E Mata, E Fakaakoako Katoatoa Atu Koe Ki Te Keliso?

“E pelā eiloa mo te . . . olaga . . . telā e ‵tau o ola ei koutou . . . e ‵tau eiloa o fakasilisili ne koutou a te olaga tenā.”​—1 TESALONIA 4:1.

1, 2. (a) Ne a nisi mea ‵lasi ne molimau ne tino e tokouke i aso o Iesu? (e) Kaia e fakaofoofogia foki ei ‵tou aso nei?

KAI mafaufau aka eiloa koe ki te gali moi ne ola koe i te taimi ne nofo ei a Iesu i te lalolagi? Kāti ko mafaufau koe ki te fakamoemoega ke faka‵lei aka koe ne Iesu kae ke sao atu koe i nisi tulaga fakafanoa‵noa o logo‵maega faka-te-foitino. Io me kāti ko mafaufau fua koe ki te fakafiafia fua ke mafai o matea kae ke lagona atu foki ne koe a Iesu​—ke mafai o tauloto mai i a ia io me lavea ne koe a te faiga ne ia o nisi vavega. (Maleko 4:1, 2; Luka 5:3-9; 9:11) Ko oko eiloa i te gali moi ne ‵nofo atu tatou i te taimi ne fai ei ne Iesu a galuega katoa konā! (Luka 19:37) E seai eiloa se kautama talu mai te taimi tenā ne molimau ne ia a vaegā mea penā, kae ka se toe fai eiloa ne Iesu a mea kolā ne fai ne ia i te lalolagi e auala “i te ofo atu o ia ke fai mo taulaga.”​—Epelu 9:26; Ioane 14:19.

² Kae e tāua foki a ‵tou aso nei. Kaia? Ko ola nei tatou i te vaitaimi telā ne ‵valo mai i te Tusi Tapu e pelā me ko “te taimi o te gataga” mo “aso fakaoti.” (Tanielu 12:1-4, 9; 2 Timoteo 3:1) I te vaitaimi tenei, ko oti ne ‵pei ifo a Satani mai i te lagi. Ko pili nei a te taimi ka saisai ei a ia kae ‵pei atu ki “mone.” (Fakaasiga 12:7-9, 12; 20:1-3) Ko te taimi foki tenei ko maua ei ne tatou a te tauliaga lasi ke folafola atu a te “tala ‵lei o te Malo” ki te lalolagi kātoa, mai i te fai atu ki tino e uiga ki te fakamoemoega ki te Palataiso​—se galuega telā ka se toe fai eiloa.​—Mataio 24:14.

3. Mai mua faeloa o tena fanakaga ki te lagi, ne a mea ne fai atu ne Iesu ki ana soko ke fai, kae se a te mea e aofia i ei?

³ Mai mua faeloa o tena fanakaga ki te lagi, ne fai atu a Iesu ki ana soko: “Ka fai foki koutou mo molimau ki a au i Ielusalema, i Iutaia kātoa mo Samalia, ke oko eiloa ki kapakapalagi o te lalolagi.” (Galuega 1:8) E aofia eiloa i te galuega tenā a te faiga o akoakoga i te lalolagi kātoa. Se a te fakamoemoega o te galuega tenā? Ke fai a soko​—nisi soko fakaopoopo o te Keliso—⁠a koi tuai o oko mai te gataga. (Mataio 28:19, 20) Ne a mea e ‵tau o fai ne tatou māfai ko fia manumalo tatou i te fakataunuga o te fakatonuga a Keliso?

4. (a) Se a te mea telā ne faka‵mafa mai ne pati tāua a Petelu i te 2 Petelu 3:11, 12 me e ‵tau o fai? (e) Se a te mea e ‵tau o ‵teke atu ki ei ko te mea ke tumau tatou i te matapula‵pula?

