Fesili Mai te Kau Fai‵tau
Se a te uiga o pati a Iesu: “Sa mafaufau i a au ne vau o aumai a te filemu”?
Ne folafola ne Iesu a te fekau o te filemu. Kae i te taimi e tasi, ne fai atu a ia ki ana apositolo: “Sa mafaufau i a au ne vau o aumai a te filemu ki te lalolagi, au ne vau o aumai te pelu kae e se ko te filemu. Me i a au ne vau o faka‵tupu a mavae‵vaega, ko te tagata e ‵teke atu ki tena tamana, ko te tama fafine e ‵teke atu ki tena mātua, kae ko te avaga a te tama tagata e ‵teke atu ki te mātua o tena avaga.” (Mata. 10:34, 35) Se a te mea ne fakauiga ki ei a Iesu?
Ne seki manako a Iesu ke mavae‵vae a tino i te kāiga, kae ne iloa ne ia me ka ‵tupu a mavae‵vaega i nisi kāiga ona ko ana akoakoga. Tela la, a latou kolā e fai mo soko o Keliso kae papatiso, e ‵tau o iloa ‵lei ne latou a mea ka iku mai ona ko te lotou fakaikuga. Kafai ne fe‵paki latou mo ‵tekemaiga mai i se avaga sē talitonu, io me ko nisi tino i te kāiga, e mafai eiloa o faigata te mea tenei ke tumau a ia i te fakamaoni ki akoakoga a Keliso.
E fakamalosi atu te Tusi Tapu ki Kelisiano “ke tausi te filemu i te va o [latou] mo tino katoa.” (Loma 12:18) Kae e mafai foki o fai a akoakoga a Iesu e pelā me “se pelu” i nisi kāiga. E tupu a te mea tenei māfai ko talia ne se tino i te kāiga a akoakoga a Iesu kae e ‵teke atu a nisi tino ki a latou. I taimi penā, a kāiga—i loto i te kaukāiga—e fai mo “fili” o te tino telā e tauloto ki te munatonu.—Mata. 10:36.
A soko o Keliso kolā e aofia i kāiga e mavae‵vae i mea tau te lotu, e fe‵paki sāle i nisi taimi mo tulaga kolā e tofotofo aka ei te lotou a‵lofa ki a Ieova mo Iesu. E pelā mo kāiga sē tali‵tonu, e mafai o fakamalosi atu ki a latou ke fakamanatu ne latou se aso malōlō fakalotu. Kafai ko tofotofogina latou, ko oi ka fakafiafia ne latou? Ne fai mai a Iesu: “So se tino e sili atu tena alofa ki tena tamana io me ko tena mātua i lō au e seai sena aoga ki a au.” (Mata. 10:37) E tonu, ne seki fai mai a Iesu me ke aoga tatou ki a ia, e ‵tau o foliki ifo te a‵lofa o ana soko ki olotou mātua. I lō te fai penā, ne faka‵mafa mai ne ia a mea kolā e ‵tau o fakamuamua ne tatou. Kafai e ‵teke mai se kāiga sē talitonu ki ‵tou taumafaiga ke tapuaki ki a Ieova, e tumau tatou i te a‵lofa ki a latou kae e talia ne tatou a te manatu me e ‵tau o fakamuamua ne tatou a te ‵tou a‵lofa ki te Atua.
E aunoa mo te fakalotolotolua, e faka‵mae ‵loto ‵ki māfai ko ‵teke mai a kāiga. Kae e masaua faeloa ne soko o Iesu ana pati: “So se tino e se fia amo tena pou fakasaua kae tautali mai i a au, e seai sena aoga ki a au.” (Mata. 10:38) I nisi tugapati, e ‵kilo atu a Kelisiano ki ‵tekemaiga o kāiga e pelā me ne logo‵maega kolā e talia mo te fia‵fia ne soko o Keliso. I te taimi foki tenā, e fakamoe‵moe latou me ka fakamalosi atu olotou amioga ‵lei ki olotou kāiga sē tali‵tonu ke talia kae fia tauloto ki te fekau i te Tusi Tapu.—1 Pe. 3:1, 2.