Ke Fiafia ki te Amiotonu mo Tou Loto Kātoa

‘E fiafia koe ki te amiotonu.’​—SALAMO 45:7.

1. Se a te mea e mafai o fesoasoani mai ke tau‵tali atu tatou i “ala ‵tonu” o te amiotonu?

E AUALA i tena Muna mo tena agaga tapu, e takitaki ne Ieova ana tino i “ala ‵tonu” o te amiotonu. (Salamo 23:3) Kae ona ko tatou ne tino sē ‵lei katoatoa, e ma‵nako faeloa tatou ke olo keatea mai te auala tenā. A te ‵fuli atu o fai a te mea tonu e manakogina i ei a taumafaiga mautinoa. Se a te mea ka fesoasoani mai ke manumalo tatou? E pelā mo Iesu, e ‵tau o fia‵fia tatou o fai te mea tonu.​—Faitau te Salamo 45:7.

2. Ne a “ala ‵tonu” o te amiotonu?

² Ne a “ala ‵tonu” o te amiotonu? E lauliki fua a te auala ke sa‵sale i ei. A “ala ‵tonu” konei ne faka‵mautakitaki ki tulaga amio‵tonu o Ieova. I te ‵gana Epelu mo te ‵gana Eleni, e fakasino atu a te “amiotonu” ki te “mea tonu,” telā e faka‵mafa mai ei a te fakalogo ki fakatakitakiga i mea tau amioga. A Ieova e “fakatuagagina,” e fia‵fia ana tino tapuaki ke ‵kilo atu ki a ia ke fakaasi mai ne ia te auala tonu i mea tau amioga telā e ‵tau o tau‵tali i ei latou.​—Ielemia 50:7.

3. E mafai pefea ne tatou o tauloto ki mea e uke atu e uiga ki te amiotonu o te Atua?

³ Kafai fua e taumafai tatou mo ‵tou loto kātoa ke faka‵logo ki tulaga amio‵tonu o te Atua, ka fakafiafia katoatoa eiloa ne tatou a ia. (Teutelonome 32:4) E kamata eiloa te mea tenā ki te tauloto ki mea katoa e uiga ki a Ieova te Atua mai tena Muna, ko te Tusi Tapu. Ko te uke o mea e tauloto ne tatou e uiga ki a ia, kae fakapili‵pili atu ki a ia i aso katoa, ko te lasi foki o te ‵tou fia‵fia ki tena amiotonu. (Iakopo 4:8) E ‵tau foki o talia ne tatou a te takitakiga a te Muna tusia a te Atua māfai e ma‵nako tatou o fai a fakaikuga tāua i te olaga.

‵Sala ki te Amiotonu o te Atua

4. Ne a mea e aofia i te ‵sala atu ki te amiotonu o te Atua?

⁴ Faitau te Mataio 6:​33. A te ‵sala atu ki te amiotonu o te Atua e aofia i ei a mea e uke atu i lō te fakaaoga fua o taimi ki te talaiatuga o te tala ‵lei o te Malo. Ko te mea ke talia ne Ieova a ‵tou taviniga tapu, e ‵tau o fetaui ‵lei a ‵tou amioga i aso takitasi mo ana tulaga ma‵luga. Se a te mea e ‵tau o fai ne tino katoa kolā e ‵sala atu ki te amiotonu o Ieova? E ‵tau mo latou o “‵pei ki te foitino fou, telā ne faite i foliga o te Atua i te amiotonu mo te ‵malu.”​—Efeso 4:​24.

5. Se a te mea ka fesoasoani mai ke manumalo tatou i te loto vāivāi?

⁵ I te taimi e taumafai ei tatou ke ola e ‵tusa mo tulaga amio‵tonu o te Atua, e mafai o loto vāi‵vai tatou i nisi taimi ona ko ‵tou vāivāiga. Ne a mea e mafai o fesoasoani mai ke manumalo tatou i te loto vāivāi kae fakamasani ke fia‵fia ki te amiotonu kae fai foki? (Faataoto 24:10) E ‵tau o fakapili‵pili atu faeloa tatou ki a Ieova i se ‵talo “i te loto talitonu fakamaoni mo te fakatuanaki.” (Epelu 10:​19-​22) Faitalia me ko tatou ne Kelisiano fakaekegina io me e maua ne tatou te fakamoemoega i te lalolagi nei, e fakatuanaki eiloa tatou ki te taulaga togiola a Iesu Keliso mo ana galuega e pelā me ko te ‵tou Faitaulaga Pule. (Loma 5:8; Epelu 4:​14-​16) A te aoga o te toto maligi o Iesu ne fakaasi mai i te lomiga muamua eiloa o te mekesini tenei. (1 Ioane 1:​6, 7) Ne fai mai te mataupu: “Se manatu tonu, me [kafai] e fakaata ne koe se mea telā e ‵lanu ‵kula ki se kilasi ‵kula i te mainaga, a te mea tenā e foliga ‵kena; tela la, faitalia me e foliga ‵kula ‵ki loa a ‵tou agasala, kafai ko oko atu tatou ki te kilokiloga a te Atua e auala i te toto o Keliso, a mea konā e foliga ‵kena.” (Iulai 1879, itu. 6) Ma‵faga la o fakatokaga gali ne fai ne Ieova mō tatou e auala i te taulaga togiola a tena Tama fagasele!​—Isaia 1:​18.

