E Tasi Te Lafu Mamoe, Mo Te Tausi Mamoe E Tokotasi

“A koutou konā e tinoagafulu mo te tokolua kolā ne tau‵tali mai i a au; e ‵nofo foki koutou i nofogaaliki e sefulu lua o fakamasino matakāiga e sefulu lua o Isalaelu.”​—MATAIO 19:28.

1. Ne saga atu pefea a Ieova ki tino ne ‵tupu mai i a Apelaamo, kae kaia e se fakauiga i ei me ko fulitua katoatoa atu a ia ki nisi tino katoa?

NE ALOFA malosi a Ieova ki a Apelaamo, telā ne fakaasi atu ei ne Ia a te alofa fakamaoni ki tino kolā ne ‵tupu mai i a ia. E sili atu i te 15 senitenali, ne kilo atu ei a ia ki te atufenua o Isalaelu, telā ne tupu mai i a Apelaamo, e pelā me ko ana tino filifilia, ko “ona tino ‵tonu.” (Faitau te Teutelonome 7:6.) E mata, e fakauiga i ei me ne fulitua katoatoa atu a Ieova ki tino o fenua fakaa‵tea? Ikai. I te taimi tenā, a tino kolā e se ne tino Isalaelu kolā ne ma‵nako o tapuaki atu ki a Ieova ne talia ke ‵kau atu latou ki tena fenua fakapito. A tino mai fenua fakaa‵tea kolā ne ‵fuli atu ne ‵kilo atu ki ei e pelā me ne vaega o te fenua. Ne ‵tau eiloa o fai latou e pelā me ne taina. (Levitiko 19:33, 34) Kae ne manakogina ke faka‵logo latou ki tulafono katoa a Ieova.​—Levitiko 24:22.

2. Se a te folafolaga fakaofoofogia ne fai ne Iesu, kae se a te fesili ne iku atu ki ei?

² Kae ne fai atu ne Iesu se folafolaga fakapoi ki tino Iutaia i ana aso: “I te Malo o te Atua e ave keatea mai i a koutou, kae tuku atu ki se fenua telā e fakaasi mai i ei ne fua ‵lei.” (Mataio 21:43) Ko oi ka aofia i te fenua fou tenei, kae e pokotia pefea tatou i aso nei i te ‵fuliga tenei?

Te Fenua Fou

3, 4. (a) Ne fakamatala mai pefea ne te apositolo ko Petelu a te fenua fou? (e) Ko oi e aofia i te fenua fou tenei?

³ Ne fakamatala faka‵lei mai eiloa ne te apositolo ko Petelu a te fenua fou tenei. Ne tusi atu ne ia a pati konei ki ana taina Kelisiano: “A koutou ko te fenua filifilia, ko faitaulaga a te Tupu, ko te fenua tapu, ko tino tonu o te Atua, ne filifilia ke folafola atu a galuega fakaofoofogina a te Atua, telā ne kalagagina ne ia a koutou mai i te pouliga ki tona mainaga fakaofoofogina.” (1 Petelu 2:9) E pelā mo te mea ne ‵valo mai, a tino Iutaia kolā ne talia ne latou a Iesu e pelā me ko te Mesia ne fai mo tino muamua o te fenua fou tenā. (Tanielu 9:27a; Mataio 10:6) Fakamuli ifo, ne aofia foki a nisi kolā e se ne tino Isalaelu i te fenua tenei, me ne fai atu a Petelu: “Ne seki fai koutou mo tino o te Atua i aso mua, kae nei ko fai koutou mo ona tino.”​—1 Petelu 2:10.

