Ke “Fakamafanafana a Latou Kolā e ‵Tagi Fanoa‵noa”

“Ne filifili ne ia [Ieova] au . . . o fakamafanafana a latou kolā e ‵tagi fanoa‵noa.”—ISAIA 61:​1, 2.

1. Ne a mea ne fai ne Iesu ki tino kolā e fanoa‵noa, kae kaia?

NE FAI mai a Iesu Keliso: “A taku meakai, ko te fai ne au a te loto o ia telā ne uga mai ne ia au, kae o fakapalele foki a te galuega ne tuku mai ne ia ki a au ke fai.” (Ioane 4:​34) I te faiga o te galuega telā ne tuku mai ne te Atua ke fai ne ia, ne fakaasi mai ne Iesu a uiga tafasili i te ‵gali o tena Tamana. E aofia i uiga konei a te alofa sili o Ieova mō tino. (1 Ioane 4:​7-​10) Ne fakaasi mai ne te apositolo ko Paulo a te fakaasiga e tasi o te alofa o Ieova i tena fakamatalaga me i a Ieova “ko te Atua o fakamafanafanaga katoa.” (2 Kolinito 1:3) Ne fakaasi mai ne Iesu a te vaegā alofa tenā i te fakataunuga ne ia o valoaga kolā ne ‵valo ne te pelofeta ko Isaia. (Faitau te Isaia 61:​1, 2.) Ne faitau ne Iesu a te valoaga tenā i te sunako i Nasaleta kae ne fakasino atu eiloa ne ia a pati konā ki a ia. (Luka 4:​16-​21) I tena olaga kātoa i te faiga o te galuega talai, ne fakamafanafana eiloa ne Iesu mo te alofa a tino ‵tagi fanoa‵noa, kae tuku atu foki ki a latou a fakamalosiga mo te filemu o te mafaufau.

2, 3. Kaia e ‵tau ei mō soko o Keliso o fakaakoako atu ki a ia i te tuku atu o fakamafanafanaga?

² E ‵tau mo soko katoa o Iesu o fakaakoako atu ki a ia mai te fakamafanafana atu a latou kolā e fanoa‵noa. (1 Kolinito 11:1) Ne fai mai a Paulo: “Ke fakamalosi atu te suā tino ki te suā tino, ke fesoasoani foki te suā tino ki te suā tino.” (1 Tesalonia 5:​11) Kae maise eiloa te manakogina malosi ke fakamafanafana atu tatou ki nisi tino, me i a tatou ko ola tonu “i taimi faiga‵ta.” (2 Timoteo 3:1) Ko gasolo aka eiloa o tokouke a tino loto fakamaoni i te lalolagi kātoa e pokotia i pati mo faifaiga a nisi tino kolā e fakamafua aka ne latou a logo‵maega, te loto māfatia, mo te fanoanoa.

³ E pelā loa mo valoaga i te Tusi Tapu kolā ne ‵valo mai, i aso fakaoti o te olaga masei tenei, e tokouke a tino, “ka ma‵natu fakapito, kaima‵nako, fakamata‵mata, fia ma‵luga, pati ma‵sei, sē faka‵logo ki olotou mātua, e se loto fakafetai, e se fia‵fia ki lotu, e se kaima‵lie, e se loto a‵lofa, e gutu fatufatu, e faka‵tupu taua, e mata kaitaua, e ita ki te ‵lei, ka faka‵tupu masei, e se ‵poi i te masei, ko ‵fete i te fakamata‵mata, ka sili te lotou fia‵fia ki manakoga o te foitino i lō te Atua.” A vaegā faifaiga penei ko gasolo aka eiloa o ma‵sei atu, me i ‘tino amio ma‵sei mo te fakaloiloi tino, ka kamata eiloa latou mai i te masei o fakasolo o na ma‵sei atu.’​​—2 Timoteo 3:​2-4, 13.

