E Tāua Eiloa Latou ke Takitaki Atu ki Vai Puna o te Ola

“Te Tamā Mamoe . . . ka fai mo olotou tausi mamoe, o takitaki latou ki vai puna o te ola.”—FAKAASIGA 7:17.

1. E taku mai pefea ne te Muna a te Atua a Kelisiano fakaekegina, kae se a te tiute ne tuku atu ne Iesu ki a latou?

E TAKU ne te Muna a te Atua a Kelisiano fakaekegina kolā e tausi ne latou a manakoga o Iesu i te lalolagi nei e pelā me ko “te tavini fakamaoni kae poto.” I te taimi ne iloilo ei ne Keliso a “te tavini” tenei i te 1918, ne lavea atu ei ne ia me ne fakamaoni eiloa a te kau fakaekegina konā i te lalolagi i te tukumaiga o “mea‵kai [faka-te-agaga] i te taimi tonu.” Tela la, ne fiafia eiloa a Iesu, te Matai, ke filifili fakamuli ne ia latou “ke pule i ana mea katoa.” (Faitau ki te Mataio 24:45-47.) Ona ko te mea tenei, e tavini atu eiloa a te kau fakaekegina ki nisi tino tapuaki o Ieova i te lalolagi nei a koi tuai o maua ne latou te lotou taui i te lagi.

2. Fakamatala mai a mea io me ko kope o Iesu.

² E isi eiloa se pulega a te matai ki luga i ana mea, io me ko ana kope, kae mafai o fakaaogā ne ia i te auala telā e filifili aka ne ia. A kope o Iesu Keliso, te tupu filifilia a Ieova, e aofia i ei a mea katoa o te Malo i te lalolagi. E aofia i ei a “te vaitino tokouke” telā ne lavea atu ne te apositolo ko Ioane i se fakaasiga. E fakamatala mai penei a Ioane e uiga ki te vaitino tokouke: “Ne kilo atu au, matea ei ne au a te vaitino tokouke, ko se mafai eiloa o faitau a latou katoa ne se tino! Ne o‵mai katoa mai fenua katoa, matakāiga, tino valevale, ‵gana, kae ‵tu i mua o te nofogaaliki, pelā foki i mua o te Tamā Mamoe, e ‵pei katoa ki gatu ‵kena, kae puke a lau o pama i olotou lima.”—Fakaasiga 7:9.

3, 4. E taulia malosi pefea a latou kolā e aofia i te vaitino tokouke?

³ E aofia eiloa a sui o te vaitino tokouke i tino kolā ne fakasino atu ki ei a Iesu e pelā me ko ana ‘nisi mamoe.’ (Ioane 10:16) A te lotou fakamoemoega ko te ola ki te se-gata-mai i te lalolagi palataiso. E tali‵tonu latou me ka “takitaki latou [ne Iesu] ki vai puna o te ola” kae ka “‵solo keatea ne te Atua a loimata katoa mai olotou mata.” Ona ko te mea tenā, ko oti “ne ‵ta olotou gatu, kae ne faka‵kena foki ne latou ki te toto o te Tamā Mamoe.” (Fakaasiga 7:14, 17) Ona ko te lotou fakatuanaki ki te taulaga a Iesu, e maua ne latou a ‘gatu ‵kena’ i te kilokiloga a te Atua. E taku amiotonugina latou e pelā me ne taugasoa o te Atua, e pelā eiloa mo Apelaamo.

⁴ E se gata i ei, ona ko te mea e kilo atu te Atua ki te vaitino tokouke o nisi mamoe telā e gasolo aka faeloa o tokouke e pelā me e amio‵tonu, e mafai eiloa ne latou o ‵sao atu i te fakaseaiga o te olaga masei tenei i te fakalavelave lasi. (Iakopo 2:23-26) E mafai o fakapilipili atu latou ki a Ieova, kae e pelā me se potukau, e maua foki ne latou te fakamoemoega gali ke ‵sao atu i a Amaketo. (Iakopo 4:8; Fakaasiga 7:15) E se ‵tu tokotasi latou kae e loto fia‵fia ke tavini atu latou mai lalo i te takitakiga a te lotou Tupu faka-te-lagi mo ana taina fakaekegina i te lalolagi nei.

