‘Ke Fakatumau te Tasi o te Agaga’

NE FAKAMALOSI atu a te apositolo ko Paulo ki Kelisiano i Efeso ke tumau i te “fakatau faˋki koutou i otou mea ˋse i te alofa, i te otou taumafai malosi ke fakatumau ne koutou te tasi o te agaga telā ko te fusi o te filemu.”—Efe. 4:2, 3.

A “te tasi,” io me ko te ˋkau fakatasi telā e maua ne tatou, e maua mai “i te agaga” telā ko te malosi galue o te Atua. E pelā mo pati a Paulo, e ˋtau o fakatumau faeloa te ˋtou ˋkau fakatasi. Ko oi a tino e fakatumau ne latou? E ˋtau mo Kelisiano taki tokotasi katoa o gaˋlue ‘ke fakatumau te tasi o te agaga.’

Ke fai se fakatusaga, mafaufau me ne tuku atu ne se tino se motoka fou ma koe. Ko oi e ˋtau o tausi fakaˋlei ne ia te motoka? E manino ˋlei te tali ki ei. E se ˋtau o ˋlosi ne koe ki te tino ne tuku atu ne ia te motoka māfai ko masei ona fua ko koe seki tausi fakaˋlei ki ei.

I se auala tai ˋpau, e tiga loa te ˋtou ˋkau fakatasi faka-Kelisiano se meaalofa mai i te Atua, kae i o tatou taki tokotasi a te tiute ke fakatumau ne tatou te ˋkau fakatasi tenā. Kafai e isi se va sē ˋlei o tatou mo se taina io me se tuagane, e ˋtau o fesili tatou penei, ‘E mata, e fai ne au toku tiute ke fakatumau te tasi o te agaga mai te galue o fakaˋlei aka te fakalavelave tenei?’

“TAUMAFAI MALOSI” O FAKATUMAU TE OTOU ˋKAU FAKATASI

E pelā mo pati a Paulo, i nisi taimi e ˋtau o gaˋlue malosi tatou o fakatumau te tasi o te agaga. E mafai o fai penā māfai ne fai ne se taina io me se tuagane a tatou ke kaitāua. E mata, e fakasino atu a te fakatumau o te ˋkau fakatasi ki te fanatu faeloa o faipati ki te tino e uiga ki se fakalavelave? E se manakogina ke fai penā. Ke fesili ifo, penei, ‘Kafai e fai ne au te mea tenā, e mata, ka fai ei ke ˋlei te fakalavelave io me fai ei ke masei atu?’ I nisi taimi se mea poto ke fakamagalo io me fakapuli atu te fakalavelave tenā.—Faata. 19:11; Male. 11:25.

Ata: Se taina e fakaiku aka ne ia ke fakapuli atu se mea ˋse ne fai ki a ia. 1. Ne pakalaga kaitaua atu se taina ki a ia. 2. E mafaufau a ia ki te mea ne fatoa oti ne fai atu ne te taina ki a ia. 3. E faitau a ia ki te Tusi Tapu kae mafaufau ˋloto. — Ke fesili ifo penei, ‘Kafai e saga atu au ki te fakalavelave tenei, e mata, ka fai ei ke ˋlei te fakalavelave io me fai ei ke masei atu?’

E ˋtusa mo pati ne tusi mai ne te apositolo ko Paulo, e ˋtau mo tatou o “fakatau faˋki . . . i otou mea ˋse i te alofa.” (Efe. 4:2) E fai mai se tusi e tasi me i te uiga o te fuaiupu tenei ko te “talia fua ne tatou a latou konā.” Tena uiga, ko te talia ne tatou i ˋtou taina taliˋtonu ne tino agasala, e pelā eiloa mo tatou. E tonu, e taumafai eiloa tatou ke “ˋpei ki uiga ˋfou.” (Efe. 4:23, 24) Kae seai se tino i a tatou e mafai o fai penā i se auala ˋlei katoatoa. (Loma 3:23) Kafai e talia ne tatou a te manatu tenā, ka faigofie ki a tatou ke fakatau faˋki i te suā tino, ke loto fakamagalo, kae ke ‘fakatumau te tasi o te agaga.’

Kafai e fakaˋlei aka ne tatou a fakalavelave mo nisi tino—faitalia me fai ne tatou penā i ˋtou loto—ka tumau eiloa i te maua ne tatou a “te fusi o te filemu.” A te pati Eleni telā ne ˋfuli ki te “fusi” i te Efeso 4:3 ne ˋfuli foki ki “sokoga ivi” i te Kolose 2:19. A sokoga ivi ne mea kolā e soko ne latou a te ivi e tasi ki te suā ivi. I se auala tai ˋpau, a te filemu, e pelā foki mo te aˋlofa ki ˋtou taina, ka fesoasoani mai ke tumau te ˋpili o tatou ki a latou faitalia ˋtou fakalavelave mo latou.

Tela la, kafai ne fai ne se taina talitonu ke kaitaua, fanoanoa, io me se fiafia koe, taumafai o kilo atu ki te tino tenā mo te alofa atafai i lō te fakamasei ne koe a ia. (Ko. 3:12) A tino katoa e se ˋlei katoatoa, kāti ne fai foki ne koe ke kaitaua se tino i se taimi. Kafai e masaua ne koe te mea tenā ka fesoasoani atu eiloa ke fai tou tiute ke ‘fakatumau te tasi o te agaga.’