Ke Tavini Atu ki te Atua O te Saolotoga

“Me tenei eiloa te uiga o te alofa ki te Atua, ko te fakalogo ki ana fakatonuga. Kae ko ana fakatonuga e se ‵mafa.”—1 IOANE 5:3.

E MAFAI NE KOE O TALI?

Se a te mea e manako a Satani ke mafau‵fau tatou ki ei e uiga ki tulafono a te Atua?

Kaia e ‵tau ei o fakaeteete malosi tatou i te filifiliga o ‵tou taugasoa?

Se a te mea ka fesoasoani mai ki a tatou ke tumau i te a‵lofa fakamaoni ki te Atua o te saolotoga?

1. E kilo atu pefea a Ieova ki te saolotoga, kae ne fakaasi atu pefea ne ia a te mea tenā i ana faifaiga ki a Atamu mo Eva?

KO IEOVA fua e maua ne ia a te saolotoga telā e seai se tapulā ki ei. Kae e fakaaoga faeloa ne ia a tena saolotoga i te auala tonu. Kae e se pule atu foki a ia ki mea likiliki katoa kolā e fai ne ana tavini. I lō te fai penā, ko oti ne tuku atu ne ia ki a latou a te saolotoga ke fai olotou fakaikuga totino kae ke fakama‵lie aka olotou manakoga ‵tonu katoa. E pelā me se fakaakoakoga, e tasi fua te mea telā ne fai atu te Atua ki a Atamu mo Eva me e se talia ke fai ne lāua. Ne fai atu a ia ki a lāua ke se ‵kai ki fuaga o “te lakau telā e fai ne ia te tino ke iloa te ‵lei mo te masei.” (Kenese 2:17) Tela la, ne mafai eiloa ne lāua o fai te loto o te Atua kae tumau i te mauaga o te saolotoga fakaofoofogia!

2. Kaia ne galo ei i ‵tou mātua muamua a te saolotoga telā ne tuku atu ne te Atua ki a lāua?

² Kaia ne talia ei ne te Atua ke maua ne Atamu mo Eva a saolotoga e uke? Ne faite ne ia lāua ki tena fakatusa kae tuku atu se loto lagona ki a lāua. Ne fakamoemoe eiloa a ia ke fai ne lāua a te mea tonu ona ko te a‵lofa o lāua ki a ia e pelā me ko te lā Māfuaga. (Kenese 1:27; Loma 2:15) Se mea fakafanoanoa, me ne seki loto fakafetai a Atamu mo Eva ki te lā Māfuaga mo te saolotoga telā ne tuku atu ne ia ki a lāua. I lō te fai penā, ne filifili lāua ke fakaiku aka eiloa ne lāua a te mea tonu mo te mea ‵se. Ne ma‵natu aka lāua me ka lasi atu te lā saolotoga e maua i te faiga tenei, kae ko te tonuga loa, ne fai ne te lā filifiliga ke pologa lāua mo lā tama‵liki ki te agasala kae ne iku atu i ei ki logo‵maega mo te mate.—Loma 5:12.

3, 4. Se a te mea e manako a Satani ke mafau‵fau tatou ki ei e uiga ki tulaga o te Atua?

³ Kafai ne mafai ne Satani o fakamalosi aka a tino ‵lei kātoatoa e tokolua mo agelu e tokouke ke ‵teke atu ki te pulega a te Atua, e mafai foki o fai ne ia a te mea tenā ki a tatou. E seki ‵fuli a togafiti a Satani. E manako tou tagata ke mafau‵fau tatou me i tulaga o te Atua ko tō faiga‵ta. E manako a Satani ke mafau‵fau tatou me kafai e tavini atu tatou ki te Atua, ka sē maua ne tatou te fiafia i ‵tou olaga. (1 Ioane 5:3) E mafau‵fau penei a tino o te lalolagi, kae kafai e fakamāumāu faeloa ‵tou taimi mo latou, kāti ka kamata o mafau‵fau tatou e pelā mo latou. Ne fai mai se tuagane telā ko 24 tausaga te matua “me ne lasi ‵ki eiloa te fakamalosiga a oku taugasoa ma‵sei ki a au. Ne mataku au ma ‵kese oku manatu mai nisi talavou.” A ko te ikuga, ne fai ne te tuagane tenei a amioga fakatauavaga sē ‵tau. E se taumate ko oti foki ne oko atu ki a koe a fakamalosiga penā mai taugasoa.

⁴ Se mea fakafanoanoa me e mafai foki o fai a nisi tino i te fakapotopotoga Kelisiano e pelā me ne fakamalosiga ma‵sei. Ne fai mai se taina talavou me i nisi taugasoa o ia i te fakapotopotoga e fia‵fai mo tino kolā e se tapuaki ki a Ieova. Muna a tou tagata: “A toku fesokotakiga mo Ieova ko gasolo ifo o vāivāi. Au ko sē fiafia ki fakatasiga, kae seāseā ko fano au i te galuega talai. E tenā eiloa te taimi ne iloa aka ei ne au me ko ‵tau o fakagata te fakamāumāu taimi fakatasi mo latou, kae ne fai eiloa ne au!” E mata, e matea ne koe a te lasi o te fakamalosiga e mafai o fai ne ou taugasoa ki a koe? Ke mafau‵fau ki se fakaakoakoga mai te Tusi Tapu telā e mafai o fesoasoani mai ki a tatou i aso nei.—Loma 15:4.