5. E ‵lago atu pefea a te vaitino tokouke ki taina fakaekegina o Keliso?

⁵ Ko oti eiloa ne fe‵paki a Kelisiano fakaekegina mo ‵tekemaiga ‵lasi mai i te lalolagi a Satani, kae ka fai faeloa penā. E tiga eiloa te feitu tenā, e mafai eiloa o fakalago‵lago latou ki te fesoasoani o olotou taugasoa ko te vaitino tokouke. E tiga eiloa ko mu‵tana ifo te aofaki o Kelisiano fakaekegina, e gasolo aka faeloa ki luga te aofaki o te vaitino tokouke i tausaga katoa i taki selau o afe. E se mafai eiloa ne te kau fakaekegina o tausi a fakapotopotoga Kelisiano takitasi kolā e nofo pelā ki te 100,000 i te lalolagi kātoa. Tela la, a te feitu e tasi e maua ei ne te kau fakaekegina a te fesoasoani mai nisi mamoe, ko te tavini atu o tāgata kolā e fetaui ‵lei mai te vaitino tokouke e pelā me ne toeaina i fakapotopotoga. E fesoasoani atu latou i te tausiga o te fia miliona o Kelisiano kolā ko oti ne tuku atu ke tausi ne “te tavini fakamaoni kae poto.”

6. Ne ‵valo mai pefea te ‵lago atu o taugasoa o Kelisiano fakaekegina ko te vaitino tokouke ki a latou?

⁶ Ne ‵valo mai ne te pelofeta ko Isaia a te fesoasoani atu mo te loto fiafia telā ka tuku atu ne taugasoa ko nisi mamoe, ki Kelisiano fakaekegina. Ne tusi mai a ia: “Muna a te Aliki [ko Ieova] ki a Isalaelu, ‘A te maumea o Aikupito mo Sutana ka puke ma koe; a tāgata ‵loa o Sepa ka fai mo au pologa; ka tau‵tali atu i a koe.’” (Isaia 45:14) I se auala fakatusa, e sa‵sale atu a Kelisiano kolā e fakamoe‵moe ke ola i te lalolagi mai tua o te tavini fakaekegina mo tena Potukau Pule, mai te tau‵tali atu ki te lotou takitakiga. E pelā me ne “pologa,” e fakamāumāu eiloa ne nisi mamoe i te loto fiafia mo te loto kātoa olotou malosi mo kope i te ‵lago atu ki te galuega talai telā ne ‵tofi aka ne Keliso ke fai ne ana soko fakaekegina i te lalolagi.—Galuega 1:8; Fakaasiga 12:17.

7. Se a te mea ko fakamasani nei ki ei a te vaitino tokouke?

⁷ I te taimi e fesoasoani atu ei latou ki olotou taina fakaekegina, e fakamasani eiloa te vaitino tokouke e pelā me ko te fakavae o tino kolā ka tumau mai tua ifo o Amaketo. E ‵tau eiloa o malosi kae ‵mautakitaki te fakavae tenā, kae e ‵tau o loto fia‵fia kae tau‵tali atu eiloa ana sui ke fai a mea kolā e fakatonu mai ne te Matai. E tuku atu eiloa ki Kelisiano taki tokotasi a te avanoaga ke fakaasi atu me e mafai o fakaaogā a ia ne te Tupu, ko Keliso Iesu. Mai te fakaasiatuga nei o te fakatuanaki mo te alofa fakamaoni, e fakaasi atu ei ne ia me ka toka a ia o fakalogo i te taimi e tuku atu ei ne te Tupu a takitakiga i te lalolagi fou.

Ko Fakamaoni Atu ne te Vaitino Tokouke te Lotou Fakatuanaki

8, 9. E fakamaoni atu pefea ne te vaitino tokouke te lotou fakatuanaki?

⁸ E fakamaoni atu ne taugasoa o Kelisiano fakaekegina, kolā ko nisi mamoe i te fakapotopotoga a te lotou fakatuanaki i auala kese‵kese. Muamua la, e ‵lago atu latou ki te kau fakaekegina i te folafolaatuga o te tala ‵lei o te Malo o te Atua. (Mataio 24:14; 28:19, 20) A te lua, e faka‵logo latou mo te loto fia‵fia ki te takitakiga telā e tuku mai ne te Potukau Pule.—Epelu 13:17; faitau ki te Sakalia 8:23.