4. Se a te mea ko tupu ki te lalolagi i ‵tou aso nei?

⁴ E sē ‵tau mo tatou o ‵poi i te mea tenei, me ko oti eiloa ne fakaasi manino mai ne te Muna a te Atua me i “te lalolagi kātoa ko i lalo i te pule a te Tino Masei.” (1 Ioane 5:​19) Ko aofia te “lalolagi nei” i faifaiga faka-politiki, faka-lotu, mo mea tau pisinisi ‵lasi, pelā foki mo mea fakasalalau kolā e fakaaogā i se auala sē tonu. E aunoa mo se fesili, e maina ‵lei tatou me e taku a Satani te Tiapolo ko te “aliki masei o te lalolagi” mo te “atua masei o te lalolagi nei.” (Ioane 14:30; 2 Kolinito 4:4) A te tulaga o te lalolagi kātoa ko gasolo aka eiloa o masei ona ko Satani ko oko eiloa i te lasi o tena kaitaua, me e iloa ne ia me ko mu‵tana fua ana aso e ‵toe a koituai o fakaseai atu a ia ne Ieova. (Fakaasiga 12:12) Ma‵faga o mea fakafiafia ke iloa atu me ko pili o fakaseai atu ne te Atua a Satani mo tena fakanofonofoga masei tenei, kae ka faka‵lei foki ne ia a te kinauga e uiga ki te pulega sili a Ieova!​​—Kenese mata. 3; Iopu, mata. 2.

Ko Oti ne Folafola Atu te Tala ‵Lei i te Lalolagi Kātoa

5. Ne fakataunu pefea a te valoaga e uiga ki te galuega talai telā e fai i aso fakaoti konei?

⁵ I taimi faiga‵ta konei i tala fakasolopito o tino, ko taunu tonu eiloa a mea kolā ne ‵valo mai ne Iesu me ka ‵tupu. Ne fai mai a ia: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.” (Mataio 24:14) Ko gasolo aka eiloa ki luga a te aofaki o tino e fai ne latou a te talaiga tenei e uiga ki te Malo o te Atua i te lalolagi kātoa. I aso nei, ko silia atu i te 7,500,000 a Molimau a Ieova fakatasi mo fakapotopotoga e silia atu foki i te 107,000 i te lalolagi kātoa e talai atu ne latou a te Malo o te Atua, ko te matua foki eiloa telā ne fakaaoga ne Iesu i te faiga o tena galuega talai mo ana akoakoga ne fai. (Mataio 4:​17) Ona ko te ‵tou galuega talai i aso nei, ko maua eiloa ne tino fanoa‵noa a fakamafanafanaga e uke. Me i tausaga fua e lua konei ko ‵teka atu, e toko 570,601 te aofaki o tino ne papatiso e pelā me ne Molimau a Ieova!

6. Se a tau faka‵tau e uiga ki te magoi o te faiga o te ‵tou galuega talai?

⁶ E fia‵fia ke iloa atu a te magoi o te faiga o te galuega talai tenei ona ko tusi faka-te-Tusi Tapu kolā ne ‵fuli kae tufatufa atu ne Molimau a Ieova i ‵gana e silia atu i te 500. E seai eiloa se mea e mafai o faka‵tusa ki te faiga tenei i tala fakasolopito o tino! A te māfuaga, te galuega, mo te gasolo ki mua o te vaega o te fakapotopotoga saukātoa a Ieova i te lalolagi ne fai e pelā me ko te ‵toe mea fakaofoofogia eiloa. E aunoa mo te takitakiga mo te fesoasoani o te malosi o te agaga tapu o te Atua, se mea faigata ‵ki ke tupu se vaegā mea penei i se lalolagi telā e nofo mai i lalo i te pulega a Satani. Ona ko te mea ko oti ne talai atu a te tala ‵lei i te lalolagi nofoaki kātoa, a fakamafanafanaga i te Tusi Tapu ne seki aoga fua ki a tatou mo ‵tou taina tali‵tonu, kae ne aoga foki ki tino loto fanoa‵noa katoa kolā ne talia ne latou a te fekau e uiga ki te Malo.

