E Mata, e Iloa Koe ne Ieova?

“E iloa ne te Aliki [ko Ieova] a latou kolā e a ia.”—2 TIMOTEO 2:​19.

1, 2. (a) Se a te mea ne saga malosi atu ki ei a Iesu? (e) Ne a fesili e ‵tau o mafau‵fau tatou ki ei?

ITE aso e tasi ne fanatu se Faiakoga o te Tulafono kae ‵sili atu ki a Iesu, penei: “Tefea a te fakatonuga tafa sili i te Tulafono?” Ne tali atu a Iesu: “E ‵tau mo koe o alofa ki te Aliki tou Atua mo tou loto kātoa, mo tou agaga kātoa, mo tou mafaufau kātoa.” (Mataio 22:​35-37) Ne sili eiloa te alofa o Iesu mō tena Tamana faka-te-lagi kae ne ola a ia e ‵tusa mo pati konā. Ne manavase foki a Iesu e uiga ki tena tulaga i mua o Ieova, kae fakaasi atu te mea tenei e auala i tena olaga fakamaoni. Tela la, mai mua malie o tena mate, ne mafai o fai atu a ia me ne iloa ne te Atua a ia e pelā me se tino telā ne fakalogo fakamaoni ki Ana fakatonuga. Tela la, ne tumau eiloa a Iesu i te alofa o Ieova.​​—Ioane 15:10.

² E tokouke a tino e fai mai i a latou e a‵lofa ki te Atua. E seai se fakalotolotolua me e fai atu foki tatou penā. Kae e isi ne nisi fesili tāua kolā e ‵tau o mafau‵fau tatou ki ei: ‘Ne a mafaufauga o Ieova e uiga ki a au? E mata, e mafai o fai atu me i a Ieova e “iloa” ne ia au, io me e maua ne au te taliaga a Ieova? E mata, e mafaufau mai a Ieova ki a au e pelā me i a ia te tino?’ (2 Timoteo 2:​19) Se mea gali ke mafau‵fau me e mafai o maua ne tatou se vā fakataugasoa ‵pili mo te Pule Sili o te iunivesi!

3. Kaia e faigata ei ki nisi tino ke tali‵tonu me e mafai o fai latou e pelā me i a Ieova, kae ne a mea e mafai o fesoasoani atu ki a latou ke ‵fuli olotou mafaufauga?

³ Kae se mea faigata mō nisi tino kolā e a‵lofa ki a Ieova ke mafau‵fau me e mafai o fai taugasoa latou mo te Atua. E tali‵tonu a nisi tino i a latou e se aoga. Ona ko te mea tenā, e mafau‵fau latou me i a latou e se i a Ieova. Se mea gali ke iloa atu me e ‵kese te kilokiloga a Ieova ki a tatou! (1 Samuelu 16:7) Mafaufau ki te mea tenei: Kaia e faitau ei ne koe te mekesini tenei? Kaia e taumafai malosi ei koe ke tavini atu ki a Ieova mo te loto kātoa, agaga, mafaufau mo tou malosi? Kafai e tuku atu tou olaga kātoa ki a Ieova kae papatiso, kaia e fai ei ne koe te mea tenā? E fai mai te Tusi Tapu me e sukesuke ne Ieova a loto kae e salasala ne ia a tino kolā e “tāua” ki a ia. Kae e ‘talia’ io me ‵kami ne ia latou ke fai mo ana taugasoa. (Faitau te Hakai 2:7; Ioane 6:​44.) Tela la, e mafai eiloa o mautinoa me e tavini atu koe ki a Ieova me e manako a ia ke fai koe penā. Ka se tiaki lele ne ia a latou kolā ne ‵kami ne ia ke fai mo ana taugasoa māfai e tumau latou i te fakamaoni ki a ia. E tāua eiloa latou ki te Atua, kae e alofa malosi a ia ki a latou.​​—Salamo 94:14.