⁴ Ko oi ne faipati a Petelu e uiga ki ei i konei? I te kamataga o tena tusi, ne fai atu a ia: “Ne tuku mai ei [ne te Atua] te ola fou i te fakatuakega o Iesu Keliso mai te mate. Tenei te mea ko faka‵fonugina ei foki tatou i te fakamoemoega ola, tela la, a matou e ‵kilo mo te fakamoe‵moe ke maua te fakamanuiaga telā e tausi ne te Atua mo ona tino i aso mai mua. E tausi ne ia i te lagi mō koutou, i te koga telā e se oko ki ei te pala, te masei mo te magemage.” (1 Petelu 1:3, 4) Tela la, a te fenua fou tenei e aofia i ei a Kelisiano fakaekegina, kolā e maua ne latou te fakamoemoega faka-te-lagi. A latou ko te “Isalaelu a te Atua.” (Kalatia 6:16) I se fakaasiga, ne lavea ne te apositolo ko Ioane me e toko 144,000 a tino kolā e aofia i te Isalaelu faka-te-agaga. Ne “fakaolagina latou mai te tokoukega o tino, ka ko latou foki ko tino muamua e tuku atu ki te Atua mo te Tamā Mamoe” ke tavini atu e pelā me ne “faitaulaga” kae ke “pule fakatasi latou mo [Iesu] i te afe o tausaga.”​—Fakaasiga 5:10; 7:4; 14:1, 4; 20:6; Iakopo 1:18.

E Mata, ne Aofia Foki i ei a Nisi Tino?

5. (a) Se a te mea e fakasino atu ki ei a te tugapati ko te “Isalaelu a te Atua”? (e) Kaia e se fakauiga fua i ei ki se mea e tasi a te pati ko te “Isalaelu”?

⁵ E manino ‵lei me e fakasino atu fua a te tugapati ko te “Isalaelu a te Atua” i te Kalatia 6:16 ki Kelisiano fakaekegina. Kae e mata, e isi ne taimi e fakaaoga ei ne Ieova a te atufenua o Isalaelu e pelā me se ata, io me se fakatusa, telā e aofia i ei a Kelisiano i lō te kau fakaekegina fua? E mafai o maua a te tali i pati konei a Iesu ki ana apositolo fakamaoni: “E pelā eiloa mo te tukumaiga ne toku Tamana te pule ki a au, e pelā foki taku feagaiga ki a koutou. Ka ‵kai kae inu koutou i taku taipola i toku Malo, kae ka ‵nofo foki koutou i paepaealiki, o fakamasino atu matakāiga e sefulu lua o Isalaelu.” (Luka 22:28-30) Ka tupu eiloa te mea tenei i te taimi e oko mai ei “te lalolagi fou,” i te pulega a Keliso i te Meleniuma.​—Faitau te Mataio 19:28.

6, 7. Se a te mea e fakasino atu ki ei a te tugapati ko “matakāiga e sefulu lua o Isalaelu” i te Mataio 19:28 mo te Luka 22:30?

⁶ Ka tavini atu a te toko 144,000 e pelā me ne tupu faka-te-lagi, faitaulaga, mo famasino i te Pulega i te Afe Tausaga. (Fakaasiga 20:4) Ko oi ka fakamasino ne latou, kae pule atu foki latou ki ei? I te Mataio 19:28 mo te Luka 22:30, e fai mai i ei ki a tatou me ka fakamasino ne latou a “matakāiga e sefulu lua o Isalaelu.” Ko oi e fakaata mai i “matakāiga e sefulu lua o Isalaelu” i te mataupu tenei? E fakaata mai i ei a latou katoa kolā e maua ne latou te fakamoemoega i te lalolagi​—ko latou kolā e fakatuanaki ki te taulaga a Iesu kae e se aofia i te potukau ko faitaulaga mo tupu. (A te matakāiga o Levi ne seki aofia i te fakasologa o matakāiga e 12 o Isalaelu.) A latou kolā e fakaata mai i te mataupu tenei ne matakāiga e 12 o Isalaelu, ko tino kolā ka maua ne latou a mea aoga mai i galuega fakafaitaulaga a te toko 144,000. A tino kolā e maua ne latou a mea aoga kae e se aofia i te tofi fakafaitaulaga ko tino foki o te Atua, kae e alofa kae talia ne ia latou. Se mea ‵lei ke faka‵pau latou ki ana tino i aso mua.