Fakamafanafana Atu a Taina Tali‵tonu

7. (a) Kaia e sē ‵tau ei o fakamoe‵moe tatou ke fakaseai atu katoa ne Ieova a tulaga faiga‵ta i taimi nei? (e) E iloa pefea ne tatou me e mafai o kufaki ne tatou a fakasauaga mo fakalavelave faiga‵ta?

⁷ I te lalolagi tenei ko ‵fonu i amioga matagā mo logo‵maega, e mautinoa eiloa me ka fe‵paki tatou mo tulaga faiga‵ta kolā e mafai o fakalogo‵mae mai ki a tatou. E se fakamoe‵moe eiloa tatou ke fakaseai atu ne te Atua a māfuaga katoa o te sē fiafia mo te fanoanoa ke oko eiloa ki te taimi e fakaseai ei ne ia a te olaga masei tenei. I te vaitaimi tenei, kafai ko fe‵paki tatou mo fakasauaga kolā ko oti ne ‵valo mai, ka tofotofo eiloa ‵tou fakamaoni ki a Ieova ona ko te ‵tou ‵lago atu ki tena pulega sili i te lagi mo te lalolagi. (2 Timoteo 3:​12) Kae mai te fesoasoani mo te fakamafanafanaga mai i te ‵tou Tamana faka-te-lagi, ko mafai ei ne tatou o fai e pelā mo Kelisiano fakaekegina i Tesalonia mua, kolā ne mafai ne latou o kufaki i fakasauaga mo fakalavelave faiga‵ta fakatasi mo te kufaki mo te fakatuanaki.​​—Faitau 2 Tesalonia 1:​3-5.

8. Se a te fakamaoniga mai te Tusi Tapu me i a Ieova e fakamafanafana ne ia ana tavini?

⁸ E seai eiloa se fakalotolotolua me ka tuku mai eiloa ne Ieova ki ana tavini a te fakamafanafanaga telā e manakogina. E pelā mo te mea tenei, i te taimi ne tu atu ei a te ola o te pelofeta ko Elia i se tulaga fakamataku mai i te tupu fafine matagā ko Iesepela, ne galo a te loto malosi i te pelofeta tenei kae ne sola ei a ia, kae fai atu foki i a ia ko fia mate. Kae i lō te taku fakamasei ne ia a Elia, ne fakamafanafana eiloa ne Ieova a ia kae tuku atu foki ki a ia a te loto malosi ke fakataunu a tena galuega e pelā me se pelofeta. (1 Tupu 19:​1-​21) E lavea foki ne tatou me e fakamafanafana ne Ieova ana tino e pelā foki mo te mea ne fai ne ia ki te fakapotopotoga Kelisiano i te senitenali muamua. E pelā mo te mea ne fai‵tau ne tatou e uiga ki se vaitaimi telā “ko oko eiloa i te filemu o ekalesia [fakapotopotoga] katoa i Iutaia, Kalilaia mo Samalia.” E se gata i ei, “ka ko tokouke foki a tino e fakaopoopo e auala mai i te fesoasoani o te agaga tapu, i te lotou sasale mo te āva ki te Aliki.” (Galuega 9:​31) Ma‵faga o mea fakafiafia ki a tatou me e mafai foki o maua ne tatou a “te fesoasoani o te agaga tapu”!

9. Kaia e fai ei a te tauloto ki mea e uiga ki a Iesu mo fai se fakamafanafanaga ki a tatou?

⁹ E pelā me ne Kelisiano, ko oti ne maua ne tatou a te fakamafanafanaga mai te tauloto ki mea e uiga ki a Iesu Keliso kae sa‵sale i ana kalafaga. Ne fai mai a Iesu: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malōlōga. Ke amo ne koutou taku amoga, kae fakaakoako mai ki a au, me i a au e filemu kae loto malalo; e maua foki i ei ne koutou a te tokaga malie otou agaga. Me amogofie taku amoga, kae māmā foki.” (Mataio 11: 28-​30) A te tauloto ki auala kolā ne avatu ei ne Iesu a fakamalosiga ki tino mo te tau‵tali atu i ana faifaiga konā ka fesoasoani mai foki ke fakamāmā aka a fakalavelave kolā e fe‵paki mo tatou.

