Te ‵Tou Takitaki I Aso Nei

“Ne fanatu a ia o tau e pelā mo se tino e manumalo sāle i taua.”​—FAKAASIGA 6:2.

1, 2. (a) Ne fakamatala mai pefea a te galuega fakatupu a Keliso talu mai te 1914 i te Tusi Tapu? (e) Ne a mea ne fai ne Keliso i te taimi ne fakaeke ei a ia?

NE FAKAEKE a Keliso e pelā me ko te Tupu i te Malo faka-Mesia o Ieova i te 1914. E fakaataata pefea nei ne tatou a ia i ‵tou mafaufau? E mata, e fai a ia e pelā me se tupu e mafaufau ‵lei telā e sagasaga i tena nofogaaliki, kae kilokilo mai ki lalo i te lalolagi i taimi katoa ke lavea ne ia a mea e fai ne tena fakapotopotoga? Kafai e penā loa, e ‵tau o ‵fuli a ‵tou kilokiloga. E fakamatala mai ne te Salamo mo te tusi o Fakaasiga a ia e pelā me ko te tupu malosi i luga i te solofanua, telā e tele atu ki mua “e pelā mo se tino e manumalo sāle i taua,” kae tumau eiloa i te “manumalo.”​—Fakaasiga 6:2; Salamo 2:6-9; 45:1-4.

² A te taimi muamua ne fai ei a Keliso e pelā me ko te tupu mai tua o tena fakaekega ko te taimi ne manumalo ei a ia i “te talako mo ana agelu.” E pelā me ko te pule o agelu ko Mikaele telā e fakatonu ne ia a agelu, ne ‵pei ifo ne Keliso a Satani mo ana temoni mai te lagi ‵malu ki lalo i te lalolagi nei. (Fakaasiga 12:7-9) Kae i tena tulaga e pelā me ko te ‘avefekau o te feagaiga,’ ne fai ne Iesu fakatasi mo tena Tamana a te iloiloga o te faletapu faka-te-agaga. (Malaki 3:1) Ne fakamasino ne ia a Lotu Kelisiano ‵Se, te vaega o ‘Papelonia te Sili,’ ona ko te fakamaligi toto kae finalalolagi i te feitu faka-te-agaga mo malo fakapolitiki o te lalolagi tenei.​—Fakaasiga 18:2, 3, 24.

Te Faka‵maga o Tena Pologa Faka-te-Lalolagi

3, 4. (a) Se a te galuega ne fakataunu ne Keliso e pelā me ko te “avefekau” a Ieova? (e) Se a te mea ne fakaata mai i te iloiloga o te faletapu, kae e pelā me ko te Ulu o te fakapotopotoga, se a te fakatokaga ne fai ne Iesu?

³ Ne fakaata mai foki i te iloiloga a Ieova mo tena “avefekau” i te titi o te faletapu faka-te-agaga a te aofia o se potukau o Kelisiano ‵tonu, kolā e se ne vaega o Lotu Kelisiano ‵Se. Kae e ‵tau foki mo Kelisiano fakaekegina konei, io me ko te “fanauga a Levi,” o faka‵magina. E pelā eiloa mo te mea ne ‵valo mai ne Malaki: “Ka vau a ia [Ieova] o fakamasino e pelā me se tino e faka‵ma siliva [“kae ‵tau o faka‵ma ne ia te fanauga a Levi,” Tusi Paia, Samoa]. E pelā mo te tino galue i fiti e faka‵ma ne ia a siliva mo aulo, e penā foki a te ave fekau a te Aliki o faka‵ma a faitaulaga ko te mea ke aumai ne latou ki te Aliki a taulaga ‵lei.” (Malaki 3:3) Ne fakaaoga ne Ieova tena ‘avefekau o te feagaiga,’ ko Iesu Keliso, ke faka‵ma ne ia a te Isalaelu faka-te-agaga.