4. Kaia e ‵tau ei o mafau‵fau faeloa tatou ki te ‵tou vā fakataugasoa mo Ieova?

⁴ Kafai ko oti ne fakapilipili mai a Ieova ki a tatou, e ‵tau o tumau tatou i te alofa o te Atua. (Faitau te Iuta  20, 21.) Masaua me e fakaasi mai i te Tusi Tapu me e mafai o tapea‵pea io me olo keatea mai te Atua kae ko se fai mo ana taugasoa. (Epelu 2:1; 3:​12, 13) E pelā me se fakaakoakoga, mai mua malie o pati i te 2 Timoteo 2:​19, ne faipati eiloa a te apositolo ko Paulo e uiga ki a Umenio mo Fileto. E foliga mai me ne tavini atu a tagata konei ki a Ieova i se vaitaimi, kae ne tiakina fakamuli ne lāua te munatonu. (2 Timoteo 2:​16-​18) Ne tiakina foki ne nisi tino i te fakapotopotoga i Kalatia a te munatonu. E seki ‵nofo latou i te munatonu. (Kalatia 4:9) E ‵tau o masaua faeloa ne tatou a te tāua o te ‵tou vā fakataugasoa mo Ieova.

5. (a) Ne a uiga kolā e fai ei ke iloa tatou ne te Atua? (e) Ne a fakaakoakoga ka sau‵tala tatou ki ei?

⁵ E isi aka foki ne uiga kolā e ‵tau o maua ne tatou māfai e ma‵nako tatou ke iloa tatou ne Ieova. (Salamo 15:​1-5; 1 Petelu 3:4) A mea konei ko te fakatuanaki mo te loto maulalo. Ka fai‵pati eiloa tatou ki fakaakoakoga a tagata e tokolua kolā ne a‵lofa ki a Ieova me ne fakaasi atu ne lāua a uiga konei. Ka onoono foki tatou ki se tagata telā ne fakamatamata kae ne seki talia ne te Atua ona ko te uiga tenā. E mafai o tauloto ne tatou a akoakoga tāua mai fakaakoakoga konei.

Te Tamana o Tino Kolā e Fakatuanaki

6. (a) Ona ko tena fakatuanaki ki folafola a Ieova, ne a mea ne fai ne Apelaamo? (e) I te auala fea ne iloa ‵lei ei ne Ieova a Apelaamo?

⁶ A Apelaamo se tagata telā ne “talitonu . . . ki te Aliki.” Ne taku a ia ko te “tamana o tino fakatuanaki.” (Kenese 15:6; Loma 4:​11) Ona ko tena fakatuanaki, ne lotomalie a Apelaamo o tiaki tena fale, ana taugasoa, tena galuega, mo mea katoa ne maua ne ia ko te mea ke fanatu ki se koga ‵mao. (Kenese 12:​1-4; Epelu 11:​8-​10) Ne tumau eiloa te malosi o te fakatuanaki o Apelaamo. E tasi te fakamaoniga ki ei me i te fia tausaga fakamuli ifo ne toka eiloa a ia o fakalogo ki te fakatonuga a Ieova kae ke ofo atu tena tama ko Isaako e pelā me se taulaga ki a Ieova. (Epelu 11:​17-​19) Ne fakaasi atu te fakatuanaki o Apelaamo ki folafolaga a Ieova, kae ne fai ne te mea tenā ke tu ‵kese a ia i mua o te Atua. Ne iloa ‵lei ne Ieova a Apelaamo. (Faitau te Kenese 18:19.) E fakauiga i ei me e se gata fua i te iloa ne Ieova me i a Apelaamo se tino tonu kae alofa foki a ia ki ei e pelā me se taugasoa.​​—Iakopo 2:​22, 23.

