E Mata, e Takalialia Koe ki te Ofa Tulafono?

“E . .  . takalialia [Iesu] ki te mea ‵se.”—EPELU 1:9.

1. Se a te mea ne akoako mai ne Iesu e uiga ki te alofa?

KE FAKA‵MAFA atu a te tāua o te alofa, ne fai atu a Iesu Keliso ki ana soko: “E avatu ne au ki a koutou te poloakiga fou: ke fakatau a‵lofa koutou. E pelā mo au e alofa ki a koutou; tela la, e ‵tau mo koutou o fakatau a‵lofa. Tenā te mea e iloa ei ne tino katoa ko oku soko koutou, manafai e fakatau a‵lofa koutou!” (Ioane 13:​34, 35) Ne fakatonu ne Iesu ana soko ke fakaasi atu te alofa sē fakapito o te suā tino ki te suā tino. E fai a te alofa tenā mo fai te lotou fakailoga. Kae ne fakamalosi atu foki a Iesu ki a latou: “Ke a‵lofa atu koutou ki otou fili, ‵talo foki mō latou kolā e fakasaua ki a koutou.”​—Mataio 5:44.

2. Se a te mea e ‵tau o takalia‵lia ki ei a soko o Keliso?

² I tafa o te akoako atu o ana soko e uiga ki te alofa, ne akoako latou ne Iesu ki mea kolā e ‵tau o takalia‵lia latou ki ei. Ne fakasino atu te mea nei ki a Iesu: “E fiafia koe ki te mea tonu kae takalialia ki te mea ‵se [mea ma‵sei].” (Epelu 1:9; Salamo 45:7) E fakaasi mai i te mea tenei me e se ‵tau fua o ati aka ne tatou a te fiafia ki te mea tonu io me ko te amiotonu kae ko te takalialia foki ki te agasala, io me ko te ofa tulafono. Se mea tāua me ne fai ‵tonu mai te apositolo ko Ioane, penei: “So se tino e agasala, e sala a ia i te ofa ne ia a te Tulafono a te Atua; me i te agasala ko te ofa tulafono tenā.”​—1 Ioane 3:4.

3. Ne a feitu o te olaga ka onoono ki ei tatou i te mataupu tenei e uiga ki te takalialia ki te ofa tulafono?

³ Kae e pelā me ne Kelisiano, e ‵tau o fesili ifo tatou penei, ‘E mata, e takalialia au ki te ofa tulafono?’ Ke na suke‵suke tatou ki te auala e mafai ei o fakaasi atu ne tatou a te ‵tou takalia‵lia ki mea ma‵sei i feitu e fa konei o te olaga: (1) ko ‵tou kilokiloga ki te fakaaoga ‵se o te kava, (2) ko ‵tou kilokiloga ki faifaiga faivailakau, (3) ‵tou ­faifaiga ki amioga finalalolagi, a ko te (4) ko ‵tou kilokiloga ki tino kolā e fia‵fia ki te ofa tulafono.

Ke mo a ma Pologa ki te Kava

4. Kaia ne seki manavase ei a Iesu ma faipati atu i te taimi ne fakailoa atu ei ne ia ke fakaeteete i te konā?

⁴ Ne inu a Iesu ki te uaina i nisi taimi, kae ne kilo atu ki ei e pelā me se meaalofa mai te Atua. (Salamo 104:​14, 15) Kae ne seki fakaaoga ‵se eiloa ne ia te meaalofa tenei mai i te inu ke konā. (Faataoto 23:​29-​33) Ne faipati atu a Iesu e aunoa mo te manavase i te taimi ne polopoloki ei ne ia a tino kolā e fai penā. (Faitau te Luka 21:34.) A te fakaaogaga ‵se o te kava e mafai o iku atu ki nisi agasala matagā. Kae ne tusi mai te apositolo ko Paulo: “Ke mo a e ko‵nā koutou i te uaina, telā e fakamasei ne ia a koutou, ka ke ‵fonu koutou i te Agaga.” (Efeso 5:​18) Ne fakamalosi foki ne ia a loma‵tua i te fakapotopotoga ke mo a ma fai e pelā me ne “pologa a te kava.”​—Tito 2:3.

