A Kelisiano ‵Tonu Katoa Ne Tino Talai

“Usu pese atu ki te Aliki kae viki atu ki a ia! Talai atu i aso katoa te tala ‵lei i te Aliki ne fakasao ne ia tatou.”​​—⁠SALAMO 96:⁠2.

I SE lalolagi telā e ‵tupu fakafuasei i ei a fakalavelave i aso katoa, se fakamafanafanaga tonu ke iloa atu me e pelā mo te mea e folafola mai ne te Tusi Tapu, ka pili o gata atu a taua, amioga solitulafono, te fiakai, mo mea e māfatia ei a tino. (Salamo 46:9; 72:​3, 7, 8, 12, 16) A te ‵tonuga loa, e mata, e se tenei te tala ‵lei e ‵tau o lagona ne tino katoa? E mafau‵fau eiloa penā a Molimau a Ieova. E lauiloa latou i koga katoa e pelā me ne tino kolā e talai atu te “tala ‵lei, ko te tala o te filemu!” (Isaia 52:⁠7) E tonu, ko oti ne logo‵mae a Molimau e tokouke i fakasauāga mō te lotou tu ‵mautakitaki i te ‵takuatuga o te tala ‵lei. Kae e fai penā me e fia fakaoko atu a mea ‵lei ki tino katoa. Kae tafaga la te fakaofoofogia o te loto finafinau mo te ‵mautakitaki o te kau Molimau.

² E ‵pau a te loto finafinau o Molimau a Ieova i aso nei mo Kelisiano i aso o te kau apositolo. Ne fai ‵tonu mai a te nusipepa a te Katolika Loma ko te L’Osservatore Romano, e uiga ki a latou, penei: “I te taimi ne papatiso ei a Kelisiano mua ne iloa ei ne latou me e isi te lotou tiute ke fakasalalau atu te Tala ‵Lei. Ne fai‵pati atu a pologa e uiga ki te Tala ‵Lei ki nisi tino.” Kaia e loto finafinau malosi ei penā a Molimau a Ieova, e pelā mo Kelisiano mua? Muamua la, ona ko te mea ne māfua te tala ‵lei telā e talai atu ne latou mai i a Ieova te Atua eiloa. E mata, e isi foki se isi pogai tai ‵lei atu mō te lotou loto finafinau? A te lotou galuega talai se tali ki pati a te faisalamo, konei: “Usu pese atu ki te Aliki kae viki atu ki a ia! Talai atu i aso katoa te tala ‵lei i te Aliki ne fakasao ne ia tatou.”​​—⁠Salamo 96:⁠2.

³ E fakamasaua mai ne pati a te faisalamo ki a tatou e uiga ki te lua o pogai mō te loto finafinau o Molimau a Ieova. A te lotou fekau se fekau o te fakaolataga. E ga‵lue a nisi tino i te fa‵kaimasaki, i ofisa, i mea tau tupe, io me ko nisi galuega aka kae e ‵tau o fakamālō atu ki vaegā taumafaiga penā. Kae ko so se mea telā e mafai o fai ne se tino mō te suā tino e foliki fua māfai e fakatusa ki te auala ka “fakasao” ei ne te Atua tatou. E auala i a Iesu Keliso, ka faka‵sao ne Ieova a tino loto mau‵lalo mai te agasala, masaki, mo te mate. A tino kolā e maua ne latou a mea aogā mai i ei ka ola ki te se-gata-mai! (Ioane 3:​16, 36; Fakaasiga 21:​3, 4) I aso nei, e aofia te fakaolataga i “galuega fakaofoofogia” kolā e mafau‵fau ki ei a Kelisiano i te taimi e ‵saga atu ei latou ki pati, konei: “Fakasalalau atu tena ‵mana [o te Atua] ki malo katoa; mo ana galuega fakaofoofogia ki tino katoa. Te Aliki e sili kae ‵tau eiloa mo tatou o fakama‵luga ona vikiga; e ‵tau o fakaaloalo malosi atu tatou ki a ia i lo atua katoa.”​​—⁠Salamo 96:​3, 4.