7. Ne a mea e iloa ne Apelaamo e uiga ki folafolaga a Ieova? E fakaasi atu pefea tena fakatuanaki ki ei?

⁷ Ne tauto atu a Ieova ki a Apelaamo me i tena gafa ka “manumalo faeloa i taua” mo olotou fili kae ka fai pelā mo “one i te matafaga.” (Kenese 22:​17, 18) E tiga eiloa ne seki fakataunu a folafolaga konei i te taimi ne ola ei a Apelaamo, kae ne tumau eiloa te malosi o tena fakatuanaki ki a Ieova. Ne iloa ne ia me i folafolaga a te Atua e ‵tonu, kae ne fakaasi atu ne ia te fakatuanaki tenei i te auala ne ola ei a ia. (Faitau te Epelu 11:13.) E mata, e iloa ne Ieova tatou e pelā me ne tino kolā e fakatuanaki e pelā mo Apelaamo?

A te Faka‵tali ki a Ieova se Fakailoga o te Fakatuanaki

8. Ne a nisi mea e ma‵nako malosi ki ei a te tokoukega o tino?

⁸ Kāti e isi ne mea kolā e ma‵nako malosi tatou ki ei, e pelā mo te fia avaga, faiga o tama‵liki, mo te mauaga o te ola ‵lei. E sē se mea masei a te manako ki mea konei. Kafai e isi se mea telā e ma‵nako malosi tatou ki ei kae e se mafai o maua nei ne tatou, ne a mea ka fai ne tatou? A te auala e gasue‵sue ei tatou i te feitu tenei e fakaasi atu i ei te malosi o ‵tou fakatuanaki.

9, 10. (a) Ne a mea ne fai ne nisi tino ko te mea ke maua a mea e ma‵nako latou ki ei? (e) Se a tau faka‵tau ki folafolaga a Ieova kolā ka taunu ‵tonu mai?

⁹ Se mea valea ke ‵teke atu tatou ki te takitakiga a te Atua kae taumafai o ‵sala atu ki mea e ma‵nako tatou ki ei. E mafai o fakamasei ne te mea tenei a ‵tou vā fakataugasoa mo Ieova. E pelā me se fakaakoakoga, ko oti ne filifili ne nisi tino a vaegā togafiti kolā e se fetaui mo fakatakitakiga i te Tusi Tapu. Ko oti ne talia ne nisi tino a galuega kolā e fai ei ke seai ne olotou taimi mō olotou kāiga io me ko fakatasiga a te fakapotopotoga. E kamata ne nisi tino se fesokotakiga faka-famau mo se tino telā e se tavini atu ki a Ieova. Kafai e fai ne se Kelisiano te mea tenā, e mata e taumafai a ia o fai ke iloa a ia ne Ieova? Mafaufau māfai ne seki kufaki a Apelaamo e uiga ki fuafuaga a te Atua. E pefea la a lagonaga o Ieova ki ei? E fai pefea moi ne fai eiloa ne Apelaamo a mea i ana auala totino kae ‵togi ne ia se fale lasi? E a moi ne fakaiku aka ne ia ke fai sena igoa i lō te faka‵tali ke gasuesue a Ieova? (Fakatusa ki te Kenese 11:4.) E mata, koi fai eiloa ne Ieova a ia mo fai tena taugasoa?

¹⁰ Ne a mea e manako malosi koe ki ei? E mata, e lava tou fakatuanaki ke faka‵tali ke tuku atu ne Ieova a mea konā ki a koe? E tauto mai a ia me ka fakama‵lie ne ia a “manako” o tino ola katoa. (Salamo 145:16) E mafai o se oko tonu mai a folafolaga a Ieova i te taimi telā e ma‵nako tatou ki ei. Kae kafai e tumau tatou i te ola i se auala telā e fakaasi atu ei me e maua ne tatou te fakatuanaki e pelā mo Apelaamo, ka se puli lele eiloa i a Ieova a tatou. Ka taui mai eiloa ne ia tatou.​​—Epelu 11:6.

