Se Fakalavelave I Te Lalolagi Kātoa, Se Faka‵leiga i te Lalolagi Kātoa

A LOGO‵MAEGA ko salalau i koga katoa, kae e tokouke a tino e loto fia‵fia o fesoasoani atu ki tino kolā e logo‵mae. E pelā me se fakaakoakoga, a te matagaluega o te fa‵kaimasaki e leva ‵ki a te taimi e ‵tu ei a tino ga‵lue ko te mea ke mafai o fesoasoani atu ki tino ma‵saki mo tino pa‵kia. A tino ta afi, pulisimani, tino fai tulafono, penā foki loa mo matagaluega kolā e fakafeagai mo mea ‵tupu fakafuasei e taumafai malosi ko te mea ke fakafeoloolo aka io me ke puipui a te logo‵mae o nisi tino. A vaegā taumafaiga penei e aoga ‵ki eiloa ki tino, kae e se mafai eiloa ne se tino e tokotasi io me se fakapotopotoga o fakagata aka a logo‵maega konei i te lalolagi kātoa. E ‵kese mai i a latou, e mafai eiloa ne te Atua o tuku mai se faka‵leiga ki te lalolagi kātoa.

E fakamautinoa mai eiloa a pati konā i te ‵toe tusi o te Tusi Tapu: “Ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.” (Fakaasiga 21:4 ) Mafaufau la ki te tokouke o tino ka pokotia i te folafolaga tenā. E fakamatala fakatoetoe mai i ei a te fuafuaga a te Atua ke fakaseai atu a logo‵maega katoa. Ka fai ne ia penā mai i te ave keateaga o taua i te lalolagi, ogega meakai, faifaiga sē fakamaoni, fakatasi foki loa mo tino amio ma‵sei katoa. E seai eiloa se tino e mafai o fakataunu ne ia a te mea tenā.

Mea Kolā ka Fai ne te Malo o te Atua

Ka fakataunu ne te Atua tena folafolaga e auala i te tokolua o tino ma‵losi i te lagi mo te lalolagi​—⁠ko Iesu Keliso telā ne toetu aka. E oko mai te taimi ka kamata ei o pule katoatoa mai a Iesu e pelā me se Tupu ki luga i te lalolagi kātoa. A tino ka se toe ‵nofo mai lalo i pulega a tupu, pelesitene, io me ko tino fakapolitiki. I lō te fai penā, ka pule tatou ne te Tupu e tokotasi mo te malo e tasi​—⁠ko te Malo o te Atua.

A te Malo tenā ka fakaseai atu ne ia a pulega a tino. Ko leva ne ‵valo mai ne te Tusi Tapu: “Ka fakatu ne te Atua o te lagi a te malo telā ka se toe gata mai. Ka se toe mafai o takavale te malo tenā. Ka fakatakavale ne ia a malo katoa konā, kae ka tumau ki te se gata mai.” (Tanielu 2:44) A tino i te lalolagi kātoa ka ‵kau fakatasi mai lalo i te pulega amiotonu​—⁠ko te Malo o te Atua.

I te taimi ne nofo ei a Iesu i te lalolagi nei, ne talai a ia i koga kese‵kese e uiga ki te Malo tenā. Ne fakasino atu foki a ia ki te mea tenei i te ‵talo a te Aliki, mai i te akoako atu ki ana soko ke ‵talo penei: “Ke oko mai tou Malo, ke fai te mea e loto koe ki ei i lalo nei, e pela mo te faiga i te lagi.” (Mataio 6:10) Mafaufau me ne fai mai a Iesu me i te Malo tenā ka fakataunu ne ia te fuafuaga a te Atua ki luga i te lalolagi, telā ka ave kea‵tea ei ne ia a logo‵maega i te lalolagi kātoa.

A te Malo amiotonu o te Atua ka aumai ne ia a fakamanuiaga kolā e se mafai ne pulega a tino o fai. Ke masaua me ne tuku mai ne Ieova tena Tama e pelā me se taulaga ko te mea ke maua ne tino katoa a te ola se gata mai. Mai lalo i te pulega alofa kaimalie a te Malo tenei, a tino ka kamata o gasolosolo atu ki te tulaga ‵lei katoatoa. Se a te ikuga? A Ieova “ka fakagata ne ia te mate ke se toe ai eiloa! Ka ‵solo ne ia a loimata mai i mata o tino katoa.”​—⁠Isaia 25:⁠8.