Ke Iloilo Faka‵lei Tou Gatutau Faka-te-Agaga

6. Kaia e tāua ei ke iloilo faka‵lei aka ne tatou a te ‵tou gatutau faka-te-agaga?

⁶ I taimi katoa, e ‵tau o fakapei ne tatou ki te “foitino a te amiotonu ke fai mo o‵tou ufifatafata,” me se vaega tāua o te gatutau faka-te-agaga mai te Atua. (Efeso 6:​11, 14) Faitalia me ko oti ne tukugina atu tatou i aso nei ki a Ieova io me ko oti ne tavini atu tatou ki a ia mō se fia tausaga, e tāua ‵ki eiloa ke iloilo aka ne tatou a te ‵tou gatutau faka-te-agaga i aso katoa. Kaia? Me ko oti ne ‵pei ifo ki lalo a te Tiapolo mo ana temoni ki te lalolagi nei. (Fakaasiga 12:​7-​12) Ko kaitaua nei a Satani kae ko iloa ne ia me ko se leva ona aso. Tela la, ko momea aka ana osoatuga ki tino o te Atua. E mata, e fakatāua ne tatou a te tāua ke fakapei ki te “foitino a te amiotonu ke fai mo o‵tou ufifatafata”?

7. E ‵tau o pefea ‵tou amioga māfai e ma‵nako tatou ki te “amiotonu ke fai mo o‵tou ufifatafata”?

⁷ A te ufifatafata e puipui ne ia te fatu. Ona ko te ‵tou tulaga sē ‵lei katoatoa, e mafai eiloa ne ‵tou fatu fakatusa o faka‵se tatou kae e ma‵saki foki. (Ielemia 17:9) Ona ko te mea e ma‵nako ‵tou loto o fai a te mea ‵se, se mea tāua ke akoako kae fakatonutonu faka‵lei ne tatou. (Kenese 8:​21) Kafai e fakatāua ne tatou a te “amiotonu ke fai mo otou ufifatafata,” ka se gasue‵sue eiloa tatou o filifili aka a fakafiafiaga telā e aofia i ei a mea kolā e takalialia ki ei te Atua; io me ka se talia ne tatou ke mafaufau ke fai se mea ‵se. Ka se fakamāumāu ne tatou a te ukega o taimi aoga ke onoono ki te televise. Kae ka tumau eiloa tatou i te taumafai ke fai a te mea telā e fiafia ki ei a Ieova. Kafai foki e ‵siga tatou ona ko mafaufauga faka-te-foitino sē amio‵tonu, ka ‵tu aka eiloa tatou ki luga ona ko te fesoasoani o Ieova.​—Faitau te Faataoto 24:16.

8. Kaia e manakogina ei ne tatou a te “fakatuanaki” ke fai mo talita?

⁸ E aofia i vaega o te ‵tou gatutau faka-te-agaga a te “fakatuanaki” telā e fai pelā me se talita. E fai ei ke mafai ne tatou o “tamate ki ei a matasana ‵ka a te tino masei.” (Efeso 6:​16) I te suā feitu, a te fakatuanaki mo te alofa ki a Ieova mo te loto kātoa e fesoasoani mai ke fai te amiotonu kae tumau i te auala ki te ola se-gata-mai. Ko te lasi o te ‵tou fakamasani ke a‵lofa ki a Ieova, ko te momea aka foki o te fakatāua ne tatou a tena amiotonu. Kae e a ‵tou loto lagona? E mafai pefea o fesoasoani mai ki ‵tou taumafaiga ke fia‵fia ki te amiotonu?