NE ‵FULI NE IA OLOTOU LOTO

5, 6. Ne fakaloiloi pefea ne Apisaloma a nisi tino, kae e mata, ne iku manuia a tena aofaga?

⁵ E maua i te Tusi Tapu a fakaakoakoga e uke o tino kolā ne fai pelā me ne fakamalosiga ma‵sei ki nisi tino. E tasi te fakaakoakoga mai i ei ko Apisaloma, te tama tagata a te tupu ko Tavita. A Apisaloma se tagata tino gali. E pelā mo Satani, ne talia ne tou tagata ke tupu aka se manakoga masei i tena loto. Ne manako a ia ke fai mo tupu i lō tena tamana, faitalia me e seai se taliaga ke fai Apisaloma mo tupu.a Ko te mea ke maua a te mea telā e manako a ia ki ei, ne fai ne Apisaloma ke tali‵tonu a tino me ne manako a ia o fesoasoani atu ki a latou kae e se ko te tupu. E pelā mo te Tiapolo i te fatoaga o Etena, ne fai ne Apisaloma ke mafau‵fau a tino me e atafai atu a ia ki a latou kae ne fai atu foki ne ia se loi matagā e uiga ki tena tamana i te taimi eiloa tenā.—2 Samuelu 15:1-5.

⁶ E mata, ne iku manuia te aofaga a Apisaloma? E iloa ne tatou me ne manuia malie me e fai mai te Tusi Tapu i a “Apisaloma ne tumau eiloa i te ‵fuliga o loto o tāgata Isalaelu.” (2 Samuelu 15:6, NW) Ne fakaloiloi ne Apisaloma a tino e tokouke, kae i te fakaotiga, ne takavale a ia. Ne iku atu a tena fakamatamata ki tena mate mo te ‵mate o te fia afe o tino kolā ne fakaloiloi ne ia.—2 Samuelu 18:7, 14-17.

7. Ne a akoakoga e mafai o tauloto ne tatou mai te tala e uiga ki a Apisaloma? (Ke onoono ki te ata i te itulau e 19.)

⁷ Kaia ne faigofie ei ke takitaki ‵se ne Apisaloma a tino Isalaelu konā? Kāti ne ma‵nako ou tāgata ki mea kolā ne tauto atu a ia ki a latou. Io me kāti ne fakamalosi aka latou ne tena tino gali. Faitalia me se a te pogai, e mautinoa ‵lei i a tatou a te mea tenei: Ne seki a‵lofa fakamaoni latou ki a Ieova mo tena tupu telā ne fakaeke ne ia. Tenā te mea ne faigofie ei o fakaloiloigina latou. I aso nei, e tumau eiloa Satani i te fakaaogaga o tino e pelā mo “Apisaloma” ke taumafai o fakaloiloi a tavini a Ieova. Kāti ka fai mai latou me i tulaga o Ieova ko tō faiga‵ta kae ko tino kolā e se tavini ki a Ieova e fia‵fia faeloa. Kafai e lagona ne koe a mea konei, e mata, e iloa ne koe i mea konā ne mea fakaloiloi fua kae tumau eiloa koe i te alofa fakamaoni ki te Atua? E mata, e iloa ne koe me ko te “tulafono ‵lei kātoatoa” fua a Ieova, te tulafono a Keliso, e mafai o ‵taki ne ia koe ki te saolotoga tonu? (Iakopo 1:25) Kafai e iloa ne koe, fakaasi atu me e fakatāua ne koe a te tulafono tenā, kae ke fakaaoga a tou saolotoga i se auala telā e fakafiafia atu ki a Ieova.—Faitau te 1 Petelu 2:16.

8. Ne a nisi fakaakoakoga e fakaasi mai i ei me i te sē fakalogo ki mea e manako a Ieova ki ei e se fakafiafia atu ki tino?

