Te Mesia! Ko te Fakaolataga a te Atua

“Ne ‵mate katoa tino i te agasala a Atamu; tela la, ka fakaolagina tino katoa i a Keliso.”​—⁠1 KOLINITO 15:⁠22.

1, 2. (a) Ne ‵saga atu pefea a Anitelea mo Filipo i te taimi ne fetaui ei latou mo Iesu? (e) Kaia e fai atu ei tatou me e maua ne tatou a fakamaoniga e uke atu i a Iesu ko te Mesia eiloa i lō Kelisiano i te senitenali muamua?

“KO OTI ne maua ne māua a te Mesia,” ne fai atu a Anitelea ki tena taina ko Petelu, ona ko tena talitonu me i a Iesu te Nasaleta ko te Tino Fakaekegina a te Atua. Ne talitonu foki a Filipo kae ne ‵sala atu ki tena taugasoa ko Natanielu, kae fai atu: “Ko oti ne maua ne matou a ia telā ne tusi mai ne Mose i te Tulafono, pelā foki mo pelofeta. Ko Iesu te Nasaleta, te tama a Iosefa.”​—⁠Ioane 1:​40, 41, 45.

² E mata, e talitonu katoatoa koe me i a Iesu ko te Mesia telā ne folafola mai, ko te ‘Takitaki . . . ki te fakaolataga’ a Ieova? (Epelu 2:​10) I aso nei, e maua ne tatou a fakamaoniga e uke atu o tena tulaga e pelā me ko te Mesia i lō fakamaoniga ne maua ne ana soko i te senitenali muamua. Mai i te taimi ne fanau ei a Iesu ke oko ki tena toetuga, e tuku mai i te Muna a te Atua a fakamaoniga ‵tonu me i a ia ko te Keliso. (Faitau te Ioane 20:​30, 31.) E fakaasi mai foki i te Tusi Tapu me koi tumau eiloa a Iesu i te fakataunuga o tena tulaga e pelā me ko te Mesia mai i te lagi. (Ioane 6:40; faitau te 1 Kolinito 15:22) I se feitu faka-te-agaga, e mafai foki o fai atu koe me ko oti ne ‘maua ne koe te Mesia’ i aso nei. Kae ke mafau‵fau muamua tatou ki te pogai ne fakaiku aka ei ne soko konā i te senitenali muamua me ko oti ne maua ne latou a te Mesia.

Ne Fakaasi Malielie Mai a te Mea “‵Funa” e Uiga ki te Mesia

3, 4. (a) Ne mafai pefea ne soko i te senitenali muamua o ‘maua te Mesia’? (e) Kaia e mafai ei o fai atu me ko Iesu fua ne mafai ne ia o fakataunu a valoaga katoa e uiga ki te Mesia?

³ Ne mafai pefea ne soko o Iesu i te senitenali muamua o mautinoa i a latou me i a ia ko te Mesia? E auala i pelofeta, ne fakaasi malielie mai ne Ieova a fakailoga e iloa ei te Mesia telā ka vau. Ne fakatusa ne se tino sukesuke ki te Tusi Tapu e tokotasi a te fakatokaga tenei ki te ‵toe fakapikipikiga o vaega takitasi o te fatagata ne faite ki fatu tāua. Mafaufau la ki tagata e tokouke kolā ne seki fesokotaki atu eiloa te suā tino ki te suā tino kae e aumai ne latou se vaega e tasi o te fatagata tenā ki se potu. Kafai e fetaui ‵lei a vaega takitasi konā ke maua mai i ei se fatagata ‵lei katoatoa, e mafai o fakaiku aka ne koe me e isi eiloa se tino telā ne katikati ne ia a vaega takitasi konei kae avatu ki tagata konā. E pelā eiloa mo vaega takitasi o te fatagata, a valoaga faka-Mesia katoa e tuku mai i ei se vaega tāua o fakamatalaga e uiga ki te Mesia.