Te ‵Kesega i te vā o te Loto Maulalo mo te Fakamatamata

11. Ne a mea ne fai ne Kola i tausaga e uke?

¹¹ Ka onoono nei tatou ki fakaakoakoga a tagata e tokolua kolā ne gasue‵sue i auala kese‵kese, ko Mose mo Kola. A mea ne fai ne lāua e fesoasoani mai eiloa ke malamalama tatou me i mafaufauga o Ieova e uiga ki a tatou e fakalagolago eiloa ki te lasi o te āva e fakaasi atu ne tatou mō ana filifiliga mo auala e fai ei ne ia a mea. A Kola se tino Levi mai te matakāiga o Koate. Kāti ne maua ne ia te avanoaga ke kilo atu ki mea a Ieova ne fai ke fakasaoloto ei te kau Isalaelu mai te Tai Kula. E isi foki sena tusaga ne fai i te fakamasinoga a Ieova ki tino Isalaelu fakalogoga‵ta i te mauga o Sinai, kae ne fesoasoani atu a ia i te avega o te pusa o te feagaia. (Esoto 32:​26-​29; Numela 3:​30, 31) E foliga mai me ne fakamaoni a ia ki a Ieova mō tausaga e uke, kae ona ko te mea tenā, ne āva eiloa a tino Isalaelu e tokouke ki a ia.

12. Se a te mea ne tupu ki te vā fakataugasoa o Kola mo te Atua ona ko tena fakamatamata?

¹² Kae i tena auala ki te Fenua o te Folafolaga, ne mafaufau a Kola me e isi se mea ‵se i te auala ne takitaki ei ne Ieova a te fenua. Ne manako a ia o fai a ‵fuliga. Telā ne ‵kau atu ei a nisi tagata e toko 250 ki a Kola. E mautinoa eiloa i a latou me ne iloa ne Ieova latou kae ne maua ne latou tena taliaga. Ne fai atu latou ki a Mose: “Ko tō silia katoa te lua mea tenei e fai! A tino Isalaelu katoa e o te Aliki, ka ko te Aliki e fakatasi mai ki a tatou katoa.” (Numela 16:​1-3) Ne fai ne latou te mea tenei i se auala fakamatamata. Ne tali‵tonu latou ki olotou auala totino. Ne fai atu a Mose ki a latou: “Ka fakaasi mai ne te Aliki a te tino telā ne filifili ne ia.” (Faitau te Numela 16:5.) I te suā aso, ne ‵mate atu katoa a Kola mo latou kolā ne ‵kau ki a ia.​​—Numela 16:​31-​35.

13, 14. I auala fea ne fakaasi atu ei ne Mose me i a ia e loto maulalo?

¹³ Ne ‵kese eiloa a Mose mai i a Kola. A ia “ko te ‵toe tagata loto malalo eiloa i te lalolagi.” (Numela 12:3) Ne fakaasi mai ne ia tena atafai mo tena loto maulalo mai te faiga o mea kolā ne fakatonu atu ne Ieova ke fai ne ia. (Esoto 7:6; 40:16) E seki fakaasi mai eiloa i te Tusi Tapu me ne seki talia ne Mose a auala o Ieova e uiga ki te faiga o mea io me ne kaitaua a ia me ne ‵tau o tautali a ia ki fakatonuga mai a Ieova. E pelā me se fakaakoakoga, ne tuku atu ne Ieova ki a ia a fakatonuga ma‵nino e uiga ki te auala e faite ei te faleie tapu. Ne aofia i fakatonuga konei a te ‵lanu o te filo mo te aofaki o pu fakalave e ‵tau o fakaaoga ne tino Isalaelu ke fai ki ei te faleie laugatu tenā. (Esoto 26:​1-6) Kafai e tuku atu ne se ovasia i te fakapotopotoga a te Atua se fakatonuga manino e uiga ki mea, e mafai eiloa o loto vāivāi koe i nisi taimi. A ko Ieova ko te ‵toe ovasia ‵lei katoatoa. E tuku atu ne ia a galuega a ana tavini, kae e talitonu a ia me ka fai faka‵lei eiloa ne latou. Kafai e tuku mai ne ia a fakamatalaga e uke, e isi eiloa se pogai e fai ei ne ia penā. E seki kaitaua a Mose ki a Ieova io me mafaufau me e se fakaasi atu ne Ieova te āva me ne tuku atu ne ia a fakatonuga e uke. E seki mafaufau a Mose me ko ave keatea ne Ieova tena saolotoga. Ne fai atu a Mose ki tino ga‵lue ke fai te mea telā ne fakatonu atu ne Ieova ki a latou. (Esoto 39:32) A te mea tenei se auala loto maulalo. Ne iloa ne Mose me i a Ieova te galuega kae ne fakaaoga eiloa a ia ne Ieova ke fai tena galuega.