⁴ Kae ne maua atu ne Iesu a Kelisiano fakamaoni konei e taumafai malosi o tuku atu a mea‵kai faka-te-agaga ki tino tapuaki ‵tonu ki te Atua. Mai te 1879 o vau ki mua, i taimi o fakalavelave faiga‵ta, ne ‵lomi ne latou a muna‵tonu faka-te-Tusi Tapu e uiga ki te Malo o te Atua i itulau o te mekesini tenei. Ne ‵valo mai ne Iesu me i tena “foki mai” o iloilo ana tavini i te vaitaimi tenei o “te gataga o te lalolagi,” e maua atu ne ia se tavini telā e fakatoka ne ia a “mea‵kai i te taimi tonu.” E taku ne ia a te tavini tenā me e fiafia kae “fili ne ia a te tavini tenā, ke pule i ana mea katoa” i te lalolagi. (Mataio 24:3, 45-47) E pelā me ko te ulu o te fakapotopotoga Kelisiano, ne fakaaoga ne Keliso a te “tavini fakamaoni kae poto” tenei ke folafola atu a manakoga o te Malo. Ne tuku atu ne ia a fakatakitakiga mō “tavini” fakaekegina mo olotou taugasoa ko ‘nisi mamoe’ e auala i te Potukau Pule.​—Ioane 10:16.

‵Katiga o Saito i te Lalolagi

5. Se a te mea ne lavea ne Ioane i se fakaasiga me e fai ne te Tupu faka-Mesia?

⁵ Ne lavea ne te apositolo ko Ioane i se fakaasiga se mea ‵kese telā ka fai ne te Tupu faka-Mesia i te “Aso o te Aliki,” i te otiga o Tena fakaekega i te 1914. Ne tusi mai a Ioane: “Ne kilo atu au, matea ei ne au a te kaumana ‵kena, mo te mea e pelā me se tino e sagasaga i luga i te kaumana, mo te foualiki aulo i luga i tona ulu mo tena naifi ‵kati saito mata‵kai e puke i tona lima.” (Fakaasiga 1:10; 14:14) Ne lagona ne Ioane se agelu mai i a Ieova e fai atu ki te Tino ‵kati saito ke tuku ifo tena naifi me “ko ma‵tua saito i te lalolagi.”​—Fakaasiga 14:15, 16.

6. Se a te mea ne fai mai ne Iesu me ka gasolo aka ki luga i taimi mai mua?

⁶ A te ‵katiga tenei o “saito i te lalolagi” e fakamasaua mai ki a tatou e uiga ki te tala fakatusa a Iesu ki saito mo mouku. Ne fakatusa ne Iesu a ia ki se tagata telā ne ‵toki ne ia a saito i tena manafa mo se kilokiloga ke ‵fua mai ki fuataga saito ‵lei, telā e sui ne “tino o te Malo,” ko Kelisiano ‵tonu kolā ne fakaekegina ke pule fakatasi mo ia i tena Malo. Kae i te po, ka vau se fili, telā ko te “Tiapolo,” o ‵toki a mouku, “ko tino a te Tino Masei.” Ne fakatonu atu a te tino ‵toki saito ki ana tino ga‵lue ke tuku ei ke ola tasi aka a saito mo mouku ke oko eiloa ki te taimi e ‵kati ei te saito, telā ko te vaitaimi o te “gataga o te lalolagi.” I te taimi tenā, ka uga atu ei ne ia ana agelu ke olo o ‵vae keatea a saito mai mouku.​—Mataio. 13:24-30, 36-41.

7. Ne fai pefea ne Keliso a te galuega ko te ‵katiga o “saito i te lalolagi”?

⁷ I te fakataunuga o te fakaasiga telā ne tuku atu ki a Ioane, ko oti ne fai ne Iesu a te galuega ko te ‵katiga o saito i te lalolagi kātoa. Ne kamata a te ‵katiga o “saito i te lalolagi” ki te fakamaopoopomaiga o te ‵toega o te toko 144,000 o “tino o te Malo,” kolā ko “saito” i te tala fakatusa a Iesu. Ne lavea faka‵lei atu a te lasi o te ‵kese i te va o Kelisiano ‵tonu mo Kelisiano ‵loi mai tua malie eiloa o te Taua Muamua a te lalolagi, tela la ne fakaopoopo atu a te mea tenei ki te lua o vaega o te ‵katiga o “saito i te lalolagi”​—telā ko te fakamaopoopomaiga o nisi mamoe. A latou konei e se ko “tino o te Malo” kae se “vaitino tokouke” kolā ko toka o ola mai lalo i te Malo tenā. A latou ko saito kolā ne aumai mai “fenua katoa . . . ‵gana.” E faka‵logo latou ki te Malo faka-Mesia, telā e aofia i ei a Keliso Iesu mo te toko 144,000 “tino o te Atua” kolā ka ‵kau fakatasi mo ia i te malo faka-te-lagi tenā.​—Fakaasiga 7:9, 10; Tanielu 7:13, 14, 18.

