Ke Faka‵logo mo te Fakamaoni ki te Pulega a te Atua

“Ko te Aliki [Ieova] tokotasi ka fai mo tupu o tatou; ka pule ne ia tatou kae puipui foki ne ia tatou.”​​—⁠ISAIA 33:⁠22.

I TE 1513 T.L.M., ne fakatu ei te fenua o Isalaelu. I te taimi tenā, ne seki ai se lotou laumua, se fenua, mo se tupu. Ne fai a tino i ei mo fai ne pologa mua. Kae ne ‵kese ‵ki te atufenua fou tenā i se isi auala aka foki. A Ieova ko tena Famasino, te Tino Fai Tulafono, mo te Tupu. (Esoto 19:​5, 6; Isaia 33:22) E seai aka foki eiloa se isi atufenua e mafai o fai mai penā!

² Ona ko Ieova, se Atua o te tokagamalie mo te filemu, e fakamoe‵moe foki tatou ke tokagamalie so se atufenua telā ne pule atu a ia ki ei. (1 Kolinito 14:33) Tenā eiloa te tulaga o tino Isalaelu. Kae ne mafai pefea o takitaki ne se Atua sē matea se fakapotopotoga matea i te lalolagi? E maua ne tatou a mea aogā māfai e mafau‵fau ki te auala ne takitaki ei ne Ieova te atufenua mua tenā, kae masaua foki te auala ne faka‵mafa mai i ana faifaiga ki te kau Isalaelu a te tāua o te fakalogo mo te fakamaoni ki te pulega a te Atua.

Te Auala ne Pule Atu ei ki Isalaelu Mua

³ E tiga eiloa e fai a Ieova mo fai te Tupu sē matea o Isalaelu, ne ‵tofi aka ne ia a tāgata fakamaoni e pelā me ne ana sui matea. E isi ne matai, ulu o kaukāiga, mo toeaina kolā ne tavini atu ki tino e pelā me ne tino fakatonutonu mo famasino. (Esoto 18:​25, 26; Teutelonome 1:​15) Kae e se ‵tau o mafau‵fau tatou me e mafai eiloa ne tāgata konā o faka‵tonu aka a fakalavelave i te poto mo te malamalama ‵lei katoatoa e aunoa mo te takitakiga a te Atua. E se ‵lei katoatoa latou, kae e se iloa foki ne latou a mea i loto o olotou taina tapuaki. Kae e mafai o tuku atu ne famasino kolā e ma‵taku ki te Atua a pati fakatonutonu aogā ki olotou taina tali‵tonu me e fakavae a mea konā ki te Tulafono a Ieova.​​—⁠Teutelonome 19:15; Salamo 119:​97-​100.

⁴ Kae e uke atu a mea e manakogina ke fai ne famasino i lō te iloaga fua o te Tulafono. Ona ko te sē ‵lei katoatoa, ne matapula‵pula a toeaina ko te mea ke taofi aka olotou uiga ma‵sei, e pelā mo te kaiū, te fakailoga tino, mo te kaimanako, kolā e mafai o fakamasei ei te faiga ne latou o te fakamasinoga. Ne fai atu a Mose ki a latou, penei: “Sa fapito ki se tino i otou fakamasinoga; fakamasino a tino katoa ke pau, faitalia me ko oi a ia. Sa mataku ki so se tino, me i ikuga e fai ne koutou ko ikuga kona mai i te Atua.” E tonu, ne sui ne famasino o Isalaelu a te Atua i te faiga o fakamasinoga. Ko oko eiloa i te tāua o te tauliaga tenā mai te Atua!​​—⁠Teutelonome 1:​16, 17.

