E Mata, “E Loto Finafinau [Koe] O Fai A Galuega ‵Lei”?

1, 2. Se a te tauliaga e tasi telā e maua fua ne Molimau a Ieova, kae e pefea ou lagonaga ki ei?

E MAFAU‵FAU a tino e tokouke i te mauaga o se taui ona ko te faiga o se mea fakapito se tauliaga lasi ‵ki. Pelā me se fakaakoakoga, ne maua ne nisi tino se tulaga taulia ona ko te loto finafinau o ati aka a te filemu i te va o atufenua e lua. Kae sili atu la te lasi o te tauliaga e maua māfai e uga atu tatou ne te Atua o fesoasoani ki tino ke ati aka ne fesokotakiga filemu mo te lotou Mafuaga!

² E pelā me ne Molimau a Ieova, e maua fua ne tatou a te tauliaga tenā. Mai i te fakatonuga a te Atua mo Keliso, e fakamolemole atu tatou ki tino ke “faka‵lei aka . . . mo te Atua.” (2 Koli. 5:20) E fakaaoga tatou ne Ieova ke ‵futi atu a tino ki a ia. Tenei te auala ne fesoasoani atu ei ki te fia miliona o tino i atufenua e silia atu i te 235 ke fia‵fia ki fesokotakiga ‵lei mo te Atua kae fakamoemoe ke maua a te ola se-gata-mai. (Tito 2:11) E ‵kami ne tatou mo te loto finafinau, “so se tino telā e fiainu ki te vai o te ola e aunoa mo se ‵togi.” (Faka. 22:17) Ona ko te fakatāua ne tatou a te ‵tofiga tenei kae fakataunu mo te fakamaoni, e ‵tau eiloa o taku tatou ki tino kolā “e loto finafinau o fai a galuega ‵lei.” (Tito 2:14) Ka mafau‵fau nei tatou ki te auala e fesoasoani mai ei a ‵tou loto finafinau ke ‵futi mai ne tatou a tino ki a Ieova. A te auala e tasi ko te ‵tou galuega talai.

FAKAAKOAKO KI TE LOTO FINAFINAU O IEOVA MO IESU

3. Se a te mea e fakatalitonu mai ne te “loto finafinau o Ieova” ki a tatou?

³ I te fakasino atu ki mea kolā ka fakataunu ne te pulega a te Tama a te Atua, e fai mai te Isaia 9:7, NW: “Ka fai eiloa ne te loto finafinau o Ieova o kautau a te mea tenei.” E faka‵mafa mai i pati konā a te fiafia lasi o ‵tou Tamana faka-te-lagi ke faka‵sao a tino. E fakaasi manino mai i te fakaakoakoga loto finafinau a Ieova, me e ‵tau eiloa o ‵lago katoatoa atu tatou mo te loto finafinau ki ‵tou galuega ne tuku mai ne te Atua e pelā me ne tino talai o te Malo. A ‵tou ma‵nako malosi o fesoasoani atu ki tino ke iloa ne latou te Atua se fakaasiga o te loto finafinau o Ieova. E pelā me ne tino ga‵lue o te Atua, e mata, e fakaiku aka ne tatou taki tokotasi ke ‵kau katoatoa atu ki te folafolaga o te tala ‵lei e ‵tusa mo ‵tou fakanofonofoga?​—1 Koli. 3:9.

4. Ne fai pefea ne Iesu se fakaakoakoga o te tumau i te loto finafinau i te galuega talai?

⁴ Mafaufau foki ki te loto finafinau o Iesu. Ne fai ne ia se fakaakoakoga ‵lei katoatoa o te tumau i te loto finafinau i te galuega talai. Faitalia te ma‵sei o ‵tekemaiga, ne tumau eiloa a ia i te loto finafinau i te galuega talai ke oko ki te fakaotiga o tena olaga i te lalolagi. I te taimi ko pilipili mai ei a tena mate e pelā me se taulaga, ne fakaiku aka ne Iesu ke fesoasoani atu a ia ki nisi tino ke iloa malosi ne latou a Ieova.