Takitaki o Fakapotopotoga

8, 9. (a) Se a te mea e fakaasi mai i ei me e se sukesuke fua ne Keliso a faifaiga a te fakapotopotoga kae ko te vaegā olaga foki o tino taki tokotasi i ei? (e) E pelā mo te mea ne fakamatala mai i te itulau e 29, ne a “akoakoga ‵funa kae ‵loto a Satani” e ‵tau o ‵kalo keatea tatou mai ei?

⁸ Ne lavea ne tatou i te mataupu muamua a te auala ne sukesuke ei ne Keliso a te tulaga faka-te-agaga o fakapotopotoga takitasi i te senitenali muamua T.A. I ‵tou aso nei, e pelā me ko te Tupu filifilia telā ne tuku atu ki ei a “te pule . . . i te lagi mo te lalolagi,” e pule mai eiloa a Keliso te ‵tou Takitaki ki fakapotopotoga i te lalolagi kātoa mo olotou ovasia. (Mataio 28:18; Kolose 1:18) Ne fai ne Ieova a ia “ke pule i mea katoa, kae ne tuku atu foki a ia ki te ekalesia” o tino fakaekegina. (Efeso 1:22) Mai te fai penā, e lavea katoa ne ia a mea kolā e ‵tupu i fakapotopotoga o Molimau a Ieova kolā e sili atu i te 100,000.

⁹ E uiga ki te fakapotopotoga i Tuatila, ne avatu ne Iesu a te fekau tenei ki a latou: “Tenei te fekau mai te Tama a te Atua, ka ko ona mata e pelā eiloa mo se afi ko ‵ka ulaula, . . . ‘E iloa ne au au mea e fai.’” (Fakaasiga 2:18, 19) Ne ‵liko ne ia a tino o te fakapotopotoga tenā ona ko olotou amioga sē ‵lei, mo olotou olaga ko ‵fonu i fakafiafiaga, kae fai atu ki a latou, penei: “E iloa ne au a mafaufauga o tino mo olotou manako. E taui atu ne au ki tino takitokotasi e ‵tusa mo olotou mea ne fai.” (Fakaasiga 2:23) E fakaasi mai i te fakamatalaga tenā me e se sukesuke fua ne Keliso a faifaiga a fakapotopotoga takitasi, kae penā foki loa a vaegā olaga o tino takitokotasi. Ne tavae ne Iesu a Kelisiano i Tuatila kolā e seki iloa ne latou a “akoakoga ‵funa kae ‵loto a Satani.” (Fakaasiga 2:24) I aso nei e fiafia a ia ki talavou io me ko tino ma‵tua kolā e ‵kalo keatea mai te onoono atu ki te “akoakoga ‵funa kae ‵loto a Satani” e auala i te itaneti io me ko ata fakasaua i vitio io me talia a manatu o tino. Ko oko eiloa i tena fiafia ke onoono atu ki taumafaiga mo mea faiga‵ta kolā e talia ne Kelisiano e tokouke i aso nei, kolā e taumafai malosi o tau‵tali ki tena takitakiga i vaega katoa o olotou olaga!

10. E fakaasi mai pefea a te takitakiga a Keliso ki toeaina i te fakapotopotoga, kae ne a fakatokaga e ‵tau o iloa ne latou?

¹⁰ E maua ne fakapotopotoga i te lalolagi nei a te tausiga alofa a Keliso e auala i toeaina filifilia. (Efeso 4:8, 11, 12) I te senitenali muamua, a ovasia katoa ne tino kolā ne fakaekegina. E fakamatala mai ne te Fakaasiga a latou e pelā ne fetu i te lima fakaatamai o Keliso. (Fakaasiga 1:16, 20) I aso nei, a te tokoukega o toeaina i te fakapotopotoga e aofia i nisi mamoe. Ne filifili latou mai tua o te ‵talo mo te takitakiga a te agaga tapu; ko te mea ke ‵nofo foki latou mai lalo o te takitakiga a Keliso. (Galuega 20:28) Kae e iloa ne latou me e fakaaoga ne Keliso se potukau foliki o Kelisiano fakaekegina e pelā me se Potukau Pule ke takitaki kae fakatonutonu ei ana soko i te lalolagi.​—Faitau te Galuega 15:6, 28-30.

“Te Aliki Iesu, na Vau!”

