Te Sapati Malōlō o te Atua—E Mata, ko Oti ne Ulu Atu Koe ki ei?

“Me i te muna a te Atua e ola kae galue mo te ‵mana.”​​—EPELU 4:​12.

1. Se a te auala e tasi e mafai o ulu atu tatou ki loto i te koga malōlō o te Atua i aso nei, kae kaia e faigofie ei ke faipati atu i lō te faiga?

NE MATEA ne tatou i te mataupu muamua me e mafai o ulu atu tatou ki loto i te koga malōlō o te Atua mai te faka‵logo o ga‵lue e ‵tusa mo tena fuafuaga. Kāti e faigofie ke faipati ki ei i lō te faiga. Kafai e iloa ne tatou me e se talia ne Ieova se mea telā e fia‵fia tatou ki ei, kāti a ‵tou lagonaga i te taimi muamua ko te ‵teke atu ki ei. E fakaasi mai i te feitu tenei me e manakogina ke ga‵solo tatou ki mua ke “toka o faka‵logo.” (Iakopo 3:​17, NW) I te mataupu tenei, ka iloilo aka ei ne tatou a nai feitu e uiga ki ‵tou fia‵fia o ga‵lue e ‵tusa mo te fuafuaga a te Atua​​—ko te faka‵logo mai te loto e mafai o tofotofogina.

2, 3. Ne a taumafaiga e ‵tau o fai faeloa ne tatou ko te mea ke tumau tatou i te taulia i te kilokiloga a Ieova?

² E pefea tou tulaga i te taliaga o pati fakatonutonu kolā e fakavae ki te Tusi Tapu? E fakaasi mai ne te Tusi Tapu ki a tatou me ko te loto eiloa o te Atua ke fakamaopoopo atu ki a ia a “koloa tāua” o atufenua katoa. (Hakai 2:7) E tonu la me i te tokoukega o tatou ne seki fai mo fai ne koloa tāua i te taimi muamua ne iloa ei ne tatou te munatonu. Kae ko te alofa ki te Atua mo tena Tama pele ne fai ei ke fai ne tatou a ‵fuliga ‵lasi ki ‵tou kilokiloga mo ‵tou faifaiga masani ko te mea ke fakafiafia katoatoa atu ki te Atua. Kae oti aka loa, i te otiga o ‵tou ‵talo mo taumafaiga e uke, ne oko atu ei ki te aso manuia i te taimi ne mafai ei o tuku atu tatou ke papatiso e pelā me ne Kelisiano.​​—Faitau te Kolose 1:​9, 10.

³ Kae e seki fakagata ne te ‵tou papatisoga a te taua atu ki ‵tou tulaga sē ‵lei katoatoa. Ka tumau faeloa te taua tenā i te taimi e fai ei tatou mo fai ne tino sē ‵lei katoatoa. Kae e fakamautinoa mai ki a tatou me kafai e tumau faeloa tatou i te taua atu kae taumafai malosi ke taulia tatou i te kilokiloga a te Atua, ka fakamanuia eiloa ne Ieova a ‵tou taumafaiga.

Te Taimi e Manakogina ei a Pati Fakatonutonu

4. Ne a auala e tolu e mafai ei o maua ne tatou a pati fakatonutonu mai te Tusi Tapu?

⁴ A koituai o ‵saga atu tatou ki ‵tou vāivāiga, e ‵tau o iloa ne tatou me ne a mea konā. Kāti e mafai o fakaasi mai se vāivāiga sē ‵lei i se lauga fakaotia loto i te Kingdom Hall io me se mataupu fakaala mafaufau i ‵tou tusi. I te suā feitu, kafai ne seki maua ne tatou te manatu tonu telā ne tuku mai i se lauga io me ne fakata‵mala tatou o fakagalue aka a pati fakatonutonu mai i se tusi, e mafai o fakaaoga ne Ieova se taina Kelisiano ke fakailoa mai ki a tatou a ‵tou vāivāiga.​​—Faitau te Kalatia 6:1.