⁵ Ne fai ne Ieova a nisi fakatokaga ko te mea ke tausi atu ki manakoga o ana tino i te feitu faka-te-agaga. A koi tuai foki o oko atu latou ki te Fenua o te Folafolaga, ne fakatonu atu a ia ki a latou ke faite a te faleie, ko te koga telā e fai i ei te tapuakiga tonu. Ne fakatoka foki ne ia se potukau o faitaulaga ke akoako atu te Tulafono, ke ofo atu a taulaga manu, kae ke ‵sunu foki a mea ma‵nogi i taeao mo afiafi. Ne fakasopo ne te Atua a te taina matua o Mose, ko Alona, mo fai te faitaulaga sili muamua eiloa o Isalaelu kae ne ‵tofi aka ana tama‵liki ke fesoasoani atu ki te lotou tamana mo ana tiute.​​—⁠Esoto 28:1; Numela 3:​10; 2 Nofoaiga Tupu 13:​10, 11.

⁶ A te tausiga o manakoga faka-te-agaga o te fia miliona o tino konā se galuega lasi ‵ki, kae e mu‵tana fua a faitaulaga. Tela la, ne fai a fakatokaga ke fesoasoani atu a nisi tino ki a latou mai te matakāiga o Levi. Ne fai atu a Ieova ki a Mose, penei: “Ko te tiute taua eiloa e tasi o tino sa Levi, ko te tavini atu ki a Alona mō ana tama tagata.”​​—⁠Numela 3:​9, 39.

⁷ Ne fakatoka faka‵lei eiloa a te kau Levi. Ne vaevae aka latou ki kāiga e tolu​​—⁠ko te kau Kelesona, Koate, mo Melali​​—⁠kae ne tofu eiloa te kāiga mo te lotou galuega. (Numela 3:​14-17, 23-​37) Kāti ne foliga mai me e tāua atu a nisi tofiga i lō nisi mea, kae ne tāua katoa eiloa a galuega konā. A te galuega a te kāiga o Koate mai te matakāiga o Levi ne fai ei ke ga‵lue latou i tafa o te pusa o te feagaiga ‵malu mo te fakatokaga faka‵lei o te faleie tapu. Kae e maua eiloa ne tino Levi katoa a tauliaga ‵gali, faitalia me e aofia latou i te kāiga o Koate io me ikai. (Numela 1:​51, 53) Se mea fakafanoanoa, me ne seki fakatāua ne nisi tino olotou tauliaga. I lō te faka‵logo ki tino kolā ne ‵tofi aka ne te Atua, ne kamata o maua ne latou a uiga pelā mo te fia sili, fiafai tofi, mo te loto masei. E tokotasi mai i ei, ko Kola, se tino mai te matakāiga o Levi.

“Ko Ma‵nako Foki Koutou ki te Tofi Faitaulaga”?

⁸ Ne seki fai a Kola mo fai te matai i te matakāiga o Levi, io me ko te ulu o te kāiga o Koate. (Numela 3:​30, 32) E tiga eiloa te feitu tenā, ne tāua ‵ki eiloa tena tulaga i Isalaelu. Kāti ne ga‵lue tasi i nisi taimi a Kola mo Alona mo ana tama‵liki tāgata ona ko ana tiute. (Numela 4:​18, 19) Ona ko te masani o Kola ki vāivāiga o tāgata konei, kāti ne fakasakosako mai tou tagata, penei: ‘A faitaulaga konei e se ‵lei katoatoa, kae kaia fua la e ‵tau ei o fakalogo au ki a latou! Ne fatoā oti atu fua ne faite ne Alona se pulumakau aulo. Ne iku atu te tapuaki atu ki te pulumakau tenā ki te ifo ki tupua o ‵tou tino. Nei la, ko tavini atu a Alona, te taina o Mose, e pelā me se faitaulaga sili! Tapa la ki te fāpito! Kae e a a tamaliki tā‵gata a Alona, ko Natapu mo Apiu? A te ‵tonuga loa, ne ‵teke malosi atu laua ki te lā tauliaga i te taviniga telā ne tamate ei laua ne Ieova!’a (Esoto 32:​1-5; Levitiko 10:​1, 2) Faitalia me ne a mafaufauga o Kola, e manino ‵lei me ne kamata o maua ne ia se kilokiloga faka-te-foitino e uiga ki te kau faitaulaga. Ne iku atu i ei ki tena ‵tekeatuga ki a Mose mo Alona, kae sili atu i ei, ki a Ieova.​​—⁠1 Samuelu 15:23; Iakopo 1:​14, 15.