Te Fakaakoakoga a te Matai

⁴ E isi foki se pogai i te tolu e loto finafinau ei a Molimau a Ieova. E tau‵tali atu latou ki te fakaakoakoga a Iesu Keliso. (1 Petelu 2:21) Ne talia katoatoa ne te tagata ‵lei katoatoa tenā a te tofiga ke “avatu te tala lei ki tino mativa [loto maulalo].” (Isaia 61:1; Luka 4:​17-21) Tela la, ne fai ei a ia mo fai se tino talai, se tino telā e avatu ne ia te tala ‵lei. Ne faimalaga atu a ia i Kalilaia mo Iutaia kātoa, ke “folafola atu foki a te Tala ‵Lei o te Malo.” (Mataio 4:23) Kae ona ko te mea ne iloa ne ia me e tokouke a tino ka ‵saga atu ki te tala ‵lei tenā, ne fai atu ei a ia ki ana soko, penei: “Ko oko eiloa i te lasi o te saito e fia kati, ka ko tino ga‵lue i te saito e se tokouke! Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.”​​—⁠Mataio 9:​37, 38.

⁵ E ‵tusa eiloa mo ana ‵talo, ne fakaakoako ne Iesu a nisi tino ke fai mo fai ne tino talai. I nisi taimi, ne uga atu fua ne ia ana apositolo kae fai atu ki a latou, penei: “Olo o folafola atu, ‘I te Malo o te lagi ko pili mai!’ ” E mata, e sili atu i te aogā ke fakatoka ne latou a polokalame ke fesoasoani atu ki fakalavelave o te olaga i olotou aso? Io me e ‵tau o ‵kau atu latou ki mea fakapolitiki ke ‵teke atu ki faifaiga sē fakamaoni kae lauiloa i te taimi tenā? Ikai. I lō te fai penā, ne tuku mai ne Iesu a te tulaga mō Kelisiano talai katoa i te taimi ne fai atu ei a ia ki ana soko, penei: “Olo o folafola atu.”​​—⁠Mataio 10:​5-7.

⁶ Fakamuli ifo, ne uga atu ne Iesu a te suā potukau o soko ke folafola atu, penei: “A te Malo o te Atua ko pili mai ki a koutou.” I te taimi ne ‵foki atu ei latou o fakaasi atu te lipoti ki te iku manuia o te lotou malaga talai, ne fiafia malosi a Iesu. Ne ‵talo atu a ia, penei: “Toku Tamana, te Aliki o te lagi mo te lalolagi! Au e fakafetai atu ki a koe, i te mea ko fakaasi ne koe ki tino seki akoakogina, a mea kola ne ‵funa ne koe mai tino ‵poto mo tino kola ne a‵koga.” (Luka 10:​1, 8, 9, 21) A soko o Iesu, kolā ne ga‵lue mua e pelā me ne tino faiika, tino tausi manu, mo nisi mea aka foki penā, ne fai pelā me ne pepe māfai e fakatusa ki takitaki lotu o te fenua kolā ne a‵koga faka‵lei. Kae ne akoakogina a soko ke folafola atu te ‵toe tala ‵lei i tala katoa.

⁷ Mai tua o te fanakaga a Iesu ki te lagi, ne tumau ana soko i te fakasalalauatuga o te tala ‵lei o te fakaolataga. (Galuega 2:​21, 38-40) Ko oi ne talai atu muamua latou ki ei? E mata, ne olo atu latou ki atufenua kolā ne seki iloa ne latou te Atua? Ikai, te lotou koga talai muamua ko Isalaelu, ne tino kolā ne masani mo Ieova i tausaga e silia atu i te 1,500. E mata, e isi se lotou saolotoga ke talai atu i se fenua telā ko oti ne tapuaki atu ei a tino ki a Ieova? Ao. Ne fai atu a Iesu ki a latou, penei: “Ka fai foki koutou mo molimau ki a au i Ielusalema, i Iutaia katoa mo Samalia, ke oko eiloa ki kapakapalagi o te lalolagi.” (Galuega 1:⁠8) Ne ‵tau foki o lagona ne tino Isalaelu a te tala ‵lei e pelā mo nisi fenua aka.