⁷ E fetaui ‵lei foki me mai tua o te laveaga ne te apositolo ko Ioane a te ‵toe fakamailogaga o te toko 144,000 o tino Isalaelu faka-te-agaga mai mua o te fakalavelave lasi, ne lavea foki ne ia a te “vaitino tokouke” ko se mafai eiloa o lau kae e o‵mai mai “fenua katoa.” (Fakaasiga 7:9) Ka ‵sao atu a tino konei i te fakalavelave lasi i te Pulega a Keliso i te Meleniuma. Ka ‵kau atu ei latou ki te fia piliona o tino kolā ka toe‵tu mai i konā. (Ioane 5:28, 29; Fakaasiga 20:13) Ka aofia katoa a latou konei i “matakāiga e sefulu lua o Isalaelu” fakatusa telā ka fakamasino aka ei latou ne Iesu mo ana pule lagolago e toko 144,000.​—Galuega 17:31; 24:15; Fakaasiga 20:12.

8. Ne fakaata mai pefea i mea ‵tupu i te Aso o te Faka‵maga i tausaga katoa a te fesokotakiga i te va o te toko 144,000 mo te ‵toega o tino?

⁸ A te fesokotakiga tenei i te va o te toko 144,000 mo te ‵toega o tino ne fakaata mai i mea ‵tupu i te Aso o te Faka‵maga i tausaga katoa. (Levitiko 16:6-10) Muamua la, ne manako a te faitaulaga ke ofo atu ne ia se pulumakau e pelā me se taulaga mō “ana agasala mo agasala a tino o tena kāiga.” Tela la, a te taulaga a Iesu ne fakagalue muamua ki tena kaukāiga o faitaulaga, ko latou kolā ka tavini atu fakatasi mo ia i te lagi. I te Aso o te Faka‵maga, ne fakatoka foki a kouti e lua mō agasala a nisi tino Isalaelu. I te fakatokaga tenei, telā e fakaata mai i matakāiga o faitaulaga a te toko 144,000, a ko te ‵toega o tino Isalaelu e fakaata mai i ei a latou katoa kolā e maua ne latou se fakamoemoega ke ola i te lalolagi. E fakaasi mai i te fakauigaga tenei me i te tugapati ko “matakāiga e sefulu lua o Isalaelu” i te Mataio 19:28, e se fakasino atu ki faitaulaga a Iesu kolā ne fakaekegina ki te agaga, kae ki tino katoa.a

9. Ko oi e fakaata mai i faitaulaga i te fakaasiga a Esekielu e uiga ki te faletapu, kae ko oi e fakaata mai i tino Isalaelu kolā e se aofia i faitaulaga?

⁹ Mafaufau ki te suā fakaakoakoga. Ne tuku mai ne te pelofeta ko Esekielu se fakaasiga ‵loto e uiga ki te faletapu o Ieova. (Esekielu, mataupu e 40-48) I te fakaasiga tenā, ne ga‵lue te kau faitaulaga i te faletapu, mai i te tuku atu o fakatonuga kae e maua foki a pati polopoloki mo fakatonutonuga a Ieova. (Esekielu 44:23-31) I te fakaasiga foki eiloa tenā, ne olo atu a sui o matakāiga kese‵kese o tapuaki kae ofo atu a taulaga. (Esekielu 45:16, 17) Kae i te mataupu tenei, e fakaata mai i faitaulaga a te kau fakaekegina, kae ko tino Isalaelu mai i matakāiga kolā e se ne faitaulaga ko latou kolā e maua ne latou a te fakamoemoega i te lalolagi. E faka‵mafa mai i te fakaasiga tenei me i potukau e lua e ga‵lue mo te fealofani, fakatasi mo te kau faitaulaga kolā e fai ne latou a te takitakiga i te tapuakiga ‵ma.

