Te Munatonu e Mafai o ‵Fuli ne ia Tou Olaga

KĀTI ko oti ne lagona io me ne akoako atu ki a koe se loi e tasi e uiga ki te Atua, telā ko fakaasi faka‵sau mai i te fakasologa o mataupu i te mekesini tenei. Kae kāti e mafai o fakalotolotolua koe ma ‵fuli ou talitonuga, maise loa māfai ne puke ‵mau koe ki ei mō se taimi leva.

E malamalama ‵lei eiloa tatou i te vaegā fakalotolotolua tenā. E se fakamalosi aka ne nisi lotu a te tāua ke fakatusatusa olotou akoakoga mo mea kolā e fakaasi mai i te Tusi Tapu. E taumafai a nisi tino ke puipui a olotou akoakoga ‵se mai te fai atu me e faigata ke malamalama i te Tusi Tapu, kae ne seki fakatoka ke malamalama a tino katoa i ei. A ko te tokoukega o soko o Iesu e seki olo ki akoakoga ma‵luga, kae ne maua tonu eiloa ne latou a mea kolā ne akoako atu ne ia.—Galuega 4:13.

E mafai foki o taofi aka ne koe a te sukesuke ki ou talitonuga ona ko te mataku me kafai e fai penā, e fakaasi atu fua i ei a te sē lava o te fakatuanaki. Kae e mata, se mea tonu me e se fiafia te Atua ke sukesuke koe ki te Tusi Tapu, ki tena fekau ki tino katoa, kae ke malamalama i mea kolā e fakamolemole mai a ia ke fai ne koe? E ‵kese mai ei, e fakamalosi mai tena Muna ki a koe ke sukesuke ki te Tusi Tapu, i ana muna: “Ke fakatalitonu ne koutou me se a te loto o te Atua, te mea ‵lei, te mea e logomalie mo te gali.”—Loma 12:2.

A te tauloto ki te munatonu e uiga ki te Atua e tāua ‵ki, kae e se fai fua penā ko te mea ke tauloto ne koe se mea fou kae ko te mea ke mafai o ‵fuli ne ia tou olaga ke ‵lei atu. (Ioane 8:32) A Deanne, telā ne taku mai i te mataupu muamua, ne ati aka ne ia a tena fakatuanaki ki te Muna a te Atua. E fai mai a ia: “Ne seki iloa ne au me e manino ‵lei eiloa a fakamatalaga i te Tusi Tapu ke oko eiloa ki te taimi ne kamata ei au o sukesuke ki ei. Nei la, ko iloa ne au a Ieova e pelā me ko toku Tamana alofa i te lagi, kae e se pelā me se Atua sē matea. Ko maua nei ne au se fakamoemoega tonu i te olaga.”

Kāti ne sukesuke koe ki te Tusi Tapu i aso mua kae ne seki maua ne koe a mea aoga mai i ei. Kafai e penā loa, ke mo a ma ‵fiu vave koe. A taumafaiga ke malamalama i te Tusi Tapu māfai ko oti ne akoakogina koe ki loi e uiga ki te Atua e ‵pau eiloa mo taumafaiga ke faite se masini kae fakaaoga a te tusi fakatonutonu ‵se o te masini. E mafai o faite ne koe a nisi mea aka o te masini kae mafai o ‵fiu koe māfai e se mafai ne koe o faite a nisi mea ma‵sei o te masini. Kae kafai e fakaaoga eiloa ne koe a te tinā tusi fakatonutonu o te masini, ka mafai eiloa o faite ne koe a te masini tenā ke ‵lei.

E mata, e fia tauloto koe ki te mea tonu e uiga ki te Atua? E ‵kami ne matou a koe ke fesokotaki atu ki Molimau a Ieova i tou fenua io me tusi mai koe ki so se fakatuatusi i te itulau e 4 o te mekesini tenei māfai e manako koe ki se akoga faka-te-Tusi Tapu sē ‵togi.

[Manatu tāua i te itulau e 9]

“Ke fakatalitonu ne koutou me se a te loto o te Atua, te mea ‵lei, te mea e logomalie mo te gali.”—LOMA 12:2