¹⁴ Ne fakaasi mai ne Mose me ne loto maulalo a ia faitalia me ne isi ne pogai ne fanoanoa ei a ia. E pelā me se fakaakoakoga, i te taimi ne fameo ei a tino me ko seai ne olotou vai, ne kaitaua malosi a Mose ki a latou kae ne seki ‵viki atu a ia ki a Ieova. Ona ko te mea tenā, ne fai atu a Ieova ki a Mose me ka se takitaki ne ia a tino ki loto i te Fenua o te Folafolaga. (Numela 20:​2-​12) Ne logo‵mae a Mose mo Alona i se fia tausaga, mai te faka‵logo ki fameo a te kau Isalaelu. Kae nei, ona ko te mea ‵se tenā, ne seki mafai ei o maua ne Mose a te mea telā ko leva ne fakamoemoe a ia ki ei! Ne a mea ne fai ne Mose? E tonu me ne fanoanoa a ia. Kae ne loto maulalo kae talia ne ia te fakaikuga a Ieova. Ne iloa ne ia me i a Ieova se Atua amiotonu telā “e fai ne ia te mea tonu kae nofogamalie.” (Teutelonome 3:​25-​27; 32:4) I aso nei, kafai e mafau‵fau tatou ki a Mose, e mafau‵fau eiloa tatou ki se tino telā ne iloa ne Ieova.​​—Faitau te Esoto 33:​12, 13.

A te Faka‵logo ki a Ieova e Manakogina i ei te Loto Maulalo

15. Ne a mea e mafai o tauloto ne tatou mai mea ne fai ne Kola ona ko te fakamatamata?

¹⁵ E mafai fua o maua ne tatou te taliaga a Ieova māfai e talia ne tatou a fakamafuli‵fuliga kolā e fai. Kae e ‵tau o fakaasi atu ne tatou te āva ki a latou kolā e fakaaoga ne Ieova ke takitaki ei te fakapotopotoga. Ne a mea e fai ne tatou māfai ko fai ne tagata konei a fakaikuga io me ‵fuli ne latou te auala e fai ei a mea i te fakapotopotoga? Ona ko te mea ne tali‵tonu latou ki auala totino e fai ei ne latou a mea konā, ne seki toe fai a Kola mo ana tino e pelā me ne taugasoa o te Atua. Ne fakamata‵mata kae fakaasi atu ne latou te fakatuanaki foliki. Ne mafaufau a Kola me i a Mose se toeaina matua fua telā e fai ana fakaikuga totino, kae ne puli i a ia me ko Ieova eiloa ne takitaki ne ia te fenua. E pelā me ko te ikuga, ne seki fakaasi atu ne ia te alofa fakamaoni ki tino kolā ne fakaaoga ne te Atua. Ne ‵tau o faka‵tali a Kola ke gasuesue muamua a Ieova. Ne mafai o fesoasoani atu a Ieova ke malamalama a ia i te pogai e ‵tau ei o fai a mea i te auala telā e ‵tau o fai i ei io me ‵fuli māfai e manakogina. Ona ko te mea ne fai penā a Kola, e se ‵tau lele eiloa o mafau‵fau tatou i aso nei me ne tavini fakamaoni a Kola ki a Ieova. E mafau‵fau eiloa tatou ki a ia e pelā me se tino telā ne seki fakalogo ki a Ieova ona ko tena fakamatamata.