11. Kaia e olioli ei ke lavea fakavave ne tatou a te ‵tou Takitaki?

¹¹ I te fakaasiga telā ne tuku atu ki te apositolo ko Ioane, e uke ‵ki a taimi ne fai mai ei a Iesu i a ia ka vau fakavave. (Fakaasiga 2:16; 3:11; 22:7, 20) E seai se fakalotolotolua, me ne fakasino atu a ia ki tena vau o fakaoko mai a te fakamasinoga ki luga i Papelonia te Sili mo te ‵toega o te fakanofonofoga masei a Satani. (2 Tesalonia 1:7, 8) Ona ko te manako ke lavea ne ia a te fakataunuga o mea ‵gali katoa kolā ne ‵valo mai, ne folafola mai a te apositolo ko Ioane telā ko toeaina, penei: “Ka fai eiloa penā. Te Aliki Iesu, na vau!” E ma‵nako foki tatou katoa kolā e ola i te taimi tenei o te gataga o te olaga nei ke lavea atu a te ‵tou Takitaki mo te Tupu e vau i te Malo malosi ke faka‵malu ei a te igoa o tena Tamana kae fakamaluga aka Tena pulega sili.

12. Se a te galuega ka fakaoti ne Keliso a koi tuai o ‵tala mai a matagi o te fakaseaiga?

¹² A koi tuai o vau a Iesu o taua mai ki te fakapotopotoga matea a Satani, ka maua ne toe tino o te toko 144,000 o te Isalaelu faka-te-agaga a te fakamailogaga fakaoti. E fakaasi manino mai i te Tusi Tapu me i matagi kolā e fakamasei ne latou a te fakanofonofoga a Satani ka se ‵tala mai ke oti ‵lei a te fakamailogaga o te 144,000.​—Fakaasiga 7:1-4.

13. E fakaasi mai pefea ne Keliso a tena fakatasi mai i te vaega muamua o te ‘fakalavelave lasi’?

¹³ A te ‘fakatasi’ mai o Keliso talu mai te 1914 ko se matea ‵lei ne tino e tokouke i te lalolagi. (2 Petelu 3:3, 4) Kae ka fai ne ia ke lavea ne tino a tena fakatasi mai e auala i te fakaokomaiga o fakamasinoga a Ieova ki vaega kese‵kese o te fakanofonofoga a Satani. A te fakaseaiga o “te tino Amio Masei,” telā ko faifeau o Lotu Kelisiano ‵Se, se fakaasiga manino o te “foki mai” o Iesu. (Faitau te 2 Tesalonia 2:3, 8.) Ka tuku mai i ei a fakamaoniga ‵tonu me i a Keliso e fai pelā me ko te Famasino a Ieova. (Faitau te 2 Timoteo 4:1.) A te fakaseaiga katoatoa o te ‵toe vaega matagā o Papelonia te Sili ka kamata eiloa ki te fakaseaiga o te emupaea o lotu ‵se katoa i te lalolagi masei tenei. Ka tuku atu ne Ieova ki loto o takitaki fakapolitiki a te manakoga ke fakaseai a te fafine talitagata faka-te-agaga tenei. (Fakaasiga 17:15-18) Tenā eiloa te kamataga o te ‘fakalavelave lasi.’​—Mataio 24:21.

14. (a) Kaia ka fakamu‵tana fua i ei a aso e fakaoko mai ei a te fakalavelave lasi? (e) Se a te uiga o te “fakailoga o te Tama a te Tagata” ki tino o Ieova?

¹⁴ Ne fai mai a Iesu me ka fakamu‵tana fua a aso o te fakalavelave tenā “ona ko tino filifilia a te Atua,” te ‵toega o Kelisiano fakaekegina kolā koi ‵nofo i te lalolagi nei. (Mataio 24:22) Ka se talia ne Ieova a te fakaseaiga tenei o lotu ‵se ke fakaseai i ei a Kelisiano fakaekegina mo olotou taugasoa ko nisi mamoe. Ne fakaopoopo mai ne Iesu me “mai tua ifo o aso konā,” ka isi ne fakailoga i te la, te masina, mo fetu, kae ka “lavea atu i te lagi a te fakailoga o te Tama a te Tagata.” Ka fai ne te mea tenei ke “‵tagi mautuutu a tino katoa i te lalolagi.” Kae ka se fai eiloa penā a te kau fakaekegina, kolā e maua ne latou a te fakamoemoega faka-te-lagi, fakatasi mo olotou taugasoa ko nisi mamoe kolā e fakamoemoe ke ola i te lalolagi nei. Ka ‘‵tu latou kae ‵kilo ki luga, me ko pili mai te lotou fakaolataga.’​—Mataio 24:29, 30; Luka 21:25-28.