⁴ Mafaufau la ki pati ne fai mai ne te apositolo ko Petelu: “Kafai ko fakamaseigina a mea katoa penā, se vaegā olaga la pefea e fia ola koutou i ei? E ‵tau o faka‵malu kae fakatapu otou olaga mō te Atua. Ka koi fakatalitali koutou ki te Aso o te Atua.” (2 Petelu 3:11, 12) E faka‵mafa mai i pati a Petelu a te manakoga ke tumau i te matapula‵pula i aso fakaoti konei ke fakamautinoa aka me e tumau eiloa ‵tou olaga i galuega kolā e fakavae ki te tapuakiga ki te Atua. E aofia i galuega konā a te talaiatuga o te tala ‵lei. Tela la, se mea fakafiafia ke ‵kilo atu ki te loto finafinau o ‵tou taina i te lalolagi kātoa i te faiga o te galuega talai telā ne fakatonu mai ne Keliso! I te taimi eiloa tenei, e lavea atu me e ‵tau o fakaeteete tatou i fakamalosiga mai i te lalolagi a Satani i aso katoa, kae ke mo a ma fakavāivāi ne ‵tou manakoga faka-te-foitino a te loto finafinau i te faiga o te ‵tou taviniga ki te Atua. Tela la, ke na mafau‵fau nei tatou ki te auala e mafai ei o fakamautinoa aka ne tatou me e tumau eiloa tatou i te fakaakoako atu ki te Keliso.

Ke Talia mo te Fiafia a Tofiga Mai te Atua

5, 6. (a) Se a te mea ne fakamālō atu ei a Paulo ki ana taina tali‵tonu i Ielusalema, kae ko oi ne fakailoa atu ne ia ke fakaeteete i ei? (e) Kaia e se ‵tau ei o manatu ma‵mā tatou ki ‵tou tiute mai i te Atua?

⁵ I tena tusi ki Kelisiano i Ielusalema, ne fakamālō atu a te apositolo ko Paulo ki ana taina tali‵tonu mō te lotou kufaki mo te fakamaoni mai lalo i fakasauaga i aso ko ‵teka. Ne fai atu a ia: “Ke masaua a mea ne ‵tupu ki a koutou i aso ko ‵teka. I aso konā, i te otiga ne ‵sulu atu te mainaga o te Atua ki a koutou, e uke a puapuaga ne fe‵paki mo koutou, kae ne seki taka‵vale koutou i ei.” E tonu, ne masaua ne Ieova te lotou olaga fakamaoni. (Epelu 6:10; 10:32-34) A pati fakamālō mo te alofa a Paulo ne ‵tau eiloa o fakamalosi atu ki Kelisiano Epelu i se auala lasi ‵ki. Kae i te tusi foki eiloa tenā, ne fakailoa atu ne Paulo ke fakaeteete i se manakoga faka-te-foitino telā e mafai o fakavāivāi ne ia te loto finafinau o se tino i te taviniga ki te Atua māfai e se pule faka‵lei atu ki ei. Ne fai mai a ia me e ‵tau o fakaeteete a Kelisiano ke mo a ma “‵teke,” io me fai ne olotou fakamasakoga ke mo a ma tau‵tali atu ki fakatonuga a te Atua.​—Epelu 12:25.

⁶ A te fakailoaga tenā ke puipui mai te manakoga fia “‵teke” atu ki tiute kolā e tuku mai ne te Atua e aoga foki ki Kelisiano i aso nei. E iloa ne tatou me e ‵tau o fakaiku faka‵lei aka ke mo a eiloa ma manatu mā‵ma ki ‵tou tiute faka-Kelisiano io me talia ke fakavāivāi ‵tou loto finafinau ki te taviniga ki te Atua. (Epelu 10:39) A te ‵tonuga loa, a te tukuatuga o te taviniga tapu e aofia i ei te ola mo te mate.​—1 Timoteo 4:16.

7, 8. (a) Se a te mea ka fesoasoani mai ke fakatumau aka ei ‵tou loto finafinau i te taviniga ki te Atua? (e) Kafai ko galo malie atu ‵tou loto finafinau muamua, se a te mea e ‵tau o masaua ne tatou e uiga ki a Ieova mo Iesu?

⁷ Ne a mea ka fesoasoani mai ke puipui ei tatou mai i te faiga o fakamasakoga ke mo a ma fakataunu ‵tou tiute mai te Atua? A te auala tāua e tasi ke taua atu ki te manakoga tenā ko te mafaufau ‵loto faeloa ki te uiga o ‵tou tautoga i te taimi ne fai ei ‵tou tukuatuga. E sili atu i te tāua, ne tauto tatou ki a Ieova me ka fakamuamua ne tatou te faiga o tena loto i ‵tou olaga, kae e fia tausi foki ne tatou te tautoga tenā. (Faitau te Mataio 16:24.) Tela la, i nisi taimi, e ‵tau o mānava malie aka tatou kae fesili ifo: ‘E mata, koi ‵pau eiloa toku loto finafinau ke ola e ‵tusa mo taku tukuatuga ki te Atua e pelā eiloa mo te taimi talu mai taku papatisoga? Io me ko oti ne galo atu a nisi vaega o toku loto finafinau muamua i tausaga talu mai te taimi tenā?’