5. Ne a fesili e mafai o ‵sili ifo ne tino kolā e filifili ke inu latou ki meainu ma‵losi?

⁵ Kafai e filifili ne koe ke fakaaoga te kava, e ‵tau o fesili ifo koe, penei: ‘E mata, e maua ne au te kilokiloga a Iesu e uiga ki te konā? Kafai e manako au o fakatonutonu a nisi tino i te mea tenei, e mata, e mafai o faipati atu au e aunoa mo te manavase? E mata, e inu au ke ave keatea te manavase io me ke fakamāmā aka te fi‵ta o te mafaufau? E pefea te uke o meainu ma‵losi e fakaaoga ne au i vaiaso takitasi? E pefea taku kilokiloga māfai e fai mai se tino me ko tō uke aku mea e inu? E mata, e kamata o fai atu aku fakamasakoga io me kaitaua? A te talia ke pologa tatou ki te kava e mafai o pokotia i ei ‵tou atamai ke fakasako‵sako atu faka‵lei kae fai foki a filifiliga ‵poto. E taumafai eiloa a soko o Keliso o puipui olotou mafaufau ‵lei.​—Faataoto 3:​21, 22.

Ke ‵Kalo Keatea Mai Faifaiga Faivailakau

6, 7. (a) E saga atu pefea a Iesu ki a Satani mo ana temoni? (e) Kaia ko salalau valevale ei a faifaiga faivailakau i ‵tou aso nei?

⁶ I tena nofoga i te lalolagi, ne ‵teke katoatoa atu ne Iesu a Satani mo ana temoni. Ne ‵teke atu ne ia a kinauga a Satani e uiga ki tena alofa fakamaoni. (Luka 4:​1-​13) Ne iloa kae ‵teke foki ne ia a taumafaiga fai lēmū ke fakamalosi aka ei ana mafaufauga mo faifaiga. (Mataio 16:​21-​23) Ne fesoasoani atu a Iesu ki tino loto ‵lei ke ‵sao mai pulega ma‵sei a temoni.​—Maleko 5:​2, 8, 12-​15; 9:​20, 25-​27.

⁷ Mai tua o te fakasopoga o Iesu e pelā me ko te Tupu i te 1914, ne faka‵ma ne ia a te lagi mai fakamalosiga ma‵sei a Satani mo ana temoni. E pelā me ko te ikuga, ko lasi te avanoaga e maua ne Satani​—ke “fakaloiloi ne ia te lalolagi kātoa.” (Fakaasiga 12:​9, 10) Kae e se ‵tau o ‵poi tatou, me tenā eiloa te pogai ko salalau kae gasolo aka ei ki luga a faifaiga faivailakau. Ne a mea e mafai o fai ke puipui ei tatou?

8. Se a te mea e ‵tau o iloilo aka ne tatou ki ‵tou filifiliga e uiga ki fakafiafiaga?

⁸ E fakailoa manino mai i te Tusi Tapu e uiga ki te fakamataku o te aofia i faifaiga faivailakau. (Faitau te Teutelonome 18:​10-​12.) I aso nei, e fakamalosi ne Satani mo ana temoni a mafaufauga o tino e auala i ata, tusi, mo tafaoga i vitio kolā e fakamalosi aka ei a faifaiga faivailakau. Tela la, kafai ko filifili aka a fakafiafiaga, e ‵tau o fesili ifo tatou taki tokotasi, penei: ‘I masina konei ko ‵teka atu, e mata, kai filifili aka eiloa ne au a fakafiafiaga e auala i ata, polokalame i TV, tafaoga i vitio, tusi io me ko ata faka‵kata kolā e fakaaoga i ei a faifaiga faivailakau? E mata, e malamalama au i te tāua ke ‵teke atu ki faifaiga faivailakau, io me e onoono eiloa au ki mea fakama‵taku konei? E mata, kai mafaufau aka eiloa au ki lagonaga o Ieova ki taku filifiliga e uiga ki fakafiafiaga? Kafai e ‵tala ne au te mataloa ki fakamalosiga fakasatani, e mata, ka faimālō au ne toku alofa ki a Ieova mo ana fakatakitakiga amio‵tonu ke ‵teke katoatoa atu ne au a mea konā?’​—Galuega 19:​19, 20.