10, 11. (a) Se a te fakataunuga o pati a Iesu ne lavea ne tatou telā e fakamalosi aka ei te fakatuanaki? (e) Se a te fesili ne sae aka e uiga ki nisi mamoe?

¹⁰ Ne faipati a Iesu e uiga ki ‘nisi mamoe,’ kolā e se ‵tu i loto i te “lulu” telā e ‵tu i ei a te “lafu foliki” o ana soko fakaekegina. (Ioane 10:16; Luka 12:32) Ne fai mai a ia: “E ‵tau mo au o aumai latou, ka faka‵logo foki latou ki toku leo; ko tasi ei te lafu mamoe, mo te tausi mamoe e tokotasi.” Ko oko eiloa i te fakamalosi mai ki ‵tou fakatuanaki ke lavea atu a te fakataunuga o pati konā! Ko oti ne ‵kau fakatasi a potukau e lua o tino​—ko te tamā potukau o te kau fakaekegina mo te vaitino tokouke o nisi mamoe. (Faitau te Sakalia 8:23.) E tiga eiloa e se tavini atu i se auala fakatusa a nisi mamoe i loto i te faletapu faka-te-agaga, e tavini atu eiloa latou i te titi o te faletapu tenā.

¹¹ Kae kafai e fakaaoga ne Ieova i nisi taimi a sui o tino Isalaelu mua kolā e se ne faitaulaga ke fakaata mai i ei a nisi mamoe konei, e mata, e se ‵tau foki o ‵kai kae inu a latou kolā e fakamoe‵moe ke ola i te lalolagi, i te falaoa mo te uaina i te Fakamanatuga? Ka mafau‵fau nei tatou ki te tali ki te fesili tenei.

Te Feagaiga Fou

12. Se a te fakatokaga fou ne ‵valo mai ne Ieova?

¹² Ne ‵valo mai ne Ieova se fakatokaga fou mō ana tino i te taimi ne fai mai ei a ia: “A te feagaiga fou tenei ka fai ne au mo tino Isalaelu, e penei: Ka tuku atu ne au taku tulafono ki a latou kae tusi ne au i olotou loto. Ka fai au mo Atua o latou, ka ko latou ka fai mo oku tino.” (Ielemia 31:31-33) E auala i te feagaiga fou tenei, ka fakataunu mai i ei i se auala ‵malu kae tumau a te tautoga a Ieova ne fai ki a Apelaamo.​—Faitau te Kenese 22:18.

13, 14. (a) Ko oi e aofia i te feagaiga fou? (e) Ko oi e maua ne latou a mea aoga mai i te fakatokaga tenei, kae e “tausi fakamaoni” pefea latou ki te feagaiga fou tenei?

¹³ Ne fakasino atu a Iesu ki te feagaiga fou tenei i te po mai mua o tena mate i te taimi ne fai mai ei a ia: “Ko te ipu tenei o te feagaiga fou i toku toto, ke fai te mea tenei i taimi katoa e inu koutou ki ei, mo fakamanatuga ki a au.” (Luka 22:20; 1 Kolinito 11:25) E mata, e aofia a Kelisiano katoa i te feagaiga fou tenei? Ikai. A nisi tino, e pelā mo te kau apositolo kolā ne inu i te ipu tenā, ko tino kolā e aofia i te feagaiga fou tenā.b Ne fai ne Iesu a te suā feagaiga mo latou ke pule fakatasi mo ia i tena Malo. (Luka 22:28-30) Ka ‵kau fakatasi latou mo Iesu i tena Malo.​—Luka 22:15, 16.