16. E fesoasoani mai pefea ki a tatou a te fakaakoakoga o te loto maulalo o Mose?

¹⁶ A te mea telā ne tupu ki a Kola se fakamasauaga mō toeaina mo nisi tino i te fakapotopotoga i aso nei. Ke faka‵tali ke gasuesue muamua a Ieova kae ke faka‵logo ki tino kolā e fakaaoga ne Ieova ke takitaki ei te fakapotopotoga, e ‵tau o loto mau‵lalo tatou. E mata, e fakaasi atu ne tatou te loto maulalo e pelā mo Mose? E mata, e malamalama kae talia ne tatou me e fakaaoga ne Ieova a tino kolā e takitaki ne latou te fakapotopotoga? E mata, e faka‵logo tatou ki olotou fakatonuga? E mata, e pule faka‵lei atu tatou ki ‵tou lagonaga māfai e fanoa‵noa tatou? Kafai e fai ne tatou a mea konei, ka maua ne tatou te taliaga a Ieova. Kafai e loto maulalo kae faka‵logo tatou, ka tāua ‵ki eiloa tatou ki a ia.

E Iloa ne Ieova a Tino Kolā e a Ia

17, 18. Se a mea e mafai o fesoasoani mai ke maua faeloa ne tatou te taliaga a Ieova?

¹⁷ Se mea ‵lei ke mafau‵fau tatou e uiga ki fakaakoakoga a tino kolā ne alofa ki ei a Ieova kae ‵kami ne ia ke fai mo ana taugasoa. A Apelaamo mo Mose e sē ‵lei katoatoa kae isi ne lā fakalavelave, e pelā eiloa mo tatou. Kae ne kilo atu a Ieova ki a lāua e pelā me ne taugasoa, e pelā me i a ia a tino. E ‵kese eiloa mo te mea ne tupu ki a Kola. E fakaasi mai i tena fakaakoakoga a te auala e se ‵lei ei ke olo keatea tatou mai i a Ieova kae ko se fai mo ana taugasoa. E ‵tau mo tatou taki tokotasi o mafau‵fau e uiga ki fesili konei: Ne a mafaufauga o Ieova e uiga ki a au? Ne a mea e mafai o tauloto ne au mai fakaakoakoga konei i te Tusi Tapu?

¹⁸ E mafaufau eiloa a Ieova ki ana tavini fakamaoni e pelā me i a ia a tino. A te mea tenei se fakamafanafanaga mō tatou. Tela la, taumafai ke fakaasi atu a vaegā uiga e pelā mo te fakatuanaki mo te loto maulalo. Ka fai ei ke tāua malosi koe ki te ‵tou Atua gali. Se tauliaga gali eiloa ke iloa tatou ne Ieova. A tino kolā e talia ne ia e maua ne latou se olaga fiafia i te taimi nei kae ka maua ne latou a fakamanuiaga i aso mai mua.​​—Salamo 37:18.

E Mata, e Masaua ne Koe?

• Se a te tulaga tāua e mafai o maua ne tatou i mua o Ieova?

• E mafai pefea o fakaakoako atu tatou ki te fakatuanaki o Apelaamo?

• Ne a akoakoga e mafai o tauloto ne tatou mai i a Kola mo Mose?

[Ata i te itulau e 29]

E pelā mo Apelaamo, e mata e maua ne tatou te fakatuanaki me ka fakataunu katoatoa ne Ieova ana folafolaga?

[Ata i te itulau e 31]

Ne seki lotomalie a Kola ke fakalogo mo te loto maulalo ki fakatonuga

[Ata i te itulau e 32]

E mata e iloa koe ne Ieova e pelā me se tino telā e loto maulalo o fakalogo ki fakatonuga?