5. Taku mai a nisi auala sē ‵lei kolā e mafai o ‵saga atu tatou ki ei māfai e tuku mai ki a tatou a pati fakatonutonu, kae fakamatala mai te pogai e ‵tau ei o fakatumau ne tausi mamoe Kelisiano olotou taumafaiga ke fesoasoani mai ki a tatou.

⁵ E se faigofie ke talia a pati fakatonutonu mai se tino sē ‵lei katoatoa, faitalia te auala ‵lei kae alofa ne tuku atu ei a pati fakatonutonu konā. Kae e pelā mo te mea e fakaasi mai i te Kalatia 6:​1, e fakatonu atu a Ieova ki a latou kolā e ‵nofo mo tauliaga faka-te-agaga ke “taumafai, NW” o fakatonutonu aka tatou, kae fai eiloa “i te agaga o te loto malalo.” Kafai e ‵saga atu tatou ki ei mo te fiafia, ka momea aka eiloa te ‵tou taulia i te kilokiloga a te Atua. E ofo foki tatou me kafai e ‵talo atu tatou, e fakaasi ‵tonu atu ne tatou i a tatou e sē ‵lei katoatoa. Kae kafai e fakaasi mai ne se tino a ‵tou vāivāiga ki a tatou, e masani o fai ne ‵tou fakamasakoga ke fakamāmā aka ei te fakalavelave, e fakafesili ne tatou a lagonaga o te tino fakatonutonu, io me e se talia ne tatou te auala ne tuku mai ei a pati fakatonutonu konā. (2 Tupu 5:​11) Kae kafai e oko atu a pati fakatonutonu ki se tulaga faigata​​—ko mea ne fai ne se tino o te kāiga, ko ‵tou gatu mo teuga, ‵tou tu ‵ma, io me se vaegā fakafiafiaga telā e fia‵fia tatou ki ei kae takalialia a Ieova ki ei​​—kāti ka ‵saga atu tatou ki ei i se auala sē ‵lei, kae ka fakafanoanoa atu i ei ki te tino fakatonutonu! Kae kafai ko tai ‵noga malie aka tatou, ko fakaasi ‵tonu atu ei me e ‵tau eiloa o maua ne tatou a pati fakatonutonu.

6. E fakaasi mai pefea ne te muna a te Atua “a manako mo mafaufauga i loto o tino”?

⁶ E fakamasaua mai ki a tatou te tusi faitau fakavae mō te mataupu tenei me i te muna a te Atua “e galue mo te ‵mana.” E tonu, a te muna a te Atua e galue mo te ‵mana ke ‵fuli ei a olaga o tino. E magoi eiloa tena fesoasoani i te faiga o ‵fuliga kolā e manakogina ma oti tatou ne papatiso e pelā eiloa mo tena fesoasoani a koituai o oko atu tatou ki te lasaga tenā. I tena tusi ki tino Epelu, ne tusi atu foki a Paulo me i te muna a te Atua “e ‵suki ne ia te loto mo te agaga ke mavaelua, ke oko foki eiloa ki sokogā ivi mo ‵kano, e fakamasino foki ne ia a manako mo mafaufauga i loto o tino.” (Epelu 4:​12) I nisi tugapati, kafai e malamalama ‵lei tatou i te fuafuaga a te Atua mō tatou, e fakaasi mai i te auala e ‵saga atu ei tatou ki ei a mea i ‵tou ‵kanoloto. E mata, e isi se ‵kese i ‵tou foliga i tua (te “foitino”) mo ‵tou uiga ‵tonu (te “agaga”) i nisi taimi? (Faitau te Mataio 23:​27, 28.) Onoono ki te auala ka saga atu ei koe ki mea konei e ‵soko mai.

Ke Olo Tasi mo te Fakapotopotoga Saukātoa a Ieova

7, 8. (a) Se a te mea kāti ne fai ei a nisi Kelisiano Iutaia ke ‵piki ‵mau ki nisi faifaiga o te Tulafono a Mose? (e) Ne fakafetaui aka pefea olotou taumafaiga ki te fuafuaga a Ieova?