⁹ Ona ko te maluga o tou tagata, ne faigofie fua ki a Kola ke ‵futi mai ne ia a nisi tino kolā ne ‵pau olotou kilokiloga ke ‵kau atu ki a ia. Ne maua ne ia, fakatasi mo Tatano mo Apilamo, a tino e toko 250 kolā e ‵pau olotou mafaufauga, kae ne matai katoa o te fenua. Ne olo fakatasi atu latou ki a Mose mo Alona kae fai atu, penei: “A tino Isalaelu katoa e o te Aliki, ka ko te Aliki e fakatasi mai ki a tatou katoa. Mose, ai a e fia pule ei koe i luga o te fenua katoa o te Aliki?”​​—⁠Numela 16:​1-3.

¹⁰ Ne ‵tau o iloa ne latou me se mea se ‵lei ke ‵teke atu ki te pulega a Mose. Ne fatoā oti atu foki eiloa te ‵tekeatuga o Alona mo Miliama ki a Mose. A te ‵tonuga loa, ne tai ‵pau eiloa lā fakamasakoga mo Kola! E ‵tusa mo te Numela 12:​1, 2, ne fesili atu laua, penei: “Kae a, ko Mose fua nei ne faipati sale ki ei a te Aliki? E faipati mai sale foki ki a taua.” Ne lagona ne Ieova lā pati konā. Ne fakatonu atu a Ia ki a Mose, Alona, mo Miliama ke olo atu ki te mataloa o te faleie mō tapuakiga ko te mea ke fakaasi mai ne Ia te tino telā ne filifili aka ne ia mo fai te takitaki. Telā ne fai ‵tonu atu ei a Ieova i se auala manino, penei: “Kafai e isi ne pelofeta i a koutou, au e fakaasi ki a latou i fakaasiga kae faipati ki a latou i moemiti. Kae e kese eiloa manafai e faipati au ki taku tavini ko Mose, me ko oti ne fakasopo ne au a ia ke pule i te fanauga katoa o Isalaelu.” Mai tua ifo o mea konā, ne fai ei ne Ieova ke poko a Miliama i te lepela mo se vaitaimi toetoe.​​—⁠Numela 12:​4-7, 10.

¹¹ Kāti ne iloa ne Kola mo tena kau a te mea tenā ne tupu. E seai eiloa se lotou fakamasakoga e mafai o ‵sao latou i ei. Kae e tiga eiloa te feitu tenā ne taumafai a Mose o fakamatala faka‵lei atu ki a latou mo te kufaki. Ne fakamalosi atu a ia ke momea aka te fakatāua ne latou olotou tauliaga, mai te fai atu, penei: “A koutou e manatu māmā ki te filifiliga o koutou ne te Atua o Isalaelu mai tino katoa o Isalaelu, ke mafai ne koutou o tavini atu ki te Aliki i tena Faleie, kae fai foki ne koutou a galuega mō tino Isalaelu katoa?” Ikai, e se ‵tau o manatu māmā ki ei me i te mea tenā se “tofi taua” ‵ki! Ne uke ‵ki eiloa a tauliaga ko oti ne maua ne te kau Levi. Ne a foki la mea e ma‵nako latou ki ei? Ne momea aka te tuku faka‵sau mai o fakamasakoga i olotou loto ona ko nisi pati a Mose, penei: “Ko ma‵nako foki koutou ki te tofi faitaulaga”?b (Numela 12:3: 16:​9, 10) Ne pefea a faifaiga a Ieova ki te ‵tekeatuga tenei ki te pulega telā ne ‵tofi aka ne te Atua?