Ke Tau‵tali ki te Faka‵pulaga a Iesu e Uiga ki Amioga Finalalolagi

9. E mafai pefea o ati aka ne se tino a te fiafia ki te ofa tulafono?

⁹ Ne ‵lago atu a Iesu ki tulaga o Ieova e uiga ki faifaiga fakatauavaga sē ‵tau. Ne fai mai a ia: “E a, e seki fai‵tau ne koutou i te Tusi? ‘A ia telā ne faite ne ia a tino i te kamataga, ne faite ne ia a te tagata mo te fafine. Ne fai atu, “Tenā te pogai ko tuku ei ne te tagata tena tamana mo tena mātua, kae fakatasi mo tena avaga, ko fai ei lāua mo foitino e tasi. Tela la, ko se toe tokolua lāua, ka ko tasi. A lāua kolā ko oti ne fakatasi ne te Atua, e seai se tino e mafai ne ia o ‵tala.” (Mataio 19:​4-6) Ne iloa ne Iesu me i mea kolā e lavea ne tatou e mafai o pokotia i ei ‵tou loto. I tena Lauga i luga i te mauga, ne fai atu a ia: “Ko oti foki ne lagona ne koutou me ne fai mai penei, ‘Sa mulilua.’ Kae fai atu au ki a koutou: so se tino e onoono atu ki se fafine kae manako ki ei tena loto, ko mulilua a ia i te loto.” (Mataio 5:​27, 28) A tino kolā e se fia ‵saga atu ki te faka‵pulaga a Iesu e ati aka eiloa ne latou a te fia‵fia ki te ofa tulafono.

10. Fakamatala mai se tala e fakaasi mai ei me e mafai o ‵kalo keatea se tino mai i te onoono atu ki ata ma‵sei.

¹⁰ E fakamalosi aka ne Satani a faifaiga fakatauavaga sē ‵tau e auala i ata ma‵sei. Ko ‵fonu eiloa te olaga masei tenei i mea konā. E faigata i tino kolā e onoono atu ki ata ma‵sei ke ‵solo keatea ne latou a ata ma‵sei konā i olotou mafaufau. E mafai eiloa o umiti latou ki ata ma‵sei. Mafaufau la ki te mea ne tupu ki se Kelisiano e tokotasi. E fai mai a ia: “Ne onoono ‵muni sāle au ki ata ma‵sei. Ne nofo atu loa au i se isi lalolagi telā ne mafaufau au me e ‵mao mai te lalolagi telā e tavini atu ei au ki a Ieova. Ne iloa ne au me e ‵se te faifaiga tenei kae ne mafaufau au me koi talia eiloa a taku taviniga ki te Atua.” Se a te mea ne ‵fuli i ei a mafaufauga o te taina tenei? E fai mai a ia: “E tiga eiloa ne fai a te mea tenei mo fai te ‵toe mea faigata ke fai ne au, ne fakaiku aka ne au ke fakaasi atu toku fakalavelave ki toeaina.” Ne tiakina katoatoa fakamuli ne te taina tenei a te faifaiga tenā. “I taimi ne faka‵ma ei toku olaga mai te agasala tenei,” e fai ‵tonu mai a ia, “ne fatoa maua ne au se loto lagona ‵ma.” A latou kolā e takalia‵lia ki te ofa tulafono e ‵tau foki o takalia‵lia ki te onoono ki ata ma‵sei.