⁷ E tokouke i a tatou e ‵mau i ‵tou mafaufau a pati konei i te Faataoto 4:​18: “A te auala telā e sa‵sale i ei a tino amio‵tonu, e pelā mo te la e kamata o fanake, e gasolosolo malie eiloa o vau te mainaga ke oko eiloa ki te taimi ko ao mai ei.” Ko tena uiga e fano te taimi kae e gasolo aka foki o ‵lei atu a ‵tou amioga mo ‵tou malamalama i fuafuaga a te Atua.

⁸ E pelā mo te mea ne sau‵tala tatou ki ei i te mataupu ko teka, i te otiga ne mate a Iesu, ne faigata ki Kelisiano Iutaia e tokouke ke ‵kalo keatea mai te Tulafono a Mose. (Galuega 21:20) E tiga eiloa ne apo a Paulo i te kinau atu me ko se ‵nofo a Kelisiano mai lalo i te Tulafono, ne ‵teke atu eiloa a nisi tino ki ana fakasakosakoga kolā ne fakaosofia. (Kolose 2:​13-​15) Kāti ne ma‵natu aka latou me kafai e tau‵tali atu latou ki nisi vaega o te Tulafono, ka se fakasauagina latou. E ui i ei, ne tusi atu a Paulo ki Kelisiano Epelu kae fai ‵tonu atu ki a latou me e se mafai o ulu latou ki loto i te koga malōlō o te Atua māfai e tumau latou i te se fia ga‵lue e ‵tusa mo Tena fuafuaga telā ko oti ne fakaasi mai.a (Epelu 4:​1, 2, 6; faitau te Epelu 4:​11.) Ko te mea ke talia latou ne Ieova, ne ‵tau o ‵saga atu latou ki te mea tonu me ko takitaki ne ia ana tino i se isi auala ‵kese.

9. Se a te kilokiloga e ‵tau o maua ne tatou māfai e tuku mai se malamalama fou e uiga ki mea i te Tusi Tapu?

⁹ Ko oti ne fakalauefa atu a ‵tou malamalama i nisi akoakoga mai te Tusi Tapu i ‵tou aso nei. E se ‵tau o manava‵se tatou ki ei; e ‵tau o fakamalosi aka i ei a te ‵tou tali‵tonu ki te potukau ko te tavini fakamaoni kae poto. Kafai e matea ne sui o te “tavini” me e manakogina ke fakapa‵tonu io me faka‵tonu aka a ‵tou talitonuga i nisi vaega o te munatonu, e se taofi ne latou te faiga o se ‵fuliga ki ei. E tāua atu ki te potukau ko te tavini ke olo tasi a olotou galuega mo te fuafuaga a te Atua i lō tena puipuiga mai fakamaseiga e uiga ki te malamalama fou ko maua. Ka saga atu pefea koe māfai e tuku mai se malamalama fou mai te Tusi Tapu?​​—Faitau te Luka 5:​39.

10, 11. Ne a akoakoga e mafai o tauloto mai te auala ne ‵saga atu ei a nisi tino i te taimi ne fakaasi mai ei a aofaga ‵fou i te talaiatuga o te tala ‵lei?

