Ke Mo A Ma Fakafanoanoa Ne Koe Te Agaga Tapu O Ieova
“Sa faigina ke fanoanoa te agaga tapu o te Atua, i te agaga ko te fakamailoga tenā a te Atua i a koutou.”—EFESO 4:30.
1. Se a te mea ko oti ne fai ne Ieova mō te fia miliona o tino, kae se a te tiute e maua ne latou?
KO OTI ne fai ne Ieova se mea fakapito mō te fia miliona o tino kolā e ola i te lalolagi faigata tenei. Ko oti ne fakafaigofie ne ia te auala ke fakapili‵pili atu latou ki a ia e auala i tena tama e tokotasi, ko Iesu Keliso. (Ioane 6:44) A koe se tokotasi o tino konei māfai ko oti ne fai ne koe tau tukuatuga ki te Atua kae ola e ‵tusa mo te mea tenā. E pelā me se tino ne papatiso i te igoa o te agaga tapu, ko maua ne koe te tiute ke ola e ‵tusa mo te agaga tenā.—Mataio 28:19.
2. Ne a fesili ka mafau‵fau tatou ki ei?
2 A tatou kolā e “‵toki i luga i te agaga” e fakapei ki luga i a tatou a uiga ‵fou. (Kalatia 6:8; Efeso 4:17-24) Kae e polopoloki mai a te apositolo ko Paulo ki a tatou kae fakailoa mai foki ke mo a ma fakafanoanoa ne tatou te agaga tapu o te Atua. (Faitau te Efeso 4:25-32.) Ke na onoono faka‵lei nei tatou ki pati polopoloki a te apositolo. Se a te mea ne fakauiga ki ei a Paulo i te taimi ne faipati ei a ia e uiga ki te fakafanoanoa atu ki te agaga o te Atua? E mafai pefea o fai ne so se tino telā ne tukugina atu ki a Ieova se mea penā? Kae e mafai pefea o ‵kalo keatea tatou mai te fakafanoanoa atu ki te agaga o Ieova?
Te Uiga o Pati a Paulo
3. E fakamatala mai pefea ne koe a te uiga o pati i te Efeso 4:30?
3 Muamua la, ke mafau‵fau ki pati a Paulo ne tusi i te Efeso 4:30. Ne tusi mai a ia: “Sa faigina ke fanoanoa te agaga tapu o te Atua; i te agaga ko te fakamailoga tenā a te Atua i a koutou, e iloa ei i a koutou e a ia, kae se fakamailoga mo te Aso telā e fakasaoloto ei koutou ne te Atua.” Ne seki manako a te apositolo ko Paulo ke fakamasei ne ana taina tali‵tonu te lotou feitu faka-te-agaga. Me ko te agaga o Ieova telā ne “fakamailoga ei [latou] mo te Aso telā e fakasaoloto” ei latou.” A te agaga tapu o te Atua ne fai kae koi fai eiloa e pelā me se fakamailoga, io me se ‘fakailoga o te fakamanuiaga katoatoa a te Atua i aso konei mai mua’ mō tino fakaekegina fakamaoni. (2 Kolinito 1:22) E fakaata mai ne te fakailoga tenā me ko fai latou mo tino o te Atua kae ka mafai o maua ne latou te ola i te lagi. A te aofaki telā ka maua ne latou te fakamailogaga fakaoti e ‵tusa mo te toko 144,000.—Fakaasiga 7:2-4.