⁴ Se a la te pogai e mafai o mafau‵fau ki ei me ne fakataunu i se auala fakafuasei ki se tino a valoaga katoa e uiga ki te Mesia? Ne fai mai se tino poto e tokotasi me ko oko eiloa i te sē tonu o te manatu me ne fakataunu fakafuasei a valoaga faka-Mesia katoa ne se tino. A “Iesu​—⁠kae ko Iesu fua i tala mua katoa​—⁠​ne mafai ne ia o fai a te mea tenā.”

5, 6. (a) Ka fakaoko atu pefea a te fakamasinoga o Satani? (e) Ne fakaasi malielie atu pefea ne te Atua a te gafa e ‵tau o sae mai i ei a te “fanau”?

⁵ A valoaga e uiga ki te Mesia se mea “‵funa” telā e uke a vaega tāua i ei ki tino i te lagi mo te lalolagi kātoa. (Kolose 1:​26, 27; Kenese 3:​15) Ne aofia i te mea ‵funa tenā a te fakamasinoga o Satani te Tiapolo, “te gata taumua,” telā ne fai ne ia ke oko atu te agasala mo te mate ki tino. (Fakaasiga 12:⁠9) E fakaoko atu pefea a te fakamasinoga tenā? Ne ‵valo mai ne Ieova me i te “fanau” a te “fafine” ka tuki pala ne ia te ulu o Satani. A te “fanau” telā ne folafola mai, ka tuki pala ne ia te ulu o te gata, mai i te fakaseaiatuga o te pogai o te ‵tekeatuga, masaki, mo te mate. Kae mai i te taliaga a te Atua, e ‵tau o fakapakia muamua ne Satani a te mulivae fakatusa o te “fanau” a te fafine.

⁶ Ne fakaasi malielie mai ne Ieova a te “fanau” telā ne folafola mai. Ne tauto atu a ia ki a Apelaamo: “E auala i tau fanau, ka fakamanuia ei ne atufenua katoa o te lalolagi a latou eiloa.” (Kenese 22:​18, Tusi Paia, Samoa) Ne ‵valo mai ne Mose me i te Tino tenei ka fai mo fai “se pelofeta” telā e sili atu i a Mose. (Teutelonome 18:​18, 19) Ne fakatalitonu atu ki a Tavita, kae toe fakamaoni fakamuli mai ne pelofeta, me i te Mesia ka tupu mai i a ia kae ka maua ne ia te nofogātupu o Tavita ki te se-gata-mai.​—⁠2 Samuelu 7:​12, 16; Ielemia 23:​5, 6.

Fakamaoniga i a Iesu ko te Mesia

7. Ne vau pefea a Iesu mai i te “fafine” a te Atua?

⁷ Ne uga mai ne te Atua tena Tama, tena mea muamua ne faite, mai i tena fakapotopotoga o ana tama faka-te-agaga, telā e fai pelā me ko Tena avaga i te lagi ke fai mo fai te “fanau” telā ne folafola mai. E manakogina i ei ke “tiakina katoatoa” ne te tama fagasele eiloa e tokotasi a te Atua a tena olaga faka-te-lagi kae ke fanau mai e pelā me se tino ‵lei katoatoa. (Filipi 2:​5-7; Ioane 1:​14) A te “oko atu” o te agaga tapu ki luga i a Malia ne fakamaoni aka ei me i te tino telā e fanau mai e ‵tau o taku ko te “tamaliki tapu tenā, ko te Tama a te Atua.”​—⁠Luka 1:​35.

8. Ne fakataunu mai pefea ne Iesu a te valoaga e uiga ki te Mesia i te taimi ne tuku atu ei a ia mō te papatisoga ki te vai?