⁹ Ako te tolu, e ‵lago atu a te vaitino tokouke ki olotou taina fakaekegina mai te ola e ‵tusa mo akoakoga amio‵tonu a Ieova. E taumafai latou o ati aka a uiga e pelā mo “te alofa, te fiafia, te filemu, te kufaki, te mataalofa, te ‵lei, te fakamaoni, te loto malalo, mo te loto pulea.” (Kalatia 5:22, 23) I aso nei, a te fakaasiatuga o uiga penā, i lō te fakamalosiakaga o ‘manakoga o te foitino,’ ko se lauiloa eiloa. E tiga eiloa te feitu tenā, e tumau eiloa a te vaitino tokouke i te ‵teke atu ki te “sulaitetapu, amio masei, mo faiga ma‵sei; ifo ki tupua, fai vailakau, fai fili, fai taua, loto masei, loto ita, manatu fakapito, finau valea, mo te fia fakamavaevae; kaisano, konā, fiafiaga o te konā, mo nisi mea katoa penei.”—Kalatia 5:19-21.

10. Se a te fakaikuga ko oti ne fai ne te vaitino tokouke?

¹⁰ Ona ko te sē ‵lei katoatoa o tatou, e mafai eiloa o faigata ke fakamalosi aka a fuataga o te agaga, ‵kalo keatea mai manakoga faka-te-foitino, kae ‵teke atu foki ki fakamalosiga mai te lalolagi a Satani. E tiga eiloa te feitu tenā, e fakaiku aka ne tatou ke mo a ma talia a te loto vāivāi ona ko ‵tou vāivāiga totino, ‵tou fakata‵mala i nisi taimi, io me ko ‵tou tapulā faka-te-foitino ke pokotia i ei te malosi o ‵tou fakatuanaki io me ke fakavāivāi aka ei te ‵tou a‵lofa mō Ieova. E iloa ne tatou me ka fai eiloa ne Ieova te mea ne tauto a ia ke fai—ko te faka‵saoga o te vaitino tokouke i te fakalavelave lasi.

11. Ne a togafiti ko oti ne fakaaogā ne Satani i ana taumafaiga ke fakavāivāi te fakatuanaki o Kelisiano?

¹¹ E tiga eiloa te feitu tenā, e tumau eiloa tatou i te matapula‵pula me e iloa ne tatou i te ‵tou fili tonu ko te Tiapolo, kae e se ‵fiu vave a ia. (Faitau ki te 1 Petelu 5:8.) E taumafai a ia o fakaaogā a aposetate mo nisi tino ke fakatalitonu mai ki a tatou me e ‵se a akoakoga kolā e tau‵tali atu tatou ki ei. Kae e masani eiloa o se magoi te togafiti tenā. Faitalia me fakatuai ne fakasauāga a te faiga o te galuega talai i nisi taimi, e masani eiloa o aogā fua a fakasauāga ki te fakamalosiakaga o te fakatuanaki o tino kolā e fakasauāgina. Tela la, e momea aka eiloa te fakaaogāga ne Satani se togafiti telā e mafaufau a ia me ka fakavāivāi malosi mai ki ‵tou fakatuanaki. E fakaaogā faka‵lei ne ia a lagonaga o te loto vāivāi. Ne fakailoa atu ki Kelisiano i te senitenali muamua e uiga ki te mea fakamataku tenei, i te taimi ne fai atu ei ki a latou: “Mafaufau ake ki te auala ne ui ne ia [Keliso], i tona loto kufaki i te ukega o mea ma‵sei ne fai ne tino agasala ki a ia.” Kaia? Ko te mea ke se “loto vāi‵vāi, kae fai ki mua.”—Epelu 12:3.

12. E fakamalosi aka pefea ne pati fakatonutonu i te Tusi Tapu a tino kolā e loto vāivāi?

¹² E mata, kai lagona aka eiloa ne koe me e to faigata ke tumau i te tavini atu ki a Ieova? E mata, e mafaufau koe i nisi taimi me e se aogā au taumafaiga? Kafai e penā loa, ke mo a ma talia ne koe a Satani ke fakaaogā ne ia a lagonaga konā ke taofi aka ei koe mai te tavini atu ki a Ieova. A te sukesuke ‵loto ki te Tusi Tapu, te ‵talo mo te loto kātoa, mo te kau atu faeloa ki fakatasiga kae fai taugasoa mo taina Kelisiano ka fakamalosi aka ei koe kae fai foki ei koe ke ‵kalo keatea mai te “loto vāivāi.” Ne tauto mai a Ieova ke fesoasoani atu ki tino kolā e tavini atu ki a ia ke toe fakafou te lotou malosi, kae e mafai o tali‵tonu tatou ki tena tautoga. (Faitau ki te Isaia 40:30, 31.) Ke na saga tonu atu koe ki te taviniga ki te Malo. Ke ‵kalo keatea mai mea fakamāumāu taimi, kae saga tonu atu o fesoasoani ki nisi tino. Kae ka fakamalosi aka ei koe ke kufaki faitalia te loto vāivāi.—Kalatia 6:1, 2. 