4. Kaia e tāua ei ke ‵kalo keatea mai te fakafanoanoa atu ki te agaga o te Atua?
4 A te fakafanoanoa atu ki te agaga e mafai o fai e pelā me ko te lasaga muamua telā e iku atu ki te galo katoatoa atu o te malosi galue o te Atua i te olaga o se Kelisiano. E lavea atu a te ‵tonu o te mea tenei e auala i pati a Tavita mai tua o te taimi ne agasala ei a ia mo Patisepa. Ne fakamolemole atu a Tavita mo te salamo ki a Ieova: “Sa ave keatea au mai ou mua; sa ave keatea foki a tou agaga tapu mai i a au.” (Salamo 51:11) Ko tino fakaekegina fua kolā e “fakamaoni eiloa ke oko ki te mate” ka maua ne latou a te “foualiki” o te ola i te lagi telā e se toe mafai o mate. (Fakaasiga 2:10; 1 Kolinito 15:53) E ‵tau foki o maua ne Kelisiano kolā e fakamoe‵moe ke ola i te lalolagi a te agaga tapu, māfai e tumau latou i te fakamaoni ki te Atua kae ka maua ne latou tena meaalofa ko te ola telā e fakavae ki te fakatuanaki ki te taulaga togiola a Keliso. (Ioane 3:36; Loma 5:8; 6:23) Tela la, e ‵tau mo tatou katoa o fakaeteete i te fakafanoanoa atu ki te agaga tapu o Ieova.
E Mafai Pefea o Fakafanoanoa ne se Kelisiano a te Agaga?
5, 6. E mafai pefea o fakafanoanoa ne se Kelisiano a te agaga o Ieova?
5 E pelā me ne Kelisiano tukugina atu, e mafai o ‵kalo keatea tatou mai te fakafanoanoa atu ki te agaga. E mafai o tonu a te mea tenei māfai e ‘takitaki kae ola tatou i te agaga,’ kae ka se fakatakavale ei tatou ne manakoga o te foitino kae sē fakaasi atu foki a uiga sē amioatua. (Kalatia 5:16, 25, 26) Kae e mafai o mafuli a te mea tenā. E mafai o fakafanoanoa ne tatou a te agaga o te Atua mai te talia ne tatou ke tapea‵pea malielie atu tatou, kāti i se auala sē lavea, ki te faiga o uiga kolā e taku fakamasei ne te Muna a te Atua telā ne fakaosofia ne te agaga.
6 Kafai e tumau tatou i te faiga o mea kolā e fetaui mo te takitakiga a te agaga tapu, ko fakafanoanoa eiloa ne tatou a te agaga tapu e pelā foki mo Ieova, te Mafuaga o te agaga. A te iloilo faka‵lei ki te Efeso 4:25-32 ka fakaasi mai ei a amioga kolā e ‵tau o fai ne tatou, kae e mafai o fesoasoani mai ke ‵kalo keatea tatou mai te fakafanoanoa atu ki te agaga o te Atua.
Te Auala ke ‵Kalo Keatea Mai te Fakafanoanoa Atu ki te Agaga
7, 8. Fakamatala mai a te pogai e ‵tau ei o fai ne tatou a te mea tonu.
7 E ‵tau mo tatou o fai a te mea tonu. E ‵tusa mo pati i te Efeso 4:25, ne tusi mai a Paulo: “Ke se toe iai se loi. A tino katoa e ‵tau o fai‵pati ki olotou taina ki te mea tonu, i te mea ko tasi katoa tatou i te foitino o Keliso.” Ona ko te mea ko ‵kau fakatasi tatou e pelā me “ko tasi katoa tatou,” e se ‵tau eiloa mo tatou o fai togafiti io me taumafai tonu o takitaki ‵se a ‵tou taina tapuaki, me e ‵pau eiloa te mea tenā mo te ‵loi atu ki a latou. So se tino telā e tumau i te faiga o se vaegā mea penā ka iku atu eiloa ki te seai o se fesokotakiga o ia mo te Atua.—Faitau te Faataoto 3:32.