⁸ Ne fakaasi mai i valoaga e uiga ki te Mesia a te koga mo te taimi ne sae mai ei a Iesu. Ne fanau mai a Iesu i Peteleema e pelā eiloa mo te mea ne ‵valo mai. (Mika 5:⁠2) I te senitenali muamua, ne ma‵luga ‵ki a fakamoemoega o te kau Iutaia. Ona ko te lotou olioli ke lavea atu a foliga o te Mesia, ne fesili atu a nisi tino e uiga ki a Ioane te Papatiso, me ko ia “nei ko te Keliso”? Kae ne tali atu a Ioane: “Ka vau a ia telā e sili atu i a au.” (Luka 3:​15, 16) I te fanatuga ki a Ioane i te tau e ta‵tela ei a lau o lakau i te 29 T.A. ke papatiso a ia kae ko 30 ana tausaga, ne tuku atu ne Iesu a ia eiloa e pelā me ko te Mesia i te taimi tonu eiloa. (Tanielu 9:​25) Ne kamata ei tena galuega tāua telā ne vau o fai, ana muna: “Ko oko nei ki te taimi tonu, ka ko te Malo o te Atua ko pili mai!”​—⁠Maleko 1:​14, 15.

9. E tiga eiloa e seki maua ne ia a fakamatalaga katoa, ne a fakamaoniga ‵tonu ne maua ne soko o Iesu?

⁹ Kae ne ‵tau o ‵fuli a fakamoemoega o tino. Ne ‵lei eiloa ke fakaaloalo atu ki a Iesu e pelā me ko te Tupu, kae ne seki malamalama katoatoa a tino i te taimi tenā me i te pulega ka fai i aso mai mua kae ka pule ifo a ia mai i te lagi. (Ioane 12:​12-​16; 16:​12, 13; Galuega 2:​32-​36) Kae i te taimi ne fesili atu ei a Iesu: “Ka ko koutou, se a te otou mau me ko oi au?” Ne tali fakavave atu a Petelu: “A koe ko te Keliso, ko te Tama a te Atua ola.” (Mataio 16:​13-​16) Ne ‵pau foki eiloa te tali a Petelu i te taimi ne fulitua atu ei a tino e tokouke ona ko te sē fia‵fia ki se akoakoga.​—⁠Faitau te Ioane 6:​68, 69.

Ke Faka‵logo ki te Mesia

10. Kaia ne faka‵mafa atu ei ne Ieova a te manakoga ke fakalogo ki tena Tama?

¹⁰ I te lagi, a te Tama fagasele eiloa e tokotasi a te Atua se tino faka-te-agaga kae malosi. I te lalolagi, a Iesu “ne vau mai te Atua.” (Ioane 16: 27, 28) Ana muna: “A akoakoga e fai atu ne au e se e a aku, kae e a ia telā ne uga mai ne ia au.” (Ioane 7:​16) Ke fakamaoni atu te tulaga o Iesu e pelā me ko te Mesia i te taimi ne ‵fuli ei ana foliga, ne fakatonu atu a Ieova: “Faka‵logo la ki a ia.” (Luka 9:​35) E tonu, ke faka‵logo ki te Tino Filifilia tenei. E manakogina i ei a te fakatuanaki mo galuega ‵lei​—⁠ne mea kolā e aoga ‵ki eiloa ki te fakafiafia atu ki te Atua mo te mauaga o te ola se-gata-mai.​—⁠Ioane 3:​16, 35, 36.

11, 12. (a) Ne a pogai ne ‵teke atu ei a tino Iutaia i te senitenali muamua ki a Iesu e pelā me ko te Mesia? (e) Ko oi ne fakatuanaki ki a Iesu?

¹¹ E tiga eiloa e fakaofoofogia a pogai e ‵tau ei o fai a Iesu mo fai te Mesia, ne ‵teke atu eiloa te tokoukega o tino Iutaia i te senitenali muamua ki a ia e pelā me ko te Mesia. Kaia? Me ne ‵kese olotou mafaufauga e uiga ki te Mesia, e aofia i ei a te fai mo fai se mesia fakapolitiki telā ka fakasaoloto ne ia latou mai i te pulega fakasaua a te kau Loma. (Faitau te Ioane 12:34.) Tela la, ne seki mafai o talia ne latou a te Mesia telā ne fakataunu ki ei a valoaga me ka se fia‵fia kae takalia‵lia ki a ia, kufaki i puapuaga mo te ‵mae i masaki, kae tamate atu fakamuli. (Isaia 53:​3, 5) Ke oko foki eiloa ki nisi soko o Iesu kolā ne a‵lofa fakamaoni ne seki fia‵fia me ne seki fakasaoloto latou mai i pulega fakapolitiki. Kae ne tumau eiloa te lotou a‵lofa fakamaoni, telā ne fakaasi fakamuli atu ei ki a latou a te mainaga tonu.​—⁠Luka 24:⁠21.