5. Ne gasuesue pefea a Iesu e ‵tusa mo tena tala fakatusa e uiga ki te lakau ko te mati?

⁵ I te tausaga e 32 T.A., ne taku mai ne Iesu a te tala fakatusa o se tagata telā ne isi sena mati i loto i tena togāvine kae seki fua aka eiloa i tausaga e tolu. I te taimi ne fai atu ei ke ‵kati ki lalo a te lakau, ne fakamolemole atu a te tino galue i vine ke fakaavanoa mai se taimi e lava ke fakakaiao aka. (Faitau te Luka 13:6-9.) Se aofaki foliki fua o soko ne mafai o lau i te taimi tenā e pelā me ko fuataga o te galuega talai a Iesu. Kae pelā mo te mea e fakaasi mai i te tala fakatusa tenā o te tino galue i vine, ne fakaaoga ne Iesu a te taimi toetoe koi ‵toe​—e nofo ki te ono masina—ke fakamalosi aka a tena galuega talai i Iutaia mo Pelea. I nāi aso mai mua o tena mate, ne tagi a Iesu mō tino o tena fenua kolā ne “lagona ne latou ki olotou taliga e aunoa mo te ‵saga atu ki ei.”​—Mata. 13:15; Luka 19:41.

6. Kaia e ‵tau ei o uke atu ‵tou mea e fai i te galuega talai?

⁶ I te ‵kilo atu o tatou ki te pili ‵ki mai o te gataga, e mata, e sē se mea tāua ke taumafai tatou o fakauke aka a ‵tou mea e fai i te galuega talai? (Faitau te Tanielu 2:41-45.) Mafaga o tauliaga fakaofoofogia ke fai mo fai se Molimau a Ieova! Ko tatou fua i te lalolagi nei e mafai o tuku atu se fakamoemoega tonu ki te faka‵leiga o fakalavelave o tino. Ne fakamatala mai ne se tino tusitala o te nusipepa me e se mafai o tali aka a te fesili tenei, “Kaia e ‵tupu ei a mea ma‵sei ki tino ‵lei?” Ko te tiute faka-Kelisiano mo te tauliaga o tatou ke fakailoa atu a tali a te Tusi Tapu ki fesili penā ki tino katoa kolā e fia‵fia o faka‵logo mai. E ‵tau o “faka‵fonu [tatou] ki te agaga tapu” i te fakataunuga o ‵tou tiute mai te Atua. (Lo. 12:11) Fakatasi mo te fakamanuiaga a te Atua, e mafai eiloa o fesoasoani atu a ‵tou talaiga loto finafinau ki nisi tino ke iloa ne latou a Ieova kae a‵lofa ki ei.

E FAKAALOALO ATU KI A IEOVA A TE AGAGA FIA TUKU ATU O TATOU EILOA

7, 8. E fakaaloalo atu pefea ki a Ieova a te agaga fia tuku atu e pelā me se taulaga?

⁷ E pelā mo te mea ne fakaasi mai i tala o te apositolo ko Paulo, e mafai o iku atu a ‵tou galuega talai ki te “sē ti moe i po” mo te “seai ne meakai i nisi taimi.” (2 Koli. 6:5) E fakaasi mai i tugāpati konei se ata manino o te tuku atu e pelā me se taulaga kae fakamasaua faka‵lei mai i ei ki a tatou e uiga ki paenia kolā e fakamuamua te lotou galuega talai i olotou olaga kae tausi atu ki a latou eiloa i mea tau tupe. Ke mafaufau foki ki ‵tou misionale kolā ‘e ‵ligi atu a latou eiloa e pelā me se taulaga uaina’ ke fesoasoani atu ki tino i fenua fakaa‵tea. (Fili. 2:17) Kae e a ‵tou toeaina kolā e se ‵kai i nisi taimi io me e se lava te moe i te ga‵lue malosi o tausi a mamoe a Ieova? E isi foki ne ‵tou tino ma‵tua mo latou kolā e fakamasakisaki, e taumafai malosi ke ‵kau mai latou ki fakatasiga Kelisiano kae olo i te galuega talai. E ‵fonu ‵tou loto i te fia‵fia māfai e mafau‵fau tatou ki te loto fiafia o tavini katoa konei a te Atua o tuku atu a latou e pelā me ne taulaga. E pokotia eiloa a kilokiloga a nisi tino ki ‵tou galuega talai i vaegā taumafaiga penā.

⁸ I se tusi ne tusi atu ki te nusipepa ko te Boston Target, Egelani, ne fai mai se tino faitau e sē se Molimau: “A tino ko sē tali‵tonu ki olotou lotu . . . Ne a mea e fai ne faifeau o lotu konei i aso katoa? E se olo latou ki tua e pelā mo Keliso o fakafetaui atu ki tino . . . A te lotu fua telā e foliga mai me e saga tonu mai ko te Molimau a Ieova, kolā e olo o āsi ki tino kae aofia tonu i te talaiga o te munatonu.” I te lalolagi tenei ko ‵fonu i te manatu fakapito, a te agaga fia tuku atu o tatou e pelā me ne taulaga e avatu i ei a tavaega ki a Ieova te Atua.​—Lo. 12:1.