8 A pati mo faifaiga ‵loi e mafai o fakamasei ne ia te fealofani o te fakapotopotoga. Tela la, e ‵tau o fai tatou e pelā mo te pelofeta fai mea tonu ko Tanielu, telā ne seki ai se mea masei ne maua ne nisi tino i a ia. (Tanielu 6:4) Kae e ‵tau o masaua ne tatou a pati fakatonutonu a Paulo ki Kelisiano kolā e fakamoe‵moe ke ola i te lagi me i tino taki tokotasi o “te foitino o Keliso” e ga‵lue fakatasi kae e ‵tau mo tatou o tumau i te ‵kau fakatasi mo taina fakaekegina kae fai mea ‵tonu o Iesu. (Efeso 4:11, 12) Kafai e fakamoe‵moe tatou ke ola ki te se-gata-mai i te lalolagi Palataiso, e ‵tau foki mo tatou o fai‵pati ki te mea tonu, ko te mea ke ‵lago atu tatou ki te ‵kau fakatasi o ‵tou taina i te lalolagi kātoa.
9. Kaia e tāua ei ke faka‵logo tatou ki pati i te Efeso 4:26, 27?
9 E ‵tau mo tatou o ‵teke atu a te Tiapolo, kae ke mo a ma tuku atu ki a ia se avanoaga ke fakamasei ne ia tatou i te feitu faka-te-agaga. (Iakopo 4:7) E fesoasoani mai a te agaga tapu ke ‵teke atu tatou ki a Satani. E pelā me se fakaakoakoga, e mafai o fai tatou penā mai te fakaeteete i te ita vave. Ne tusi mai a Paulo: “Kafai koe kaitaua, ke se takitaki koe ne tou kaitaua ki te agasala; kae sa nofo mo tou kaitaua i te aso kātoa. Sa tukugina se avanoa mō te Tiapolo.” (Efeso 4:26, 27) Kafai e isi se pogai tonu ke kaitaua tatou, e mafai o fesoasoani atu a te ‵talo lēmū ke ‘toka faeloa ‵tou loto,’ kae ke fakaasi atu a te loto pulea i lō te faiga o se mea telā e mafai o fakafanoanoa atu ki te agaga o te Atua. (Faataoto 17:27) Tela la, ke mo a ma ‵nofo tatou mo ‵tou kaitaua kae tuku atu se avanoaga ki a Satani ke takitaki ne ia tatou ki te faiga o amioga ma‵sei. (Salamo 37:8, 9) A te auala e tasi ke ‵teke atu ei ki a ia ko te faka‵lei fakavave o kinauga e ‵tusa mo polopolokiga a Iesu.—Mataio 5:23, 24; 18:15-17.
10, 11. Kaia e se ‵tau ei mo tatou o kai‵soa io me se fakamaoni?
10 E se ‵tau o taka‵vale tatou i so se fakaosoosoga ke kaisoa io me ke se fakamaoni. E uiga ki te kaisoa, ne tusi mai a Paulo: “A te tino telā e masani o kaisoa, e ‵tau mo ia o fakagata tena amioga tenā, ka ko kamata o fakaputuputu mo tona olaga i fua o ana galuega ‵lei e fai ne ona lima, ko te mea ke mafai ne ia o fesoasoani ki tino ma‵tiva.” (Efeso 4:28) Kafai e kaisoa se Kelisiano tukugina atu, ko ‘fakamasiasi eiloa ne ia te Atua.’ (Faataoto 30:7-9) E se ‵tau eiloa o kaisoa se tino ona ko te mativa. A tino kolā e a‵lofa ki te Atua mo tuakoi ko iloa ne latou me i te kaisoa e sē se fakamasakoga ‵lei.—Maleko 12:28-31.
11 Ne seki taku mai fua ne Paulo a mea kolā e se ‵tau o fai ne tatou; ne faka‵mafa mai foki ne ia a mea e ‵tau o fai ne tatou. Kafai e ola kae takitaki tatou ne te agaga tapu, ka ga‵lue malosi tatou ko te mea ke tausi atu ki ‵tou kāiga kae ke “tufatufa atu foki se mea ki tino fakaa‵lofa.” (1 Timoteo 5:8) Ne tuku fakaa‵tea ne Iesu mo ana apositolo ne tupe ke fesoasoani atu ki tino ma‵tiva, kae ne puke ne Iuta te Isikaliota a nisi tupe. (Ioane 12:4-6) E mautinoa eiloa me ne seki takitaki a ia ne te agaga tapu. A tatou kolā ne takitaki ne te agaga o te Atua e ‘fai te mea tonu i taimi katoa,’ e pelā mo te mea ne fai ne Paulo. (Epelu 13:18) Tela la, e ‵tau o ‵kalo keatea tatou mai te fakafanoanoa atu ki te agaga tapu o Ieova.