⁸ I se auala tai ‵pau, e talai atu a Molimau a Ieova i te lalolagi kātoa. E ga‵lue tasi latou mo te agelu ne lavea ne Ioane telā e “folafola atu te talaiga se gata mai tela ko te Tala ‵Lei ki tino o te lalolagi, ki fenua katoa mo matakaiga, ki ‵gana katoa mo tino.” (Fakaasiga 14:⁠6) I te tausaga ko te 2001, ne ga‵lue malosi latou i fenua mo koga talai e 235, e aofia i ei a nisi tino kolā e masani o ‵kilo atu ki ei e pelā me ne Kelisiano. E mata, se mea ‵se ke talai atu a Molimau a Ieova i koga kolā ko oti ne faka‵tu aka ne Lotu Kelisiano ‵Se olotou lotu i ei? E fai mai a nisi tino me se mea ‵se kae e mafau‵fau a nisi tino me i te vaegā talaiga penā e “kaisoa ei a tino o te lotou lotu kolā e mafau‵fau latou me i a latou a mamoe.” Kae e masaua ne Molimau a Ieova a te kilokiloga a Iesu ki tino Iutaia loto mau‵lalo i ana aso. E tiga eiloa ko oti ne maua ne latou te lotou kau faitaulaga, ne seki fakatalave a Iesu i te talai atu ki a latou e uiga ki te tala ‵lei. “Ne tupu ake ei tona loto alofa mō latou, me ko se toka olotou loto i te seai o se tino e fesoasoani atu, ko pela mo mamoe e seai se lotou tino tausi.” (Mataio 9:36) Kafai e maua ne Molimau a Ieova a tino loto maulalo kolā e se iloa ne latou a mea e uiga ki a Ieova mo tena Malo, e mata, e ‵tau o taofi aka te tala ‵lei mai i vaegā tino penā ona ko te fia pule atu o nisi lotu ki a latou? I te tautali atu ki te fakaakoakoga a apositolo a Iesu, e tali atu tatou penei, ikai. E ‵tau o talai atu te tala ‵lei “ki tino katoa [atufenua],” e aunoa mo te fakalotolotolua.​​—⁠Maleko 13:⁠10.

Ne Talai a Kelisiano Mua Katoa

⁹ Ko oi ne ‵kau atu ki te galuega talai i aso o te kau apositolo? E fakaasi mai ne tala ‵tonu me i Kelisiano katoa ne fai mo fai ne tino talai. Ne fai mai ne te tino tusitala ko W. S. Williams a te mea tenei: “A te fakamaoniga kātoa me i Kelisiano katoa i te Lotu taumua . . . ne talai atu ne latou te tala ‵lei.” E uiga ki te mea ne tupu i te aso o te Penitekoso i te 33 T.A., e fai mai te Tusi Tapu, penei: “Ko ‵fonu latou [tāgata mo fāfine] katoa i te Agaga Tapu, kamata eiloa latou o fai‵pati ki ‵gana valevale, i te mea ko tuku atu ne te Agaga Tapu ki a latou te mana o fai‵pati ki ‵gana valevale.” Ne aofia i tino talai a tāgata mo fāfine, tamaliki mo tino ma‵tua, pologa mo tino saoloto. (Galuega 1:14; 2:​1, 4, 17, 18; Ioelu 2:​28, 29; Kalatia 3:28) I te taimi ne faimālō ei a Kelisiano e tokouke ne fakasauāga ke ‵tele kea‵tea mai Ielusalema, “a tino talitonu kola ne salalau valevale, ko olo sale fua ki so se koga o talai atu te Tala ‵Lei.” (Galuega 8:4) A “tino talitonu [katoa] kola ne salalau valevale,” e se ko nāi tino fua ne ‵tofi aka, ke talai atu.

¹⁰ Ne fai faeloa penā i tausaga konā. Ne ‵valo mai a Iesu, penei: “A te Tala ‵Lei tenei e uiga ki te Malo, e fakamatala atu ki te lalolagi katoa, mo fai te molimau ki tino katoa; ko oko mai ei te gataga.” (Mataio 24:14) I te fakataunuga muamua o pati konā i aso o te kau apositolo, ne talai atu ei te tala ‵lei ki koga katoa a koi tuai o fakaseai ne te kautau a Loma a te lotu Iutaia mo olotou faifaiga fakapolitiki. (Kolose 1:23) E se gata i ei, ne faka‵logo a soko katoa o Iesu ki tena fakatonuga: “Tela la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. Akoako atu foki latou ke faka‵logo ki mea katoa kola ne fakatonu atu ne au ki a koutou.” (Mataio 28:​19, 20) Ne seki fakamalosi atu a Kelisiano mua ki tino loto maulalo ke tali‵tonu ki a Iesu kae oti aka ko tuku faitalia latou ke tavini atu ki te Atua i te auala e ma‵nako latou ki ei e aunoa mo se takitakiga. I lō te fai penā, ne akoako ne latou a latou eiloa ke fai mo fai ne soko o Iesu, ne fakatokagina latou ki fakapotopotoga, kae fakaakoako foki ko te mea ke mafai ne latou o talai atu te tala ‵lei kae fai foki a soko. (Galuega 14:​21-23) E tau‵tali atu a Molimau a Ieova i aso nei ki te fakaakoakoga tenā.

