi te manakoga mō tino talai o te Malo? E mata, e mafai o tauloto ne se kāiga se ‵gana fou ko te mea ke fakaoko atu te tala ‵lei ki tino mai fenua fakaa‵tea?

12. Ne a mea e mafai o fai ne ulu o kāiga ke fesoasoani atu ki olotou kāiga ke ga‵solo ki mua i te feitu faka-te-agaga?

¹² E pelā me se ulu o te kāiga, ke onoono ki feitu kolā e mafai ei o gasolo ki mua te kāiga i te feitu faka-te-agaga. Ko fakatoka ei a fakamoemoega ‵tonu kae kausaki atu ki ei. E ‵tau o aoga a fakamoemoega kolā e fakatoka ne te kāiga kae e ‵tau o fai e ‵tusa mo fakanofonofoga mo mea e mafai ne latou o fai. (Faataoto 13:12) E tonu, e uke a taimi e ‵tau o ga‵lue i ei ke maua ne latou a fakamoemoega aoga. Tela la, ke fakaavanoa a taimi kolā e onoono ki te vitio kae fakaaoga mō mea faka-te-agaga. (Efeso 5:​15, 16) Galue malosi ke kausaki atu ki fakamoemoega e fakatoka ne koe mō tou kāiga. (Kalatia 6:9) A te kāiga telā e kausaki atu ki mea faka-te-agaga ka “matea ne tino katoa” a te lotou ga‵solo ki mua.​—1 Timoteo 4:​15.

Ke Fakatumau te Tapuakiga a te Kāiga i Afiafi

13. Se a te ‵fuliga ko oti ne fai i te fakasologa o fakatasiga a te fakapotopotoga i te vaiaso, kae ne a fesili e ‵tau o mafau‵fau tatou ki ei?

¹³ A te ‵fuliga tāua o fakatasiga i vaiaso telā ne kamata i a Ianuali 1, 2009 se fesoasoani aoga ki kāiga “ke toka” mō te oko mai o te Tama a te tagata. Ko se toe manakogina ke ‵kau fakatasi tatou i se aso o te vaiaso ke fai ei a te Sukesukega a te Fakapotopotoga ki te Tusi. Ko fai fakatasi a te fakatasiga tenei mo te Akoga mō Tino Talai mo te Fakatasiga mō te Galuega Talai. Ne fai te ‵fuliga tenei ke fakaavanoa atu ki kāiga Kelisiano ke fakamalosi aka te lotou feitu faka-te-agaga mai te filifili aka o se afiafi i vaiaso takitasi mō te tapuakiga a te kāiga. Ona ko te mea ko leva ne fakamasani tatou ki te ‵fuliga tenei, e mafai o fesili ifo tatou penei, ‘E mata, e fakaaoga ne au te avanoaga tenei ke fai te Tapuakiga a te Kāiga i te afiafi io me ko sukesukega totino? E mata, ka manuia eiloa aku taumafaiga ke tautali atu i te fakatokaga tenā?’

14. (a) Se a te ‵toe auala tāua ke fakatumau ei te Tapuakiga a te Kāiga i te afiafi io me ko sukesukega totino? (e) Kaia e tāua ei a te fakaavanoa o se afiafi ke fai a sukesukega?

¹⁴ A te fakatumauga o te Tapuakiga a te Kāiga i te afiafi io me ko sukesukega totino ko te ‵toe auala tāua ke fakapilipili atu ei ki te Atua. (Iakopo 4:8) Kafai e fakaaoga ne tatou a taimi ke suke‵suke ki te Tusi Tapu kae momea aka ‵tou iloa e uiga ki te Mafuaga, ka fakamalosi aka ei te ‵tou fesokotakiga mo ia. Ko te ‵pili o tatou mo Ieova, ko te lasi foki o te ‵tou a‵lofa ki a ia ‘mo ‵tou loto kātoa, ‵tou ola kātoa, ‵tou mafaufau kātoa, mo ‵tou malosi kātoa.’ (Maleko 12:30) E tonu, e loto finafinau eiloa tatou ke faka‵logo ki te Atua kae fakaakoako atu ki a ia. (Efeso 5:1) Kae ko te fakatumauga o te Tapuakiga a te Kāiga i te afiafi ko te kī tāua ke fesoasoani atu ki te kāiga “ke toka” i te feitu faka-te-agaga i te taimi e fakatalitali ei tatou ki te ‘fakalavelave lasi’ telā ko leva ne ‵valo mai. (Mataio 24:21) E tāua ‵ki eiloa ke ‵sao tatou.

15. E aoga pefea a te tapuakiga a te kāiga i te afiafi ki te fesokotakiga o tino taki tokotasi i loto i te kāiga?

¹⁵ A ko te suā mea e tāua ei te fakatokaga ki te Tapuakiga a te Kāiga​—me e fesoasoani atu ki te kāiga ke ‵pili te va o te suā tino ki te suā tino. A te ‵kau fakatasi ke sau‵tala ki mea faka-te-agaga e lasi ‵ki tena aoga ki te auala e fesokotaki ei a tino i loto i te kāiga. Ka fealofani eiloa se tauavaga māfai e lagona ne lāua te fiafia ke tauloto fakatasi lāua mai te Tusi Tapu! (Faitau te Failauga 4:​12.) E fia‵fia eiloa a mātua mo tama‵liki kolā e tapuaki kae ‵kau fakatasi i te alofa, “telā e fusi fakatasi . . . ne ia a mea katoa ke ‵lei.”​—Kolose 3:​14.