Ko Gasuesue te Famasino o Isalaelu

¹² I te taimi ne tuku atu ei ne Ieova te Tulafono ki tino Isalaelu, ne fai atu a ia ki tino me kafai e faka‵logo latou, ka ‘fai latou mo ana tino tonu eiloa’ kae ka tumau eiloa te ‵malu o te fenua māfai e talia ne latou te fakatokaga a Ieova. (Esoto 19:​5, 6) Kae i te taimi ne kamata o ‵teke atu a nisi tino i ei, ne gasuesue ei te famasino mo te tupu! Ne fai atu a Mose ki a Kola, penei: “Taeao ko o‵mai koutou mo te luaselau limasefulu tino kona e kau mo koe ki te Faleie o te Aliki; a Alona e vau foki ki kona. Ka puke otou ulo, tuku ne mea faka‵manogi ki ei, ko ofo atu ei i luga i te fatafaitaulaga.”​​—⁠Numela 16:​16, 17.

¹³ E ‵tusa mo te Tulafono a te Atua, ko faitaulaga fua e ‵tau o ofo atu ne latou a taulaga ma‵nogi. A te manatu tenā ke ofo atu ne se tino Levi, telā e se se faitaulaga, a taulaga ma‵nogi i mua o Ieova, ne ‵tau o fai ei ke mafau‵fau faka‵lei a tino konā. (Esoto 30:7; Numela 4:​16) Kae ne seki fai eiloa penā a Kola mo tena kau! I te aso mai tua ifo i ei, “ne fakamaopoopo ne Kola a te fenua katoa, kae tu faka fesagai ki a Mose mo Alona i te mataloa o te Faleie.” E fai mai te tala, penei: “Tena ne fai mai ei a te Aliki ki a Mose mo Alona penei, ‘Fakamao atu keatea mo tino kona me ka tamate nei ne au a latou.’ ” Kae ne fakamolemole atu a Mose mo Alona ke mo a ma tamate a tino o te fenua. Ne talia ne Ieova te lā fakamolemole. Kae “ne aumai ei ne te Aliki [ko Ieova] te afi” ki luga i a Kola mo tena potukau, “tela ne sunu ei a te 250 tagata kola ne fai olotou taulaga manogi.”​​—⁠Numela 16:​19-​22, 35.c

¹⁴ Se mea fakaofoofogia, me ne seki tauloto ne tino Isalaelu se akoakoga tāua mai i te mea ne fai ne Ieova ki tino ‵teke konā. “I te sua aso, ne mui‵mui a te fenua katoa ki a Mose mo Alona, kae fai atu penei, ‘Ko oti ne tamate ne koulua a nisi o te fenua o te Aliki.’ ” Ne ‵kau atu a tino Isalaelu ki te kau ‵teke! Ne gata atu ei te kufaki o Ieova. Ne seki toe mafai ne se tino, ke oko foki eiloa ki a Mose mo Alona o toe fesoasoani atu ki tino i te taimi nei. Ne fai ne Ieova se mala ke fakalogo‵mae atu ki tino sē faka‵logo, kae ko “te aofaki o tino kola ne mate e tusa mo te sefulu fa afe fituselau, e se aofia i ei a tino kola ne mate fakatasi mo Kola.”​​—⁠Numela 16:​41-49.

¹⁵ Ne seki ‵tau eiloa o ‵mate a tino katoa konā. Moi ne fakaaogā faka‵lei eiloa olotou mafaufau, penei e se ‵mate latou. Ne mafai o ‵sili ifo ne latou a vaegā fesili, penei: ‘Ko oi ne olo atu ki te Falao faitalia me ne mafai o ‵mate laua i ei? Ko oi ne tumau i te fakamolemole atu ke fakasaoloto aka te kau Isalaelu? Ko oi ne ‵kami ke fanatu tokotasi ki te Mauga o Olepa mai tua o te fakasaolotoga o te kau Isalaelu ke fai‵pati mo te agelu a te Atua?’ E mautinoa eiloa me ko mea kolā ne fai ne Mose mo Alona ne fakamaoni aka ei te lā a‵lofa fakamaoni ki a Ieova mo te lā a‵lofa foki ki tino. (Esoto 10:28; 19:24; 24:​12-​15) Ne seki fia tamate ne Ieova a tino ‵teke konei. Kae i te taimi ne foliga mai i ei, me ka tumau eiloa te ‵teke atu o tino, ne gasuesue eiloa a ia. (Esekielu 33:11) E tāua ‵ki ki a tatou i aso nei. Kaia?