¹¹ E tokouke a Molimau a Ieova, i te tau‵tali atu ki fakaakoakoga i te senitenali muamua a Paulo, Panapa, mo nisi tino aka, ko oti ne fai pelā me ne misionale i fenua fakaa‵tea. Ne aogā tonu eiloa te lotou galuega, ona ko te mea ne seki ‵kau atu latou ki mea fakapolitiki io me ko nisi auala aka kolā e taofi ei latou mai te fakatonuga ke talai atu te tala ‵lei. Ne faka‵logo loa latou ki te fakatonuga a Iesu: “Olo o folafola atu.” Kae ko te tokoukega o Molimau a Ieova e se ne misionale i fenua fakaa‵tea. E tokouke latou e ga‵lue i galuega ‵togi ke tausi ei latou, mo nisi tino koi a‵koga. E puti aka ne nisi tino olotou tama‵liki. Kae e fakamatala atu ne Molimau katoa a te tala ‵lei telā ko oti ne tau‵loto ne latou. Ne faka‵logo mo te fia‵fia a tama‵liki mo tino ma‵tua, tāgata mo fāfine, ki te fakamalosiga a te Tusi Tapu, penei: “Ke folafola atu ne koe te muna, ‵fuli mai a loto, ka ke mau eiloa koe i te folafola atu, i taimi ‵tau mo taimi se ‵tau.” (2 Timoteo 4:⁠2) E pelā mo olotou taugasoa i te senitenali muamua, ne tumau latou i te “akoako atu kae lauga atu ki tino e uiga ki a Iesu te Keliso.” (Galuega 5:42) E fakasalalau atu ne latou te ‵toe tala tafasili i te ‵lei.

E ‵Lei ke ‵Fuli a Tino io me e Talai Atu Fua ki ei

¹² E maua i te ‵gana Eleni a te pati ko te pro·se’ly·tos, telā e fakauiga ki te “‵fuli.” Mai te pati tenei, ne maua i ei te pati Peletania ko te “proselytism,” telā e fakauiga loa ki te “faiga ke fuli mai a tino.” I aso nei, e fai mai a nisi tino me e masei te faiga ke ‵fuli ei se tino. Ne ‵lomi se fakamatalaga ne te Kaunisela o Lotu i te Lalolagi e uiga ki “te agasala ko te faiga o ‵fuliga.” Kaia? E fai mai te Catholic World Report, penei: “Ona ko te uke o fāmeo o te Lotu Orthodox, e ma‵natu aka a tino me i te uiga o te ‘fuli mai ko te faimālō.’ ”

¹³ E mata, e fakalogo‵mae atu a te faiga o ‵fuliga? E mafai o fai penā. Ne fai mai a Iesu me i te faiga a faiakoga o te Tulafono mo Falesaio ke ‵fuli atu a tino ki ei ne fakalogo‵mae atu ki a latou. (Mataio 23:15) E mautinoa eiloa, me se mea ‵se a te “faimālō atu ke ‵fuli.” E ‵tusa mo pati a te tino poto ko Iosefatu, i te taimi ne fakatakavale ei ne te tino Maccabee ko John Hyrcanus a te kau Idumaean, ne “talia ne ia ke tumau latou i te lotou fenua māfai ko pilitome latou kae loto fia‵fia o faka‵logo ki tulafono a tino Iutaia.” Kafai ne ‵nofo te kau Idumaean mai lalo i te pulega a te kau Iutaia, e ‵tau o fai ne latou te tapuakiga a te kau Iutaia. E fai mai a tino ‵poto i tala fakasolopito me i te valu o senitenali, ne fakatakavale ne Charlemagne a te kau Saxon fapaupau i te feitu ki mātū o Eulopa kae ne fakasaua atu kae ne faimālōgina a tino i ei ke ‵fuli latou.a E pefea la te fakamaoni o te ‵fuliga a te kau Saxon io me ko te kau Idumaean? E mata, e pefea te fia fakalogo o te Tupu Idumaean ko Helota​​—⁠telā ne taumafai ke tamate a Iesu​​—⁠ki te Tulafono faka-Mose telā ne fakaosofia ne te Atua ke tusi ki lalo?​​—⁠Mataio 2:​1-18.