Fakatumau se Loto Lagona ‵Lei

9. E maua pefea ne tatou a mea aoga mai te fakatumauga o se loto lagona ‵lei?

⁹ I te taimi o te ‵tou papatisoga, e fakamolemole atu tatou ki a Ieova mō se “mafaufau ‵lei” io me se loto lagona ‵lei. (1 Petelu 3:​21) Ona ko te mea e fakatuanaki tatou ki te taulaga, e fakamagalo ‵tou agasala i te toto o Iesu kae maua ei ne tatou se tulaga ‵ma i mua o te Atua. Kae ke tumau i se tulaga ‵ma i mua o te Atua, e ‵tau o fakatumau ne tatou se loto lagona ‵lei. Kafai e fakamasino aka tatou ne ‵tou loto lagona i nisi taimi kae logosala foki, e ‵tau o loto fakafetai tatou me e galue ‵lei eiloa ‵tou loto lagona. E fakaasi mai i vaegā fakamasauaga penā me e se loto ma‵keke tatou e uiga ki auala amio‵tonu o Ieova. (1 Timoteo 4:2) Kae e isi se tiute fakaopoopo o te loto lagona ki a latou kolā e fia‵fia ki te amiotonu.

10, 11. (a) Fakamatala mai se tala telā e fakaasi mai i ei a te pogai e ‵tau ei mo tatou o tau‵tali ki ‵tou loto lagona kolā ne akoakogina ki te Tusi Tapu. (e) Kaia e aumai ei ne te fiafia ki te amiotonu a te fiafia lasi?

¹⁰ Kafai e fai ne tatou se mea ‵se, e mafai o fakamasei io me e fakalogo‵mae tatou ne ‵tou loto lagona. E tokotasi te talavou ne sipa keatea mai i “ala ‵tonu” o te amiotonu. Ne kamata a ia o umiti ki ata ma‵sei kae ‵pusi maluana. Ne ma‵sei ana lagonaga i te taimi ne fanatu ei a ia ki fakatasiga kae mafaufau a ia me ko fai a ia e pelā me se tino loi māfai ko fano i te galuega talai, tela la, ne fakagata ne ia tena kau atu ki galuega faka-Kelisiano konei. Ne fai mai a ia: “Kae e se iloa ne au me e fakasala eiloa au ne toku loto lagona mō aku faifaiga.” Ne fakaopoopo mai a ia, “Ne gata atu eiloa toku olaga fakavalevale tenā mai tua ifo o te fa tausaga.” Kae ne kamata o mafaufau a ia o toe foki mai ki te munatonu. E tiga eiloa ne mafaufau a ia i a Ieova ka se fakalogologo ki ana ‵talo, ne ‵talo eiloa a ia kae akai atu mō se fakamagaloga. I nai minute mai tua ifo, ne āsi atu tena mātua ki a ia kae fakamalosi atu ke foki atu ki fakatasiga. Ne fanatu a ia ki te Kingdom Hall kae fakamolemole atu ki se toeaina ke fai tena akoga. E seki leva, ne papatiso a ia, kae ne fakafetai a ia ki a Ieova mo te fakasaoga o tena ola.

¹¹ E mata, e se mafai o maua ne tatou te fiafia lasi mai te faiga o te mea tonu? I te taimi e tauloto ei tatou ke fia‵fia ki te amiotonu kae fakagalue katoatoa ne tatou, ka maua eiloa ne tatou a te fiafia i te faiga o mea kolā e fiafia ki ei te ‵tou Tamana faka-te-lagi. Kae mafaufau la! Ka oko mai te taimi ka fia‵fia fua ei a tino katoa ona ko olotou loto lagona; ka fakaasi mai ne latou a foliga o te Atua i se auala ‵lei katoatoa. Tela la, ke na ‵toki ne tatou a te fiafia ki te amiotonu i ‵tou loto kae fai ei ke fiafia a Ieova.​—Faataoto 23:​15, 16.

12, 13. E mafai pefea ne tatou o akoako ‵tou loto lagona?