16. Fakamatala mai me ne aoga pefea ki tuagane faka-te-agaga e tokotolu a te fakaavanoa ne latou o se afiafi ke fai te akoga faka-te-Tusi Tapu.

¹⁶ Mafaufau ki te auala ne maua ei ne tuagane e tokotolu a mea aoga mai te fakatokaga ke fakaavanoa se afiafi mō sukesukega totino io me se akoga faka-te-Tusi Tapu. E tiga eiloa e se kāiga latou, ne ‵nofo fakatasi a tuagane ma‵tua konei kolā ko ‵mate olotou avaga i te fa‵kai e tasi kae ne fai latou e pelā me ne taugasoa i tausaga e uke. Mai te manakoga ke ‵kau fakatasi latou kae ke fakatāua a mea faka-te-agaga i lō a mea masani o te olaga, ne filifili aka ne latou ke fakaavanoa se afiafi ke suke‵suke latou ki te Tusi Tapu. Ne kamata o fakaaoga ne latou a te tusi ko te “Bearing Thorough Witness” About God’s Kingdom. “Ko oko eiloa i te motou fia‵fia, telā ko mafai o silia atu i se itula a te motou akoga,” ko pati a se tokotasi o latou. “E taumafai matou o fakaataata a tulaga ne oko ki ei a ‵tou taina i te senitenali muamua kae sau‵tala ki mea e mafai ne matou o fai i vaegā fakanofonofoga tai ‵pau penā. Ko taumafai ei matou ke fakagalue i te galuega talai a manatu kolā ne tauloto mai i te sau‵talaga. Ne fai ne te mea tenei ke gali kae magoi a te faiga o te motou galuega talai o te Malo mo te faiga o soko i lō aso mua.” I tafa o te akoako atu o latou i te feitu faka-te-agaga, ne fai ne te fakatokaga tenei ke ‵pili a te va fakataugasoa o te suā tino ki te suā tino. “E faka­tāua ne matou a te fakatokaga tenei,” ko olotou pati.

17. Ne a manatu kolā e fesoasoani atu ki te faiga ke gali kae aoga a te Tapuakiga a te Kāiga i te afiafi?

¹⁷ Kae e a koe? E mafai pefea o maua ne koe a mea aoga mai te fakaavanoa o se afiafi mō te tapuakiga a te kāiga io me ko sukesukega totino? Kafai e se fai faeloa, ka se iku manuia ­eiloa a te fakatokaga tenei. E ‵tau o toka faeloa a te kāiga ke suke‵suke i te taimi tonu. E se ‵tau o talia ne tatou a tamā fakalavelave ke taofi aka ei ‵tou fakatokaga i te afiafi. E se gata i ei, e ‵tau o filifili aka a te mataupu i se auala telā e aoga ki tou kāiga. Ne a mea e mafai ne koe o fai ke gali te sukesukega tenei? Ke fakaaoga a auala ma‵goi ke akoako atu, kae fai a te mea tenā i se auala āva kae filemu.​—Iakopo 3:​18.a

“Ke Mataala” Kae “ke Toka”

18, 19. E pokotia pefea koe mo tou kāiga i te iloa atu me ko pili o oko mai te Tama a te Tagata?

¹⁸ A tulaga ma‵sei o te lalolagi kolā e fakamailoga i ‵tou aso nei se fakamaoniga me talu mai i te 1914, ne oko mai eiloa a aso fakaoti o te lalolagi masei a Satani. Ko pili mai eiloa a Amaketo. Ko pili o oko mai te taimi ke fakaoko mai ei ne te Tama a te Tagata a te fakamasinoga a Ieova ki tino sē amioatua. (Salamo 37:10; Faataoto 2:​21, 22) E mata, e se pokotia koe fakatasi mo tou kāiga i te mea tenā?

¹⁹ E mata, e fakalogo koe ki te fakatakitakiga a Iesu ke “kilokilo faeloa” ki mea ‵lei io me ke fakafaigofie tau kilo? E tiga eiloa e kausaki atu a tino o te lalolagi tenei ke maua a koloa, tulaga ma‵luga, io me se malosi pule, e mata, e kausaki atu tou kāiga ki fakamoemoega faka-te-agaga? E mata, e aoga ki a koutou a te fakatokaga mō te Tapuakiga a te Kāiga i te afiafi io me ko sukesukega totino? E mata, ko maua ne koe a mea kolā ne fakamoemoe koe ki ei? E pelā mo te mea ne sau‵tala ki ei i te mataupu muamua, e mata, e fai ne koe tou tiute faka-te-Tusi Tapu e pelā me se tagata avaga, se fafine avaga, io me se tamaliki, mai te fesoasoani atu ki te kāiga kātoa ke “mataala”? (1 Tesalonia 5:6) Kafai e penā loa, ka “toka” faeloa koe mō te oko mai o te Tama a te Tagata.

[Fakamatalaga fakaopoopo]

Ne a Mea e Tauloto ne Koe?

• Ke fakamatala mai a te auala e mafai ei ne kāiga Kelisiano o fai ke “toka” latou mai . . .

te “kilokilo faeloa” ki mea ‵lei.

te fakatoka kae kausaki atu ki fakamoemoega faka-te-agaga.

te fakatumauga o te Tapuakiga a Kāiga i afiafi.

[Ata i te itulau e 16]

A te “kilokilo faeloa” ki mea ‵lei io me fakafaigofie tau kilo ka fai ei ke ‵teke atu ne tatou a fakalavelave o te lalolagi