¹⁴ E mata, e faimālō atu a tino ke ‵fuli olotou lotu i aso nei? E fai eiloa penā a nisi tino. E isi ne misionale o Lotu Kelisiano ‵Se ne ofo mai ne latou a avanoaga ke olo atu o a‵koga ko te mea ke ‵fuli ei latou. Io me kāti ka fai ne latou se potukau o tino kolā ne ‵tuli kea‵tea mai te lotou fenua kae e fia‵kai ke fakalogo‵logo ki se lauga ko te mea ke maua ne latou olotou pauna i mea‵kai. E ‵tusa mo te fakamatalaga telā ne faka‵pula atu i te 1992 ne se fono a Epikopo, “i nisi taimi e fai a ‵fuliga ona ko te ofo atu o mea faka-te-foitino mo vaegā fakasauāga kese‵kese i nisi taimi.”

¹⁵ A te faimālō atu ki tino ke ‵fuli olotou lotu se mea ‵se. E mautinoa eiloa, me e se fai penā a Molimau a Ieova.b Tela la, e se taumafai o ‵fuli a tino ki a latou e ‵tusa mo te uiga o te pati “proselytism” i aso nei. I lō te fai penā, e talai atu ne latou te tala ‵lei ki tino katoa, e pelā eiloa mo Kelisiano i te senitenali muamua. So se tino telā e saga tonu mai e ‵kami atu ke maua ne ia a te iloaga e auala i te sukesukega ki te Tusi Tapu. E tau‵loto a vaegā tino ‵fou penā ke maua te fakatuanaki, telā e fakavae ‵mautakitaki ki te iloaga tonu i te Tusi Tapu, ki te Atua mo ana fuafuaga. E iku atu i ei ki te ka‵laga atu o latou ki te igoa o Ieova, mō te fakaolataga. (Loma 10:​13, 14, 17) Faitalia me ka talia ne latou te tala ‵lei io me ikai, a te mea tenā se filifiliga totino eiloa. E se faimālōgina latou i ei. Kafai e fai penā, ko tena uiga e seai se aogā o te ‵fuliga. Ko te mea ke talia ne te Atua te tino, e ‵tau o māfua tena fia tapuaki atu mai tena loto.​—⁠Teutelonome 6:​4, 5; 10:⁠12.

Te Talaiatuga i Aso Nei

¹⁶ I aso fakamuli nei, ko oti ne talai atu ne Molimau a Ieova a te tala ‵lei o te Malo i se fakataunuga e sili atu o te Mataio 24:14. E tasi te mea faigaluega lauiloa e fakaaogā i te galuega talai tenei ko te mekesini ko Te Faleleoleo Maluga.c I te 1879, i te taimi ne ‵lomi ei te lomiga muamua o Te Faleleoleo Maluga, kāti e 6,000 a kopi o te mekesini ne ‵lomi i se ‵gana e tasi. I te tausaga ko te 2001, e silia atu i te 122 tausaga fakamuli ifo, ne oko atu ei te ‵lomiga o mea konā ki kopi e 23,042,000 i ‵gana e 141. Fakatasi mo te gasoloakaga tenā, ko oti foki ne gasolo aka ki luga te galuega talai a Molimau a Ieova. Ke na faka‵pau aka a te fia afe fua o itula ne fakamāumāu i tausaga takitasi i te galuega talai i te 19 senitenali mo te 1,169,082,225 o itula ne fakamāumāu ki te galuega talai i te tausaga ko te 2001. Mafaufau ki akoga faka-te-Tusi Tapu e toko 4,921,702 kolā e fai sāle i masina takitasi. Ko tafaga la te lasi o te aofaki o galuega ‵lei ne fai! Kae ne fai ne tino talai ma‵losi e toko 6,117,666.