11, 12. E mafai pefea o fakaasi atu ne tatou a te ‵tou takalia‵lia ki te ofa tulafono māfai ko fai ‵tou filifiliga ki pese?

¹¹ A pese fakatagitagi fakatasi mo pati o pese e mafai o fakamalosi aka i ei ‵tou lagonaga, mo ‵tou loto. A pese se meaalofa mai te Atua kae ko leva eiloa ne fakaaoga i te tapuakiga tonu. (Esoto 15:​20, 21; Efeso 5:​19) Kae e fakamalosi aka ne te lalolagi a Satani a pese kolā e fakatāua i ei a amioga ma‵sei. (1 Ioane 5:​19) E mafai pefea o iloa ne koe me i pese kolā e fakalogologo koe ki ei e fakamasei ne ia koe io me ikai?

¹² Kāti e mafai o fesili ifo muamua koe penei: ‘E mata, a pese kolā e fakalogologo au ki ei e fakamaluga aka ei a te tatino, te mulilua, te finalalolagi, mo te pati masei? Kafai e ‵tau o faitau ne au a pati o nisi pese ki se tino, e mata, e lavea ne te tino tenā me i a au e takalialia ki te ofa tulafono, io me e fakaasi mai i pati me ko lailai toku loto?’ E se mafai o takalia‵lia tatou ki te ofa tulafono i pati kae fakatāua ne tatou a te fakalogologo ki pese penā. Ne fai mai a Iesu: “Ka ko te mea e vau i te gutu, e fanake tonu eiloa mai te loto, tenā te mea e fakamasei ne ia a te tino. Me ko te loto e māfua mai ei a mafaufauga ma‵sei: ko te tatino, ko te mulilua, ko te finalalolagi, ko te kaisoa, ko te faitala ‵loi, mo te fatufatu.”​—Mataio 15:​18, 19; fakatusa ki te Iakopo 3:​10, 11.

Ke Talia te Kilokiloga a Iesu ki Tino Kolā e Fia‵fia ki te Ofa Tulafono

13. E pefea te kilokiloga a Iesu e uiga ki tino agasala loto ma‵keke?

¹³ Ne fai mai a Iesu i a ia ne vau o kalaga ki tino agasala, io me ko tino ofa tulafono, ke sala‵mo. (Luka 5:​30-​32) Kae ne kilo atu pefea a ia ki tino kolā ne loto ma‵keke i te taimi e agasala ei latou? Ne tuku atu ne Iesu se fakailoaga ke fakaeteete i vaegā fakamalosiga mai tino penā. (Mataio 23:​15, 23-​26) Kae ne fakaasi manino mai foki ne ia penei: “E se ‵sao ki te Malo o te lagi a latou katoa kolā e fai mai ki a au, ‘Te Aliki, te Aliki,’ na ko ia fua telā e fai ne ia te loto o toku Tamana telā i te lagi. Kafai e oko mai te Aso tenā, e tokouke e fai mai ki a au penei, ‘Te Aliki, te Aliki! Ko tou igoa ne folafola atu ei ne matou a te Muna a te Atua. Ko tou igoa foki ne ‵tuli ei ne matou a temoni, kae fai foki i ei ne matou a vavega!’ Telā, taku ‵tonu atu ei ne au ki a latou, ‘E se iloa ne au koutou; olo kea‵tea mai i a au, tino amio ma‵sei!’” (Mataio 7:​21-​23) Kaia e maua ei ne tino konei a te vaegā fakamasinoga tenei? Me e fakamasiasi ne vaegā tino penā a te Atua kae fakalogo‵mae ne latou a nisi tino e auala i olotou faifaiga ofa tulafono.

