E Mata, e Olo Atu a Tino ‵Lei Katoa ki te Lagi?

MAI tua o te ‵toe ‵kaiga a Iesu mo ana apositolo i te afiafi mai mua o tena tamatega, ne tauto atu a Iesu me ka tuku atu ne ia se koga mō latou i te lagi. Ne fai mai a ia: “E uke a mea e ‵nofo ei koutou i te fale o toku Tamana, kae tenei au ka fano o fakatoka mō koutou. Moi seai, penei e se fai atu ne au ki a koutou.” (Ioane 14:2) Kaia e fakatoka ei ne Iesu se koga mō latou i te lagi? Ne a olotou mea ka fai i konā?

Ne mafaufau a Iesu ki se tofiga fakapito mō ana soko. I te afiafi foki eiloa tenā, ne fai mai a ia: “Ne ‵kau fakatasi foki koutou mo au i oku tofotofoga. E pelā eiloa mo te tukumaiga ne toku Tamana te pule ki a au, e pelā foki taku feagaiga ki a koutou.” (Luka 22:28, 29) Ne tauto atu te Atua ki a Iesu me ka fai a ia mo Tupu telā ka fakataunu ne ia se manakoga sili e tasi o tino​—se Malo ‵lei. Ka faka‵sao ne Iesu a tino mai i logo‵maega kae ka fakatakavale ne ia a tino kolā e fakapuapuaga ne latou a tino. E tiga eiloa ka tokouke a tino ka pule atu ki ei a Iesu kolā ka salalau atu ki “feitu katoa o te lalolagi,” ka fakatu eiloa tena nofogaaliki i te lagi.​—Salamo 72:4, 8; Tanielu 7:13, 14.

Kae ka se pule tokotasi mai fua a Iesu. Tela la, ne folafola atu ne Iesu ki ana apositolo se koga mō latou i te lagi. Ne aofia latou i tino muamua ne filifili aka ke “pule latou [ki] te lalolagi.”​—Fakaasiga 5:10.

E tokofia a tino e olo atu ki te lagi? E pelā mo so se malo, e foliki fua te aofaki o tino pule i te Malo faka-te-lagi o te Atua māfai ko fakatusa ki tino kolā ka ola mai lalo i te pulega tenā. Ne fai atu a Iesu ki a latou kolā ka pule fakatasi mo ia: “Taku lafu foliki ko apositolo, ke se ma‵taku koutou i te mea ko loto fiafia eiloa te otou Tamana o tuku atu ki a koutou a te Malo.” (Luka 12:32) A te “lafu foliki” tenā ko te toko 144,000. (Fakaasiga 14:1) E foliki a te aofaki tenā māfai ko fakatusa ki te fia miliona o tino kolā ka maua ne latou te ola se-gata-mai i te lalolagi e pelā me ne tino fakamaoni mai lalo i te Malo tenā.​—Fakaasiga 21:4.

Tela la, e se ko tino ‵lei katoa e olo atu ki te lagi. E pelā mo te tupu ‵lei ko Tavita, ne fai mai a te apositolo ko Petelu, penei: “Ne seki fano Tavita ki te lagi.” (Galuega 2:34) A Ioane te Papatiso se tagata ‵lei. Kae ne fakaasi mai ne Iesu me ka se fakamaluga aka a ia ke pule atu e pelā me se tupu i te lagi. Ne fai mai a Iesu: “E seai se tama ne fanau i fafine e sili atu i a Ioane te Papatiso, ka ko te tino tafa sē taulia i te Malo o te lagi, e sili atu i a Ioane.”​—Mataio 11:11.

E Mata, ka Maua ne Koe te Taui o Tino ‵Lei?

Ke maua a te taui ko te ola ki te se-gata-mai i te lalolagi, ne a mea e ‵tau o fai ne se tino? Ne fai mai a Iesu: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke se malaia so se tino e fakatuanaki ki a ia, kae ke maua ne ia te ola se gata mai.” (Ioane 3:16) Mafaufau la, me ko te alofa o te Atua mō te lalolagi ne takitaki ei a ia ke fakatoka ke maua ne tino katoa a te ola se-gata mai, kae ko latou fua kolā “e fakatuanaki ki a ia” e maua eiloa ne latou te taui tenā.

E ‵tau o fakavae te fakatuanaki ki te poto tonu. (Ioane 17:3) E mafai o fakaasi atu ne koe me i a koe se tino ‵lei mai te tauloto ki mea e uke atu e uiga ki te fuafuaga a Ieova mō tino. Ke fakatuanaki ki au mea e tauloto. Kae ke fakatalitonu atu me i te avanoaga e uiga ki te ola telā e seai sena gatamaiga e avanoa atu nei ki a koe.

[Ata i te itulau e 7]

Ne a Pati a te Tusi Tapu?

Fesili:

Ne a mea e ‵tupu ki tino ‵lei i te taimi e ‵mate ei latou?

Tali:

“Ka ko tino ‵mate e seai se mea a latou e iloa.” ​—FAILAUGA 9:5.

Fesili:

Se a te fakamoemoega e maua ne tino ‵lei mō aso mai mua?

Tali:

“Sa ofo koutou i te mea tenei, me ko oko mai eiloa te taimi e lagona ei a tena leo ne latou katoa kolā e i loto i tanuga, kae ka ulu mai ei latou ki tua.”​—IOANE 5:28, 29.

Fesili:

Ka ‵nofo atu i fea a te tokoukega o tino ‵lei?

Tali:

“A tino amio‵tonu ka fai mō latou te fenua, kae ka ‵nofo faeloa i ei ki te se gata mai.”​—SALAMO 37:29.