Ka fesili mai a nisi tino: ‘Kaia e seki na gasuesue ei te Atua o fai penā a koi tuai o oko mai ki te taimi nei? Se a te mea e faka‵tali a ia ki ei?’ Ko leva eiloa ne mafai ne Ieova o fakagata a logo‵maega katoa. Kae i lō te fai penā, ne talia ne ia ke ‵tupu a mea konei e aunoa mo se manakoga kaimanako, kae ke maua ne ana tama‵liki i luga i te lalolagi tenei a mea aoga tumau. A mātua a‵lofa e mafai o talia ne latou olotou tama‵liki ke aofia i mea faiga‵ta māfai e iloa ne latou me ka maua i ei a mea aoga tumau. Kae e penā foki loa a Ieova, e isi ne pogai ‵lei e talia ei ne ia ke maua ne tino a logo‵maega mō se vaitaimi toetoe penei, kae e fakamatala mai a pogai konei i te Tusi Tapu. E aofia i ei a te ‵tou saolotoga, agasala, mo te kinauga e uiga ki te ‵tonu o te pulega a Ieova. E fakamatala mai foki i te Tusi Tapu, me e isi se agaga masei ko oti ne talia ke pule mai ki te lalolagi nei mō se vaitaimi toetoe.a

E tonu, e se mafai o fakamatala mai a pogai katoa konei i nāi laupepa konei, kae e lua fua a manatu ‵tonu kae tāua kolā e mafai o tuku mai i ei ki a tatou se fakamoemoega mo fakamalosiga. A te pogai muamua: E mafai o fakamanuia tatou ne Ieova ke silia atu i logo‵maega kolā e maua ne tatou. E se gata i ei, ne fai mai a te Atua ki a tatou: “A mea ne ‵tupu i aso ko ‵teka ka se toe manatua eiloa.” (Isaia 65:17) Ka fakaseai katoatoa ne te Atua a te loto mafatia mo logo‵maega kolā ne iku mai i te taliaga ke ‵tupu a mea ma‵sei mō se vaitaimi toetoe.

A te lua o pogai: Ko oti ne fakamoe ne te Atua te taimi tonu ke fakagata aka ei a logo‵maega katoa. E ‵tau foki o tuku i ‵tou mafaufau me ne fai atu te pelofeta ko Sapakuka ki a Ieova, me mafea e fakagata aka ei ne Ieova a logo‵maega katoa. Ne tali atu a Ieova penei: “Tusi ki lalo, me e seki oko mai te taimi e fakataunu ei . . . E oko mai eiloa, kae ka se tuai foki.” (Sapakuka 2:⁠3) E pelā mo te mea ka onoono tatou ki ei i te suā mataupu, ko pili mai eiloa “te taimi” tonu tenā.

[Fakamatalaga fakaopoopo]

[Ata i te itulau e 7]

Tusi Siki Kolā e Fakasino Atu ki Taimi ‵Gali i Aso Mai Mua

KA SE TOE AI NE TAUA:

“O‵mai o ‵kilo ki mea ne fai ne te Aliki. ‵Kilo ki mea fakaofoofogia ne fai ne ia i te lalolagi. E fakagata ne ia a taua i te lalolagi kātoa.”​—Salamo 46:8, 9.

KA TOE‵TU MAI ‵TOU TINO PELE:

“Me i tino ‵lei mo tino sē ‵lei, ka faka‵tu mai katoa mai te mate.”​—Galuega 24:⁠15.

KA LAVA A MEA‵KAI MŌ TINO KATOA:

“Ke fakamaumea te fenua i saito; ko mauga foki ke ‵fonu i fuagalakau.”​—Salamo 72:16.

KA SE TOE AI NE MASAKI:

“Ka seai eiloa se tino i luga i te ‵tou fenua e tagi i a ia e masaki.”​—Isaia 33:24.

KA ‵GALO ATU A TINO AMIO MA‵SEI:

“Ka ko te Atua ka tapale keatea ne ia a tagata amio ma‵sei mai i te fenua, kae unu keatea a tino agasala, e pelā me ne lakau e unu keatea mai i te laukele.”​—Faataoto 2:22.

KA TUMAU TE FAI MEA TONU:

“I se aso fakamuli kae ka isi se tupu telā ka pule mo te fakamaoni, mo takitaki o te fenua kolā ka pulepule mo te fai mea tonu.”​—Isaia 32:1.

[Ata i te itulau e 7]

Ka faka‵lei ne te Malo o te Atua so se logo‵maega telā e maua nei ne tatou