“Afea e Fakalogo Mai ei Koe ki Aku Talosaga mō se Fesoasoani?”
“Au e manako ke gata toku ‵mae!” ko te ‵tagi a Jayne. Ne maua ne ia a te masaki ko te kenisa, kae ko salalau i tena foitino kātoa. Ko oko eiloa i te ma‵nako o ana kāiga mo ana taugasoa o ave keatea tena masaki mo tena tigāina! Ne ‵talo atu latou ki te Atua mō se fesoasoani. E mata, e fakalogo mai a ia? E mata, e atafai mai a ia?
A TE Atua e iloa ne ia a fakanofonofoga o kāiga faka-te-foitino. E fai mai tena Muna, ko te Tusi Tapu, penei: “Me e iloa ne tatou i mea katoa ne faite, ne ma‵nava fi‵ta; e pelā eiloa mo te ‵mae o te fafine fanau, ke oko mai eiloa ki aso nei.” (Loma 8:22) E iloa ne te Atua me e lau i selau miliona o tino kolā e logo‵mae, e pelā mo Jayne, i aso katoa, i te feitu faka-te-foitino io me ko feitu tau te mafaufau. E lavea ne te Atua te 800 miliona o tino e ‵moe fia‵kai i po katoa, e lau foki i miliona o tino e pokotia i fakasauaga i olotou kāiga, mo te tokouke o mātua e manava‵se ki te olaga ‵lei o olotou tama‵liki i aso mai mua. E mata, kai mafaufau aka loa koe me ka faka‵lei aka ne te Atua a fakalavelave katoa konei? E mautinoa eiloa, me ona ko te fia fesoasoani atu o tatou ki tino kolā e a‵lofa tatou ki ei, e mata, e se manako te Atua o fesoasoani atu ki kāiga faka-te foitino, kolā ne faite ne ia?
Kafai ne ‵sili atu ne koe a fesili tai ‵pau penā, e se ko koe tokotasi fua ne ‵sili ne koe a vaegā fesili penā. E silia atu i te 2,600 tausaga ko ‵teka, ne ‵sili atu foki ne te tagata fakamaoni tenei ko Sapakuka a fesili kolā e ‵sili sāle ne te tokoukega o tino i ‵tou aso nei, ne fai atu a ia ki te Atua, penei: “Te Aliki, afea e fakalogo mai ei koe ki aku talosaga mō se fesoasoani, o faka‵sao matou mai te fakasaua ne omotou fili? Ai a e fai ei ne koe ke lavea ne au a puapuaga konā? E mafai pefea ne koe o kufaki tou kilokilo atu ki faiga sē ‵tonu konā? A te fakamasei mo te fakasaua ko fai valevale i oku feitu, ka ko taua mo kinauga ko salalau i koga valevale.” (Sapakuka 1:2, 3) A Sapakuka, se pelofeta Epelu, telā ne lagona ne ia a te sē tokagamalie o tena mafaufau i amioga ma‵sei mo kinauga i ana aso. I ‵tou aso nei, a vaegā amioga penā koi taku loa pelā me ne mea fakatakalia‵lia ki tino amio‵tonu.
E mata, ne fakaseaoga ne te Atua a manatu o Sapakuka? Ikai. Ne fakalogo faka‵lei a ia ki fesili a Sapakuka kolā ne fai atu mo te fakamaoni kae ne fakamafanafana kae fakamalosi ne ia te tagata loto mafatia tenei. Ne fakamalosi aka ne Ieova te Atua a te fakatuanaki o Sapakuka mai te tauto atu ki a ia me ka fakagata ne Ia a logo‵maega katoa. A te folafolaga a te Atua ki te fakamoemoega, e mafai foki o fakamafanafana atu ki a koe, e pelā mo te fakamafanafana atu ki a Jayne mo tena kāiga. A mataupu kolā e ‵soko mai ka tuku mai i ei a tali ki fesili konei: E mafai pefea o fakamautinoa aka ne tatou me e atafai tonu mai eiloa te Atua ki a tatou? Ne a mea ka fai ne te Atua ke fakagata aka ei a logo‵maega, kae mafea la?