¹² A te suā pogai ne ‵teke atu ei a tino ki a Iesu e pelā me ko te Mesia telā ne folafola mai, ko ana akoakoga, telā ne faigata o talia ne tino e tokouke. A te ulu atu ki te Malo e manakogina i ei a te ‘sē toe mafaufau ki a ia eiloa,’ ‘kai’ ki te foitino mo te toto o Iesu, te “‵toe fanau mai,” mo te ‘sē fai mo fai ne tino o te lalolagi.’ (Maleko 8:​34; Ioane 3:3; 6:​53; 17:​14, 16) Ne ‵kilo atu a tino fakamata‵mata, tino mau‵mea, mo tino ‵loi ki mea konei e pelā me ko tō faigata ke tau‵tali atu ki ei. Kae ko tino Iutaia loto maulalo ne talia ne latou a Iesu e pelā me ko te Mesia, e pelā foki mo nisi tino Samalia kolā ne fai mai: “Ko iloa ei ne matou me ko ia tonu eiloa ko te Fakaola o te lalolagi.”​—⁠Ioane 4:​25, 26, 41, 42; 7:​31.

13. Ne oko atu pefea ki a Iesu a te pakiaga i te mulivae fakatusa?

¹³ Ne ‵valo mai a Iesu me ka taku fakamasei a ia ne faitaulaga pule kae fakasataulo ne Tino o Fenua Fakaa‵tea, kae i te tolu o aso ka toetu aka ei a ia. (Mataio 20:​17-​19) Ko ana pati mautinoa eiloa i mua o te Sanetulini me i a ia ko “te Keliso te Tama a te Atua” ne fakamasino aka ei a ia e pelā me ko muna masei. (Mataio 26:​63-​66) Ne iloa ne Pilato me i a Iesu e “seai sena mea masei ne fai, e ‵tau ei o mate,” kae ona ko te mea ne ‵losi atu eiloa te kau Iutaia me ne ‵teke atu a ia ki te malo, ne tuku atu ei ne Pilato a Iesu “e pelā eiloa mo te lotou manako.” (Luka 23:​13-​15, 25) Tela la, ne “‵teke” atu kae tamate foki ne latou a “te Tama Tapu kae Amiotonu,” faitalia a fakamaoniga e uke ‵ki me i a ia ne uga mai ne te Atua. (Galuega 3:​13-​15) Ne “tamate” a te Mesia e pelā mo te mea ne ‵valo mai, ne fakasataulo i luga i se pou i te Aso o te Paseka i te 33 T.A. (Tanielu 9:​26, 27; Galuega 2:​22, 23) E auala i te mate fakasaua tenei, ne logo‵mae ei a ia i te pakiaga i te ‘mulivae’ e pelā mo te mea ne ‵valo mai i te Kenese 3:​15.

Te Pogai e ‵Tau ei o Mate a te Mesia

14, 15. (a) Ne a pogai e lua ne talia ei ne Ieova ke mate a Iesu? (e) Ne a mea ne fai ne Iesu mai tua o tena toetuga?

¹⁴ Ne talia ne Ieova a Iesu ke mate ona ko pogai tāua e lua. Muamua la, a te fakamaoni o Iesu ke oko ki te mate ne fakaasi mai i ei se vaega tāua o te mea “‵funa.” Ne fakamaoni atu ne ia i se auala lasi ‵ki me e mafai ne se tino ‵lei katoatoa o tumau i te “amiotonu” i tena tapuakiga kae fakamaluga aka te pulega sili a te Atua faitalia a tofotofoga faiga‵ta mai i a Satani. (1 Timoteo 3:​16) A ko te lua, ne fai mai a Iesu, me i te “Tama a te Tagata . . . [ne] . . . vau . . . ke tuku atu foki a toku ola mō tino e tokouke.” (Mataio 20:28) A te ‘togiola telā e fetaui ‵lei’ ne ‵togi ki ei te fakasalaga o te agasala telā ne maua ne tama‵liki a Atamu kae ne fai ei ke mafai o maua a te ola se-gata-mai ne tino katoa kolā e talia ne latou a Iesu e pelā me ko te auala o te Atua ke tuku mai ei te fakaolataga.​—⁠1 Timoteo 2:​5, 6.