¹⁴ Kae e a latou kolā ka ola i te lalolagi mai lalo i tena Malo? A latou ko tino kolā e maua ne latou a mea aoga mai i te feagaiga fou. (Kalatia 3:8, 9) E tiga eiloa e se aofia latou i ei, e “tausi fakamaoni” latou ki te feagaiga tenei mai i te faka‵logo ki ei, e pelā mo te mea ne ‵valo mai ne te pelofeta ko Isaia: “Tino fakaa‵tea kolā ko fai mo tino o tena fenua, kolā e a‵lofa ki a ia kae tavini ki a ia, kolā e faka‵malu ki te Sapati kae tausi fakamaoni ki tena feagaiga. Ka aumai ne au koutou ki Siona, toku mauga tapu, ka avatu ne au te fiafia ki a koutou i loto i toku fale ‵talo.” E toe fai mai foki a Ieova: “A toku Faletapu ka fai mo fale ‵talo ki tino o malo katoa.”​—Isaia 56:6, 7.

Ko oi e ‵Tau o ‵Kai Kae Inu?

15, 16. (a) Se a te mea ne ‵soko ki ei ne te apositolo ko Paulo a te feagaiga fou? (e) Kaia e se ‵tau ei o ‵kai kae inu a tino kolā e maua ne latou te fakamoemoega i te lalolagi?

¹⁵ A latou kolā e aofia i te feagaiga fou ko maua ne latou a “te saolotoga katoatoa o ulu atu ki loto i te Potu e Sili i te Tapu.” (Faitau te Epelu 10:15-20.) Konei eiloa a tino kolā ka maua ne latou “te Malo telā e se mafai o lūlūgina.” (Epelu 12:28) Tela la, ko latou fua kolā ka fai mo fai ne tupu mo faitaulaga i te lagi mo Iesu Keliso e ‵tau o inu fakatasi i te “ipu” telā e fakaata mai i ei a te feagaiga fou. A latou konei e aofia i te feagaiga fou ko tino kolā ne tauto i te lotou fakaipoipoga ki te Mamoe. (2 Kolinito 11:2; Fakaasiga 21:2, 9) A nisi tino katoa kolā e ‵kau atu ki te Fakamanatuga i tausaga katoa e fakaasi atu ne latou te āva e pelā me ne tino maimoa, kolā e se kai kae inu.

¹⁶ E fesoasoani mai foki a Paulo ke malamalama tatou me i tino kolā e maua te fakamoemoega i te lalolagi e se ‵kai kae inu i te Fakamanatuga. Ne fai atu a ia ki Kelisiano fakaekegina: “Me ko te otou ‵kai sāle ki te falaoa tenei kae inu ki te ipu, e folafola atu ei ne koutou te mate o te Aliki ke oko ki tena oko mai.” (1 Kolinito 11:26) Se a te taimi e “oko mai” ei te Aliki? Ko te taimi e oko mai ei a ia o puke atu te ‵toe tino fakaekegina i te potukau ko te tamafine ka fakaipoipo ki te lotou koga i te lagi. (Ioane 14:2, 3) E manino ‵lei i ei, me e se toe gata a te fakamanatuga o te ‵Kaiga a te Aliki i te Afiafi i tausaga katoa. A te ‵toega o “fanau katoa” a te fafine ka tumau eiloa i te ‵kai mo te inu i te ‵kaiga tenei ke oko ki te taimi ko maua ei ne latou katoa te lotou taui faka-te-lagi. (Fakaasiga 12:17) Moi ne mafai o ‵kai kae inu a latou kolā ka ola ki te se-gata-mai i te lalolagi, penei, ko tumau eiloa te Fakamanatuga tenei ki te se-gata-mai.

“Ke Fai Latou mo Ona Tino.”

17, 18. Ne fakataunu pefea a te valoaga i te Esekielu 37:26, 27?

