Kaia e ‵Tau ei o Ola e ‵Tusa mo Tulaga o te Tusi Tapu?

E MATA, ko se aoga kae ko se ‵tau foki o tau‵tali tatou ki te kilokiloga a te Tusi Tapu e uiga ki te ‵moe fakatauavaga? Ikai. E ‵kese mai ei, e mafai eiloa o fesoasoani mai a te kilokiloga a te Tusi Tapu ki te ‵moe fakatauavaga ke ‵kalo keatea tatou mai:

▪ Masaki ‵pisi i te ‵moe fakatauavaga

▪ Te faiga o tama fua‵taka

▪ Te logo‵mae e maua mai i te avaga mavae

▪ Te sē ‵lei o te loto lagona

▪ Te masiasi me ne fakaaoga fua koe ne nisi tino ke faka‵noga aka ei olotou manakoga fakatauavaga

E manako te ‵tou Atua ko Ieovaa ke maua ne tatou ana meaalofa kae ke aoga foki ki a koe. Ko te Atua eiloa “e manako o akoako koutou ke ‵lei koutou.” (Isaia 48:17) A te tino telā e ola e ‵tusa mo fakatakitakiga a te Tusi Tapu e uiga ki te ‵moe fakatauavaga, ka maua ne latou:

▪ Te taliaga a te Atua

▪ Te filemu o te mafaufau

▪ Se fesokotakiga ‵lei mo tena kāiga

▪ Se ata ‵lei

▪ E āva a tino ki a ia

Kae pefea la, māfai e se ola nei koe e ‵tusa mo tulaga o te Tusi Tapu i mea tau amioga? E mata, e mafai o ‵fuli tou olaga? E mata, ka se fiafia te Atua ki a koe ona ko amioga kolā ne fai muamua ne koe?

Mafaufau ki te mea tenei: A tino kolā ne aofia i te fakapotopotoga Kelisiano i te senitenali muamua, ne tino kolā ne fai ne latou a amioga fakatauavaga sē ‵tau, ne mulilua, kae ne fai foki ne latou a amioga fakatauavaga i va o tāgata, penā foki mo fāfine. Ne filifili aka ne latou ke ‵fuli olotou olaga, kae ne maua ne latou mai i ei a mea aoga e uke. (1 Kolinito 6:9-11) I aso nei, ko oti foki ne fai ne te fia afe o tino i te lalolagi kātoa a fakaikuga penā. Ko saoloto nei latou mai te olaga matagā i amioga fakatauavaga, kae ko maua ne latou a mea aoga ona ko te fakafetaui aka ne latou olotou amioga mo tulaga o te Tusi Tapu. Ke mafaufau ki te tala o  Sala telā ne fakamatala mai i te mataupu muamua.

“Ne Maua Fakavave ne au se Fakatapūga”

Ne iloa aka ne Sala me ne seki mafai o maua ne ia mai i tena olaga faivalevale a te saolotoga mo te lotomalie telā ne manako a ia ki ei. Ne fai mai tou fafine, penei: “Ne iloa ne au me ko se galue toku loto lagona. Ne mā au kae manavase foki i a au ma faitama io me maua ne au se masaki matagā. Ne talitonu katoatoa au me e isi se Atua, kae e iloa ne au me ne logo‵mae malosi a ia ona ko te vaegā olaga ne ola ei au. Ne lai‵lai faeloa oku lagonaga, kae ne fai ei ke vāivāi malosi au.”

Fakamuli ifo, ne maua ne Sala a te malosi ke fai a ‵fuliga ki tena olaga. Ne ‵sala a ia ki te fesoasoani mai ana mātua kolā ne Molimau a Ieova. Ne manako foki a ia ki te fesoasoani o toeaina Kelisiano i tena fakapotopotoga. “Ne ofo malosi au i te atafai mo te alofa telā ne fakaasi mai ne oku mātua mo toeaina i te fakapotopotoga,” ko ana pati. “Ne maua fakavave ne au se fakatapūga.”

Nei la, ko tokolua a tama‵liki a Sala. E fai mai tou fafine, “Ne fakaasi atu ne au ki aku tama‵liki a filifiliga kolā ne fai ne au. E manako au ke malamalama lāua i te auala ne pokotia ei au ona ko te sē tautali ki tulaga o te Atua. E taumafai au ke iloa ne lāua a te aoga ki a lāua i te feitu faka-te-foitino, te feitu faka-te-mafaufau, mo mea tau lagonaga a te ola e ‵tusa mo tulaga o te Atua e uiga ki te ‵moe fakatauavaga. E talitonu au me e tuku mai ne te Atua a tulaga i mea tau amioga ki a tatou me e se manako a ia ke logo‵mae tatou.”

E mafai foki o aoga ki a koe a te tautali ki te takitakiga alofa a te Atua. E folafola mai te Tusi Tapu, penei: “E ‵tonu faeloa tulafono a te Aliki e fia‵fia faeloa a latou kolā e tausi ki ei. A fakatonuga a te Aliki e ‵tonu katoatoa, kae fakamaina ne ia te mafaufau. . . . E maua ne au te taui ‵lei i au ne tausi ki ei.”—Salamo 19:8, 11.b

[Fakamatalaga fakaopoopo]