¹⁰ Ke mafau‵fau tatou ki se isi fakaakoakoga. I te fakaotiga o te 19 mo te kamataga o te 20 senitenali, ne tali‵tonu a nisi Tino A‵koga i te Tusi Tapu kolā ne apo ‵ki i te faiga o lauga me i te ‵toe mea e mafai ne latou o fai ke fakataunu ei te fakatonuga ke olo o talai, ko te faiga o lauga kolā ne fakatoka faka‵lei ki tino fakalogo‵logo e tokouke. Ne fia‵fia malosi latou o lauga atu ki tino e tokouke, kae ne fakamata‵mata latou i tavaega ne maua mai i olotou tino fakalogo‵logo. Kae ne iloa fakamuli aka me e manako a Ieova ke fakalave‵lave malosi ana tino i vaega kese‵kese o te galuega talai, e aofia i ei te galuega mai fale ki fale. Ne ita fitifiti a nisi failauga apo konā ke tofotofo aka se mea fou. Ne foliga mai i a latou ne tagata faka-te-agaga, kolā ne tavini katoatoa atu ki te Aliki. Kae i te taimi ne fakafesagai atu ei latou ki te fakamaoniga manino o te fuafuaga a te Atua e uiga ki te galuega talai, ne fakaasi faka‵sau mai ei olotou mafaufauga, manakoga mo olotou lagonaga ‵tonu. E pefea a lagonaga o Ieova e uiga ki a latou? Ne seki fakamanuia ne ia latou. Ne tiakina ne latou tena fakapotopotoga.​​—Mataio 10:​1-6; Galuega 5:​42; 20:20.

¹¹ E se fakauiga i ei me ne faigofie ki a latou kolā ne tumau i te fakamaoni ki tena fakapotopotoga ke talai atu ki tino katoa. Ne iloa aka ne tino e tokouke me ne faigata te galuega, maise eiloa i te taimi muamua. Kae ne faka‵logo eiloa latou. Oti aka loa, ne manumalo latou i te lotou manava‵se, kae ne fakamanuia malosi latou ne Ieova. Ka saga atu pefea koe māfai e ‵kami koe ke kau atu ki se vaega o te galuega talai telā e se masani koe ki ei? E mata, ka fiafia koe o tofotofo aka ki se mea fou?

Kafai ko Tiaki a Ieova ne se Tino e Pele i a Tatou

12, 13. (a) Se a te pogai e fai mai ei a Ieova ke faka‵tea a tino fai mea ‵se kolā e se sala‵mo? (e) Se a te tofotofoga e fe‵paki sāle mo nisi mātua Kelisiano, kae kaia e faigata ei te tofotofoga tenā?

¹² E seai se fakalotolotolua me e lotoma‵lie katoa tatou ki te akoakoga fakavae me e ‵tau eiloa o ‵ma tatou i te feitu faka-te-foitino, te feitu faka-te-agaga e pelā foki mo ‵tou amioga ko te mea ke fakafiafia atu ki te Atua. (Faitau te Tito 2:​14.) E mafai o isi ne taimi e tofotofo malosi ei te ‵tou a‵lofa fakamaoni ki te vaega tenei o te fuafuaga a te Atua. E pelā me se fakaakoakoga, kāti ka tiaki ne se tamaliki tagata eiloa e tokotasi a se tauavaga Kelisiano a te munatonu. Mai te filifili ne ia “te agasala i ne mo taimi” i lō tena fesokotakiga mo Ieova mo ana mātua amioatua, ko fakatea ei te tamaliki tagata tenā.​​—Epelu 11:25.

¹³ Ko oko eiloa te māfatia o mātua! E uiga ki te fakateaga o se tino, e iloa ‵tonu ne lāua me e fai mai te Tusi Tapu “ke se faka‵piki koutou ki se tino telā e fai mai i a ia se Kelisiano, kae tela la se tino e fina lalolagi, se tino e kaimanako, se tino e tapuaki ki tupua, se tino fakapiau tino, se tino konā, se tino ofa tulafono. Mo a eiloa e fakatakaga koe ki ei.” (1 Kolinito 5:​11, 13) E iloa foki ne lāua me i pati “se tino” i te fuaiupu tenei e aofia i ei a tino o te kāiga kolā e se ‵nofo fakatasi mo lāua i te lā fale. Kae e a‵lofa malosi lāua ki te lā tamaliki tagata! E mafai o fai ne lā lagonaga ke fakasako‵sako atu lāua penei: ‘E mafai pefea o fesoasoani atu māua ki te ma tamaliki ke toe foki mai ki a Ieova māfai e ‵kati lele atu te ma fesokotakiga mo ia? E mata, ka se uke atu a ma mea e mafai o fai mai te fesokotaki atu faeloa ki a ia?’b

14, 15. Se a te ‵toe fakaikuga tonu e ‵tau o fai ne mātua kolā ko faka‵tea olotou tama‵liki?