E ‵Sao Atu Mai te Fakalavelave Lasi Kae Ulu Atu ki Loto i te Lalolagi Fou

13. Se a te galuega telā e faka‵tali mai mō tino kolā e ‵sao atu i Amaketo?

¹³ Mai tua o Amaketo, e tokouke ‵ki eiloa a tino sē amio‵tonu ka toe faka‵tu aka kae e manakogina ke akoako latou ki auala o Ieova. (Galuega 24:15) Ka ma‵nako ke akoako latou e uiga ki te taulaga togiola a Iesu; kae e sili atu i ei, e ‵tau o akoako latou ki te auala ke fakaasi atu ei te fakatuanaki ki te taulaga ko te mea ke maua ne latou a mea aogā mai i ei. E ‵tau o ‵teke atu latou ki manatu ‵se fakalotu kolā ne tali‵tonu latou ki ei, kae ke tiaki olotou olaga mua. E ‵tau foki o akoakogina ke faka‵pei ki luga i a latou a te foitino fou telā e fakamailoga ki ei a Kelisiano ‵tonu. (Efeso 4:22-24; Kolose 3:9, 10) Ka uke eiloa a galuega e ‵tau o fai ne nisi mamoe kolā ka ‵sao atu i te taimi tenā. Ko tafaga la te fia‵fia ke fai te vaegā taviniga penā ki a Ieova, telā e saoloto mai i fakamalosiga mo nisi mea sē aogā o te lalolagi masei tenei!

14, 15. Fakamatala mai a fakatau fakamalosiga kolā ka maua atu i vā o tino kolā e ‵sao atu i te fakalavelave lasi mo tino amio‵tonu kolā ka toe‵tu mai.

¹⁴ Ka uke atu a mea e tauloto ne tavini fakamaoni a Ieova kolā ne ‵mate mai mua o te taviniga a Iesu i te lalolagi, i te taimi tenā. Ka tauloto latou ki fakamatalaga e uiga ki te Mesia telā ne folafola mai, telā ko leva ne fakamoe‵moe latou ki ei kae ne seki matea atu ne latou. I olotou olaga mua, ko oti eiloa ne fakaasi atu ne latou te loto fia‵fia ke akoako latou ne Ieova. Mafaufau la ki te fiafia mo te tauliaga ka maua ne tatou ke fesoasoani atu ki a latou e pelā mo te fakamatala atu ki a Tanielu te fakataunuga o valoaga ne tusi ne ia ki lalo kae ne seki malamalama tou tagata i ei!—Tanielu 12:8, 9.

¹⁵ E tonu, e tiga eiloa ka uke a mea e tauloto ne tino kolā ka faka‵tu aka mai i a tatou, ka uke foki ‵tou fesili ka ‵sili atu ki a latou. E mafai fakamatala mai ne latou a tala kolā ne taku mai i te Tusi Tapu kae ne seki fakamatala likiliki mai i ei. Mafaufau la ki te fakafiafia ke lagona atu a fakamatalaga likiliki e uiga ki a Iesu mai i tena fakataina ko Ioane te Papatiso! E seai se fakalotolotolua me ka momea aka te ‵tou loto fakafetai ki te Muna a te Atua i lō te taimi nei, ona ko mea ka tauloto ne tatou mai i vaegā molimau fakamaoni penā. A tavini fakamaoni a Ieova kolā ko oti ne ‵mate—e aofia i ei a latou i te vaitino tokouke kolā e ‵mate i taimi o te gataga—ka “toe‵tu ake latou ki te olaga e sili atu i te ‵lei.” Ne kamata te lotou taviniga ki a Ieova i se lalolagi telā ne pule atu ki ei a Satani. Ko tafaga la te lotou fia‵fia ke fakatumau te lotou taviniga i fakanofonofoga kolā e sili atu i te ‵gali i te lalolagi fou!—Epelu 11:35; 1 Ioane 5:19.