⁸ Kafai e fakatalitonu mai ne se iloiloga telā ne fai mo te fakamaoni me ko tai vāivāi tatou i te ‵tou taviniga, se mea ‵lei ke mafaufau ki pati fakamalosi loto kolā ne fai mai ne te pelofeta ko Sefanaia. Ana muna: “Sa ma‵taku, a koutou tino i te fa‵kai o Siona! Sa fakagavalivali otou lima! I te Aliki te otou Atua ko fakatasi mo koutou, ko tena ‵mana e maua ei ne koutou a te manumalo. A te Aliki ka saga atu ki a koutou mo te fiafia, kae ona ko tena alofa ka maua ei ne koutou te ola fou. Ka usu pese a ia kae loto fiafia ona ko koutou.” (Sefanaia 3:16, 17) Ne fakasino atu muamua eiloa a pati fakamalosi loto konei ki te kau Isalaelu i aso mua kolā ne toe ‵foki atu ki Ielusalema mai tua o te lotou ‵nofo fakapagotaga i Papelonia. Kae koi aoga eiloa a pati fakamalosi loto konei ki tino o te Atua i aso nei. Ona ko te galuega e fai ne tatou i a Ieova, e ‵tau o masaua faeloa ne tatou me e ‵lago mai a Ieova mo tena Tama kae fakamalosi aka ne lāua a tatou ke fakataunu katoatoa ‵tou tiute ne tuku mai ne te Atua. (Mataio 28:20; Filipi 4:13) Kafai e taumafai tatou ke tumau i te faiga o te galuega a te Atua mo te loto finafinau, ka fakamanuia ne ia tatou kae fesoasoani mai ke tumau eiloa i te gasolo atu ki mua i te feitu faka-te-agaga.

‘Ke Fakamuamua Faeloa te Malo’ mo te Loto Finafinau

9, 10. Se a te uiga o te tala fakatusa a Iesu e uiga ki te ‵kaiga lasi i te afiafi, kae se a te akoakoga e mafai o maua ne tatou mai i ei?

⁹ I te taimi ne kai ei a ia i te fale o se pule o te kau Falesaio, ne tuku atu ne Iesu se tala fakatusa e uiga ki se ‵kaiga lasi i te afiafi. I te tala fakatusa tenā, ne fakamatala atu ne ia a te avanoaga ne tuku atu ki tino kese‵kese ke fakafetaui aka olotou olaga ki te Malo o te lagi. Ne fakaasi mai foki ne ia a te uiga ke “‵teke” atu. (Faitau te Luka 14:16-21.) A tino ‵kami i te tala fakatusa a Iesu ne fai olotou fakamasakoga ki te pogai ko se ‵kau atu ei latou ki te ‵kaiga. Ne fai mai a te tino e tokotasi me ne ‵tau o fano muamua a ia o iloilo aka se laumanafa ne fatoa ‵togi ne ia. Ne fai mai a te suā tino me ne ‵togi ne ia a nisi pulumakau kae e fia iloilo aka ne ia latou. Kae ne fai mai a te suā tino: ‘E se mafai ne au o fanatu. Ne fatoa avaga au.’ Ko oko eiloa i te sē ‵lei o fakamasakoga konei. A te tino telā e ‵togi ne ia se manafa io me ne manu e masani eiloa o iloilo aka ne ia a mea konā a koi tuai o ‵togi ne ia, tela la, e se manakogina malosi ke iloilo fakavave aka a mea konā mai tua ifo i ei. Kae kaia e ‵tau ei o taofi aka ne se tauavaga fatoa fakaipoipo se vaegā ‵kamiga penā? E se tioa eiloa o kaitaua malosi a te tino e a ia te ‵kaiga!

