E Mata, ko Oti ne Fakatoka ne Koe se Taimi mō Sukesukega ki te Tusi Tapu?

I TE tausaga ko teka, ne faka‵pula mai ne te Potukau Pule se fakamafuliga ki te fakatokaga o fakatasiga a te fakapotopotoga telā e maua ei a taimi e uke atu mō sukesukega ki te Tusi Tapu mo sau‵talaga e pelā me se kāiga. Kafai koe se ulu o te kāiga, ke fakamautinoa aka me e fai faeloa kae aoga foki te sukesukega ki te Tusi Tapu a te kāiga mo tou avaga mo tama‵liki. Ka ma‵nako a taki tauavaga kolā e seai ne olotou tama‵liki ke fakaaoga te taimi tenei ke sukesuke fakatasi ki te Tusi Tapu. Ka fakaaoga foki ne taina mo tuagane taka kolā e seai ne olotou tiute faka-te-kāiga a te taimi tenei mō sukesukega totino ki te Tusi Tapu.

Ko oti ne fakaasi mai ne tino e tokouke a te lotou loto fakafetai mō te fakatokaga ke fai se Tapuakiga a te Kāiga i te afiafi. E pelā me se fakaakoakoga, ne tusi mai penei se toeaina, ko Kevin: “A te pati ‘fakafetai’ e se taitai o lava ke fakaasi atu ei ne matou i te fakapotopotoga a omotou lagonaga. E pelā me ne toeaina, ko oti ne sau‵tala matou ki te auala e fakaaoga ei a taimi sao‵sao i po ke fai a mea kolā e fakamalosi mai ne te Potukau Pule​​—⁠ke suke‵suke fakatasi mo omotou kāiga.”

Ne tusi mai a Jodi telā e avaga ki se toeaina, penei: “E tokotolu ma tamaliki fa‵fine, olotou tausaga ko 15, 11, mo te 2. Ne fatoa ‵kau atu matou ki se fakapotopotoga i te ‵gana fai ki tāga. E manakogina a taimi mo taumafaiga e uke ke fakatoka mō fakatasiga katoa. Nei la, ona ko te ‵fuliga tenei, ko maua ei ne matou se afiafi fakaopoopo ke ‵saga tonu atu ki te tapuakiga a te kāiga!”

Ne tusi mai penei a John mo JoAnn, se tauavaga kolā ne tavini atu e pelā me ne paenia tumau: “Ne seki tumau faeloa te faiga o te motou sukesukega faka-te-kāiga ki te Tusi Tapu ona ko te mea ne taumafai matou o fai i va o fakatokaga kese‵kese a te fakapotopotoga. A te fakatokaga fou tenei se meaalofa mai i a Ieova telā e fakafou faeloa i ei tatou i te feitu faka-te-agaga​​—⁠māfai e fakaaoga ne tatou a te taimi i te auala e ‵tau ei o fai ne tatou.”

Ne fakaaoga ne Tony, se taina taka ko 20 tupu ana tausaga, a te afiafi o te Aso Lua mo fai ana sukesukega totino. E fakaaoga ne ia a nisi taimi o te vaiaso ke fakatoka ei mō fakatasiga a te fakapotopotoga. Kae e fai mai a Tony, “E olioli malosi eiloa au ki Aso Lua.” Kaia? “A te afiafi tenā ko toku taimi fakapito mo Ieova.” E fakamatala mai a Tony, penei: “E nofo loa pelā ki se lua itula, e sukesuke ei au ki mataupu kolā e fakamalosi aka ei toku fesokotakiga mo Ieova. A te uke o taimi e fakaaoga mō sukesukega e mafai ei ne au o mafaufau ‵loto ki fuaiupu i te Tusi Tapu kolā e faitau ne au.” Se a te ikuga? “E oko ‵tonu ifo eiloa a pati fakatonutonu a Ieova ki toku loto i lō aso mua.” E mata, e mafai o tuku mai ne ia se fakaakoakoga? “I te tusi ko te Insight, e faitau au e uiga ki te va fakataugasoa o Tavita mo Ionatana. Ne tauloto au ki mea e uke mai i te kilokiloga sē kaimanako a Ionatana. Ne fesoasoani mai tena fakaakoakoga ke maina faka‵lei au i te uiga o te taugasoa tonu. E olioli faeloa au ke sukesuke ki koloa tāua e uke atu i po o Aso Lua!”

E seai se fakalotolotolua me i tavini katoa a Ieova ka maua ne latou a mea aoga e uke mai i te fakaaogaga o nisi taimi kolā ko avanoa nei mō sukesukega aoga ki te Tusi Tapu mo tapuakiga a te kāiga.