Apelaamo Se Tagata Fakatuanaki

Ne tu atu Apelaamo i tua i se afiafi po kae ‵ligo. I te taimi ne kilo aka ei a ia ki te mainaga o te lagi e ‵fonu i fetū, mafaufau ei a ia ki te tautoga a te Atua me ka fakatokouke tena fanau ke pelā mo fetū. (Kenese 15:5) E fai a fetū e pelā me se fakamasauaga matea o te tautoga a Ieova ki a Apelaamo. A mea foki konā se fakapa‵tonuga o te tautoga. Kae kafai e lava te malosi o Ieova o faite ne ia te lagi mo te lalolagi mo mea katoa i ei, e mata, e se mafai foki ne Ieova o fai ke isi se tamaliki a Apelaamo mo Sala? E pogai mai a mea katoa konei i te fakatuanaki o Apelaamo.

SE A TE FAKATUANAKI? E ‵tusa mo te fakaaogaga i loto i te Tusi Tapu, e fakasino atu a te “fakatuanaki” ki te talitonu fakamaoni ki se mea e se matea ki mata. E fakavae eiloa a vaegā talitonuga penā ki fakamaoniga mautinoa. E saga tonu atu a te tino telā e fakatuanaki ki te Atua ki te fakataunuga o tautoga a Ieova kae talitonu fakamaoni ki ei e pelā me ne mea ko oti ne fakataunu.

NE FAKAASI MAI PEFEA NE APELAAMO A TE FAKATUANAKI? Ne fakaasi mai ne Apelaamo a tena talitonu ki tautoga a te Atua. Ona ko te fakatuanaki, ne tiakina ei ne Apelaamo te fenua ne fanau ei a ia kae fano mo te loto talitonu me ka tausi eiloa ne Ieova Tena tautoga ke fakaasi atu ki a ia se fenua ‵kese. Ona ko te fakatuanaki, ne fano sāle Apelaamo i loto i Kanana mo te mautinoa me ka ‵nofo fakamuli tena fanau i te fenua tenā. Kae ona ko te fakatuanaki, ne fakalogo eiloa Apelaamo ke ofo atu a Isaako mo fai te taulaga, kae talitonu a ia me ka toe fakatu aka ne Ieova a Isaako māfai e manakogina.—Epelu 11:8, 9, 17-19.

Ne kilo tonu atu Apelaamo ki aso mai mua i lō te saga atu ki aso ko ‵teka. E tiga eiloa kāti ne gali atu te vaegā olaga ne ola ei a Apelaamo mo Sala i Ulo i lō te lā olaga i Kanana, “ne seki tumau eiloa lāua i te mafau‵fau ki te fenua telā ne tiaki ne lāua.” (Epelu 11: 15, Today’s English Version) I lō te fai penā, ne ‵kilo tonu atu eiloa lāua ki te auala ka fakamanuia ei ne Ieova a lāua mo lā fanau i aso mai mua.—Epelu 11:16.

E mata, e lava ‵lei a mea ne fakavae ki ei te fakatuanaki o Apelaamo? E seai se fakalotolotolua ki ei. Ne tausi eiloa ne Ieova ana tautoga takitasi katoa. Ne fakaopoopo faeloa te fanau a Apelaamo kae fai fakamuli mo fai te fenua malosi telā ko iloa nei e pelā me ko Isalaelu. Fakamuli ifo, ne o‵mai a tino Isalaelu o ‵nofo i Kanana, ko te laukele eiloa telā ne tauto atu ei a Ieova ki a Apelaamo.—Iosua 11:23.

NE A AKOAKOGA E MAUA NE TATOU? E tali‵tonu fakamaoni tatou me ka tausi eiloa a Ieova ki ana tautoga. Kafai foki e foliga mai me e faiga‵ta a nisi mea i te kilokiloga a te tagata, e tali‵tonu tatou me “e mafai ne te Atua o fai a mea katoa.”—Mataio 19:26.

E akoako mai foki ki a tatou a te fakaakoakoga a Apelaamo ke ‵kilo tonu atu tatou ki mea ‵gali kolā ka maua ne tatou i aso mai mua, kae e se ko aso ko ‵teka. E tenā loa te mea ne tauloto ne Jason ke fai ne ia. Ne poko a Jason i se masaki telā ne ‵mate ei tena foitino kātoa. “E ‵tau o fakaasi tonu atu ne au me i nisi taimi ko mafaufau au ki aso ko ‵teka,” ko pati a Jason. Ne toe fai mai a ia: “Ko mea fo‵liki kolā e misi malosi ne au, mea pelā mo te ‵sai atu ki taku avaga ko Amanda.”

E tiga eiloa te feitu tenā, e talitonu fakamaoni a Jason me ka fakataunu eiloa ne Ieova ana tautoga e aofia i ei te tautoga me ko pili o fai te lalolagi mo fai se palataiso kae ka maua ne tino fakamaoni a te ola se-gata-mai i te malosi ‵lei katoatoa.a (Salamo 37:10, 11, 29; Isaia 35:5, 6; Fakaasiga 21:3, 4) “Ne fakamasaua ifo ne au ki a au eiloa me ko pili mai a toe taimi ‵gali,” ko pati a Jason kae toe fakamatala mai: Ko pili o oti atu a mea katoa—te māfatia, te manavase, te fanoanoa, te se ‵lei o lagonaga—ka ‵galo atu ki te se-gata-mai.” Ma‵faga o fakaakoakoga gali o te fakatuanaki e pelā mo te fakatuanaki o Apelaamo!

[Fakamatalaga fakaopoopo]