¹⁰ E mafai o tauloto ne tino katoa se akoakoga tāua mai i te tala fakatusa a Iesu. Se a te mea tenā? E pelā mo mea ne taku mai i te tala fakatusa a Iesu, e se ‵tau eiloa o talia ne tatou a ‵tou fakalavelave totino ke sili atu te lotou tāua ki a tatou i lō te ‵tou taviniga ki te Atua. Kafai e se tausi ne se Kelisiano a fakalavelave totino i olotou tulaga ‵tonu, ka gasolo ifo eiloa o vāivāi tena loto finafinau i te galuega talai. (Faitau te Luka 8:14.) Ke mo a ma tupu se vaegā mea penā, e ola tatou e ‵tusa mo te fakamalosiga a Iesu: “Ke mua koutou o ‵sala tena Malo mo tena amiotonu.” (Mataio 6:33) Ko oko eiloa i te fakamalosi loto ke lavea atu me i tavini a te Atua​—tino fo‵liki mo tino ma‵tua—⁠e fakagalue ne latou a te polopolokiga tāua tenā! A te ‵tonuga loa, ko oti eiloa ne fakafaigofie aka ne tino e tokouke olotou olaga ko te mea ke mafai o uke atu olotou taimi e fakamāumāu i te galuega talai. Ne iloa aka ne latou me kafai e mua o ‵sala te Malo mo te loto finafinau, e aumai i ei a te fiafia tonu mo te lotomalie lasi.

11. Se a te tala i te Tusi Tapu e fakaasi mai i ei a te tāua o te tavini atu ki te Atua i te loto finafinau mo te loto kātoa?

¹¹ Ko te mea ke fakaasi mai a te tāua o te loto finafinau i te taviniga ki te Atua, ke mafaufau ki se mea telā ne tupu i te olaga o te Tupu o Isalaelu ko Ieoasa. A te manavase ki te mafai ne Sulia o fakatakavale a Isalaelu, ne tagi atu a Ieoasa ki a Elisaia. Ne fakatonu atu a te pelofeta ki a ia ke sana atu se tao mai te famalama telā e saga ki Sulia, telā e fakaasi atu i ei a te manumalo o Ieova i te fenua tenā. E mautinoa eiloa me ne ‵tau o fakamalosi atu a te mea tenei ki te tupu. Ne toe fai atu a Elisaia ki a Ieoasa ke puke ana matasana kae ‵kini ki te laukele. Ne ‵kini fakatolu ne Ieoasa te laukele. Ne kaitaua a Elisaia ki te mea tenei, me i te ‵kini fakalima io me e fakaono ne ia o te laukele, e fakaasi atu i ei me “ka maua katoatoa ne [ia] te manumalo i te kau Sulia.” Nei la, ne mafai fua o maua ne Ieoasa a manumaloga e tolu. Me ne gasuesue a ia mo te sē lava o te loto finafinau, ne isi se tapula ki te manuia o Ieoasa. (2 Tupu 13:14-19) Se a te akoakoga e maua ne tatou mai i te tala tenā? Ka fakamanuia malosi eiloa ne Ieova a tatou māfai e fai ne tatou tena galuega i te loto kātoa mo te loto finafinau.

12. (a) Se a te mea ka fesoasoani mai ke fakatumau ei ‵tou loto finafinau i te taviniga ki te Atua i te taimi e fakafesagai atu ei ki mea faiga‵ta i te olaga? (e) Fakamatala mai a te auala e maua ei ne koe a mea aoga i te fakalavelave faeloa i te galuega talai.

¹² A mea faiga‵ta i te olaga e tofotofo aka ei a te ‵tou loto finafinau mo te tuku katoatoa atu ki te taviniga ki te Atua. E fakafeagai eiloa a taina mo tuagane e tokouke mo tulaga faiga‵ta i mea tau tupe. Ko se fia‵fia a nisi tino ona ko te mea ko fakatapulagina olotou mea e mafai o fai i te taviniga ki a Ieova ne se masaki lasi. Kae koi mafai eiloa ne tatou taki tokotasi o fai a mea kolā e fakatumau aka ei ‵tou loto finafinau mo te tautali katoatoa atu ki te Keliso. Fakamolemole, ke onoono ki nisi manatu fesoasoani mo tusi siki i te pokisi ko te “Se a te Mea ka Fesoasoani Atu ke Tumau Koe i te Tautali Atu ki te Keliso?” Mafaufau ki te auala e mafai ei o fakaaoga katoatoa ne koe tou atamai. Kafai e fai koe penā, ka maua eiloa a mea aoga ‵tonu. A te tumau i te fakalavelave i te galuega talai e mafai o fai mo fakamalosiga ‵mautakitaki ki a tatou, e fakamaumea ei ‵tou olaga, kae e maua foki i ei ne tatou a te filemu mo te fiafia lasi. (1 Kolinito 15:58) E sili atu i ei, a te tuku atu o tatou mo ‵tou loto kātoa ki te ‵tou taviniga ki te Atua e fesoasoani mai ke ‘fakatalitali ki te Aso o te Atua, kae olioli eiloa ke na oko mai.’​—2 Petelu 3:12.

