E Mata, e Tāua te Tali ki ei?

“Ne kamata au o fai famau i te taimi ko sefulu ei oku tausaga. Muamua la, e masani fua o pikilima kae sogi sale au mo aku famau. Fakamuli ifo, ko kamata o pukepuke matou ki koga tapu o te foitino kae tofotofo aka ki vaegā amioga fakatauavaga kese‵kese. Ne galue au i te taimi ko 15 ei oku tausaga, kae tokouke a tāgata i te koga galue ne fia‵fai mai ki a au, kae ne ma‵nako ke ‵moe fakatauavaga mo au. Ne seki manako au ke takavale au kae ne kau atu au ki mea katoa kolā ne fai ne oku taugasoa i te galuega. Ne manako au ke talia au ne oku taugasoa, kae ne iku atu i ei ki te faiga o nisi amioga fakatauavaga e uke atu.”—SALA,a AUSETALIA.

E MATA, e talitonu koe me ne puti aka a Sala i loto i se kāiga telā e fakatāua malosi ne latou a mea fakalotu? Ne taumafai ana mātua o puti aka a ia ke ola e ‵tusa mo tulaga o te Tusi Tapu e uiga ki mea tau amioga. Kae ne filifili ne Sala se isi auala aka.

Kāti e lotoma‵lie eiloa a tino e tokouke ki te filifiliga ne fai ne Sala. E tali‵tonu eiloa latou me ko se aoga te kilokiloga a te Tusi Tapu e uiga ki te ‵moe fakatauavaga. E fai mai a nisi tino me e se se mea masei māfai koe se tino e malosi ‵ki i mea fakalotu kae ola foki i se olaga telā e fakamalosi aka ei a amioga fakatauavaga.

E mata, e tāua ke iloa kae ola foki koe e ‵tusa mo te akoakoga a te Tusi Tapu e uiga ki te ‵moe fakatauavaga? E fai mai te Tusi Tapu me “i Tusitusiga Tapu katoa ne aumai mai te Atua, kae aoga ki te akoakoga o te mea tonu.” (2 Timoteo 3:16) Kafai e talitonu koe me ne faite ne te Atua a tino kae ne aumai foki ne ia te Tusi Tapu, ko tena uiga e tāua ‵ki eiloa ke iloa ne tatou a tena kilokiloga e uiga ki te mataupu tenei.

Se mea fakafanoanoa me ko ‵numi valevale a tino e tokouke i mea e akoako mai i te Tusi Tapu e uiga ki te ‵moe fakatauavaga. E ‵kese ‵ki eiloa a akoakoga kolā e fakamalosi aka ne takitaki lotu, kolā e fai mai me amanaia malosi latou ki te Tusi Tapu, e uiga ki te mataupu tenei. A te tonuga loa, ko oti ne mavae‵vae a lotu ‵lasi e uke ona fua ko te mataupu tenei.

I lō te talitonu fua ki manatu o tino, kaia e se sukesuke aka ei koe ki te mataupu tenei? Ka faipati a te suā mataupu ki fesili masani e sefulu kolā e fakafesili sale ne tino e uiga ki te kilokiloga a te Tusi Tapu ki te ‵moe fakatauavaga. Ka maua eiloa ne koe i te mataupu tenā a tali ma‵nino mai te Tusi Tapu e uiga ki te mea tenā. A te mataupu fakaoti ka faipati loa e uiga ki te tāua o filifiliga kolā e fai ne tatou.

[Fakamatalaga fakaopoopo]