E Pefea a Foliga o te Lagi?

E MAFAU‵FAU a nisi tino me e sē se mea ‵lei ke iloa ne tatou a mea e uiga ki te lagi me e seki ai eiloa se tino ne vau mai ei kae fakamatala mai a mea e uiga ki ei. Kāti ne puli i a latou me ne fai mai a Iesu: “Au ko oti ne vau ki lalo mai i te lagi.” (Ioane 6:38, Tusi Tapu Tauloto) Ne fai mai foki a ia e uiga ki nisi takitaki lotu: “A koutou ne tino mai lalo nei, ka ko au se tino mai luga.” (Ioane 8:23) Ne a pati a Iesu e uiga ki te lagi?

Ne fakapa‵tonu mai ne Iesu me i te lagi ko te koga e nofo i ei a Ieova. Ne taku ne ia te Atua ko “toku Tamana telā i te lagi.” (Mataio 12:50) Kae ne fakaaoga ne Iesu a te pati “lagi” i feitu e uke. E pelā me se fakaakoakoga, ne fakasino atu a ia ki te vanimonimo e pelā me ko te “lagi” i te taimi ne fai atu ei a ia: “Ke ‵kilo koutou ki manu eva o te lagi.” (Mataio 6:26, Tusi Paia, Samoa) Kae e nofo eiloa a Ieova mai luga atu o te vanimonimo. E fai mai te Tusi Tapu: “Ne faite ne te tagata telā e sagasaga i luga i tena nofogaaliki, i luga i foliga pukupuku o te lalolagi.”​—Isaia 40:22, Tusi Paia, Samoa.

E mata, e nofo atu a te “Tamana telā i te lagi” i va o fetu? Ne taku foki a te lagi mo te lalolagi ki te “lagi” i te Tusi Tapu. E pelā mo muna a te faisalamo, penei: “Ka onoono au ki te lagi, telā ne faite ne koe, te masina mo fetu, kolā ne faka‵tu ne koe i olotou tulaga; se a te aoga o te tagata e manatu mai ei koe ki a ia; se a foki te aoga o te tagata e saga mai koe ki a ia?”​—Salamo 8:3, 4.

Ikai, e se ‵tau o nofo a Ieova te Atua i loto i te lagi mo te lalolagi telā ne faite ne ia e pelā mo te kamuta telā e se ‵tau o nofo i loto i te sefe telā ne faite ne ia. Tela la, i te taimi ne fakaulufale ei ne te tupu ko Solomona a te faletapu ki a Ieova, ne fai atu a ia: “Te Atua, e tonu e mafai ne koe o nofo i te lalolagi nei? A te lasi o te lagi e se taitai o ofi koe i ei, kae e pefea o ofi koe i loto i te Faletapu tenei ne faite ne au?” (1 Tupu 8:27) Kafai e se nofo atu a Ieova i te lagi mo te lalolagi tenei, se a la te lagi e nofo atu ei a ia?

E tiga eiloa ne sukesuke ne tagata a te lagi mo te lalolagi tenei ki mea fakaata ma‵losi kae ne olo atu foki a nisi tino ki luga i te vanimonimo, kae e ‵tonu eiloa a pati a te Tusi Tapu e uiga ki ei: “E seai eiloa se tino kai lavea ne ia te Atua.” (Ioane 1:18) Ne fakamatala mai ne Iesu a te pogai i ana muna: “A te Atua ko te Agaga eiloa.”​—Ioane 4:24.

A te agaga se vaega o te ola telā e maluga atu i se tino. A te agaga e se aofia i ei a mea faka-te-foitino, e pelā mo te ‵kano mo te toto, telā e mafai o lavea kae lagona ne te tino. Tela la, i te taimi ne fai atu ei a Iesu me ne masani o nofo atu a ia i tafa o tena Tamana i te “lagi,” ne fakauiga eiloa a ia me ne masani o maua ne ia se vaegā olaga telā e ‵malu atu i lō so se vaegā olaga faka-te-foitino. (Ioane 17:5; Filipi 3:20, 21) A te koga telā e masani o ‵nofo atu i ei a Iesu mo tena Tamana e pelā me ne tino faka-te-agaga ko te “lagi.” E foliga pefea te mea tenei? Ne a mea e ‵tupu i konā?