Ke Fai se Iloiloga mo te Fakamaoni e Uiga ki Ou Fakanofonofoga

13. E mafai pefea o fakaiku aka ne tatou a te uiga o te taviniga mo te loto kātoa mō tatou taki tokotasi?

¹³ Se mea ‵lei ke masaua, me i te tuku atu mo te loto kātoa e se ko te uke o taimi e fakamāumāu i te galuega talai. E kese‵kese a fakanofonofoga o tino taki tokotasi. A te tino telā e fakamāumāu ne ia se itula e tasi io me e lua i te galuega talai i masina takitasi e mafai o fakafiafia malosi atu ki a Ieova māfai konā eiloa a mea e mafai o fai ne ia ona ko tena masaki. (Fakatusa ki te Maleko 12:41-44.) Tela la, ke fakaiku aka me se a eiloa te mea e mafai o fai ne koe mo te loto kātoa i te taviniga ki te Atua, e ‵tau o fai ne tatou se iloiloga mo te fakamaoni ki ‵tou atamai mo mea e mafai o fai e ‵tusa mo ‵tou fakanofonofoga. E pelā me ne soko o Keliso, e ma‵nako foki tatou ke fakafetaui aka ‵tou kilokiloga ki tena kilokiloga. (Faitau te Loma 15:5; 1 Kolinito 2:16) Se a te mea ne fakamuamua faeloa ne Iesu i tena olaga? Ne fai atu a ia ki te vaitino mai i Kapanaumi: “E ‵tau mo au o takutaku atu te Tala ‵Lei o te Malo o te Atua ki nisi fa‵kai, me tenā eiloa te mea ne uga mai ei au ne te Atua, ke vau o fai.” (Luka 4:43; Ioane 18:37) E ‵tusa mo te loto finafinau o Iesu i tena galuega talai, ke iloilo aka ou fakanofonofoga ke lavea atu me e mafai ne koe o momea aka au mea e fai i tau galuega.​—1 Kolinito 11:1.

14. Ne a auala e mafai ei o fakalauefa atu a te ‵tou galuega talai?

¹⁴ A te mafaufau mo te fakaeteete ki ‵tou fakanofonofoga e mafai o takitaki atu ei tatou ki te fakaikuga me e mafai o momea aka a taimi e fakamāumāu ne tatou i te galuega talai. (Mataio 9:37, 38) E pelā mo te fia afe o ‵tou talavou kolā ne fatoa oti mai i akoga ko oti ne momea aka te lotou taviniga kae ko maua nei ne latou te fiafia telā e māfua mai i te tavini atu mo te loto finafinau e pelā me ne paenia. E mata, e fia lagona foki ne koe a te vaegā fiafia tenā? Ko oti ne mafaufau a nisi taina mo tuagane ki olotou fakanofonofoga kae fakaiku aka me ko mafai o olo atu latou ki se koga i te lotou fenua, io me se isi fenua, telā e manakogina i ei a tino talai o te Malo. Kae koi tauloto a nisi tino ki se isi ‵gana ke fesoasoani atu ki tino kolā e fai‵pati ki nisi ‵gana. E ui eiloa e mafai o faigata a te taumafai ke momea aka te uke o mea e fai i ‵tou galuega talai, e aumai i ei a fakamanuiaga e uke, kae kāti e mafai o fesoasoani atu tatou ki nisi tino e tokouke ke “iloa foki ne latou te munatonu.”​—1 Timoteo 2:3, 4; 2 Kolinito 9:6.

Fakaakoakoga ‵Lei i te Tusi Tapu ke Tau‵tali ki ei

15, 16. I a ai a fakaakoakoga e mafai o tau‵tali tatou ki ei i te fai mo fai ne soko loto finafinau o te Keliso?

¹⁵ Ne ‵saga atu pefea a nisi tino kolā ne fai mo apositolo i te taimi ne ‵kami mai ei latou ne Keliso ke fai mo ana soko? E fai mai eiloa te tala e uiga ki a Mataio: “Ne tu ake a Levi, tiakina mea katoa kae tautali ki a ia.” (Luka 5:27, 28) E fai‵tau tatou e uiga ki a Petelu mo Anitelea, kolā ne faiika: “I konā foki eiloa, tiakina o lā tili kae olo tasi mo ia.” Ne toe lavea ne Iesu a Iakopo mo Ioane, kolā e pono mai lā tili fakatasi mo te lā tamana. Ne ‵saga atu pefea lāua ki te ‵kamiga a Iesu? “I konā foki eiloa, tiakina te poti mo te lā tamana; kae tau‵tali i a ia.”​—Mataio 4:18-22.