14. Kaia e ‵tuli keatea ei a tino agasala kolā e se sala‵mo mai te fakapotopotoga?

¹⁴ E fakatonu mai te Muna a te Atua me ka ‵tuli keatea a tino agasala kolā e se sala‵mo mai te fakapotopotoga. (Faitau te 1 Kolinito 5:​9-​13.) E tolu a pogai e tāua ‵ki ei a te mea tenei: (1) ke puipui te igoa o Ieova mai fakamaseiga, (2) ke puipui te fakapotopotoga mai fakalailaiga, a ko te (3) ke fesoasoani atu ki te tino agasala ke salamō māfai e mafai.

15. Kafai e ma‵nako tatou ke tumau te ‵tou fakamaoni ki a Ieova, ne a fesili tāua e ‵tau o fesili ifo ne tatou?

¹⁵ E mata, e tau‵tali atu tatou i te kilokiloga a Iesu ki tino kolā e tumau i olotou auala ofa tulafono? E ‵tau o mafau‵fau tatou ki fesili konei: ‘E mata, e filifili au ke fai taugasoa mo se tino telā ne fakatea io me ko manako o ‵vae keatea mai te fakapotopotoga Kelisiano? Kae e a māfai a te tino tenei se kāiga ‵pili o koe io me ko se nofo i te fale?’ A te vaegā tulaga tenā e mafai o fai e pelā me se tofotofoga tonu ki te ‵tou fia‵fia ki te amiotonu mo te ‵tou fakamaoni ki te Atua.a

16, 17. Se a te mea faigata e tasi ne fakafesagai atu ki ei se mātua Kelisiano, kae se a te mea ne fesoasoani atu ki tou fafine ke ‵lago atu ki te fakatokaga o te fakateaga o tino fai mea ‵se kae se sala‵mō?

¹⁶ Mafaufau la ki te tala o se tuagane telā e isi sena tamaliki tagata ne alofa muamua ki a Ieova. Kae fakamuli ifo, ne filifili ne ia mo te sē salamō a amioga ofa tulafono. Tela la, ne fakatea tou tagata mai te fakapotopotoga. Ne alofa te ‵tou tuagane tenei ki a Ieova, kae ne alofa foki ki tena tama kae ne faigata ‵ki ke fakagalue aka ne ia a te fakatonuga i te Tusi Tapu ke ‵kalo keatea mai te fakatasitasi mo ia.

¹⁷ Se a te fesoasoani e mafai o tuku atu ne koe ki te tuagane tenei? Ne fesoasoani atu se toeaina ki a ia ke masaua me e malamalama a Ieova i te logo‵mae o tou fafine. Ne fai atu te toeaina ke mafaufau tou fafine ki te logo‵mae ne ‵tau o maua ne Ieova i te taimi ne ‵teke atu ei a nisi o ana tama faka-te-agaga ki a ia. Ne fakasakosako atu te toeaina ki tou fafine me faitalia a te iloa ne Ieova a te fakalogo‵mae o se vaegā tulaga penā, e manako a ia ke faka‵tea atu a tino agasala kolā e se sala‵mo. Ne fakatāua ne ia a fakamasauaga konā kae fakamaoni foki a ia o ‵lago atu ki fakatokaga e uiga ki te tino fakatea.b A te vaegā fakamaoni tenā e fakafiafia atu ki te loto o Ieova.​—Faataoto 27:11.

18, 19. (a) Kafai e ‵kati kea‵tea ‵tou fesokotakiga mo se tino ofa tulafono, e fakamaoni atu i ei te ‵tou takalia‵lia ki te a? (e) Ne a ikuga e maua māfai e fakamaoni tatou ki te Atua mo tena fakatokaga?

