E Mata, ko Oti ne Fakaloiloigina Koe?

E ISI ne tino e logo‵mae māfai ko iloa ne latou me i te tino telā e tali‵tonu malosi latou ki ei ne loi atu ki a latou. E mafai o oko koe ki se tulaga masiasi, kaitaua, io me logo‵mae. A te loi e fakamasei ne ia a va fakataugasoa mo fakaipoipoga e uke; e fai foki ei ke ‵galo atu te fia miliona tālā a tino.

Kae mafaufau la ki lagonaga ka maua ne koe māfai ko iloa ne koe me i fakamatalaga ne maua ne koe e uiga ki te Atua ne mea ‵loi fua. Kafai koe se tino lotu, ka mafai eiloa o pokotia malosi koe i te mea tenā, e pelā mo pati ne fai mai ne tino kolā e olo faeloa ki lotu:

● “Ko iloa ne au me ne fakaloiloigina au ne te lotu.”—DEANNE.

● “Au ne kaitaua. Me ne iloa ne au i a au ko oti ne fakaloiloigina—ko fakaseaoga ei oku fakamoemoega katoa.”—LUIS.

E mafai koe o se talitonu me ne fakaloiloigina koe ki fakamatalaga e uiga ki te Atua. Kāti ne tauloto koe ki mea kolā ko iloa ne koe mai i tino kolā e talitonu katoatoa koe ki ei kae sē mafai o fakalogo‵mae atu ki a koe—e pelā mo ou mātua, se faifeau, io me ko tou taugasoa pele. Kāti e isi se talitonuga ne talitonu katoatoa koe ki ei i tou olaga kātoa. Kae e mata, e talitonu koe me e mafai eiloa o sē tonu se akoakoga telā ko tali‵tonu ki ei a tino e tokouke? Ne iloa ne te Pelesitene mua o te U.S ko Franklin D. Roosevelt a te ‵tonu o te mea tenei, i ana pati: “E se mafai o ‵fuli se akoakoga telā e akoako atu faeloa i ei se mea sē tonu ki se mea tonu.”

E māfai pefea o iloa aka ne koe me ko oti koe ne fakaloiloigina? E fai mai penei a pati a Iesu i tena ‵talo ki te Atua: “Tau muna se munatonu.” (Ioane 17:17) E tonu, e tuku mai i te Muna a te Atua ko te Tusi Tapu, a mea kolā e manakogina ke iloa ne tatou o faka‵kese a te mea tonu mai te loi.

Kaia e se onoono fakatasi ei tatou ki te Tusi Tapu ke fakaasi faka‵sau mai i ei a loi masani e lima e uiga ki te Atua? Ka lavea atu ne koe i ei a te auala e mafai ei o ‵fuli tou olaga ne te mea tonu ki se olaga telā e tai ‵lei atu.