9. Se a te mea e mafai o fakamalosi aka ei tatou ke loto finafinau faeloa i te faiga o galuega ‵lei i ‵tou galuega talai?

⁹ Se a te mea e ‵tau o fai ne tatou māfai e foliga mai me ko galo a te loto finafinau o tatou ki ‵tou galuega talai? Ka fesoasoani mai a te mafau‵fau o tatou ki mea ne fai ne Ieova e auala i te galuega talai. (Faitau te Loma 10:13-15.) E fakalagolago a te faka‵saoga o tino ki te ka‵laga atu i te fakatuanaki ki te igoa o Ieova, kae ka sē ka‵laga atu a tino vaganā ke talai atu tatou ki a latou. E ‵tau o fakamalosi aka tatou ne te mea tenei ke tumau i te loto finafinau i te faiga o galuega ‵lei kae fakamaoni o folafola atu a te tala ‵lei o te Malo.

E TOSINA MAI A TINO KI TE ATUA ONA KO AMIOGA ‵LEI

10. Kaia e mafai ei o fai atu me e ‵futi mai ne ‵tou amioga ‵lei a tino ki a Ieova?

¹⁰ E pelā mo te tāua o te loto finafinau i te galuega talai, e se lava fua i ei ke ‵futi mai a tino ki te Atua. A te lua o vaega o galuega loto finafinau telā e tosina mai ei a tino ki te Atua ko amioga ‵lei faka-Kelisiano. Ne faka‵mafa mai ne Paulo a te tāua o ‵tou amioga i te taimi ne tusi mai ei a ia: “E seai lele eiloa se mea e fai ne matou ke siga ei se tino, ko te mea ke seai se mea ‵se e maua aka i te motou galuega.” (2 Koli. 6:3) E fakagaligali ne ‵tou pati aoga mo amioga ‵lei a te akoakoga a te Atua, e fai ei ke tosina mai a nisi tino ki te tapuakiga a Ieova. (Tito 2:10) A te tonuga loa, e masani o lagona ne tatou a ikuga gali māfai e lavea ne tino loto fakamaoni me e fakaakoako tatou ki amioga a Keliso.

11. Kaia e ‵tau ei o mafaufau faka‵lei tatou kae ‵talo atu e uiga ki te aoga o ‵tou amioga?

¹¹ E ui eiloa e iloa ne tatou me e mafai o fakamalosi atu a ‵tou faifaiga ke fai ne tino a te mea ‵lei, e mafai foki o fakamalosi atu ke fai a mea ma‵sei. Tela la, faitalia me e ‵nofo atu tatou i te koga ga‵lue, i te fale, io me i te akoga, e se ‵tau o fai ne tatou se mea telā e taku fakamasei ei ne so se tino a ‵tou galuega talai mo ‵tou amioga. Kafai e fai faeloa ne tatou a te agasala mo te iloa tonu, ka ma‵sei ‵ki eiloa a ikuga e maua ne tatou. (Epe. 10:26, 27) E fakamalosi aka tatou ne te manatu tenei ke mafaufau faka‵lei kae ‵talo atu e uiga ki mea kolā e fai ne tatou i ‵tou olaga mo te auala e pokotia ei a nisi tino. I te gasolo ifo ki lalo a te tulaga o amioga ‵lei i te lalolagi tenei, ka lavea ne tino loto fakamaoni a te “‵kese . . . i te va o te tino telā e tavini ki te Atua mo te tino telā e se tavini atu ki a ia.” (Mala. 3:18, NW) Ao, e tāua te tusaga e fai ne ‵tou amioga ‵lei faka-Kelisiano i te faka‵leiga o te va o tino mo te Atua.

12-14. E pokotia pefea a te kilokiloga a nisi tino ki ‵tou galuega talai i te auala e kufaki ei tatou i tofotofoga o te fakatuanaki? Tuku mai se fakaakoakoga.

