Kaia e Talia ei ne te Tino Fakalogologo ki ‵Talo a Logo‵maega?

E TIGĀ eiloa kāti e ‵talo atu latou, e fakalotolotolua eiloa a nisi tino me isi se Atua io me seai. Kaia e fakalotolotolua ei latou? E se taumate ona ko te lasi o te logo‵mae i te lalolagi tenei. Kai mafaufau aka eiloa koe me kaia e talia ei ne te Atua a logo‵maega?

E mata, ne fai eiloa ne te Atua ke fai penei a tino​—e se ‵lei kātoatoa kae ‵tau eiloa o logo‵mae? E faigata o āva tatou ki se atua telā e manako ke logo‵mae a tino. Kae ke mafau‵fau ki te mea tenei: Kafai e sasāle atu koe mo te fiafia i tafa o se motoka fou kae kilo atu fua koe ki te suā feitu ko pakia, e mata, e leake koe me ne faite eiloa penā ne te tino faite motoka? Ikai! Ka fakaiku aka ne koe me ne faite eiloa ne te tino faite motoka ke “‵lei kātoatoa” kae ne fai eiloa ne se tino io me se isi mea aka ke pakia te motoka.

I se auala tai ‵pau, kafai e tavae ne tatou a te fakaofoofogia o te fakatokaga mo te faitega o te lalolagi mo mea i ei kae fakamuli ifo ko lavea atu a te lasi o te ‵numi mo te faivalevale telā e tigāina i ei te kau kāiga o tino, se a te fakaikuga ka fai ne tatou? E akoako mai te Tusi Tapu me ne faite ne te Atua te tauavaga muamua ke ‵lei kātoatoa kae fakamuli ifo, ne fai eiloa ne lāua ke ma‵sei lāua. (Teutelonome 32:4, 5) Kae ko te tala ‵lei i ei me ko oti ne tauto mai te Atua me ka faka‵lei a mea ma‵sei​—ke toe faka‵foki a tino faka‵logo ki te tulaga ‵lei kātoatoa. Kaia ne leva ‵ki ei te taimi ne faka‵tali ei a ia?

Kaia ne Leva ‵ki ei?

A te pogai e fano ki luga i te fesili me ko oi e ‵tau o pule atu ki luga i tino. Ne seki mafaufau lele a Ieova me e ‵tau o pule atu a tino ki a latou eiloa. Ne ‵tau eiloa o fai a ia mo olotou Pule. E fai mai te Tusi Tapu: “E se pule te tagata telā e sasāle i te fakatonutonuga o te ala e fano ei a ia.” (Ielemia 10:23, Tusi Paia, Samoa) Se mea fakafanoanoa, me ne fakaiku aka ne tino muamua ke ‵teke atu lāua ki te pulega a te Atua. Ne fai lāua mo tino agasala ona ko te lā faifaiga solitulafono. (1 Ioane 3:4) Ne galo i a lāua a te tulaga ‵lei kātoatoa kae ne fakamasei atu a te mea tenā ki a lāua eiloa mo lā fanau.

Ne talia ne Ieova ke pule atu a tino ki a latou eiloa i te fia afe tausaga, kae ne fakaasi mai i tala fakasolopito me e se mafai ne tino o fai penā. E fakaasi mai i ei me ne māfua mai i malo katoa o tāgata a logo‵maega. E seai eiloa se malo kai fakaseai ne ia a taua, te solitulafono, te sē fai meatonu, io me ko masaki.

Ka Faka‵lei Aka Pefea ne te Atua a Fakamaseiga?

E tauto mai te Tusi Tapu me ko pili o aumai ne te Atua se lalolagi fou kae amiotonu. (2 Petelu 3:13) Ko latou fua kolā e filifili i olotou loto eiloa ke fakaasi atu te alofa o te suā tino ki te suā tino kae ke a‵lofa ki te Atua ka talia ke ola i ei.—Teutelonome 30:15, 16, 19, 20.

E fai mai foki te Tusi Tapu me i “te aso o te fakamasinoga” telā ko pili ‵ki mai, ka fakaseai ne te Atua a logo‵maega mo latou kolā ne māfua mai i ei. (2 Petelu 3:7) Mai tua i konā, ka pule i ei ne te Pule fakaekegina a te Atua, ko Iesu Keliso, a tino faka‵logo. (Tanielu 7:13, 14) Ne a mea ka fakataunu ne te pulega a Iesu? E fai mai te Tusi Tapu: “Ka ko latou kolā e loto ma‵lalo, ka fai mo latou te fenua, kae ka maua ne latou te manuia mo te filemu kātoatoa.”​—Salamo 37:11.

E pelā me ko te Tupu i te lagi, ka fakaseai ne Iesu a mea ma‵sei​—e aofia i ei a masaki, te olaga matua, mo te mate​—kolā ne iku mai i te ‵tekeatuga a tino ki a Ieova, “te pogai o te ola.” (Salamo 36:9) Ka faka‵lei ne Iesu a tino katoa kolā e talia ne latou a tena pulega alofa. Mai lalo i tena pulega, ka taunu ei a tautoga konei a te Tusi Tapu:

◼ “Ka seai eiloa se tino i luga i te ‵tou fenua e tagi i a ia e masaki; a agasala katoa foki ka fakamagalogina katoa.”​—Isaia 33:24.

◼ “Kae ka ‵solo keatea ne ia [te Atua] a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae. Ko palele atu a mea mua.”​—Fakaasiga 21:4.

E a, e se fakamāfanafana mai ke iloa atu me ko pili o fakataunu ne te Atua a tena tautoga ke fakaseai a logo‵maega katoa? I te vaitaimi nei, e ‵tau o tali‵tonu tatou me e lagona ne ia ‵tou ‵talo, māfai foki eiloa e talia ne ia a logo‵maega mō se taimi toetoe fua.

Tenā te Atua i konā. E mafai o lagona ne ia koe, ke oko foki loa ki te ‵mae mo te fanoanoa o koe. Kae e naunau eiloa a ia o kilo atu ki a koe e ola ko te mea ke maua ne koe a te fiafia i te taimi telā ka fakaseai atu ei a mea katoa kolā e manavase koe ki ei mo logo‵maega.