Ke Iloa Aka te Auala i Aso Nei

¹⁶ I aso nei, e isi se “fenua” fou telā e fai ei a Ieova mo fai te Famasino, te Tino Fai Tulafono, mo te Tupu sē matea i ei. (Mataio 21:43) Ne kamata te “fenua” tenā i aso o te kau apositolo. I te taimi tenā, ne sui ei te faleie telā ne tu i aso o Mose ki se faletapu gali i Ielusalema, telā ne tumau eiloa te ga‵lue o te kau Levi i ei. (Luka 1:​5, 8, 9) Kae i te tausaga ko te 29 T.A., ne toe kamata aka a te suā faletapu, se faletapu faka-te-agaga, telā ne fai ei a Iesu Keliso mo fai te Faitaulaga Sili i ei. (Epelu 9:​9, 11) Ne toe fakasae aka foki te kinauga e uiga ki te pulega telā ne ‵tofi aka ne te Atua. Ko oi ne ‵tofi aka ne Ieova ke takitaki ne ia te “fenua” fou tenei? Ne fakaasi faka‵lei atu ne Iesu tena alofa fakamaoni tumau ki te Atua. Ne alofa a ia ki tino. Ne fai foki ne ia a fakailoga fakaofoofogia e uke. Kae pelā eiloa mo olotou tupuga, ne ‵teke atu a te tokoukega o tino Levi ki a Iesu. (Mataio 26:​63-​68; Galuega 4:​5, 6, 18; 5:​17) Fakamuli ifo, ne sui ne Ieova a te kau faitaulaga mai te matakāiga o Levi ki se potukau telā e ‵kese ‵ki​​—⁠ko te kau faitaulaga telā e fai foki pelā me ne tupu. Koi tumau eiloa a te kau faitaulaga pelā me ne tupu ke oko mai ki aso nei.

¹⁷ Ko oi e aofia i faitaulaga pelā me ne tupu i aso nei? Ne tali mai ne te apositolo ko Petelu a te fesili tenā i tena tusi muamua telā ne fakamalosi aka ei a ia ne te agaga tapu ke tusi ki lalo. Ne tusi atu a Petelu ki sui fakaekegina kolā ka ‵kau fakatasi mo Keliso, penei: “A koutou ko te fenua filifilia, ko faitaulaga a te Tupu, ko te fenua tapu, ko tino tonu o te Atua, ne filifilia ke folafola atu a galuega fakaofoofogina a te Atua, tela ne kalagagina ne ia a koutou mai i te pouliga ki tona mainaga fakaofoofogina.” (1 Petelu 2:⁠9) E manino ‵lei eiloa mai i pati konei me, e pelā me se potukau, e aofia a soko fakaekegina o Iesu i “faitaulaga a te Tupu” kolā ne taku foki ki se “fenua filifilia.” E aofia latou i te auala telā e fakaaogā ne Ieova ke tuku atu ki ana tino a akoakoga mo takitakiga faka-te-agaga.​​—⁠Mataio 24:​45-47.

¹⁸ E sui a faitaulaga a te Tupu ne toeaina tofia, kolā e maua ne latou a tiute i te fakapotopotoga o tino o Ieova i te lalolagi kātoa. E ‵tau o āva kae ‵lago atu mo te loto kātoa ki tāgata konei, faitalia me ne taina fakaekegina io me ikai. Kaia? Me ne ‵tofi aka ne Ieova a toeaina e auala i te agaga tapu. (Epelu 13:​7, 17) E mafai pefea o tupu te mea tenā?