¹² I tena tusi ki te kau Kolinito, ne fakaasi atu ne Paulo me ne logo‵mae a ia i puapuaga, mea faiga‵ta, ‵kiniga, mo te ‵pei ki te falepuipui. (Faitau te 2 Kolinito 6:4, 5.) Kafai e fe‵paki tatou mo tofotofoga o te fakatuanaki, e mafai o fesoasoani atu a ‵tou kufaki ke talia ne nisi tino a te munatonu. Ke fai se faka‵tusaga: I nāi tausaga ko ‵teka, ne isi se taumafaiga ne fai ke fakaseai a Molimau a Ieova i se kogā koga i Angola. Ne puke a Molimau papatiso e tokolua mo tino fia‵fia taki tokotasi kolā ne ‵kau ki ‵tou fakatasiga. Ne maopoopo a tino o onoono i te taimi ne kini ei ne tino ‵teke a latou konei ke oko ki te taimi ko to‵toto ei. Ne seki ‵sao foki a fāfine mo tamaliki i te fakasauaga tenei. Ne fai a te faifaiga tenei ke fakamatakutaku a tino ke mo a se tino e fakalogo ki Molimau a Ieova. Kae mai tua o te kiniga tenā, ne olo atu a tino e tokouke o fakamolemole ki Molimau ke fai olotou akoga faka-te-Tusi Tapu! Mai tua i konā, ne gasolo ki mua a te galuega talai o te Malo, kae ne iku atu ki fakamanuiaga e uke mo te lasi o te fanakaga o te aofaki.

¹³ E fakaasi mai i te fakaakoakoga tenei a te aoga o ‵tou tumau i fakatakitakiga fakavae mai te Tusi Tapu ki luga i nisi tino. Kāti e fia iloa ne tatou me e tokofia a tino ne faka‵lei aka te lotou va mo te Atua ona ko te loto ma‵losi o Petelu mo nisi apositolo. (Galu. 5:17-29) Kae mō tatou, e mafai o talia ne taugasoa i te akoga, tino ga‵lue, io me ko ‵tou kāiga māfai e lavea ne latou a te tumau o tatou o fai a te mea tonu.

¹⁴ E isi ne nisi taina o tatou e fe‵paki faeloa mo fakasauaga i so se taimi. Pelā me se fakaakoakoga, e nofo ki te 40 taina e ‵pei i te falepuipui i Armenia ona ko te sē ‵kau o latou ki te kautau, kae fai pelā me e tokouke atu ka ‵pei ki te falepuipui i masina mai mua. I Eritrea, e toko 55 tavini a Ieova ne ‵pei ki te falepuipui, kae ko nisi tino i ei e silia atu mo te 60 tausaga te ma‵tua. I Kolea ki Saute, e nofo ki te 700 Molimau e ‵pei i te falepuipui ona ko te lotou fakatuanaki. E ‵tusa mo te 60 tausaga te leva o te faifaiga tenei. Ke na ‵talo atu tatou ke maua tavaega o te Atua mai te fakamaoni o ‵tou taina kolā e fakasauāgina i atufenua kese‵kese kae fesoasoani atu ki tino kolā e fia‵fia ki te amiotonu ke talia ne latou a te tapuakiga tonu.​—Sala. 76:8-10.

15. Ke fai se faka‵tusaga ki te auala e mafai ei o tosina mai a nisi tino ki te munatonu ona ko te ola i se olaga fakamaoni.

¹⁵ A te ola o tatou i se olaga fakamaoni e fai foki i ei a tino ke tosina mai ki te munatonu. (Faitau te 2 Kolinito 6:4, 7.) Ke mafaufau ki te tala tenei: “Ko toka se tuagane o ‵togi a tena pasese i te pasi kae fai atu se taugasoa o ia me e se ‵tau o ‵togi me e pili fua te koga e fano a ia ki ei. Ne fakamatala atu ne te tuagane me e ‵tau eiloa o ‵togi faitalia me e pili fua te koga. Oti aka, sopo ifo ei ki lalo mo te pasi a te taugasoa o tou fafine. Mai konā, ne ‵fuli atu a te tino fakatele o te pasi ki te tuagane kae fesili atu “A koe se Molimau a Ieova?” “Ao,” ko te tali a te tuagane. “Kaia ne fesili mai ei koe?” “Ne lagona ne au te sau‵talaga a koulua e uiga ki te ‵togiga o te pasese i te pasi, kae e iloa ne au me i Molimau a Ieova e aofia i nāi tino fua kolā e fai penā kae kolā e fakamaoni i mea katoa.” I nāi masina mai tua ifo, ne fanatu se tagata ki te tuagane i te fakatasiga kae fai atu, ‘E iloa ne koe au? Au ko te tino fakatele o te pasi telā ne faipati atu ki a koe e uiga ki te ‵togi o te pasese i te pasi. I te laveaga ne au a te ‵lei o au amioga, fakaiku aka ei ne au ke kamata au o suke‵suke fakatasi mo Molimau a Ieova ki te Tusi Tapu.” A te fakamaoni o tatou i ‵tou mea e fai e fai ei tatou e pelā me ne faifeau fakatuagagina.