¹² Ne a mea e mafai ne tatou o fai ke akoako ei ‵tou loto lagona? Kafai e suke‵suke tatou ki te Tusi Tapu mo ‵tou tusi faka-te-Tusi Tapu, se mea tāua ke masaua me i “tino ‵poto e mafau‵fau mua ki olotou pati kae koi tuai o fai.” (Faataoto 15:28) Mafaufau la ki auala e fakamaoni mai ei te aoga o te mea tenei māfai ko fakafesagai atu tatou ki fesili e uiga ki te galuega. Kafai e isi se vaegā galuega ‵togi telā e fe‵paki mo fakatakitakiga i te Tusi Tapu, e ‵saga fakavave atu te tokoukega o tatou ki fakatakitakiga kolā ne tuku mai e auala i te tavini fakamaoni kae poto. Kae kafai e se manino ‵lei a te tali ki te fesili e uiga ki te galuega, e ‵tau o ‵sala atu tatou ki fakatakitakiga faka-te-Tusi Tapu e uiga ki te tulaga tenei kae ‵talo kae mafaufau ‵loto ki ei.a E aoga a te vaegā fakatakitakiga tenei ko te mea ke ‵kalo keatea mai te fakamasei atu ki loto lagona o nisi tino. (1 Kolinito 10:​31-​33) Kae maise i ei, e ‵tau o ‵saga atu tatou ki fakatakitakiga kolā e aofia i ei ‵tou fesokotakiga mo te Atua. Kafai a Ieova se tino tonu ki a tatou, kāti ka fesili muamua tatou, penei, ‘E mata, a te faiga ne au o te galuega tenei e fakalogo‵mae atu ki a Ieova?’​—Salamo 78:​40, 41.

¹³ Kafai e fakatoka mō te Sukesukega ki Te Faleleoleo Maluga io me ko te Sukesukega a te Fakapotopotoga ki te Tusi Tapu, e ‵tau o masaua ne tatou a te tāua ke mafaufau ‵loto ki fakamatalaga kolā e fakaasi mai i ei. E mata, e māka fakavave faeloa ne tatou a te tali ki se fesili i te sukesukega, ko fanatu ei ki te suā palakalafa? E se fai ne vaegā sukesukega penei ke fia‵fia malosi tatou ki te amiotonu io me e fakamalosi aka ei ‵tou loto lagona. Kafai ko kamata o fia‵fia tatou ki te amiotonu, e ‵tau mo tatou o suke‵suke faka‵lei kae mafaufau ‵loto ki mea ne faitau ne tatou i te Muna tusia a te Atua. E manakogina a taumafaiga e uke māfai ko fakamasani tatou ke fia‵fia ki te amiotonu mo ‵tou loto kātoa!

Te Fiakai mo te Fiainu ki te Amiotonu

14. E pefea a lagonaga o Ieova te Atua mo Iesu Keliso e uiga ki ‵tou taviniga tapu?

¹⁴ E ma‵nako a Ieova te Atua mo Iesu Keliso ke fia‵fia tatou i te taimi e fai ei ‵tou taviniga tapu. Se a te mea ka fakaopoopo mai ki te ‵tou fiafia? Ko te fiafia ki te amiotonu! I te Lauga i luga i te mauga, ne fai atu a Iesu: “Amutia a latou kolā e fia‵kai kae fia inu i te amiotonu; me ma‵kona latou.” (Mataio 5:6) Se a te uiga o pati konei mō latou kolā e isi se manakoga ke fia‵fia ki te amiotonu?

15, 16. Ne a auala e mafai ei o fakama‵lie aka te fiakai mo te fiainu faka-te-agaga?

¹⁵ A te lalolagi tenei e ‵nofo i ei tatou e pulegina ne te tino masei. (1 Ioane 5:19) Kafai e fai‵tau tatou ki se nusipepa i so se fenua, e lavea atu ne tatou a lipoti e uiga ki amioga ma‵sei mo fakasauaga i se lalolagi telā e seki fai aka eiloa penā i taimi mua. A amioga ma‵sei a tino ki nisi tino e fai mo fai se mea matagā ki se tino amiotonu ke fakaataata i tena mafaufau. (Failauga 8:9) E pelā mo tino kolā e a‵lofa ki a Ieova, e iloa ne tatou me ko ia fua e mafai o fakama‵lie ne ia a te fia‵kai mo te fia inu i te feitu faka-te-agaga o tino kolā e ma‵nako ke tauloto ki te amiotonu. Ko pili o fakaseai atu a tino sē amioatua, kae ka se toe maua ne tino fia‵fia ki te amiotonu a puapuaga mai tino ofa tulafono mo olotou amioga ma‵sei. (2 Petelu 2:​7, 8) Ko tafaga la te fakatapūga e maua i ei!

¹⁶ E pelā me ne tavini a Ieova mo soko o Iesu Keliso, e iloa ne tatou me i tino katoa kolā e fia‵kai kae fiainu ki te amiotonu ka “ma‵kona.” Ka lotoma‵lie katoatoa latou ki te fakatokaga a te Atua e uiga ki te lagi fou mo te lalolagi fou telā ka “‵nofo i ei a te amiotonu.” (2 Petelu 3:​13) Tela la, ke mo a ma loto vāi‵vai tatou io me e ‵poi me ne ave keatea ne ‵tekemaiga mo fakasauaga a te amiotonu i te lalolagi tenei a Satani. (Failauga 5:8) A Ieova, te Atua Maluga e iloa ne ia a mea e ‵tupu kae ko pili o faka‵sao ne ia a tino kolā e fia‵fia ki te amiotonu.