¹⁵ Mai tua o aso e tolu i te tanuga, ne toetu aka ei a Keliso, kae ne fakasae sāle atu a ia ki ana soko i aso e 40, ke fakamaoni atu ei me i a koe ko toe ola kae tuku atu foki ne ia a nisi fakatonuga. (Galuega 1:​3-5) Mai i konā ne avaka ei a ia ki te lagi ke tuku atu ki a Ieova te tāua o tena taulaga kae faka‵tali ki te taimi tonu e kamata ei te fakatasi mai o te Tupu faka-Mesia. I te vaitaimi tenā, ne uke ‵ki eiloa a mea ne ‵tau o fai ne ia.

Te Fakataunuga o Tena Tulaga e Pelā me ko te Mesia

16, 17. Ke fakamatala mai te tulaga o Iesu e pelā me ko te Mesia mai tua o tena fanakaga ki te lagi.

¹⁶ I te fia o senitenali talu mai tena toetuga, ne tausi eiloa mo te fakamaoni ne Iesu a galuega a te fakapotopotoga Kelisiano telā ne pule atu a ia ki ei e pelā me ko te Tupu. (Kolose 1:​13) I te taimi tonu, ne kamata ei o fakaaoga ne ia tena ‵mana e pelā me ko te Tupu i te Malo o te Atua. E fakamaoni mai ne valoaga i te Tusi Tapu mo mea ‵tupu i te lalolagi me ne kamata tena fakatasi mai e pelā me ko te Tupu i te 1914, e penā foki loa mo te vaitaimi o te “gataga o te lalolagi.” (Mataio 24:3; Fakaasiga 11:15) Mai tua malie ifo eiloa, ne takitaki atu ei ne ia a agelu tapu i te ‵peiifoga o Satani mo ana temoni mai i te lagi.​—⁠Fakaasiga 12:​7-​10.

¹⁷ A te galuega talai mo te galuega ko te faiga o akoakoga telā ne kamata ne Iesu i te 29 T.A., ko pili atu eiloa ki tena fakaotiga. E se leva nei kae ka fakamasino ne ia a tino ola katoa. Ko fai atu ei a ia ki mamoe fakatusa kolā e talia ne latou a ia pelā me ko te auala o te fakaolataga a Ieova “ke fai mō [latou] a te Malo ne fakatoka mō koutou mai te kamataga o te lalolagi.” (Mataio 25:​31-​34, 41) A latou kolā e ‵teke atu ki a Iesu e pelā me ko te Tupu ka fakaseai atu i te taimi e takitaki ei ne ia a te kautau faka-te-lagi o taua atu ki tino amio ma‵sei katoa. Ka oti, ko ‵loka faka‵mau ei ne lesu a Satani kae ‵pei atu a ia mo ana temoni ki te “lua ‵poko.”​—⁠Fakaasiga 19:​11-​14; 20:​1-3.

18, 19. Se a te mea e fakataunu e Iesu i te fakataunuga o tena tulaga e pelā me ko te Mesia, kae ne a ikuga e oko atu i ei ki tino faka‵logo?