16. E ‵tusa mo te valoaga, ka gasolo atu pefea ki mua te Aso Fakamasino?

¹⁶ I se taimi i te Aso Fakamasino, ka ‵tala mai i ei a pelugā tusi. Fakatasi mo te Tusi Tapu, ka fai eiloa a mea konā mo fai te fakavae mō te fakamasinoga o tino ola katoa e ‵tusa mo te lotou tāua ke maua te ola se-gata-mai. (Faitau ki te Fakaasiga 20:12, 13.) I te fakaotiga o te Aso Fakamasino, ka lava ‵lei eiloa te avanoaga ne tuku atu ki tino taki tokotasi ke fakaasi atu me e ‵lago atu a ia ki te feitu fea i te kinauga e uiga ki te pulega sili i te lagi mo te lalolagi. E mata, ka fakamaluga aka ne ia te fakatokaga a te Malo kae talia ne ia te Tamā Mamoe ke takitaki atu a ia “ki vai puna o te ola”? Io me ka ‵teke atu a ia, mai te ita fitifiti ma fakalogo ki te Malo o te Atua? (Fakaasiga 7:17; Isaia 65:20) I te taimi tenā, ka maua eiloa ne tino katoa i te lalolagi se avanoaga ke fai se fakaikuga totino, e aunoa mo te fakalavelave atu o te agasala telā ne togi mai io me ko fakanofonofoga ma‵sei konei. E seai se tino ka mafai ne ia o fakafesili aka te ‵tonu o te ‵toe fakamasinoga fakaoti a Ieova. Ko tino amio ma‵sei fua ka fakaseai atu ki te se-gata-mai.—Fakaasiga 20:14, 15.

17, 18. Se a te taimi fakafiafia telā e olioli eiloa ki ei a Kelisiano fakaekegina mo nisi mamoe i te Aso Fakamasino?

¹⁷ E olioli eiloa a Kelisiano fakaekegina i aso nei, kolā e tāua ke maua ne latou te Malo, ke pule mai latou i te Aso Fakamasino. Ko tafaga la te fakaofoofogia o te tauliaga tenā! Ko te fakamoemoega eiloa tenā e fakamalosi atu ki a latou ke tau‵tali atu ki pati fakatonutonu kolā ne tuku atu ne Petelu ki olotou taina i te senitenali muamua: “Taumafai malosi o fai a te kalaga a te Atua mo tena filifiliga ki a koutou ke fai mo lagona mautakitaki; me kafai e fai penā ne koutou e se toe mafai eiloa o toe pa‵ku keatea koutou. I te feitu tenei, e tuku atu ki a koutou a te saolotoga tonu o ulu atu ki te Malo se gata mai o te ‵tou Aliki mo te ‵tou Fakaola ko Iesu Keliso.”—2 Petelu 1:10, 11.

¹⁸ E fia‵fia fakatasi eiloa a nisi mamoe mo olotou taina fakaekegina. Ne fakaiku aka ne latou ke ‵lago atu ki olotou taina fakaekegina. E pelā me ne taugasoa o te Atua i aso nei, e fakamalosi aka latou ke fai te ‵toe mea e mafai ne latou o fai i te taviniga a te Atua. I te Aso Fakamasino, ka fia‵fia eiloa latou ke ‵lago atu mo te loto kātoa ki fakatokaga a te Atua i te taimi e takitaki atu ei latou ne Iesu ki vai puna o te ola. Kae—i te fakaotiga—ka tāua eiloa latou ke fai mo tavini a Ieova i te lalolagi ki te se-gata-mai!—Loma 8:20, 21; Fakaasiga 21:1-7.

E Masaua ne Koe?

• Ne a mea e aofia i mea io me ko kope o Iesu?

• E ‵lago atu pefea a te vaitino tokouke ki olotou taina fakaekegina?

• Ne a tauliaga mo fakamoemoega e fia‵fia ki ei te vaitino tokouke?

• E pefea tau kilokiloga ki te Aso Fakamasino?

[Ata i te itulau e 26]

A latou kolā e aofia i te vaitino tokouke ne ‵ta olotou gatu kae faka‵kena ki te toto o te Tamā Mamoe

[Ata i te itulau e 27]

Se a te mea e fakamoemoe ke tauloto ne koe mai tino fakamaoni kolā ka toe‵tu mai?