¹⁴ E a‵lofa loa tatou ki mātua penā. Kae e maua eiloa ne te lā tama te saolotoga ke fai sena filifiliga, kae ne filifili aka a ia ke ola i se olaga sē Kelisiano i lō te fakatumau o se fesokotakiga ‵pili mo ana mātua mo nisi taina tali‵tonu. Kae i te suā feitu la, e seai eiloa se aiā o mātua i te mea tenei. E se tioa eiloa o māfatia lāua!

¹⁵ Kae se a te mea ka fai ne mātua konā? E mata, ka faka‵logo lāua ki te fakatonuga manino a Ieova? Io me ka mafau‵fau lāua me e mafai o fesokotaki faeloa lāua mo te lā tama ne fakatea ke fai pelā me ne “fesokotakiga ‵tau faka-te-kāiga”? I te faiga o te lā fakaikuga, e se ‵tau o puli i a lāua a lagonaga o Ieova e uiga ki te mea telā ka fai ne lāua. Ko tena fuafuaga eiloa ke tausi ke ‵ma te fakapotopotoga kae kafai e mafai, ke toe ‵foki mai a tino fai mea ‵se. E mafai pefea o ‵lago atu a mātua Kelisiano ki te fuafuaga tenā?

16, 17. Se a te akoakoga e mafai o maua ne tatou mai te mafaufau ‵loto ki te fakaakoakoga a Alona?

¹⁶ Ne fepaki te taina o Mose ko Alona mo se tulaga faigata e uiga ki ana tama ta‵gata e tokolua. Mafaufau ki ana lagonaga i te ofoatuga ne ana tama ko Natapu mo Apiu se afi telā e se talia ne Ieova. Ne fakagata ei i konā te fesokotakiga o tāgata konā mo lā mātua. Kae ne seki gata fua i ei. Ne fakatonu atu a Ieova ki a Alona mo ana tama ta‵gata fakamaoni penei: “Ke mo a e saesae otou gatu, io me se fai faka‵lei otou ulu, o fakaasi i a koutou e ‵tagi fanoa‵noa. Kafai e fai ne koutou a mea konā ko koutou ka ‵mate, kae ka kaitaua foki te Aliki ki te fenua kātoa.” (Levitiko 10:​1-6) E manino ‵lei te fekau. E ‵tau o sili atu te ‵tou a‵lofa ki a Ieova i lō ‵tou kāiga sē fakamaoni.

¹⁷ I aso nei, e se tamate fakavave ne Ieova a tino kolā e soli ne latou ana tulafono. E tuku atu ne ia mo te alofa te avanoaga ke sala‵mo mai i olotou galuega sē ‵tonu. Kae e pefea a lagonaga o Ieova māfai e tumau eiloa a mātua o se tino fai mea ‵se kae sē salamō i te tofotofo atu ki a Ia mai te faiga o fesokotakiga sē ‵tau mo te lā tamaliki telā ne fakatea?

18, 19. Ne a fakamanuiaga e mafai o maua ne tino o te kāiga kolā e tau‵tali i fakatonuga e uiga ki tino faka‵tea?

¹⁸ E tokouke a tino kolā ne faka‵tea ko fakaasi ‵tonu mai nei me ne fesoasoani atu ki a latou te tulaga ‵mautakitaki o olotou taugasoa mo olotou kāiga ke toe ‵foki mai latou. I te ‵toe fakafokimaiga o se tamafine e tokotasi, ne tusi mai a toeaina me i te pogai e tasi ne faka‵ma ei ne ia tena olaga “ko te āva o tena tuagane faka-te-foitino ki te fakatokaga e uiga ki tino faka‵tea.” Ne fai mai tou fafine me “i te ‵piki ‵mau mo te fakamaoni o tena tuagane ki fakatakitakiga faka-te-Tusi Tapu ne fesoasoani atu ki tou fafine ke toe foki mai.”