10, 11. I te fakapotopotoga, ko oi e mafai ne ia o tuku atu a pati fakamafanafana?

¹⁰ E mafai foki o maua ne tatou a fakamafanafanaga mai i ‵tou taina tali‵tonu. E pelā me se fakaakoakoga, mafaufau ki te auala e fesoasoani atu ei a toeaina i te fakapotopotoga ki a latou kolā e fe‵paki mo tulaga faiga‵ta. Ne tusi mai penei a te soko ko Iakopo: “Kafai e isi se tino o koutou e masaki, e ‵tau mo ia o fai atu ki toeaina o te ekalesia ke ‵talo mō ia.” Kae se a te ikuga? “A te ‵talo tenei, se ‵talo e fai i te fakatuanaki, kae ka fakaola ne ia te tino masaki: ka toe fakafoki atu ne te Aliki te malosi ki a ia, ka ko ana agasala ne fai ka fakamagalogina.” (Iakopo 5:​14, 15) E mafai foki o tuku atu ne nisi tino i te fakapotopotoga a fakamafanafanaga.

¹¹ E faigofie atu ki fafine ke sau‵tala atu ki nisi fafine e uiga ki fakalavelave kese‵kese e uke. Kae mō latou kolā e ma‵tua atu, e tuku atu ne tuagane atamai a manatu fesoasoani aoga ki tuagane kolā koi talavou. Kāti ko oti foki ne fe‵paki a fafine Kelisiano ma‵tua konei mo fakalavelave faiga‵ta i olotou olaga. A olotou pati fakamafanafana mo olotou uiga a‵lofa e mafai o fai e pelā me se fesoasoani lasi ‵ki. (Faitau Tito 2:​3-5.) E tonu, e mafai kae ‵tau foki mo toeaina e pelā foki mo nisi tino o “fesoasoani atu ki tino loto vāi‵vai” kolā e fakatasitasi mo tatou. (1 Tesalonia 5:​14, 15) Se mea ‵lei ke masaua i a tatou me i te Atua “e fakamafanafana mai ki a matou i omotou puapuaga katoa, ko te mea ke mafai ne matou o fakamafanafana ki a latou kolā e maua ne so se puapuaga.”​​—2 Kolinito 1:4.

12. Kaia e tāua ei ke ‵kau atu tatou ki fakatasiga Kelisiano?

¹² A te ‵toe mea tāua ke maua ei ne tatou a fakamafanafanaga ko te ‵kau atu ki fakatasiga faka-Kelisiano kae sau‵tala ki mea faka-te-Tusi Tapu ke maua ei ne tatou a muna fakamalosi loto. E fai‵tau tatou me ne fakamalosi atu ne Iuta mo Sila “a loto o te kau taina i muna e uke.” (Galuega 15:32) A sau‵talaga a taina mo tuagane a koituai o kamata io me māfai ko oti a fakatasiga e fakamalosi loto eiloa. Tela la, kafai foki loa e logo‵mae tatou ona ko nisi tulaga faiga‵ta, ke mo a ma fia tu tokotasi tatou, me kafai e fai penā, e se mafai o ‵lei ‵tou fakalavelave. (Faataoto 18:1) I lō te fai penā, e tau‵tali atu eiloa tatou ki pati fakamalosi kae fakaosofia a te apositolo ko Paulo, penei: “Ke mafaufau te suā tino ki te suā tino, ke fakatau fesoasoani foki koutou o fakaasi te alofa mo te fai mea ‵lei. Ke tumau faeloa te maopoopo sāle o tatou, e pelā eiloa mo te mea e masani ei a nisi tino o koutou. A te mea sili ke fakatau fakamalosi eiloa ne tatou o‵tou loto; i te mea ko iloa ne koutou i te Aso o te Aliki ko pili mai.”​​—Epelu 10:​24, 25.