15. Se a te galuega ka fai ne Keliso māfai ko vau a ia?

¹⁵ A koi tuai o oko ki te fakaotiga o tena taua, ka vau a te Tama a te Tagata i te suā auala. Ne ‵valo mai a ia: “Kafai e vau au te Tama a te Tagata i toku ‵malu fakatupu, e o‵mai matou mo aku agelu katoa, ko nofo ei au i toku nofogaaliki. E tu au i mua o tino katoa o te lalolagi, o ‵vae ne au ki vaega e lua, e pelā mo te tausi mamoe e ‵vae keatea ne ia a mamoe mai kouti. E tuku ne au a mamoe ki toku feitu fakaatamai, ka ko kouti ki toku feitu fakamaui.” (Mataio 25:31-33) E fakasino atu a te mea tenei ki te vau o Keliso e pelā me se Famasino ke ‵vae ei a “tino katoa” ki vaega e lua: a “mamoe,” ko tino kolā ka ‵lago atu ki ana taina faka-te-agaga (Kelisiano fakaekegina i te lalolagi) mo “kouti,” ko latou kolā “e se faka‵logo ki te Tala ‵Lei e uiga ki te ‵tou Aliki ko Iesu.” (2 Tesalonia 1:7, 8) A mamoe kolā e taku ko “tino amio‵tonu,” ka maua ne latou a te “ola se gata mai” i te lalolagi, a ko kouti ka “olo atu latou ki te fakasalaga se gata mai,” io me ko te fakaseaiga.​—Mataio 25:34, 40, 41, 45, 46.

Ko Oti a te Taua a Iesu

16. Ka fakaoti pefea ne Keliso telā ko te ‵tou Takitaki a tena taua?

¹⁶ Kafai ko oti ne fakamau‵tu aka a te aofaki kātoa o faitaulaga lagolago, kae ko iloa aka foki ei a nisi mamoe kae tuku atu i tena lima fakaatamai mō te fakaolataga, ko mafai ei ne Iesu o ‘manumalo i tena taua.’ (Fakaasiga 5:9, 10; 6:2) E pelā me ko te pule o se kautau o agelu malosi fakatasi mo ana taina kolā ne faka‵tu aka, ka fakaseai katoatoa atu ne ia a te lalolagi politiki, kae aofia i te taua a Satani tenei. (Fakaasiga 2:26, 27; 19:11-21) Ka oti atu eiloa a te taua a Keliso māfai ko fakaseai ne ia te fakanofonofoga masei a Satani. Kae ka ‵loka ne ia a Satani mo ana temoni mō se afe tausaga.​—Fakaasiga 20:1-3.

17. Ka takitaki ki fea ne Keliso a nisi mamoe i te Pulega i te Afe Tausaga, kae se a te fakaikuga e ‵tau o fai ne tatou?

¹⁷ I te faipati atu e uiga ki te “vaitino tokouke” o nisi mamoe, kolā ka ‵sao atu i te fakalavelave lasi, ne ‵valo mai a te apositolo ko Ioane me i te “Tama Mamoe telā e nofo i te kogaloto o te nofogaaliki, ka fai mo olotou tausi mamoe, o takitaki latou ki vai puna o te ola.” (Fakaasiga 7:9, 17) E tonu, i tena Pulega i te Afe tausaga, ka tumau eiloa a Keliso i te takitaki ne ia a nisi mamoe, kolā e faka‵logo tonu ki tena leo, kae takitaki atu latou ki te ola se-gata-mai. (Faitau te Ioane 10:16, 26-28.) Ke na tau‵tali fakamaoni atu ki te ‵tou Takitaki fakamaoni​—i te taimi nei ke oko eiloa ki te lalolagi fou a Ieova telā ko oti ne folafola mai!

Ke Toe Mafaufau ki ei

• Se a te mea ne gasuesue a Keliso o fai mai tua o tena fakaekega?

• Ne a mea faigaluega matea e fakaaoga ne Keliso ke takitaki ei a fakapotopotoga?

• I auala fea ka vau ei a te ‵tou Takitaki ko Keliso?

• Ka takitaki pefea ne Keliso tatou i te lalolagi fou?

[Ata i te itulau e 32]

A te fakaseaiga o te fakanofonofoga masei a Satani ka fakaasi mai i ei a te fakatasi mai o Keliso