Te Pogai e Tāua ei te Tala o e Tena ki a Koe

E TASI o mea fakaofoofogia ki manatu ‵teke kolā e faka‵sae aka ne nisi tino sukesuke ki te tala e uiga ki Etena me e se ‵lago ki ei a te Tusi Tapu kātoa. E pelā mo te Polofesa o Mataupu Fakalotu, ko Paul Morris, ne tusi mai: “E seai eiloa ne nisi fakamatalaga i te Tusi Tapu e uiga ki te tala o Etena.” E tiga eiloa e lotoma‵lie a tino kolā e fai pelā me e ‵poto atu ki a ia, e ‵teke atu eiloa te manatu tenā ki te mea tonu.

E uke eiloa a taimi e fakasino atu a te Tusi Tapu ki te fatoaga o Etena, Atamu, Eva, mo te gata.a Kae ko te lavea atu o te ‵se o nai tino sukesuke, ko te momea aka o te fakamaoniga o te ‵se o takitaki lotu mo tino ‵teke ki te Tusi Tapu. Mai i te taumafai ke fakamasei a te tala i te Kenese e uiga ki te fatoaga o Etena, ko taumafai eiloa a takitaki lotu mo tino ‵teke ki te Tusi Tapu ke fakaseaoga a te Tusi Tapu. E pefea la?

A te malamalama i te mea ne tupu i Etena e aoga ki te malamalama o tatou i te Tusi Tapu kātoa. E pelā me se fakaakoakoga, ne fakatoka a te Muna a te Atua ke fesoasoani mai ke maua a tali ki toe fesili faka‵numi kae tāua kolā e fakafesagai atu ki ei a tino. Kae e fakasino atu a tali i te Tusi Tapu ki fesili konā ki mea ne ‵tupu i te fatoaga o Etena. Mafaufau la ki nisi fakaakoakoga.

● Kaia e ga‵solo aka ei tatou o ma‵tua kae ‵mate? Ne ‵tau o ola a Atamu mo Eva ki te se-gata-mai moi ne tumau lāua i te fai e pelā me ne tino faka‵logo ki a Ieova. Ka ‵mate lāua māfai fua e ‵teke atu lāua. I te aso ne ‵teke atu ei lāua, ne kamata o ‵mate lāua. (Kenese 2:​16, 17; 3:​19) Ne galo atu i a lāua a te tulaga ‵lei katoatoa kae ne mafai fua o tuku mai a te tulaga agasala mo te tulaga sē ‵lei katoatoa ki lā tama‵liki. E fakamatala mai te Tusi Tapu: “Ne oko mai te agasala ki te lalolagi i te tagata e tokotasi, ne aumai foki ne tena agasala te mate. Tela la, ko oko ki tino katoa te mate, i te mea ko agasala a tino katoa.”​—Loma 5:​12.

● Kaia ne talia ei ne te Atua a amioga ma‵sei? I te fatoaga o Etena, ne taku ne Satani a te Atua ki se tino loi telā e taofi ne ia a mea ‵lei mai i ana mea ne faite. (Kenese 3:​3-5) Ne fakafesili ne ia a te ‵tonu o te auala e pule mai ei a Ieova. Ne filifili ne Atamu mo Eva ke tau‵tali atu lāua i a Satani; telā ne ‵teke atu foki lāua ki te pulega sili a Ieova, telā ne folafola atu me e mafai ne te tagata o fakaiku aka ne ia i a ia eiloa a te mea ‵lei mo te mea masei. I tena fakamaoni ‵lei katoatoa mo tena poto, ne iloa ne Ieova me e tasi fua te auala ke tali faka‵lei atu ei ki pati ‵toa konei​—ke ­fakaavanoa te taimi, ke maua ei ne tino a te avanoaga ke pule atu eiloa ki a latou e pelā mo te mea ne filifili ne latou. E ‵losi atu foki i nisi taimi a te ikuga o amioga ma‵sei ki te fakamalosiga a Satani kae e fakaasi malie mai i ei a te mea tonu sili: E se mafai ne te tagata o pule atu ki a ia eiloa e aunoa mo te Atua.​—Ielemia 10:23.

● Se a te fuafuaga a te Atua mō te lalolagi? I te fatoaga o Etena, ne fakatoka ne Ieova se fakatonuga ke fakagaligali ei te lalolagi. Ne fakatonu atu a ia ki a Atamu mo Eva ke faka‵fonu a te lalolagi ki lā tama‵liki kae ke “pule i ei,” ko te mea ke fakasolo atu a te gali mo te tokagamalie tenā ki te paneta kātoa. (Kenese 1:​28) Tela la, ko te fuafuaga eiloa a te Atua ke fai te lalolagi mo fai se palataiso kae ke ‵nofo i ei se kāiga ‵lei katoatoa kae fealofani o tama‵liki a Atamu mo Eva. A te ukega o mea i te Tusi Tapu ko mea e uiga ki te auala e fakataunu ei ne te Atua a te fuafuaga muamua tenā.