Ke Maua a Fakamafanafanaga Mai te Muna a te Atua

13, 14. Ke fakaasi mai te auala e fakamafanafana mai ei te Tusi Tapu ki a tatou.

¹³ Faitalia me e fai tatou e pelā me ne Kelisiano ko oti ne papatiso io me ne tino kolā ko kamata o tauloto a mea e uiga ki te Atua mo ana fuafuaga, e maua eiloa ne tatou a fakamafanafanaga e uke mai te Muna tusia a te Atua. Ne tusi mai a Paulo: “Me i mea katoa kolā ne tusi i te Tusi, ne tusi ke akoako ei tatou, ko te mea ke maua ne tatou a te fakamoemoega.” (Loma 15:4) E mafai o maua ne tatou a fakamafanafanaga mai i te Tusi Tapu ke fai ei ke “lava a tena uta e fai ei ne ia so se galuega ‵lei.” (2 Timoteo 3:​16, 17) A te iloa ne tatou o te munatonu e uiga ki fuafuaga a te Atua fakatasi mo te fakamoemoega tonu mō aso mai mua ka maua eiloa i ei a fakamafanafanaga e uke ‵ki. Tela la, e ‵tau o fakaaoga katoatoa ne tatou a te Muna a te Atua mo tusi e fakavae ki te Tusi Tapu kolā e tuku mai i ei a fakamafanafanaga e aoga ki a tatou i auala kese‵kese.

¹⁴ Ne tuku mai ne Iesu se fakaakoakoga ‵lei mai te fakaaogaga o te Tusi Tapu ke fakatonutonu kae fakamafanafana atu ki nisi tino. I te taimi ne fakasae atu ei a ia i tena toetuga, ne ‘fakamatala ne ia te Tusi Tapu’ ki ana soko e tokolua. I te taimi ne faipati atu ei a ia ki a lāua, ne otia ‵ki a lā loto. (Luka 24:32) I te tautali atu i te fakaakoakoga gali a Iesu, ne ‘fakasakosako’ atu foki a te apositolo ko Paulo mai te Tusi Tapu. Ne fakalogo‵logo eiloa a tino i Pelea kae ne “ala olotou mafaufau, kae talia gofie ne latou a te talaiga . . . kae sukesuke malosi foki latou ki te muna mai i te Tusi Tapu.” (Galuega 17:​2, 10, 11) Tela la, se mea ‵lei kae aoga ke fai‵tau tatou i aso katoa ki te Tusi Tapu mo nisi tusi faka-Kelisiano kolā e maua mai ei a fakamafanafanaga mo te fakamoemoega i aso faiga‵ta konei!

Auala Fakaopoopo ke Fakamafanafana Atu ki Nisi Tino

15, 16. Ne a mea e mafai ne tatou o fai ke fesoasoani kae fakamafanafana atu ki ‵tou taina tali‵tonu?

¹⁵ E mafai ne tatou o fesoasoani kae fakamafanafana atu ki ‵tou taina tali‵tonu i auala e uke. E pelā mo te mea tenei, kāti e mafai o olo atu tatou ki se sitoa o ‵togi ne mea ma se taina talitonu matua io me se taina masaki. E mafai foki o fesoasoani atu tatou ki nisi tino o fai a nisi galuega a latou, mai te fakaasi atu o te ‵tou amanaia ki a latou. (Filipi 2:4) Kāti e mafai foki ne tatou o fakamalō atu ki taina tali‵tonu mo olotou uiga ‵gali kolā e lavea atu, e pelā mo te olotou a‵lofa, loto taumafai, loto malosi, mo te fakatuanaki.

