Ko Pili O Palele Atu a Logo‵maega Katoa!

Kāti ko oti ne fesili ifo koe i se taimi e tasi i tou olaga, ‘Kaia ko uke ‵ki ei a logo‵maega?’ Ko oti ne logo‵mae a tino i te fia afe tausaga ona ko taua, te mativa, fakalavelave ‵tupu fakafuasei, amioga soli tulafono, fakamasinoga mo faifaiga sē fakamaoni, masaki mo te mate. Kae ne silia atu i te uke o logo‵maega ne pokotia ei a tino i te selau tausaga ko ‵teka i lō aso mai mua atu i ei. E mata, e isi se gataga o mea katoa konei?

Ao, tenā eiloa te tali fakamafanafana loto ki ei, kae ko pili foki o tupu te mea tenā! E folafola mai te Muna a te Atua, ko te Tusi Tapu: “E se toe leva nei, ka galo atu ei a tino amio ma‵sei . . . ka ko latou kolā e loto malalo, ka fai mo latou te fenua io me ko te lalolagi, kae ka maua ne latou te manuia mo te filemu katoatoa.” Ka pefea te leva e maua ei ne latou te lalolagi mo te filemu? “A tino amio‵tonu ka fai mo latou te fenua io me ko te lalolagi, kae ka ‵nofo faeloa i ei ki te se gata mai.”​—⁠Salamo 37:​10, 11, 29.

Kafai ko oti ne fakaseai ne te Atua a amioga ma‵sei mo logo‵maega, ka ‵fuli ei a te lalolagi mo fai se palataiso. Ko mafai ei o ‵nofo a tino i luga i ei ki se-gata-mai i te malosi mo te fiafia katoatoa. E ‵valo mai te Tusi Tapu penei: “Ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.”​—⁠Fakaasiga 21:⁠4.

I te lalolagi fou tenā, ka toe fakaola mai a tino ‵mate ke maua foki ne latou a fakamanuiaga konā: “I tino ‵lei mo tino se ‵lei, ka faka‵tu mai katoa mai te mate.” (Galuega 24:15) Tenā eiloa te pogai ne mafai ei o fai atu a Iesu ki te pagota telā ne salamō tonu kae fakaasi atu tena fakatuanaki ki a Ia: ‘Ka fakatasi eiloa taua i te Palataiso.’​—⁠Luka 23:43.

Kaia ne Isi ei ne Logo‵maega?

Ona ko te fuafuaga a te Atua ke maua ne tino se olaga gali i aso mai mua, kaia la ne talia ei ne ia a logo‵maega? Kaia ne talia ei ne ia ke leva katoa penei?

I te taimi ne faite ei ne te Atua a Atamu mo Eva, ne faite ne ia a laua ke ‵lei katoatoa lā foitino mo lā mafaufau. Ne tuku ne ia laua ki se fatoaga telā ne fai pelā me se palataiso kae tuku atu a galuega fakafia‵fia ke fai ne laua. E fai mai te Tusi Tapu: “Ne kilo atu te Atua ki ana mea katoa ne faite, fiafia malosi eiloa a ia.” (Kenese 1:31) Moi ne faka‵logo laua ki te Atua, penei ko fa‵nau mai ne laua ne tama‵liki ‵lei katoatoa, kae ko fai foki te lalolagi kātoa mo fai se palataiso, ko te koga telā ka ola ei a tino ki te se-gata-mai i te filemu mo te fiafia.

Ne tuku atu ne te Atua ki a Atamu mo Eva te meaalofa tafasili i te gali ko te saolotoga ke fai a lā filifiliga, e pelā me se vaega e tasi o lā foitino. Kae ne seki faite laua e pelā me se tino faite telā e se mafai o fai ne ana filifiliga. Kae, ne fakalagolago eiloa te tumau o te lā fia‵fia ki te fakaaogāga faka‵lei o te saolotoga tenā​—⁠mai te faka‵logo ki tulafono a te Atua. E pelā mo pati a te Atua: “Au ko te Aliki te otou Atua, telā e manako o akoako koutou ke ‵lei koutou kae fakatonutonu foki koutou i te auala e ‵tau o olo koutou i ei.” (Isaia 48:17) A te fakaaogā ‵se o te saolotoga tenā ka iku atu eiloa ki se tulaga fakamataku, me ne seki faite a te tagata ke mafai o manuia tena olaga māfai e tu tokotasi a ia mai te Atua. E fai mai te Tusi Tapu: “E iloa ne au me e seai se tino e pule i tena ikuga; e seai se tino e pule i tena ola.”​—⁠Ielemia 10:23.

Se mea fakafanoanoa, me ne mafau‵fau a ‵tou mātua muamua me e mafai o ‵tu tokotasi laua mai te Atua kae manuia i ei. Kae i te taimi ne ‵teke atu ei laua ki te pulega a te Atua, ne seki toe tausi ei laua ne ia ke tumau i te ‵lei katoatoa. Tenā ne gasolo ei laua o vāivāi ke oko ki te taimi ko ma‵tua kae ‵mate atu ei. Ona ko tatou ne o‵mai mai te lā gafa ne maua ei ne tatou te tulaga sē ‵lei katoatoa tenā mo te mate.​—⁠Loma 5:12.