KE FAKAASI ATU FAELOA A UIGA KOLĀ E FAKAALOALO ATU EI KI TE ATUA

16. Kaia e otia ei a loto o tino i vaegā uiga pelā mo te kufaki, alofa, mo te mataalofa? Tuku mai se fakaakoakoga.

¹⁶ E fai foki ne tatou se tusaga i te ‵futimaiga o tino ki a Ieova māfai e fakaasi atu ne tatou a uiga pelā mo te kufaki, alofa, mo te mataalofa. Kāti e ma‵nako a nisi tino kolā e onoono mai ki a tatou o tauloto e uiga ki a Ieova, ana fuafuaga, mo ana tino. E ‵kese ‵ki a faifaiga mo amioga a Kelisiano ‵tonu mo foliga fia amioatua o latou kolā e fai te lotou tapuakiga e pelā me se aofaga fakaloiloi. Ko gasolo o mau‵mea a nisi takitaki lotu mai te fakaloiloiga o olotou tino mai te fakaaogaga o tupe e uke kolā ne maua mo ‵togi a fale ‵togi ‵mafa mo motoka​—ne faite foki ne se tino se fale o te kuli kae faka‵piki a mea faka‵moko ki ei. E tonu, a te tokoukega o tino kolā e fai mai me i a latou ko soko o Keliso e seai se lagonaga i a latou ke “tuku atu . . . e aunoa mo se ‵togi.” (Mata. 10:8) I lō te fai penā, e ‵pau eiloa latou mo faitaulaga ma‵sei o Isalaelu mua, “e ma‵nako ki se ‵togi manafai e akoako atu” latou​—kae ko mea e uke kolā e akoako ne latou e se ‵lago ki ei te Tusi Tapu. (Mika 3:11) E se faka‵lei aka ne se amioga fakaloiloi penā a te va o te tino mo te Atua.

17, 18. (a) E fakaaloalo atu pefea tatou ki a Ieova māfai e fakaata atu ne tatou ana uiga i ‵tou olaga? (e) Se a te mea e fakamalosi atu ki a koe ke tumau i te loto finafinau o fai a galuega ‵lei?

¹⁷ I te suā feitu, e otia a loto o tino ona ko akoakoga ‵tonu faka-Kelisiano mo faifaiga kolā e fai atu ki tuakoi. Pelā me se fakaakoakoga, i te taimi e tasi ne talai atu ei se paenia mai fale ki fale, ne ‵tuli fakavave a ia ne se fafine matua ko mate tena avaga. Muna a tou fafine me i te taimi ne fakatagi ei ne tou tagata a te pēle o te mataloa, kae ko ia e tu i luga i te kakega i te umu ‵kuka, e taumafai o sui a te matāmoli. “E se ‵lei ke fai tokotasi ne koe a te mea tenā,” ko pati a tou tagata. Tenā ne sui ei ne te paenia a te matāmoli kae fano. I te logoga a te tama tagata a te fafine, ko oko eiloa i tena fiafia kae taumafai o ‵sala a te taina ko te mea ke fakaasi atu ki a ia a tena loto fakafetai. I te fakaotiga, ne talia ne te tama tagata se akoga faka-te-Tusi Tapu.

¹⁸ Kaia e fakaiku aka ei ne koe ke tumau koe i te faiga o galuega ‵lei? E se taumate me ko iloa ne koe me kafai e fakaasi atu ne tatou a te loto finafinau i ‵tou galuega talai kae fai a mea e ‵tusa mo te loto o te Atua, e fakaaloalo atu tatou ki a Ieova kae mafai o fesoasoani atu ki nisi tino ke maua a te fakaolataga. (Faitau te 1 Kolinito 10:31-33.) A te loto finafinau o fai a galuega ‵lei i te talaiga o te tala ‵lei mo te faiga o ‵tou amioga ke ‵lei e māfua mai i te ma‵nako malosi o tatou o fakaasi atu te alofa ki te Atua mo tino. (Mata. 22:37-39) Kafai e loto finafinau tatou o fai a galuega ‵lei, ka maua eiloa ne tatou a te fiafia mo te lotomalie tonu i te taimi nei. E se gata i ei, e ‵kilo atu eiloa tatou ki mua ki te aso telā ka fakaasi atu ei ne tino katoa a te loto finafinau ki te tapuakiga tonu e fakaaloalo atu ei ki ‵tou Mafuaga, ko Ieova.