Se Olaga Aoga I te Taimi Nei ke Oko Foki Eiloa ki te Se-Gata-Mai

E MAFAI o maua ne koe se olaga aoga i te taimi foki eiloa tenei. E pefea la? Mai te tautali atu ki fakatakitakiga aoga kolā e maua i te Muna a te Atua, ko te Tusi Tapu. Ke na iloilo aka ne tatou a nāi mea konā.

FAKATAKITAKIGA MAI I TE TUSI TAPU: “A te mea tafasili e ‵tau o fai ne te tino ko te kai, inu kae fakafiafia ki mea ko oti ne maua ne ia i ana galuega,” ko pati a Solomona.—FAILAUGA 2:​24.

A tatou ne faite ke maua ne tatou a te fiafia i te faiga o galuega aoga. Ke oko ki toe tulaga faiga‵ta, e mafai eiloa o maua ne koe se fiafia i te olaga nei mai te galue malosi mo te fakamaoni.

FAKATAKITAKIGA MAI I TE TUSI TAPU: “E sili atu te manuia o te tino telā e tuku atu fua ana mea i lō te tino telā e talia ne ia.”—GALUEGA 20:35.

Ko oti ne iloa aka ne tino e tokouke me i te faiga o mea mō nisi tino​​—te tukuatuga o olotou taimi mo olotou malosi ke fesoasoani atu ki nisi tino i taimi o fakalavelave,​​—ko oko eiloa i te fakamalie loto mo te aoga ki olotou olaga. “Sa taofi ne koe te faiga o mea ‵lei ki tino kolā e ‵tau o maua ne latou, māfai e mafai ne koe o fai,” ko pati a Solomona.​​—Faataoto 3:​27, NW.

Mafaufau ki te fakaakoakoga ne tuku mai ne Ralph. I tena otiga ne litaea, ne kau atu a ia ki tena avaga i te galuega talai faka-Kelisiano tumau. Ne fakamāumāu ne lāua taki tokotasi se aofaki o itula e uke i masina katoa i te galuega talai, i te akoako atu o te Tusi Tapu ki nisi tino. “I te taimi e ‵foki atu ei māua ki te fale i te afiafi, e se fi‵ta fua māua ona ko te ma ga‵solo aka o ma‵tua, kae e fi‵ta foki māua ona ko te fakaaogaga o ma malosi kātoa i te tavini atu ki te ma Tamana faka-te-lagi,” ko pati a Ralph. “Se lagonaga ‵lei ke fi‵ta mai te faiga o galuega ‵lei!” E fia‵fia eiloa lāua me e fakamuamua ne lāua i lā olaga a te tuku atu o mea ki nisi tino.

FAKATAKITAKIGA MAI I TE TUSI TAPU: “A takaga e masani o fia‵fia fakatasi kae fakatau a‵lofa. A taina e ‵tau o fakatau fesoasoani i taimi o fakalavelave.”—FAATAOTO 17:​17.

E faigofie atu ke kufaki i fakalavelave māfai e se ko koe tokotasi fua e pokotia i ei. Ne tusi mai te tino Peletania poto ko Francis Bacon me i tino kolā e seai ne olotou taugasoa ‵tonu, e fai eiloa “e pelā me ne tino ko ‵galo i loto i se togavao.” A te mauaga o taugasoa ‵tonu​​—mo te fai mo fai se taugasoa ‵lei​​—e mafai o fai ei ke kufaki koe i fakalavelave o te olaga; e mafai o gali kae fakamalie loto.

FAKATAKITAKIGA MAI I TE TUSI TAPU: “E fia‵fia a latou kolā e iloa ne latou olotou manakoga faka-te-agaga.”—MATAIO 5:​3, NW.

Tela la, ne fakaasi mai ne Iesu se manakoga tāua ke fai māfai e fia aofia koe i te fakataunuga o folafolaga a te Atua​​—ke malamalama faka‵lei koe i ou “manakoga faka-te-agaga” kae ke fakataunu foki ne koe. E se pelā mo manu, e ‵nofo tatou mo te manakoga ke malamalama i te aoga mo te pogai o te olaga. Ko Ieova fua e mafai o fakataunu ne ia te manakoga tenā, kae e tuku mai ne ia e auala i tena Muna, ko te Tusi Tapu. E pelā mo te mea ne matea ne tatou i te mataupu muamua, e fakaasi mai i te Tusi Tapu a te fuafuaga a te Atua mō te lalolagi. E fakaasi mai i ei a te pogai e ‵nofo ei tatou i te lalolagi nei, te pogai e uke ‵ki ei a logo‵maega, mo mea kolā e fakamoemoe te Atua ke fai ne tatou. E tāua a te malamalama i muna‵tonu konei mai te Tusi Tapu ke ola ei tatou i se olaga aoga kae fakamalie loto. A tino kolā e fakaavanoa ne latou te taimi o sukesuke ki te Muna a te Atua kae fakagalue ne latou a mea kolā e tauloto ne latou, ka fia‵fia eiloa. Kaia? Me ka ati aka ne latou i ei se fesokotakiga telā e fakatuagagina mo te ‵tou Mafuaga, ko “te Atua fiafia,” ko Ieova.​​—1 Timoteo 1:​11, NW.