Nisi Auala ke ‵Kalo Keatea Mai te Fakafanoanoa Atu ki te Agaga
12, 13. (a) E pelā mo te mea e fakaasi mai i te Efeso 4:29, ne a vaegā pati e ‵tau o ‵kalo keatea tatou mai i ei? (e) Ne a vaegā pati e ‵tau o fai ne tatou?
12 E ‵tau mo tatou o fakaeteete i ‵tou pati e fai. Ne folafola mai a Paulo: “Sa faipati ki muna e ‵mae (io me muna e pala, O le Tusi Paia o le Lalolagi Fou) ei a te loto o te suā tino. Fakaaoga eiloa a pati fesoasoani, ko vaegā pati kolā e aoga i te puti ake kae maua mai ei foki a mea ‵lei, ko te mea ke ‵fua mai au pati ki te ‵lei, i tino kolā ne fakalogo‵logo ki a koe.” (Efeso 4:29, fakamatalaga fakaopoopo) E se gata i ei, e seki fai mai fua ne te apositolo a mea kolā e se ‵tau o fai ne tatou; kae e fai mai foki ne ia a mea e ‵tau o fai ne tatou. Mai lalo i te takitakiga a te agaga o te Atua, ka fakamalosi aka ei tatou ke ‘fakaaoga a pati ‵lei kolā e aoga i te puti ake kae maua mai ei foki a mea ‵lei ki tino kolā ne fakalogo‵logo ki a koe.’ E se gata i ei, e se ‵tau o talia ne tatou a ‘pati fakalogo‵mae’ ke ‵to mai i ‵tou gutu. A te pati Eleni telā ne ‵fuli ki “muna e pala” ne fakaaoga ke fakasino atu ki se fuagalakau, ika, io me se meafasi pala. E pelā eiloa mo te ‵tou takalia‵lia ki vaegā mea‵kai penā, e takalia‵lia foki tatou ki pati kolā e kilo atu ki ei a Ieova me e ma‵sei.
13 E ‵tau o fai ‵tou pati mo te fakamaoni, atafai, kae “ke faka‵kona ki te masima.” (Kolose 3:8-10; 4:6) E ‵tau o iloa ne tino me e ‵kese tatou ona ko ‵tou pati e fai. Tela la, ke na fesoasoani atu tatou ki nisi tino mai te fai atu o “pati kolā e aoga i te puti ake” o latou. Kae ke tali‵tonu tatou ki pati a te faisalamo telā ne usu mai penei: “Te Aliki, toku lafiga mo toku fakaolataga, ke talia mai ne koe aku muna mo oku mafaufauga.”—Salamo 19:14.
14. E ‵tusa mo pati i te Efeso 4:30, 31, se a te mea e ‵tau o ‵kalo keatea tatou mai i ei?
14 E ‵tau mo tatou o ‵kalo keatea mai uiga fakapiau, uiga fakaitaita, pati masei, mo amioga ma‵sei katoa. I te otiga ne fakailoa mai ne ia ke fakaeteete i te fakafanoanoa atu ki te agaga o te Atua, ne tusi mai a Paulo: “Tiaki a uiga fakapiau, a uiga faka‵mae loto, mo uiga fakaitaita. Fakagata te sōna paka‵laga valevale mo te pati ma‵sei! Fakagata foki a uiga katoa o te loto masei!” (Efeso 4:30, 31) E pelā me ne tino sē ‵lei katoatoa, e ‵tau mo tatou katoa o ga‵lue malosi ke pule faka‵lei atu ki ‵tou mafaufauga mo faifaiga. Kafai e talia ne tatou a “uiga fakapiau, a uiga faka‵mae loto, mo uiga fakaitaita,” ka fakafanoanoa eiloa ne tatou te agaga o te Atua. Ka penā foki eiloa māfai e tausi ne tatou a mea ‵se a tino e fai mai ki a tatou, e fakaasi atu a te ita fakamoemoe, kae se talia ke faka‵lei aka mo te tino fai mea ‵se. Kafai foki ko kamata o se ‵saga atu tatou ki polopolokiga i te Tusi Tapu, e mafai o ati aka ne tatou a uiga kolā e takitaki atu ei tatou ki te agasala ki te agaga kae e mafai foki o maua mai ei a ikuga fakama‵taku.