● Kaia ne vau ei a Iesu Keliso ki te lalolagi? A te ‵tekeatuga i te fatoaga o Etena ne aumai i ei a te mate ki a Atamu mo Eva mo lā tama‵liki, kae ne tuku mai eiloa mo te alofa ne te Atua a te fakamoemoega. Ne uga mai ne ia tena Tama ki te lalolagi ke tuku mai i ei a te mea telā e taku ne te Tusi Tapu ki se togiola. (Mataio 20:28) Se a te uiga o te mea tenā? Ia, a Iesu ko te “Atamu fakaoti”; ne manumalo a ia i te mea ne takavale ei a Atamu. Ne fakatumau ne Iesu tena ola ‵lei katoatoa faka-te-foitino mai i te tumau i te fakalogo ki a Ieova. Ne tuku atu i ei tena ola e pelā me se taulaga, io me se togiola, telā ne tuku mai i ei a te auala mō tino fakamaoni katoa ke fakamagalo olotou agasala kae fakamuli ifo ke maua te vaegā olaga telā ne maua ne Atamu mo Eva i Etena a koi tuai o agasala lāua. (1 Kolinito 15:​22, 45; Ioane 3:​16) I konā ka fakamautinoa aka eiloa ne Iesu ke fakataunu a te fuafuaga a Ieova ke ‵fuli a te lalolagi tenei ki se palataiso e pelā mo te fatoaga o Etena.b

A te fuafuaga a te Atua e seai se mea fakaloiloi, io me se fakamatalaga toetoe o mataupu silisili. Se mea tonu eiloa. E pelā eiloa mo te fatoaga o Etena se koga tonu i te lalolagi tenei, fakatasi mo manu mo tino ‵tonu, e penā foki loa te folafolaga a te Atua mō aso mai mua se mea tonu eiloa telā ko pili o fakataunu. E mata, ka penā foki tou olaga i aso mai mua, se mea tonu eiloa ki a koe? E fakalagolago eiloa te mea tenā ki a koe. E manako a te Atua ke maua ne tino e tokouke, ke oko foki eiloa ki tino kolā ne tai malaia malie olotou olaga, se vaegā olaga gali penā i aso mai mua.​—1 Timoteo 2:​3, 4.

I te taimi ko pili ei o mate a Iesu, ne faipati atu a ia ki se tagata telā ne matagā ‵ki tena olaga. A te tagata tenā se tino solitulafono; ne iloa ne ia me ne ‵tau eiloa o mate a ia. Kae ne ‵fuli atu a ia ki a Iesu mō se fakamafanafanaga, mō se fakamoemoega foki. Se a te tali a Iesu? ‘Ka fakatasi tāua i te Palataiso.’ (Luka 23:43) Kafai e manako a Iesu ke toe lavea ne ia a te tino amio solitulafono mua tenā i konā​—e toe fakatu kae fakamanuiagina ki se avanoaga ke ola ki te se-gata-mai i te palataiso e pelā mo Etena​—e a, e se manako foki a ia ke maua ne koe a te fakamanuiaga tenā? E manako eiloa a ia ki ei! E manako foki ki ei tena Tamana! Kafai e manako koe ke maua se olaga penā i aso mai mua, ke na fai eiloa ne koe a mea e mafai o fai ne koe ke tauloto e uiga ki te Atua telā ne faite ne ia a te fatoaga o Etena.

[Fakamatalaga fakaopoopo]

[Ata i te itulau e 10]

Se Valoaga Telā e Tuku Fakatasi i ei te Tusi Tapu

“Kafai ne au a koulua [te gata] mo te fafine ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine a tou ulu, kae ka u ne koe olotou vae.”​—Kenese 3:​15.

Tenā eiloa te valoaga muamua i te Tusi Tapu, telā ne fai atu ne te Atua i Etena. Ko oi la a nisi tino e tokofa: te fafine, tena fanau, te gata, mo tena fanau? Ne kamata aka pefea a te “fai fili” tenei i va o latou?

TE GATA

Satani te Tiapolo.​—Fakaasiga 12:9.

TE FAFINE

Ko te fakapotopotoga o tama faka-te-agaga i te lagi. (Kalatia 4:​26, 27) Ne faipati a Isaia e uiga ki te “fafine,” i te ‵valo mai me ka fanau mai ne ia se atufenua faka-te-agaga i aso mai mua.​—Isaia 54:1; 66:8.

TE FANAU A TE GATA

Ko latou kolā e filifili ke fai te loto o Satani.​—Ioane 8:​44.

TE FANAU A TE FAFINE

Muamua la, ne vau a Iesu Keliso mai i te vaega faka-te-lagi o te fakapotopotoga a Ieova. Ne aofia foki i te “fanau” a taina faka-te-agaga o Keliso, kolā ka pule fakatasi mo ia i te lagi. A Kelisiano fakaekegina konā e aofia i te atufenua faka-te-agaga, ko “te Isalaelu a te Atua.”​—Kalatia 3:​16, 29; 6:16; Kenese 22:18.

KA FAKAPAKIA TE VAE

Se mea fakalogo‵mae ki te Mesia kae e se tumau a te pakiaga tenā. Ne manumalo a Satani i te faiga ke tamate a Iesu i te lalolagi. Ne toetu aka a Iesu.

KA TUKI PALA TE ULU

Se pakiaga tamate tino ki a Satani. Ka fakaseai atu ne Iesu a Satani ki te se-gata-mai. A koi tuai o tupu a te mea tenā, ka fakamasei ne Iesu a mea ma‵sei katoa kolā ne kamata ne Satani i Etena.​—1 Ioane 3:8; Fakaasiga 20:10.

Mō se fakatoetoega o te matua fakavae o te Tusi Tapu, ke onoono ki te polosiua ko te The Bible​​—What Is Its Message? telā ne ‵lomi ne Molimau a Ieova.

[Ata i te itulau e 11]

Ne logo‵mae a Atamu mo Eva i ikuga fakama‵taku o te agasala