Ko oi e Talai Atu ne Latou a te Tala ‵Lei?

“. . .  e fakamatala atu ki te lalolagi kātoa.”—MATAIO 24:⁠14.

KO TALAI atu nei a te tala ‵lei ne Molimau a Ieova i te lalolagi kātoa. E fai ne latou a te mea tenei i auala kese‵kese. A te auala e tasi ke fai ei te mea tenā ko te . . .

Fai‵pati atu. E pelā mo Iesu mo ana soko, e olo atu a Molimau a Ieova o talai atu te tala ‵lei ki tino. (Luka 8:1; 10:⁠1) E se fakamoe‵moe latou ke olo atu a tino ki a latou. A te molimau atu ki tino e uiga ki te Malo o te Atua se mea telā e fai ne Molimau katoa kolā e sili atu i te fitu miliona te lotou aofaki. E talai atu latou mai fale-ki-fale, i auala, i telefoni, mo nisi auala aka foki. I te tausaga ko teka, ne fakamāumāu ne Molimau a te aofaki o itula e sili atu mo te tasi mo te āfa piliona i te galuega tenei.

E se akoako atu fua ne latou a tino e uiga ki te Malo o te Atua kae e akoako atu foki ne latou a “mea katoa kolā ne fakatonu atu ne [Iesu].” (Mataio 28:20) E sili atu mo te valu miliona te aofaki o a‵koga faka-te-Tusi Tapu kolā e fai ne latou e aunoa mo se ‵togi.

E talai atu a Molimau i fenua e 236 i te lalolagi kātoa. E talai atu latou ki tino mai telega kese‵kese. E talai atu latou i fa‵kai fo‵liki mo fa‵kai ‵lasi, i te togavao o te Amazon e pelā foki mo Siberia, i toafa o Afelika mo mauga o te Himalaya. E seai ne olotou peofuga e maua; e fakaaoga eiloa olotou tupe mo olotou taimi ke fai te galuega tenei, kae e fakamalosi aka latou ne te lotou a‵lofa ki te Atua mo tuakoi. Ko fakasalalau atu foki ne latou a te tala ‵lei e auala i  . . .

Tusi Kolā ko Oti ne ‵Lomi. A te mekesini tenei, telā ko Te Faleleoleo Maluga e Folafola Atu ei te Malo o Ieova, e ‵lomi nei i ‵gana e 185 kae e sili atu mo te 42 miliona o ‵kopi e fakasalalau atu i lomiga takitasi. A te suā mekesini telā ko te ­Awake!, e folafola atu foki i ei a te Malo, e ‵lomi i ‵gana e 83 kae e nofo ki se 40 miliona o ‵kopi e fakasalalau atu i lomiga takitasi.

E mafai foki o maua i ‵gana e 540 a tusi, polosiua, tamā pepa, CDs/MP3s, mo DVDs kolā e fakamatala mai i ei a akoakoga faka-te-Tusi Tapu. Ko oti ne faite kae tufatufa atu ne Molimau a ‵kopi o mea konei kolā e sili atu mo te 20 piliona i te sefulu tausaga ko ‵teka, kae kāti ne maua ne tino taki tokotasi i te lalolagi kātoa a ‵kopi e taki tolu o mea konei!

Ko oti foki ne ‵lomi io me ne fakatoka ne Molimau a Ieova a te ‵lomiga o ‵fuliga kese‵kese o te Tusi Tapu. A te New World Translation of the Holy Scriptures​​—⁠telā ko oti ne ‵fuli, ‵lomi kae tufatufa atu ne Molimau​​—⁠ko mafai nei o maua a te tusi kātoa io me se vaega fua o ia i ‵gana e 96. E sili atu mo te 166 miliona te aofaki o ‵kopi ko oti ne tufatufa atu. E talai atu foki ne Molimau a te tala ‵lei o te Malo  . . .

I Fakatasiga Faka-Kelisiano. A fakatasiga kolā e fai i vaiaso katoa i te Kingdom Hall e se fai fua e pelā me ne maopoopoga fakalotu; kae ne fakatoka eiloa ke akoako ei a tino. E fai a lauga ki mataupu kolā e fetaui mo te Tusi Tapu, kae e sukesuke i ei ki te Tusi Tapu fakatasi mo te fesoasoani o te mekesini ko Te Faleleoleo Maluga mo nisi tusi aka. I taimi o fakatasiga, e fakamasani eiloa a Molimau ke fai latou e pelā me ne tino talai ma‵goi o te tala ‵lei.

E ‵pau eiloa a mataupu e suke‵suke ki ei a Molimau i fakapotopotoga e sili atu i te 107,000 i te lalolagi kātoa, se mea telā e fai ei ke ‵kau fakatasi latou. E ‵tala atu eiloa a fakatasiga konei ki tino katoa. E seai ne tupe e ‵tae i ei. E tonu, ka seai eiloa ne aoga o mea katoa konei māfai e se fakagalue aka ne Molimau a mea kolā e talai atu ne latou. Tela la, e taumafai latou o fakatāua a te tala ‵lei . . .

E Auala i Olotou Fakaakoakoga Totino. E taumafai latou ke fai e pelā me ne fakaakoakoga ‵lei i amioga faka-Kelisiano, mai te faiga o te ‵toe mea ‵lei ki nisi tino i te auala telā e ma‵nako latou ke fai atu ne nisi tino a mea konā ki a latou. (Mataio 7:​12) E tiga eiloa e sē ‵lei katoatoa latou kae fai ne latou a mea ‵se i nisi taimi, e ma‵nako tonu latou o fakaasi atu te alofa i olotou faifaiga ki tino katoa, e se gata fua i te talai atu o te tala ‵lei kae mai te fesoasoani atu foki i nisi auala māfai e mafai.

E se taumafai a Molimau a Ieova ke ‵fuli ne latou a tino mai te lotou talaiga. Kae kafai ko oti ne fai te galuega tenā e ‵tusa mo te loto o Ieova, ko oko mai ei te gataga, e pelā eiloa mo te valoaga a Iesu. Se a te uiga o te mea tenā ki te lalolagi mo tino i ei?

[Ata i te itulau e 7]

Ko talai atu nei a te tala ‵lei i te lalolagi kātoa ne Molimau a Ieova