¹⁸ Kafai e fakafesagai atu koe ki se tulaga penā, ke masaua me e alofa atu a Ieova ki a koe. Mai te ‵kati keatea o te fesokotakiga mo se tino fakatea, ko fakaasi atu ei ne koe a tou takalialia ki uiga mo faifaiga kolā e iku atu ki ei. Kae ko fakaasi atu foki me e alofa koe ki te tino fai mea ‵se kae manako koe ke fai te ‵toe mea ‵lei mō ia. A tou fakamaoni ki a Ieova e mafai o momea aka i ei a te avanoaga ka maua ne tino kolā ne polopoloki ke sala‵mo kae toe ‵foki mai ki a Ieova.

¹⁹ Ne tusi mai penei se tino telā ne fakatea kae ne toe foki mai: “E fiafia au me e alofa eiloa a Ieova ki ana tino me e fakamautinoa ne ia ke tumau tena fakapotopotoga i te ‵ma. A te mea telā e foliga sē ‵lei ki tino mai tua se mea e tāua kae se faifaiga alofa foki ke fai.” E mata, e talitonu koe me ka fesoasoani atu ki te tino ke fai sena fakaikuga māfai e tumau eiloa a tino i te fakapotopotoga, e aofia i ei tena kāiga i te fesokotaki atu ki a ia i te taimi e fakatea ei? A te ‵tou ‵lago atu ki te fakatokaga i te Tusi Tapu e uiga ki te fakatea e fakamaoni atu ei me e fia‵fia tatou ki te amiotonu kae lavea foki i ei te aiā o Ieova ke fakatoka ne ia a tulaga i mea tau amioga.

“Takalia‵lia ki Amioga Ma‵sei”

20, 21. Kaia e tāua ei ke tauloto tatou e uiga ki te takalialia ki te ofa tulafono?

²⁰ E fakailoa mai te apositolo ko Petelu: “Ke toka kae matapula‵pula foki koutou.” Kaia? “Me i te otou fili, telā ko te Tiapolo, e fanofano tele e pelā mo se leona fekai, e salasala ki te tino ke kai ne ia.” (1 Petelu 5:8) E mata, e mafai o fai koe mo fai te tino tenā? E fakalagolago eiloa a mea e uke ki te auala e tauloto ei koe ke takalialia ki te ofa tulafono.

²¹ A te atiakaga o se lagonaga takalialia ki mea ma‵sei e se faigofie. Ne fa‵nau mai eiloa tatou i te agasala, kae e ola tatou i se lalolagi telā e fakamalosi aka i ei a manakoga faka-te-foitino. (1 Ioane 2:​15-​17) Kae mai i te fakaakoako atu ki a Iesu Keliso kae ati aka te alofa lasi mō Ieova te Atua, ka mafai ei o manuia tatou i te atiakaga o te lagonaga takalialia ki te ofa tulafono. Ke na fakaiku aka ne tatou ke “takalia‵lia ki amioga ma‵sei,” kae tali‵tonu katoatoa me ko Ieova e “‵pui ne ia a ola o ana tino . . . mai te malosi o tino amio ma‵sei.”​—Salamo 97:10.

[Footnotes]

KaTali Mai Pefea ne Koe?

• Se a te mea ka fesoasoani mai ki a tatou ke iloilo aka ‵tou kilokiloga e uiga ki meainu ma‵losi?

• Ne a puipuiga e mafai o maua ne tatou ke ‵teke atu ki faifaiga faivailakau?

• Kaia e fakamataku ei a te onoono atu ki ata ma‵sei?

• E fakaasi atu pefea ne tatou a te takalialia ki te ofa tulafono māfai ko fakatea se tino pele o tatou?

[Ata i te itulau e 29]

Kafai e filifili koe ke inu ki meainu ma‵losi, se a te mea e ‵tau o mafaufau koe ki ei?

[Ata i tu itulau e 30]

Ke fakaeteete i fakamalosiga fakasatani i mea tau fakafiafiaga

[Ata i tu itulau e 31]

Se a te mea e ati aka ne te tino telā e onoono atu ki ata ma‵sei tena alofa ki ei?