¹⁷ Ne ‵valo mai ne Ieova a te fealofani o ana tino i ana pati konei: “Ka fai ne au se feagaiga mo latou telā ka puipui ei latou ke saogalemu ki te se gata mai. Ka fakamau‵tu ne au latou kae fakatokouke, kae fakatu toku Faletapu i te lotou fenua, kae ka tu i konā ki te se gata mai. Ka ‵nofo fakatasi au mo latou i konā; ka fai au mo Atua o latou, ka ko latou ka fai mo oku tino.”​—Esekielu 37:26, 27.

¹⁸ E taulia eiloa a tino katoa o te Atua ke maua a mea aoga mai i te folafolaga gali tenei, te feagaiga mō te filemu faka-Kelisiano. E tonu, ko oti ne fakamaoni mai ne Ieova te filemu mō ana tavini faka‵logo katoa. E galue eiloa a fuataga o tena agaga i luga i a latou. A tena faleie tapu, telā e fakaata mai i konei a te tapuakiga ‵ma faka-Kelisiano, e lavea atu foki i a latou. Ko oti eiloa ne fai ‵tonu a latou mo fai ana tino, me ko oti ne tiaki ne latou a vaega katoa o te ifo ki tupua kae ko oti foki ne fai ne latou a Ieova mo fai te Atua fua e tokotasi e tapuaki atu latou ki ei.

19, 20. Ko oi e aofia i tino kolā e taku ne Ieova ki “oku tino,” kae se a te mea ne mafai o fai ne te feagaiga fou?

¹⁹ Ko oko eiloa i te fakafiafia ke molimau atu ki te ‵kau fakatasi mo te fealofani o potukau e lua konei i ‵tou aso nei! E tiga eiloa e gasolo aka ki luga te aofaki o te vaitino tokouke kolā e se maua ne latou te fakamoemoega faka-te-lagi, e fakamata‵mata eiloa latou ke ‵kau fakatasi mo latou konā. Ko oti ne ‵piki ‵mau latou ki te Isalaelu a te Atua. Mai i te faiga o te mea tenei, e aofia latou i tino kolā e taku ne Ieova ko “oku tino.” E fakataunu eiloa ki a latou a te valoaga tenei: “Ka uke a malo ka ‵mai ki te Aliki ke fai latou mo ona tino. Ka ‵nofo fakatasi koutou mo ia, kae ka iloa ei ne koutou i a au ne uga mai ne ia ki a koutou.”​—Sakalia 2:11; 8:21; faitau te Isaia 65:22; Fakaasiga 21:3, 4.

²⁰ E auala i te feagaiga fou, ko oti ne fai ne Ieova ke mafai o taunu a mea katoa konei. E lau i miliona o tino mai fenua fakaa‵tea ko oti ne fai mo fai te atufenua telā e fiafia ki ei a Ieova. (Mika 4:1-5) E fakaiku aka ne latou ke tumau i te tausi fakamaoni ki te feagaiga tenā mai i te taliaga o ana fakatokaga kae faka‵logo ki tulafono i ei. (Isaia 56:6, 7) I te fai penā, fakatasi mo te Isalaelu a te Atua, e maua eiloa ne latou a fakamanuiaga e uke i te mauaga o te filemu. Ke na maua eiloa ne koutou a fakamanuiaga penā​—nei kae penā foki loa mo aso mai mua!

[Fakamatalaga fakaopoopo]

E Masaua ne Koe?

• Ko oi a “matakāiga e sefulu lua o Isalaelu” kolā ka fakamasino ne te toko 144,000?

• Se a te fesokotakiga i te va o te kau fakaekegina mo nisi mamoe i te feagaiga fou?

• E mata, e ‵tau o ‵kai kae inu a Kelisiano katoa i te Fakamanatuga?

• Se a te va fealofani telā ne ‵valo mai i ‵tou aso nei?

[Ata i te itulau e 29]

E tokouke a tino ko oti ne ‵piki ‵mau ki te Isalaelu a te Atua

7,313,173

4,017,213

1,483,430

373,430

1950 1970 1990 2009