E Mafai o Fakasaoloto Koe ne te Munatonu

I te aso e tasi i Ielusalema, ne faipati atu a Iesu e uiga ki tena Tamana, ko Ieova, kae fakaasi faka‵sau atu ne ia a takitaki lotu ‵loi i ana aso. (Ioane 8:12-30) A pati ne fai atu ne ia i te taimi tenā e akoako mai ei ki a tatou a te auala ke iloilo aka a talitonuga lauiloa e uiga ki te Atua i aso nei. Ne fai mai a Iesu: “Kafai e tumau koutou i aku muna, ko oku soko ‵tonu koutou, kae ka iloa ne koutou te munatonu, a ko te munatonu ka fakasaoloto ne ia koutou.”​—Ioane 8:31, 32.

“Tumau koutou i aku muna.” Ne tuku mai ne Iesu i konei a te tulaga ke iloilo aka ei me i akoakoga fakalotu ko “te munatonu” io me ikai. Kafai e lagona ne koe se fakamatalaga e uiga ki te Atua, fesili ifo penei, ‘E mata, e fetaui ‵lei a te mea tenei mo pati a Iesu, penā foki loa mo te Tusi Tapu kātoa?’ Ke fakaakoako atu ki a latou kolā ne lagona ne latou a te faipatiga a Paulo kae ne “suke‵suke malosi ki Tusitusiga Tapu i aso katoa o fakatalitonu aka me e mata, e ‵tonu a mea konei [ko mea kolā e tauloto ne latou].”​—Galuega 17:11.

A Marco, Rosa, mo Raymonde, kolā ne taku atu i te mataupu muamua i te fakasologa tenei, ne suke‵suke faka‵lei ne latou olotou talitonuga mai i te sukesuke ki te Tusi Tapu fakatasi mo Molimau a Ieova. Ne a mea ne tauloto ne latou?

Marco: “Ne fakaaoga ne te ma faiakoga a te Tusi Tapu ke tali aka ei a fesili katoa a māua mo taku avaga. Ne kamata o gasolo aka o malosi te ma a‵lofa ki a Ieova, kae ne gasolo aka foki o pili malosi atu te ma va e pelā me se tauavaga!”

Rosa: “Muamua la, ne mafaufau au me e ‵pau eiloa te Tusi Tapu mo tusi fakalotu kolā e taumafai o fakamatala a mea e uiga ki te Atua e auala i fakamatalaga a tino. Kae fakamuli ifo, ne iloa aka ne au a tali i te Tusi Tapu ki aku fesili. Nei la, ko fai eiloa a Ieova mo fai se tino tonu ki a au. E fai eiloa a Ia mo fai se tino e mafai o talitonu au ki ei.”

Raymonde: “Ne ‵talo atu au ki te Atua mō se fesoasoani ke iloa ne au a mea e uiga ki a ia. E seki leva mai tua ifo i konā, ne kamata o suke‵suke māua mo taku avaga ki te Tusi Tapu. I te fakaotiga loa, ne iloa ne māua te munatonu e uiga ki a Ieova! Ne fia‵fia malosi māua i te iloa atu o mea e uiga ki te Atua.”

E uke atu a mea e mafai o fai ne te Tusi Tapu i lō te fakaasi faka‵sau atu fua o akoakoga ‵loi e uiga ki te Atua; e fakaasi mai foki i ei a te munatonu e uiga ki ana uiga ‵gali. Ko tena Muna fakaosofia eiloa, kae e fesoasoani mai ke “iloa ne [tatou] a mea katoa ne tuku mai ne te Atua ki a [tatou].” (1 Kolinito 2:12) Kaia e se fakamaoni aka eiloa ne koe a te auala e mafai ei o tali mai ne te Tusi Tapu a fesili masani kae tāua e uiga ki te Atua, ana fuafuaga, mo ‵tou olaga i aso mai mua? Ke faitau ki tali o nisi fesili konei mai lalo i te “Bible Teachings >Bible Questions Answered” i te www.jw.org. E mafai foki o fakamolemole atu mō se akoga faka-te-Tusi Tapu i te Web site tenā io me mai i se tokotasi o Molimau a Ieova. E tali‵tonu matou me kafai e fai koe penā, ka iloa ei ne koe a te faigofie atu ke alofa ki te Atua i lō te mea ne mafaufau muamua koe ki ei.