¹⁸ I tena Pulega i te Afe Tausaga, ka fakataunu katoatoa eiloa ne Iesu ana tofi, e pelā me ko “Te Pule Sili, te Atua Malosi, te Tamana ki te se-gata-mai, te Pelenise o te Filemu.” (Isaia 9:​6, 7) Ka faka‵foki atu ne tena Malo a tino ki te tulaga ‵lei katoatoa, e aofia i ei a tino kolā ka toe‵tu mai i te mate. (Ioane 5:​26-​29) Ka takitaki atu ne te Mesia a tino loto fia‵fia ki “vai puna o te ola,” telā ka mafai ei ne tino faka‵logo o maua se fesokotakiga filemu mo Ieova. (Faitau te Fakaasiga 7:​16, 17.) Mai tua o te ‵toe tofotofoga, a tino ‵teke katoa, e aofia i ei a Satani mo ana temoni, ka “‵pei ki loto i te lase ‵ka ulaula mo te pauta ‵ka,” ko te taimi tenā e tuki pala ei te ulu o te “gata.”​—⁠Fakaasiga 20:⁠10.

¹⁹ Ko oko eiloa i te gali mo te ‵lei katoatoa o Iesu i te fakataunuga o tena tulaga e pelā me ko te Mesia! Ka faka‵fonugina a te lalolagi palataiso ki tino kolā ka fakasaoloto kae ka ola ki te se-gata-mai i te tulaga malosi mo te fiafia katoatoa. Ka faka‵magina ei te igoa ‵malu o Ieova i fakamaseiga katoa, mo te ‵tonu o tena pulega sili i te lagi mo te lalolagi ka fakamalugagina. Ko tafaga la te gali o te taui e faka‵tali mai mō tino katoa kolā e faka‵logo ki te Tino Fakaekegina a te Atua!

Kai Maua ne Koe te Mesia?

20, 21. Ne a pogai e maua ne koe ke fai atu ki nisi tino e uiga ki te Mesia?

²⁰ Talu mai te 1914, ko oti eiloa ne kamata o ola tatou i te vaitaimi o te pa·rou·siʹa, io me ko te fakatasi mai o Keliso. E tiga eiloa e se matea atu tena fakatasi mai e pelā me ko te Tupu i te Malo o te Atua, e lavea ‵lei atu eiloa te mea tenā i te fakataunuga o valoaga. (Fakaasiga 6:​2-8) E tiga eiloa te feitu tenā, e pelā mo te kau Iutaia i te senitenali muamua, e fakaseaoga eiloa ne te tokoukega o tino i aso nei a te fakamaoniga o te fakatasi mai o te Mesia. E ma‵nako foki latou ki se mesia fakapolitiki io me se tino ke galue e auala i pule fakapolitiki faka-te-foitino. Ko iloa ne koe me ko pule mai nei a Iesu e pelā me ko te Tupu o te Malo o te Atua. E mata, ne seki fiafia koe i te taimi ne iloa ei ne koe? E pelā mo soko i te senitenali muamua, ne fakaosofia koe ke fai atu: “Ko oti ne maua ne māua a te Mesia.”

²¹ I aso nei, i te taimi e faipati atu ei koe e uiga ki te munatonu, e mata, e faka‵mafa atu ne koe a te tulaga o Iesu e pelā me ko te Mesia? A te faiga penā ka fakamalosi aka ei tou loto fakafetai ki mea ko oti ne fai ne ia, ko mea e fai nei ne ia, mo mea ka fai ne ia. E pelā mo Anitelea mo Filipo, e seai se fakalotolotolua me ko oti ne faipati atu koe ki ou kāiga mo taugasoa e uiga ki te Mesia. Kaia e se fanatu ei koe ki a latou mo te loto finafinau malosi kae fakaasi atu me i a Iesu Keliso ko te Mesia eiloa telā ne folafola mai, ko te auala o te fakaolataga a te Atua?

E Mafai ne Koe o Fakamatala Mai?

• Ne maua aka pefea ne soko i te senitenali muamua a te Mesia?

• Ne a pogai tāua e lua ne mate ei a Iesu?

• Ne a mea ka fai ne Iesu ke fakataunu ei tena tulaga e pelā me ko te Mesia?

[Ata i te itulau e 21]

Ne iloa pefea ne tino i te senitenali muamua i a Iesu ko te Mesia telā ne folafola mai?

[Ata i te itulau e 23]

I te taimi ne faipati atu ei koe ki nisi tino, e mata, e faka‵mafa atu ne koe a te tulaga o Iesu e pelā me ko te Mesia?