¹⁷ E fai mai te faisalamo, penei: “A atua o malo katoa ne tupua fua, ko te Aliki [ko Ieova] eiloa ne faite ne ia te lagi.” (Salamo 96:⁠5) I te faifaiga masani o te lalolagi i aso nei, a te loto fenua, fakailoga o malo, tino ma‵luga, mea faka-te-foitino, kae ke oko foki ki te maumea ko oti ne fai mo fai ne mea kolā e tapuaki atu ki ei a tino. (Mataio 6:24; Efeso 5:5; Kolose 3:⁠5) Ne fai mai a Mohandas K. Gandhi, penei: “E talitonu katoatoa au me . . . e fakaigoa fua a Eulopa i aso nei ki se fenua Kelisiano. E tapuaki ‵tonu eiloa latou ki Mamola [koloa].” A te ‵tonuga loa, e ‵tau o talai atu te tala ‵lei ki koga katoa. A tino katoa, faitalia tena ‵gana, tena fenua, io me ko te tulaga i te fenua, e ‵tau o iloa ne ia a mea e uiga ki a Ieova mo ana fuafuaga. E fakamoe‵moe matou ke ‵saga atu a tino katoa ki pati a te faisalamo, konei: “Viki atu ki te Aliki [ko Ieova], koutou tino katoa i te lalolagi nei; viki atu ki tena ‵mana mo tena ‵malu. Viki atu ki te igoa ‵malu o [Ieova]; vau mo se taulaga ki loto i tena Faletapu”! (Salamo 96:​7, 8) E fesoasoani atu a Molimau a Ieova ki nisi tino ke tau‵loto e uiga ki a Ieova ko te mea ke mafai o tuku faka‵lei atu ne latou a te vikiga ki a ia. Kae e maua ne tino kolā e ‵saga faka‵lei atu ki ei a mea aogā e uke. Ne a mea aogā e maua ne latou? Ka sau‵tala ki mea konei i te mataupu telā e ‵soko mai.

[Fakamatalaga mai lalo]

E Mafai ne Koe o Fakamatala Mai?

• Kaia e fai ei a Molimau a Ieova mo fai ne tino talai loto finafinau?

• Kaia e talai atu ei a Molimau a Ieova ke oko foki eiloa ki koga kolā ko oti ne faka‵tu aka ne Lotu Kelisiano ‵Se olotou lotu i ei?

• Kaia e se ‵fuli ei a Molimau a Ieova e ‵tusa eiloa mo te uiga o te pati “proselytize” i aso nei?

• Ne gasolo aka pefea te galuega talai a Molimau a Ieova i aso nei?

[Fesili mo te Sukesukega]

1. Se a te tala ‵lei e ‵tau o lagona ne tino, kae ne fai pefea a Molimau a Ieova mo fai se fakaakoakoga ‵lei i te fakasalalauatuga o te vaegā tala tenā?

2. Se a te pogai e tasi e loto finafinau ei a Molimau a Ieova?

3. (a) Se a te lua o pogai e loto finafinau ei a Molimau a Ieova? (e) Se a te mea e aofia i te ‘fakasaoga’ ne te Atua o tatou?

4-6. (a) Se a te tolu o pogai e loto finafinau ei a Molimau a Ieova? (e) Ne fakaasi mai pefea ne Iesu a te loto finafinau mō te galuega ko te talaiatuga o te tala ‵lei?

7. Mai tua o te fanakaga a Iesu ki te lagi, ko oi ne talai atu muamua ki ei ne ana soko a te tala ‵lei?

8. E fakaakoako atu pefea a Molimau a Ieova i aso nei ki soko o Iesu i te senitenali muamua?

9. Ko oi ne ‵kau atu ki te galuega talai i te senitenali muamua, i te fakapotopotoga Kelisiano?

10. Ne a fakatonuga e lua ne fakataunu mai mua o te fakaseaiga o faifaiga faka-Iutaia?

11. Ko oi e ‵kau atu i aso nei ki te folafolaatuga o te ‵toe tala ‵lei ki tino?

12. Se a te proselytism, kae e ‵kilo atu pefea ki ei a tino?

13. Ne a nisi fakaakoakoga o te faiga o ‵fuliga kolā e fakalogo‵mae atu?

14. Ne fakamalosi atu pefea a nisi misionale o Lotu Kelisiano ‵Se ki tino ke ‵fuli?

15. E mata, e ‵fuli a Molimau a Ieova e ‵tusa mo te uiga o te pati “proselytize” i aso nei? Fakamatala mai.

16. Ne gasolo aka pefea te galuega talai a Molimau a Ieova i te taimi nei?

17. (a) Ne a vaegā atua ‵se e tapuaki atu ki ei a tino i aso nei? (e) Faitalia me se a tena ‵gana, tena fenua, io me ko tena tulaga, se a te mea e ‵tau o iloa ne tino katoa?

[Ata i te itulau e 19]

Ne loto finafinau a Iesu e pelā me se tino talai kae ne akoako atu ne ia a nisi tino ke fai foki te galuega tenā

[Ata i te itulau e 20]

Ne ‵kau atu a tino katoa i te fakapotopotoga i aso o te kau apositolo ki te talaiatuga ki tino katoa

[Ata i te itulau e 21]

A te faimālō atu ki tino ke ‵fuli se mea ‵se