Ke Tauloto Mai Te Muna A Te Atua

E mata, e ‵Valo mai ne te Tusi Tapu a te Taimi mai Mua?

Ka mafaufau a te mataupu tenei ki fesili kolā kāti ko oti ne faka‵sae aka ne koe kae fakaasi atu a te koga e mafai ei ne koe o faitau a tali i tau Tusi Tapu. Ka fia‵fia eiloa a Molimau a Ieova ke sau‵tala fakatasi mo koe ki tali konei.

1. E mata, e mautinoa a valoaga i te Tusi Tapu?

Ko te Atua Malosi Katoatoa fua e mafai o kilo ‵mao atu ki mea likiliki e uiga ki te taimi mai mua. (Amosa 3:7) E pelā me se fakaakoakoga, talu mai taimi mua loa, ne folafola mai ne tou tagata a te oko mai o se tino telā e taku ko te Mesia io me ko te Keliso. Ka vau a te Mesia i te gafa o te tagata fakatuanaki ko Apelaamo. Ka fai a ia mo tino pule telā ka mafai ei ne tino faka‵logo o toe maua a fakamanuiaga o te ola ‵lei katoatoa telā e seai ne masaki i ei. (Kenese 22:18; Isaia 53:4, 5) A te Tino i te Tautoga tenei ne ‵tau o vau mai i Peteleema.—Faitau te Mika 5:2.

Ne fakamautinoa aka me i a Iesu ko te Mesia. I tausaga e silia atu i te 700, ne folafola mai ne te Tusi Tapu me ne fanau mai te Mesia i se taupou kae ka takalia‵lia ki ei a tino. Ne tuku mai ne ia tena ola mō agasala a tino e tokouke, kae ne tanu fakatasi a ia mo tino mau‵mea. (Isaia 7:14; 53:3, 9, 12) Ne folafola mai foki ne te Tusi Tapu, me i tausaga e silia atu i te 500, ne ulu atu tou tagata ki loto i Ielusalema i luga i se asini kae ne fakalata a ia ki tupe siliva e 30. Ne taunu katoa a fakamatalaga likiliki konei.—Faitau te Sakalia 9:9; 11:12.

2. E mata, e ‵valo mai ne te Atua a taimi?

I tausaga e silia atu i te 500, ne ‵valo mai ne te Tusi Tapu a te tausaga tonu e sae mai ei a te Mesia. Ke oko ki tena sae mai, ne fua aka a te taimi ki vaiaso o tausaga, ko tena uiga, a te “vaiaso” e tasi e tusa mo te fitu tausaga te leva. Tela la, a te 7 e faopoopo mo te 62 a vaegā vaiaso penā, ko maua ei te aofaki o vaiaso o tausaga e 69. E ‵pau eiloa a te mea tenā mo tausaga e 483. Ne kamata mai anafea a te vaitausaga tenā? E ‵tusa mo te Tusi Tapu, ne kamata mai a te vaitaimi tenā i te taimi ne oko mai ei a te tavini a te Atua ko Neemia ki Ielusalema kae kamata o toe faite aka a te fa‵kai. E fakamautinoa mai ne tala fakasolopito o te kau Pelesia me i te taimi tenā ko te 455 T.L.M. (Neemia 2:1-5) Ko te taimi tonu eiloa ne papatiso ei a Iesu e pelā mo ko te Mesia i te 483 tausaga mai tua ifo, i te tausaga e 29 T.A.—Faitau te Tanielu 9:25.

3. E mata, ko taunu nei a valoaga i te Tusi Tapu?

Ne ‵valo mai ne Iesu a mea ko pili o ‵tupu i ‵tou taimi. E faipati a tena valoaga ki te ‵tala ‵lei o te Malo o te Atua, telā ka aumai ei a te fakatapūga ki tino kolā e a‵lofa ki te Atua i te lalolagi kātoa. Ka aumai ne te Malo a te gataga ki te fakanofonofoga masei kātoa tenei e ola tatou i ei.—Faitau te Mataio 24:14, 21, 22.

E fakamatala likiliki mai ne valoaga i te Tusi Tapu a te vaitaimi fakaotioti o te fakanofonofoga o mea tenei. Ne fakaasi mai ne te Tusi Tapu me e ‵kese mai i se mea telā ne fakamoemoe ki ei i se vaitausaga o te gasolo ki mua, ne fakamasei ne tino a te lalolagi. A puapuagā kolā e fakamāfua aka ne taua, te sē lava o meakai, mafuie, mo masaki ‵pisi ko gasolo aka eiloa ki luga. (Luka 21:11; Fakaasiga 11:18) A te tulaga o mea tau amioga ko gasolo ifo ki lalo. I taimi faiga‵ta konei, e ‵tau eiloa o talai atu ne soko o Iesu a te ‵tala ‵lei o te Malo o te Atua ki fenua katoa.—Faitau te Mataio 24:3, 7, 8; 2 Timoteo 3:1-5.

4. Ka fai pefea a te olaga o tino i te taimi mai mua?

Ko oti ne ‵teu aka ne te Atua Malosi Katoatoa a mea ‵lei mō tino fakamaoni. A Iesu Keliso, te Mesia, fakatasi mo ana tino filifilia, ka pule mai ki te lalolagi mai luga i te lagi. Ka fakatu ne latou te pulega o te Malo, telā ka pule mō se afe tausaga. Ka toe faka‵tu aka a tino ‵mate kae ka maua te avanoaga ke fakamasinogina ke fetaui ‵lei mo te ola se-gata-mai. E se gata i ei, ka faka‵lei ne te Malo a tino katoa kolā e ola. Ka sē toe ai se mate mo masaki.—Faitau te Fakaasiga 5:10; 20:6, 12; 21:4, 5.

Mō fakamatalaga e uke atu, ke onoono ki te itulau e 23-25 mo te 197-201 Ne A Mea e Akoako ‵Tonu Mai i Te Tusi Tapu? o te tusi telā e fakaata atu i konei.