¹⁶ I ‵tou taumafaiga ke fakamafanafana a tino ma‵tua, e mafai o āsi atu tatou ki a latou ke fakalogo‵logo ki olotou tala e uiga ki aso ko ‵teka mo fakamanuiaga ne maua ne latou mai te lotou taviniga ki a Ieova. Kaia? Me e mafai loa o fakamalosi kae fakamafanafana mai a olotou tala konā ki a tatou! E mafai o fai‵tau ne tatou a te Tusi Tapu mo tusi faka-te-Tusi Tapu fakatasi mo tino kolā e āsi tatou ki ei. Kāti e mafai foki o sau‵tala tatou ki manatu i mataupu kolā ne suke‵suke tatou ki ei i vaiaso takitasi mai te Sukesukega ki te Faleleoleo Maluga io me ne manatu mai te tusi telā e fai ki ei a te Sukesukega a te Fakapotopotoga ki te Tusi Tapu i te vaiaso. Io me e mafai o onoono fakatasi tatou ki se ata mai te DVD telā e fakavae ki te Tusi Tapu. Kae e se gata i ei, e mafai foki ne tatou o fai‵tau io me fakamatala atu ki a ­latou se tala ne maua ne tatou mai i ‵tou tusi.

17, 18. E pelā me ne tavini fakamaoni a Ieova, kaia e mautinoa i ei me ka ‵lago mai kae fakamafanafana mai a ia ki a tatou?

¹⁷ Kafai e lavea atu ne tatou me e isi se ‵tou taina talitonu ki a Ieova e manakogina ne ia se fakamafanafanaga, e mafai ne tatou o taku a tena igoa mo tena fakalavelave i ‵tou ‵talo totino. (Loma 15:30; Kolose 4:​12) I te taimi e fakafesagai atu ei tatou ki fakalavelave o te olaga tenei mo te taumafai foki o tuku atu a fakamafanafanaga ki nisi tino, e maua eiloa ne tatou a te fakatuanaki mo te loto talitonu telā ne nofo mo te faisalamo telā ne usu mai, penei: “Tuku atu ki te Aliki a mea e manavase koe ki ei, me ka fesoasoani a ia ki a koe; e se tiaki lele ne ia a tino fakamaoni ke taka‵vale.” (Salamo 55:22) E tonu, e fakatasi atu faeloa a Ieova o fakamafanafana kae ‵lago atu foki ki ana tavini fakamaoni.

¹⁸ Ne fai atu te Atua ki ana tino tapuaki i aso mua: “Ko au ne fai [io me fakamafanafana] ne au koe ke malosi.” (Isaia 51:12) Ka fai foki ne Ieova penā ki a tatou kae ka fakamanuia foki ne ia tatou e ‵tusa mo ‵tou faiga ‵lei mo pati fakamafanafana e tuku atu ki tino loto fanoa‵noa. Faitalia me e fakamoe‵moe tatou ke ola i te lagi io me ko te lalolagi, e maua eiloa ne tatou taki tokotasi a pati fakamafanafana a Paulo ki ana taina Kelisiano tali‵tonu fakaekegina: “Ke aumai ne te ‵tou Aliki ko Iesu Keliso mo te Atua te ‵tou Tamana, kolā ne a‵lofa mai ki a tatou, a te loto malosi mo te fakamoemoega ‵lei e se gata mai, e alatu i tena alofa tauanoa, ke faka‵fonu otou loto ki te loto ‵toa mo te fai ki mua, ko te mea ke fai ne ia ke ma‵losi atu koutou o fai a mea ‵lei katoa, kae taku atu foki a mea ‵lei katoa.”​​—2 Tesalonia 2:​16, 17.

E Mata e Masaua ne Koe?

• E pefea te magoi o te ‵tou galuega i te fakamafanafana atu ki tino loto fanoa‵noa?

• Ne a nisi mea e mafai ne tatou o fai ke fakamafanafana atu ne tatou a nisi tino?

• Ne a fakamaoniga mai i te Tusi Tapu me i a Ieova e fakamafanafana ne ia ana tino?

[Ata i te itulau 26]

E mata, a koe se tokotasi e fakamafanafana atu ki tino loto fanoa‵noa?

[Ata i te itulau 28]

E mafai o fakamafanafanagina a talavou mo tino ma‵tua