Te ‵Toe Kinauga Tāua e Uiga ki te Pulega

Kaia ne seki tamate ei ne te Atua a Atamu mo Eva kae toe faite se isi tauavaga? Ona me ko oti ne fakafesiligina a tena saolotoga ke fai tena pulega i te lagi mo te lalolagi kātoa. Te fesili telā ne sae aka: Ko oi te tino e ‵tau o pule, kae i a ai te pulega e tonu? E ‵tusa mo mea konā, e pelā me ne fai mai penei: E mata, e mafai o ‵lei atu a pulega a tino i lō te pulega a te Atua? I te taliaga ne te Atua se vaitaimi e lava ke tofotofo aka ei a tino ki se olaga saoloto katoatoa mai i a ia, ka fakaasi ‵tonu mai ei te mea tonu e uiga ki te lotou ‵lei mai lalo i tena pulega io me ko olotou pulega. A te taimi telā ne fakaavanoa atu mō te mea tenā ne ‵tau o lava tena leva ke mafai ei o tofotofo aka a tino ki faigā malo, vaegā olaga, mea tau tupe, mo vaegā tapuakiga kese‵kese e aunoa mo te takitakiga a te Atua.

Se a te mea ko oti ne iku mai i ei? E fakaasi mai i tala o mea ko oti ne ‵tupu i te fia afe o tausaga me ne gasolo aka fua o sinā uke aka a logo‵maega ne oko atu ki tino katoa. Kae ne maua ne tino katoa a toe logo‵maega ma‵sei i te senitenali ko teka. E lau i miliona ne ‵mate i falepuipui fakasauā i te Taua a te Lalolagi i te lua. E silia atu i te 100 miliona o tino ne ‵mate i taua. Ko salalau valevale a amioga soli tulafono mo amioga fakasauā. Te fakaaogāga ‵se o vailakau tapu ko oti ne fai mo fai se famai ‵pisi i te lalolagi kātoa. E tumau eiloa te ‵pisi o masaki kolā e māfua mai i faifaiga fakatauavaga fai valevale. E lau i sefulu miliona a tino e ‵mate ona ko te fia‵kai mo masaki. Ko oti eiloa ne malepelepe valevale a te tulaga ‵lei o te kāiga pelā foki mo amioga i koga katoa. E seai eiloa se malo o tagata e mafai o faka‵lei ne ia a fakalavelave konei. E seai eiloa se tino ko oti ne manumalo i te olaga mātua, masaki mo te mate.

E fakaasi mai i mea konei a te mea telā ko leva ne ‵valo mai i te Tusi Tapu me ka tupu i ‵tou aso nei. E fakasino atu a te Muna a te Atua ki ‵tou taimi nei me ko “aso fakaoti” o te olaga tenei telā ka fe‵paki ei a tino mo “taimi faiga‵ta.” Kae pelā eiloa mo muna i te Tusi Tapu, ‘ka ko tino amio ma‵sei mo te fakaloiloi tino ka gasolo atu mai te masei ki te na masei atu.’​—⁠2 Timoteo 3:​1-5, 13.

Ko Pili o Palele Atu a Logo‵maega

E fakaasi mai i fakamaoniga katoa me ko pili atu tatou ki te gataga o mea fakafanoa‵noa o te tu tokotasi mai te Atua. Ko oti ne fakamaoni faka‵lei mai me e se mafai eiloa o manuia a pulega kolā e ‵tu tokotasi mai te Atua. Ko te pulega fua a te Atua ka aumai ne ia te filemu, te fiafia, te malosi ‵lei katoatoa mo te ola se-gata-mai. Tela la, ko pili fua o fakagata ne Ieova a amioga ma‵sei mo logo‵maega katoa. Ko pili fua nei o saga mai te Atua ki pulega a tāgata mai te fakaseaiga katoatoa o te olaga masei tenei.

E fai mai penei te valoaga i te Tusi Tapu: “I te taimi o takitaki konā [ko malo o tagata i te vaitaimi nei], kae ka fakatu ne te Atua o te lagi a te malo [i te lagi] telā ka sē toe gata mai. . . . Ka fakatakavale ne ia a malo katoa konā [pulega i aso nei], kae ka tumau ki te se gata mai. (Tanielu 2:44) A te taku‵leiga o te pulega a Ieova, ko tena saolotoga ke pule mai, e auala i tena Malo i te lagi, ko te ‵toe akoakoga maluga eiloa tenā i te Tusi Tapu. I tena valoaga e uiga ki se fakailoga tāua e tasi o “aso fakaoti,” ne fai mai Iesu: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino io me ki atufenua katoa; ko oko mai ei te gataga.”​—⁠Mataio 24:14.

Kafai e oko mai te gataga, ko oi la ka ‵sao i ei? E tali mai te Tusi Tapu: “A tino amio‵tonu kae fai mea tonu ka ola i te fenua io me ko te lalolagi tenei. Ka ko te Atua ka tapale keatea ne ia a tāgata amio ma‵sei mai i te fenua io me mai te lalolagi.” (Faataoto 2:​21, 22) A tino amio‵tonu ko tino kolā e iloa ne latou te loto o Ieova kae fai ne latou. Ne fai mai a Iesu Keliso: “Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.” (Ioane 17:⁠3) E tonu, “a te lalolagi mo mea katoa i ei . . . e palele atu katoa; ka ko te tino telā e fai ne ia a te mea e loto ki ei a te Atua e ola ki te se-gata-mai.”​—⁠1 Ioane 2:⁠17.

E fakaaogā i te tamā pepa tenei te Tusi Tapu i te ‵Gana Tuvalu.