¹⁹ E fetaui ‵lei a toeaina konei mo mea kolā e manakogina ke fai ne latou i te Muna a te Atua, telā ne tusi mai lalo i te takitakiga a te agaga o te Atua. (1 Timoteo 3:​1-7; Tito 1:​5-9) Tela la, e mafai o fai atu me ne ‵tofi aka latou ne te agaga tapu. (Galuega 20:28) E ‵tau o masani ‵lei a toeaina konei mo te Muna a te Atua. E pelā mo te Famasino Sili telā ne ‵tofi aka ne ia latou, e ‵tau foki o takalia‵lia a toeaina ki so se mea telā e foliga mai e pelā me se faifaiga fakailoga tino i te faiga o fakamasinoga.​​—⁠Teutelonome 10:​17, 18.

²⁰ I lō te ‵teke atu ki te lotou pulega, e amanaia eiloa tatou ki ‵tou toeaina kolā e ga‵lue malosi! A te tavini atu mo te fakamaoni o te tokoukega o latou i te fia tausaga, e fakamalosi aka ei ‵tou loto tali‵tonu ki a latou. E fakatoka kae fai foki ne latou mo te fakamaoni a fakatasiga a te fakapotopotoga, e ga‵lue fakatasi tatou i te talaiatuga o te “Tala ‵Lei o te Malo,” kae tuku mai i ei a fakatakitakiga i te Tusi Tapu māfai e ma‵nako tatou ki ei. (Mataio 24:14; Epelu 10:​23, 25; 1 Petelu 5:⁠2) E āsi kae fakamafanafana mai foki latou ki a tatou māfai ko ma‵saki kae fanoa‵noa tatou. E ‵lago atu latou i te fakamaoni mo te sē kaiū ki manakoga o te Malo. E maua ne latou te agaga o Ieova mo tena taliaga.​​—⁠Kalatia 5:​22, 23.

²¹ E tonu, e se ‵lei katoatoa a toeaina. A te mafaufau faeloa me e isi se tapulā ki mea e mafai ne latou o fai, e se taumafai ei latou o pule fakasauā atu ki “tino kola ko tuku atu ke tausi.” I lō te fai penā, e taumafai latou ‘o fakalasi aka te fia‵fia o olotou taina.’ (1 Petelu 5:3; 2 Kolinito 1:​24) E a‵lofa a toeaina loto maulalo kae ga‵lue malosi ki a Ieova, kae e iloa ne latou me kafai e momea aka te lotou fakaakoako atu ki a ia, ko te uke foki o mea ‵lei e mafai ne latou o fai i te fakapotopotoga. Mai te mafaufau ki te mea tenei, e taumafai faeloa latou o ati aka a vaegā uiga faka-te-Atua, e pelā mo te alofa, atafai, mo te kufaki.

²² Ko oko eiloa te ‵tou fia‵fia ke fai a Ieova mo fai te ‵tou Pule sē matea, Iesu Keliso e pelā me ko te ‵tou Faitaulaga Sili, sui o faitaulaga fakaekegina a te Tupu e pelā me ko ‵tou faiakoga, mo toeaina Kelisiano fakamaoni e pelā me ko ‵tou tino fakatonutonu! E tiga eiloa e se ‵lei katoatoa so se fakapotopotoga telā e pule ne tino, e fia‵fia tatou me e mafai o tavini fakatasi atu tatou mo taina tali‵tonu fakamaoni ki te Atua, kolā e faka‵logo mo te fia‵fia ki te pulega a te Atua!

[Fakamatalaga mai lalo]

Ne a Mea ne Tauloto ne Koe?

• Ne a fakatokaga a‵lofa ne fai ne Ieova ke tausi atu ei ki tino Isalaelu?

• Kaia e seai ei se pogai ‵tau mō te ‵tekeatuga o Kola ki a Mose mo Alona?

• Se a te akoakoga e maua ne tatou mai faifaiga a Ieova ki tino ‵teke?