¹⁹ Se a te fakaikuga e ‵tau o fai ne tatou? E ‵tau o taua atu tatou ki manakoga o ‵tou loto sē ‵lei katoatoa ke ‵teke atu ki pati fakatonutonu mai te Tusi Tapu. E ‵tau o tali‵tonu katoatoa tatou me i te auala e saga mai ei te Atua ki ‵tou fakalavelave ko te ‵toe auala ‵lei eiloa i taimi katoa.

“Te Muna a te Atua e Ola”

20. Ne a auala e lua e mafai ei o fakaaoga te Epelu 4:​12? (Onoono ki te fakamatalaga mai lalo.)

²⁰ I te taimi ne tusi mai ei a Paulo me “i te muna a te Atua e ola,” ne seki fakasino tonu atu a ia ki te Muna tusia a te Atua, ko te Tusi Tapu.c E fakaasi mai i te mataupu saukātoa me ne fakasino atu eiloa a ia ki te muna o te folafolaga a te Atua. E fakaasi mai ne Paulo a te manatu tāua i konei me e se fai fua ne te Atua ana folafolaga kae ka oti ko puli ei i a ia. Ne fakatu ne Ieova te mea tenei e auala i te pelofeta ko Isaia: “E penā foki te muna telā e faipati ne au e se mafai o se fakataunu ne ia te mea telā e fakamoemoe au ke fai ne ia; e fai eiloa ne ia a mea kolā ne fai ne au ki ei ke fano o fai.” (Isaia 55:11) Tela la, e se ‵tau o manava‵se tatou māfai e se fai fakavave a mea e ‵tusa mo te mea e ma‵nako tatou ki ei. E ‘galue faeloa’ a Ieova ko te mea ke fakataunu mo te manuia tena fuafuaga.​​—Ioane 5:​17.

21. E mafai pefea o fakamalosi atu a te Epelu 4:​12 ki tino ma‵tua fakamaoni o te “vaitino tokouke”?

²¹ Ko oti ne tavini atu a tino ma‵tua o te “vaitino tokouke” ki a Ieova i te fia sefulu o tausaga. (Fakaasiga 7:9) E tokouke i a latou ne seki fakamoe‵moe ke ga‵solo aka latou o ma‵tua i te olaga tenei. Kae ne seki loto vāi‵vai latou. (Salamo 92:14) E iloa ne latou me “i te muna a te Atua e ola” kae ka fakataunu eiloa a folafolaga a Ieova. (Epelu 4:​12) Ona ko te fuafuaga a te Atua e pele i tena loto, e fakafiafia eiloa ne tatou a ia māfai e tausi kae fakamuamua ne tatou i ‵tou mafaufau. I loto i te fitu o aso malōlō tenei, e seai eiloa se mea ka taofi ne ia a Ieova mai te fakataunuga o tena fuafuaga, kae ka ‵lago atu eiloa ana tino ki ei e pelā me se potukau. Kae e a koe? E mata, ko oti koe ne ulu tonu atu ki loto i te koga malōlō o te Atua?

[Fakamatalaga fakaopoopo]

Ke mo ma Galo i a Koe te Fuafuaga

• Se a te mea e manakogina ko te mea ke ulu atu tatou ki loto i te koga malōlō o te Atua i aso nei?

• Se a te sokoga i te vā o te fuafuaga a te Atua mo te ‵tou fia‵fia o talia a pati fakatonutonu mai te Tusi Tapu?

• Ne a feitu e mafai ei o faigata te fakalogo ki fakatonuga mai te Tusi Tapu, kae kaia e tāua ei ke faka‵logo tatou ki ei?

• Ne a auala e lua e mafai o fakaaoga ki ei te Epelu 4:​12?

[Ata i te itulau e 31]

Ko oko eiloa te loto māfatia o mātua!