FAKATAKITAKIGA MAI I TE TUSI TAPU: “Ke masaua ne koe tou Mafuaga . . . a koituai o oko mai te taimi o fakalavelave mo tausaga kolā ka fai aka ei koe penei, ‘E se matea ne au se mea aoga i ei.’”—FAILAUGA 12:​1, THE NEW ENGLISH BIBLE.

A pati fakatonutonu a te tupu ko Solomona ki talavou, kolā e mafai o se matea ne latou i se vaitaimi a fakalavelave kolā e mafai o pokotia ei i te olaga, e aoga foki ki a tatou katoa. Ke fakamuamua ne koe tou Mafuaga i tou olaga kātoa. Tenā eiloa te mea ka fai ei tou olaga ke aoga kae ke isi se pogai tonu. ‵Teke atu ki te kilokiloga tenei: “Ke na ‵kai kae inu tatou, me taeao ko ‵mate tatou.” (1 Kolinito 15:32) Kafai e fakamuamua ne koe te Atua, “ka tokagamalie tou olaga,” ko pati e fakatalitonu mai i te Failauga 8:​12.

Ne iloa aka ne te tamaliki fafine ko Wendi me e tonu eiloa te mea tenā. I te taimi koi foliki ei a ia, ne tauloto ne lāua mo tena taina te ‵gana Sepania ko te mea ke olo atu lāua o ‵nofo i te Dominican Republic, telā ne manakogina malosi i ei a tino talai o te tala ‵lei i te Tusi Tapu. “Ne talia ne māua a mea faiga‵ta e uke ko te mea ke ga‵lue māua i te koga telā e lasi i ei te manakoga, kae ne gali ‵ki te mā olaga i ei. Ka se mafai o fai ne au a nisi mea ke sui aka ei a mea kolā ne fai ne au i masina e ono konā! E sili fakafia atu a fakamanuiaga kolā ne maua ne māua i lō mea faiga‵ta kolā ne aofia i ei.”

E Aoga te Olaga Māfai e Alofa Fakamaoni ki te Atua

A te atiakaga o se fesokotakiga ‵lei mo Ieova e fakaopoopo atu i ei a mea aoga ki tou olaga i se auala fakapito. E pefea la? E se fai fua pelā me e takitaki ne Satani a Atamu mo Eva ke ‵teke ki te pulega a te Atua, kae fakaasi atu foki ne ia me e seai se tino ka tumau i te alofa fakamaoni ki te Atua mai lalo i tofotofoga. (Iopu 1:​9-​11) E mafai o fesoasoani atu koe ke fakatalitonu atu i a Satani se tino loi! E pefea la? Mai te tumau i te alofa fakamaoni ki te Atua, mai te ‵piki ‵mau ki akoakoga fakavae, kae fakaasi atu me e iloa ne koe a te maluga o te saolotoga o Ieova ke filifili ne ia a mea kolā e ‵lei mo mea kolā e ma‵sei mō tatou.​​—Fakaasiga 4:​11.

Kāti ka kufaki tatou i mea faiga‵ta māfai e fia sa‵sale tatou i se auala tonu. E mata, ka kaisoa ne mea faiga‵ta konā se olaga aoga mai i a tatou? Mafaufau me e fatufatu ne se fili matagā ‵tou taugasoa pele io me se tino o tou kāiga. Kafai e fe‵paki tatou mo ne mea faiga‵ta mai ‵tou fili ona ko te ‵puluga o te igoa o se tino telā e pele ki a tatou, e mata, ka kaisoa ne te mea tenā se olaga aoga mai i a tatou? Ikai loa! Ka fia‵fia eiloa tatou o kufaki i mea faiga‵ta i se vaegā auala penā. E penā foki te tumau i te alofa fakamaoni ki te Atua. A te ‵tou a‵lofa fakamaoni ki te Atua mai lalo i tulaga matagā kolā e ‵tupu i aso nei ka fai i ei tena loto ke fiafia.​​—Faataoto 27:11.

Se Olaga Aoga ki te Se-Gata-Mai

Tela la, fakapalele ou mafi o tauloto ne koe a mea katoa e uiga ki te Atua mo ana fuafuaga. Ne fai mai a Iesu Keliso, penei: “Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.” (Ioane 17:3) I te taimi e fakataunu ei ne te Atua a tena fuafuaga muamua mō te lalolagi, ka maua eiloa ne tino fakamaoni a te mea telā ne fuafua ne Ieova mō latou i te taimi muamua​​—ko te “ola se-gata-mai” i luga i te lalolagi palataiso. Ka maua tonu ei ne tatou i konā se olaga aoga kae fakamalie loto.​​—Salamo 145:16.

E maua ne koe i fea a te iloaga tonu telā ne faipati ki ei a Iesu? E maua ne koe i te Muna fakaosofia a te Atua, ko te Tusi Tapu. Kafai e manako koe ki se fesoasoani i te faiga o te mea tenei, sa fakatalave o tusi mai ki tino kolā ne ‵lomi ne latou te mekesini tenei. Ka fakatoka eiloa ne latou mo te fia‵fia se tino ke fesoasoani atu ki a koe ke tauloto ki mea kolā e akoako ‵tonu mai i te Tusi Tapu.