¹⁶ A te suā fakaakoakoga ‵lei ko Saulo, telā ne fai fakamuli mo fai te apositolo ko Paulo. E tiga eiloa ne aofia malosi a ia i te fakasauaga o soko o Keliso, ne ‵fuli tena olaga kae ne fai mo fai se ‘tavini filifilia’ ke tauave te igoa o te Keliso. “Ne fanatu tonu eiloa a [Paulo] ki te fale tapuaki, kamata eiloa o lauga atu ki tino e uiga ki a Keliso, ana muna, ‘A Iesu ko te Tama a te Atua.’” (Galuega 9:3-22) Kae faitalia tena kufaki i mea faiga‵ta mo fakasauaga e uke, ne seki galo eiloa i a Paulo tena loto finafinau.​—2 Kolinito 11:23-29; 12:15.

17. (a) Se a te mea e manako koe ki ei e uiga ki tou tautali atu ki te Keliso? (e) Ne a fakamanuiaga e maua ne tatou ona ko te faiga o te loto o Ieova mo ‵tou loto kātoa mo ‵tou malosi kātoa?

¹⁷ E mautinoa eiloa me e fia tau‵tali atu tatou ki fakaakoakoga ‵lei a soko konā kae ke talia e aunoa mo te fakatalave a te ‵kamiga tenā. (Epelu 6:11, 12) Ne a fakamanuiaga e maua ne tatou i te taimi e taumafai ei tatou ke fakaakoako katoatoa atu mo te loto finafinau ki te Keliso? E maua ne tatou a te fiafia tonu i te faiga o te loto o te Atua mo te lotomalie telā e māfua mai i te taliaga o nisi tauliaga fakaopoopo i te taviniga mo tiute i te fakapotopotoga. (Salamo 40:8; faitau te 1 Tesalonia 4:1.) E tonu, i te taimi e ga‵lue malosi ei tatou i te tau‵tali atu ki te Keliso, e maua ne tatou a fakamanuiaga ‵gali kae tumau e pelā mo te filemu o te mafaufau, te fiafia, te lotomalie, te taliaga a te Atua, mo te fakamoemoega ki te ola se-gata-mai.​—1 Timoteo 4:10.

E Masaua ne Koe?

• Se a te galuega tāua ko oti ne tuku mai ke fai ne tatou, kae e ‵tau o pefea te ‵tou kilokiloga ki ei?

• Se a te manakoga faka-te-foitino e ‵tau o ‵teke atu tatou ki ei, kae kaia?

• Se a te iloiloga mo te fakamaoni e ‵tau o fai ne tatou?

• Se a te mea ka fesoasoani mai ke tumau tatou i te tau‵tali atu ki te Keliso?

[Ata i te itulau e 31]

Se a te Mea ka Fesoasoani Atu ke Tumau Koe i te Tautali Atu ki te Keliso?

▪ Ke faitau ki te Muna a te Atua i aso katoa, kae mafaufau ‵loto ki mea e faitau ne koe.​—Salamo 1:1-3; 1 Timoteo 4:15.

▪ Ke ‵talo atu faeloa mō te fesoasoani mo te takitakiga a te agaga o te Atua.​—Sakalia 4:6; Luka 11:9, 13.

▪ Ke ‵kau atu ki tino kolā e fakaasi mai ne latou a te loto finafinau mo te loto kātoa i te galuega talai.​—Faataoto 13:20; Epelu 10:24, 25.

▪ Ke talia a te tāua o taimi konei e ola ei tatou.​—Efeso 5:15, 16.

▪ Ke mafaufau faeloa ki ikuga ma‵sei o te ‘‵teke atu.’​—Luka 9:59-62.

▪ Ke mafaufau faeloa ki te tautoga ne fai ne koe i te taimi o tau tukuatuga mo fakamanuiaga e uke ne maua mai i te tavini atu ki a Ieova mo te tautali atu ki te Keliso mo te loto kātoa.​—Salamo 116:12-14; 133:3; Faataoto 10:22.