15. Kafai e fai mai ne tino se mea ‵se ki a tatou, ne a mea e ‵tau o fai ne tatou?
15 E ‵tau o a‵lofa, atafai kae fakamagalo. Ne tusi mai a Paulo: “E ‵tau mo koutou o fakatau a‵lofa kae fakatau atafai; ke fakatau fakamagalo foki koutou, e pelā eiloa mo te Atua ko oti ne fakamagalo ne ia koutou i a Keliso.” (Efeso 4:32) Kafai foki loa e logo‵mae malosi tatou ona ko nisi mea ‵se ne fai mai ki a tatou, ke na fakamagalo atu ne tatou, e pelā eiloa mo te mea ne fai ne te Atua. (Luka 11:4) Kāti ne fai ne se taina talitonu ne pati sē ‵lei e uiga ki a tatou. Ko te mea ke faka‵lei aka te fakalavelave, e olo atu tatou ki a ia. E fakaasi mai ne ia tena fanoanoa tonu kae fakatoese mai. E fakamagalo ne tatou a ia, kae e ‵tau o fai ne tatou a mea e tai uke atu. “Sa taui atu se mea ‵se a se tino e fai ki a koe, sa tumau foki tou kaitaua ki a ia,” ko muna a te Levitiko 19:18, “kae alofa ki tou tuakoi e pelā eiloa mo tou alofa ki a koe eiloa. Au ko te Aliki [ko Ieova].”
E Manakogina a te Matapulapula
16. Taku mai se fakaakoakoga me e mafai o fai ne tatou a ‵fuliga ko te mea ke mo a ma fakafanoanoa atu ki te agaga o Ieova.
16 Kafai foki e ‵nofo taki tokotasi tatou, e mafai eiloa o tofotofogina tatou ke fai se mea telā e fakafanoanoa atu ki te Atua. E pelā me se fakaakoakoga, kāti e fakalogologo sāle se taina ki pese sē ‵lei. Fakamuli loa, ko kamata o pakia‵kia ana lagonaga me ko se tautali atu a ia ki pati fakatonutonu i te Tusi Tapu kolā e fakamatala mai i tusi a te “tavini fakamaoni kae poto.” (Mataio 24:45) E mafai o ‵talo atu a ia e uiga mo te fakalavelave tenei kae masaua ne ia a pati a Paulo ne tusi i te Efeso 4:30. Ona ko tena manako malosi ke mo a ma fai ne ia se mea telā e fakafanoanoa atu ki te agaga o te Atua, e fakaiku aka ne ia ke ‵kalo keatea eiloa mai vaegā pese penā. Ka fakamanuia eiloa ne Ieova a te taina telā ne fakaasi mai ne ia a te vaegā uiga tenā. Tela la, ke na fakaeteete faeloa tatou ke mo a ma fakafanoanoa ne tatou a te agaga o te Atua.