• E mafai pefea o fakaasi atu ne tatou me e fakatāua ne tatou a fakatokaga a Ieova i aso nei?

[Fesili mo te Sukesukega]

1. Ne a mea kolā ne tu ‵kese ei a Isalaelu mua mai i nisi atufenua?

2. Se a te fesili telā e sae aka e uiga ki te auala ne fakatoka ei a Isalaelu, kae kaia e tāua ei te tali ki a tatou?

3. Ne a fakatokaga aogā ne fai ne Ieova mō te puipuiga o ana tino?

4. Ne a uiga kolā ne ‵kalo keatea a famasino fakamaoni o Isalaelu mai i ei, kae kaia?

5. I tafa o te ‵tofiga o famasino, ne a nisi fakatokaga ne fai ne Ieova ke tausi ei ana tino?

6, 7. (a) Se a te fesokotakiga i te va o tino Levi kolā e fai mo fai ne faitaulaga mo tino Levi kolā e se aofia i ei? (e) Se a te fakaakoakoga e mafai o tau‵loto ne tatou mai te manatu me e kese‵kese a galuega ne fai ne te kau sa Levi? (Kolose 3:​23)

8. (a) Ko oi a Kola? (e) Ne a mea ne ‵tupu kolā kāti ne fai ei a Kola ke maua ne ia se kilokiloga faka-te-foitino e uiga ki te kau faitaulaga?

9, 10. Ne a ‵losiga ‵se ne fai ne Kola mo tena kau ‵teke ki a Mose, kae kaia ne ‵tau ei o iloa ne latou me e se ‵tau o ‵teke atu latou?

11. Ne fakafesagai atu pefea a Mose ki pati a Kola?

12. Se a te mea ne fakalagolago ki ei a te tumau o te fesokotakiga ‵lei o te kau Isalaelu mo te Atua?

13. (a) Kaia ne fai ei pelā me ne fakamaua‵luga a tino ‵teke konei i te taimi ne ofo atu ei ne latou a taulaga ma‵nogi i mua o Ieova? (e) Ne pefea a faifaiga a Ieova ki tino ‵teke konei?

14. Kaia ne tamate ei ne Ieova a tino Isalaelu?

15. (a) Ne a pogai kolā ne ‵tau ei o talia fakavave e aunoa mo te fakalotolotolua ne te kau Isalaelu a te takitakiga a Mose mo Alona? (e) Se a te akoakoga e maua ne koe mai te tala tenei e uiga ki a Ieova?

16. (a) Ne a fakamaoniga ne ‵tau o fakatalitonu atu ki tino Iutaia i aso o te kau apositolo me i a Iesu ko te sui o Ieova? (e) Kaia ne sui ei ne Ieova a te potukau faitaulaga mai te matakāiga o Levi, kae se a te mea ne sui ki ei?

17. (a) Se a te potukau i aso nei telā e aofia i faitaulaga a te Tupu? (e) E fakaaogā pefea ne Ieova a faitaulaga kolā e fai pelā me ne Tupu?

18. Se a te fesokotakiga i te va o toeaina tofia mo faitaulaga a te Tupu?

19. Se a te auala e ‵tofi aka ei a toeaina ne te agaga tapu?

20. Se a te mea e fakatāua malosi ne koe i mea kolā e fai ne toeaina ga‵lue malosi?

21. Ne a mea e ‵tau o fakaeteete malosi a toeaina i ei, kae kaia?

22. Ne fakamalosi aka pefea ne te tala o Kola tou fakatuanaki ki te fakapotopotoga matea a Ieova?

[Ata i te itulau e 23]

E mata, e kilo atu koe ki so se tofiga i te taviniga ki a Ieova e pelā me se tauliaga?

[Ata i te itulau e 24]

“Mose, ai a e fia pule ei koe i luga o te fenua katoa o te Aliki?”

[Ata i te itulau e 27]

E sui ne toeaina fakaekegina a faitaulaga a te Tupu