Mea Aoga Mai te Fia‵fia ki te Amiotonu

17. Ne a nisi mea aoga e maua mai te fia‵fia ki te amiotonu?

¹⁷ E faka‵mafa mai ne te Salamo 146:8 a te aoga o te tau‵tali i te auala o te amiotonu. E usu mai te faisalamo, penei: “E alofa a ia [Ieova] ki ana tino amio‵tonu.” Mafaufau la ki te mea tenei! A te Pule Sili o te iunivesi e alofa mai ki a tatou kolā e fia‵fia ki te amiotonu! Ona ko te alofa o Ieova, e tali‵tonu tatou me ka tuku mai ne ia a mea faka-te-foitino i te taimi e fakamuamua ei ne tatou a manakoga o te Malo i ‵tou olaga. (Faitau te Salamo 37:25; Faataoto 10:3.) Fakamuli loa, ka ‵fonu a te paneta tenei i tino kolā e fia‵fia ki te amiotonu. (Faataoto 13:22) Mō tino e tokouke o te Atua, ka maua ne latou a te fiafia lasi mo te ola se-gata-mai i te lalolagi palataiso gali, ona ko te fakaasi atu o te amiotonu. Ke oko loa ki aso nei, a latou kolā e fia‵fia ki te amiotonu o te Atua e maua ne latou a te taui ko te filemu telā e fai ei ke fealofani olotou kāiga mo olotou fakapotopotoga.​—Filipi 4:​6, 7.

18. Ne a mea aoga e mafai o fai faeloa ne tatou i te taimi e fakatali‵tali ei tatou ki te aso o Ieova?

¹⁸ I te taimi e faka‵tali ei tatou ki te oko mai o te aso lasi o Ieova, e ‵tau o tumau tatou i te ‵sala atu ki tena amiotonu. (Sefanaia 2:​2, 3) Tela la, ke na fakaasi atu ne tatou te alofa tonu mō auala ‵tonu o Ieova te Atua. E aofia i te mea tenā a te ‘ufifatafata o te amiotonu’ telā e puipui ei ‵tou loto. E ‵tau foki mo tatou o fakatumau se loto lagona ‵lei​—se mea telā ka aumai ne ia te fiafia ki a tatou kae fai ei ke fiafia te loto o te ‵tou Atua.​—Faataoto 27:11.

19. Se a te mea e ‵tau o fakaiku aka ne tatou ke fai, kae se a te mea ka sau‵tala tatou ki ei i te suā mataupu?

¹⁹ A Ieova “e onoono faka‵lei eiloa ki te lalolagi, e ave ne ia a te malosi ki tino kolā e fakamaoni ki a ia.” (2 Nofoaiga Tupu 16:9) Ko oko eiloa te fakamafanafana mai a pati konā i te taimi tenei e fai ei ne tatou te mea tonu faitalia te sē tokagamalie, fakasauaga, mo amioga ma‵sei i te lalolagi tenei o fakalavelave! E tonu, e mafai o faka‵numi ‵tou auala amio‵tonu ne tino e tokouke kolā ne ‵vae keatea mai te Atua. Kae e maua ne tatou a mea aoga e uke mai te tau‵tali atu ki auala amio‵tonu o Ieova. (Isaia 48:17; 1 Petelu 4:4) Tela la, ke na fakaiku aka ne tatou mo te loto katoatoa, ke na tumau tatou i te fia‵fia ki te amiotonu kae ke fakaasi atu foki ne tatou a te amiotonu. Kae e aofia i se loto telā e katoatoa a te takalialia ki te ofa tulafono. Ka fakaasi mai i te suā mataupu a te uiga o te mea tenei ki a tatou.

[Footnotes]

Ka Tali Mai Pefea ne Koe?

• Kaia e aoga ei ke iloa ne tatou a te tāua o te togiola ko te mea ke fia‵fia ei tatou ki te amiotonu?

• Kaia e tāua ei ke ‵pei tatou ki te ‘ufifatafata o te amiotonu’?

• E mafai pefea ne tatou o akoako a ‵tou loto lagona?

[Ata i te itulau e 26]

E mafai o fesoasoani mai a te loto lagona telā ko oti ne akoakogina ke tali aka ei a fesili e uiga ki galuega ‵togi