Se Koga e Fai ei a Galuega Fakafia‵fia

E fakamatala mai ne te Tusi Tapu a te lagi e pelā me se koga telā e uke a galuega e fai i ei. E aofia i ei a te fia selau miliona o tino faka-te-agaga fakamaoni e ‵nofo i ei. (Tanielu 7:9, 10) E kese‵kese eiloa a uiga o tino faka-te-agaga konei. E iloa pefea ne tatou te mea tenā? Mai i mea katoa ne faite ne te Atua, e seai eiloa ne mea e lua e ‵pau, tela la, e mafai o tali‵tonu tatou me e isi foki se ‵kesega lasi i luga i te lagi. Se mea fakaofoofogia me i tino faka-te-lagi konei e ga‵lue mo te fealofani, kae tuku mai ne latou se ata ‵kese ki te lalolagi i aso nei, telā e faigata o ga‵lue mo te fealofani a tino i ei.

Ke mafaufau ki te auala e fakamatala mai ei ne te Tusi Tapu a galuega e fai i te lagi. “Tavae atu ki te Aliki, koutou agelu ma‵losi mo te ‵mana, kolā e faka‵logo ki ana fakatonuga mo ana muna. Tavae atu ki te Aliki, koutou mea ma‵losi katoa i te lagi, mo koutou foki tavini kolā e fai tena loto.” (Salamo 103:20, 21) Tela la, e uke a galuega e fai i te lagi. E mafai eiloa o tali‵tonu tatou me i te mea tenei se galuega fakamalie loto.

E isi eiloa se tala fakasolopito e uiga ki galuega fakafia‵fia a agelu a koi tuai o faite a te lalolagi. E ‵tusa mo pati i te Tusi Tapu, i te taimi ne faite ei ne Ieova a te lalolagi, ne “usu pese fakatasi” a tama a te Atua kae “ka‵laga mo te fia‵fia.” (Iopu 38:4, 7) Ne maua ne se tama faka-te-lagi a te Atua a te tauliaga ke ga‵lue fakatasi mo te Atua i te faitega o nisi mea katoa. (Kolose 1:15-17) A te fakamatalaga gali tenei e uiga ki galuega fakafia‵fia i te lagi e mafai o faka‵sae aka ei a fesili i tou mafaufau e uiga ki te lagi mo tino.

E Mata, ne Fakatoka a Tino ke Olo Atu ki te Lagi?

E tiga eiloa ne tavini atu a agelu ki te Atua i te lagi a koi tuai o faite a te lalolagi, ne seki faite eiloa a te tagata mo te fafine muamua ke faka‵fonu ne lāua a te lagi. I lō te fai penā, ne fai atu te Atua ki te tauavaga muamua, penei: “Fakatokouke otou tama‵liki, ko te mea ko otou fanau ke ‵nofo i te lalolagi kae pule i ei.” (Kenese 1:28; Galuega 17:26) A Atamu ko te tino muamua ne ola mai ki te lalolagi nei, telā ne mafai o iloa ne ia te Atua kae tavini atu ki a ia mo te fakamaoni. Ne ‵tau o fai a ia mo tamana ki tino kolā ka ‵nofo i te lalolagi. “A te lagi e o te Aliki tokotasi, kae ne tuku atu ne ia te lalolagi ki tino.”​—Salamo 115:16.

E se ma‵nako eiloa a tino ke ‵mate; a te mate e sē se manakoga masani o tino. Ne fakamatala atu ne te Atua a te mate ki a Atamu e pelā fua me se fakasalaga o te sē fakalogo. Moi ne fakalogo a Atamu, penei e se mate eiloa a ia.​—Kenese 2:17; Loma 5:12.

Kae e se ‵poi tatou me ne seki ai eiloa ne pati a te Atua ne fai atu ki a Atamu e uiga ki te fanatu ki te lagi. Tela la, e se fai a te lalolagi e pelā me se koga telā e tofotofo ei a tino ke lavea atu me e mafai o olo atu latou ki te lagi io me ikai. Ne faite eiloa te tagata ke ola ki te se-gata-mai i te lalolagi, kae ka fakataunu eiloa a te fuafuaga tenā a te Atua. E folafola mai te Tusi Tapu me i “tino amio‵tonu ka fai mō latou te fenua, kae ka ‵nofo faeloa i ei ki te se gata mai.” (Salamo 37:29) E manino ‵lei eiloa me ne seki faite a tino ke olo atu ki te lagi. Kae kaia ne tauto atu ei a Iesu ki ana apositolo e uiga ki te ola i te lagi? E mata, ne fakauiga a Iesu me i tino ‵lei katoa ka olo atu ki te lagi?