17. Se a te mea e mafai o tupu māfai e se matapula‵pula kae ‵talo faeloa tatou?
17 E mafai o ‵to atu tatou ki faifaiga sē ‵ma kae ‵se kolā e mafai o fakafanoanoa atu ki te agaga, seiloga ke matapula‵pula kae tumau faeloa tatou i te ‵talo. Ona ko te mea e māfua mai i te agaga tapu a uiga kolā e fakaata mai ne ia a te ‵tou Tamana faka-te-lagi, kafai e fakafanoanoa ne tatou a ia, ko fakafanoanoa ne tatou te Atua—se mea telā e se ‵tau o fai ne tatou. (Efeso 4:30) Ne fakaasi atu ne faiakoga o te tulafono Iutaia i te senitenali muamua me i o Satani te malosi e fai ei ne Iesu a vavega. (Faitau te Maleko 3:22-30.) A fili o Keliso konei ‘ne muna masei atu ki te agaga tapu’ kae ne fai ne latou a te agasala telā e se mafai o fakamagalogina. Ke mo a ma iku atu tatou ki te auala tenā!
18. E mafai pefea o fakaiku aka ne tatou me e seki fai ne tatou te agasala telā e se mafai o toe fakamagalo?
18 E tiga eiloa e se ma‵nako tatou o fakapilipili atu ki te faiga o te agasala telā e se toe mafai o fakamagalo, e ‵tau o masaua ne tatou a pati a Paulo ke mo a ma fakafanoanoa atu ki te agaga. Kae e a māfai e fai ne tatou se agasala matagā? Kafai ko oti ne sala‵mo tatou kae ko oti foki ne fesoasoani mai a toeaina, e mafai o fakaiku aka ne tatou me ko oti ne fakamagalo tatou ne te Atua, kae e seki agasala tatou ki te agaga tapu. Fakatasi mo te fesoasoani o te Atua, e mafai foki o ‵kalo keatea tatou mai te fakafanoanoa atu faeloa ki te agaga i so se auala.
19, 20. (a) Ne a nisi mea e ‵tau o ‵kalo keatea tatou mai i ei? (e) Ne a mea e ‵tau o fakaiku aka ke fai ne tatou?
19 E auala i te agaga tapu, e fakamalosi aka ne te Atua a te alofa, te fiafia, mo te fealofani o ana tino. (Salamo 133:1-3) Tela la, e ‵tau o ‵kalo keatea tatou mai te fakafanoanoa atu ki te agaga ona ko te gutu fatufatu io me ko te faiga o pati kolā e mafai o fakaasi atu i ei a te sē āva ki tino kolā ne filifili ne te agaga ke fai mo tausi mamoe. (Galuega 20:28; Iuta 8) I lō te fai penā, e ‵tau o ati aka ne tatou a te fealofani mo te āva ki tino katoa i te fakapotopotoga. E tonu, e se ‵tau o fakamalosi aka ne tatou a mavaevaega i potukau i tino o te Atua. Ne tusi mai a Paulo: “Taina, au e fakamolemole atu ki a koutou i te igoa o Iesu Keliso te ‵tou Aliki, ke fakagata te otou finau, ko te mea ke seai ne mavae‵vaega i a koutou; ke fusi koutou i te manatu e tasi mo te fakamoemoega e tasi.”—1 Kolinito 1:10.
20 E toka kae e mafai ne Ieova o fesoasoani mai ke ‵kalo keatea tatou mai te fakafanoanoa atu ki tena agaga. Ke na tumau tatou i te ‵talo atu mō te agaga tapu kae fakaiku aka ke mo a ma fakafanoanoa atu ki te agaga. Ke na tumau eiloa tatou i te “‵toki i luga i te agaga,” mai te ‵sala atu faeloa ki tena takitakiga i te taimi nei ke oko eiloa ki te se-gata-mai.
E Tali Mai Pefea ne Koe?
• Se a te uiga ke fakafanoanoa atu a te agaga o te Atua?
• E mafai pefea o fakafanoanoa ne se tino telā ne tukugina atu ki a Ieova, a tena agaga?
• I auala fea e mafai ei o ‵kalo keatea tatou mai te fakafanoanoa atu a te agaga tapu?
[Ata i te itulau e 29]
Ke faka‵lei fakavave a kinauga
[Ata i te itulau e 30]
Se a te fuataga e fakaasi mai i ei a vaegā pati e fai sāle ne koe?