⁸ E manako fakapitoa a Satani o fakaloiloi a talavou. Ne fai mai se taina telā ko 30 nei ana tausaga te matua e uiga ki te taimi koi talavou ei a ia: “Ne kilo atu au ki tulaga o Ieova i mea tau amioga e pelā me se fakataputapuga kae e sē se puipuiga.” Kae ko te ikuga, ne fai ne ia amioga fakatauavaga sē ‵tau. Ne seki fakafiafia atu a te mea tenā ki tou tagata. “Ne ma‵sei ‵ki oku lagonaga mō tausaga e uke,” ko ana muna. Ne tusi mai se tuagane e tokotasi telā ne fai ne ia amioga sē ‵tau i te taimi koi talavou ei a ia me mai tua ifo ne lagona ne ia a te fanoanoa mo te sē aoga. Ne toe fai mai tou fafine: “I te taimi foki tenei mai tua o te 19 tausaga, koi foki‵foki mai eiloa a mafaufauga ma‵sei.” Ne fai mai te suā tuagane: “E masei ‵ki ki au a te manatu me ne fakapuapuagā ne aku amioga a tino kolā e alofa au ki ei i te feitu faka-te-mafaufau, feitu faka-te-agaga, mo lagonaga. Ko oko eiloa i te matagā ke ola e aunoa mo te taliaga a Ieova.” E se manako Satani ke mafaufau koe ki ikuga penā o te agasala.

9. (a) Ne a fesili e ‵tau o ‵sili ifo ne tatou e uiga ki a Ieova mo ana tulafono mo fakatakitakiga? (e) Kaia e tāua ei ke iloa ‵lei ne koe te Atua?

⁹ E pelā mo te mea e fakaasi mai i fakaakoakoga konei, a ikuga o te sē fakalogo ki te Atua e matagā ‵ki. Ko oko eiloa i te fakafanoanoa me e tokouke a talavou i loto i te munatonu, e penā foki a tino ma‵tua, ko oti ne logo‵mae i te tauloto ki te auala faigata tenā! (Kalatia 6:7, 8) Tela la, fesili ifo ki a koe eiloa: ‘E mata, e iloa ne au a togafiti e fakaaoga ne Satani ke taumafai o fakaloiloi au? E mata, e kilo atu au ki a Ieova e pelā me ko toku toe Taugasoa pili eiloa, telā e faipati tonu faeloa kae manako ke maua ne au a te ‵toe mea ‵lei? E mata, e lotomalie kātoatoa au me ka sē taofi lele eiloa ne ia mai i a au se mea telā e ‵lei kae ka iku atu ki te mauaga ne au o te fiafia lasi?’ (Faitau te Isaia 48:17, 18.) E mafai ne koe o tali atu, ao, ki fesili katoa konei māfai fua e iloa ‵lei ne koe a Ieova. E manakogina ke iloa ne koe me i tulafono mo fakatakitakiga i te Tusi Tapu e fakaasi mai i ei te alofa o Ieova ki a koe, kae e sē se manakoga ke ave kea‵tea tou saolotoga.—Salamo 25:14.

‵TALO KE MAUA TE POTO MO TE FAKALOGO

10. Kaia e ‵tau ei o taumafai tatou ke fakaakoako ki te tupu foliki ko Solomona?

¹⁰ I te taimi koi tamataene ei a ia, ne ‵talo atu a Solomona mo te loto maulalo ki a Ieova: “Au nei koi tamaliki. E se iloa ne au o fano ki tua kae vau ki loto.” I konā ne fakamolemole atu a Solomona ki a Ieova ke fesoasoani atu ke maua ne ia te poto mo te fakalogo. (1 Tupu 3:7-9, 12, NW) Ne tali ne Ieova a te fakamolemole tenā, kae ka fai foki ne ia ki a koe, faitalia me koi foliki io me ko matua koe. E tonu, ka sē fai fakavavega ne Ieova ke maua ne koe a te poto. Kae ka fai ne ia koe ke poto māfai e sukesuke ‵loto koe ki tena Muna, ‵talo mō te agaga tapu, kae tautali i fakatakitakiga mo fakatonuga kolā e maua mai e auala i te fakapotopotoga Kelisiano. (Iakopo 1:5) A te tonuga loa, e fai foki ne Ieova ana tavini koi fo‵liki ke ‵poto atu i lō latou kolā e se faka‵logo ki a ia, ke oko foki ki “tino ‵poto mo tino ne akoakogina” o te lalolagi tenei.—Luka 10:21; faitau te Salamo 119:98-100.

11-13. (a) Ne a akoakoga tāua e mafai o tauloto ne tatou mai i te Salamo 26:4, Faataoto 13:20, mo te 1 Kolinito 15:33? (e) Ka fakaaoga pefea ne koe a akoakoga konei i tou olaga?

¹¹ Ke mafau‵fau aka tatou ki nisi tusi fai‵tau kolā e akoako mai ki a tatou a akoakoga tāua e uiga ki te filifiliga o ‵tou taugasoa. Ka fesoasoani mai a te mea tenei ke malama‵lama tatou i te tāua ke suke‵suke ki te Tusi Tapu kae mafaufau ‵loto ki ei ko te mea ke mafai o iloa ‵lei ne tatou a Ieova. E fai mai te Salamo 26:4 penei: “Au se fai takaga ki tino e seai ne aoga; au se kau foki ki tino amio ‵pelo.” I te Faataoto 13:20 e fai‵tau tatou penei: “Kauga ki tino poto kae ka poto foki koe. Kafai e kauga koe ki tino valea kae ka se aoga koe.” Kae fai mai penei i te 1 Kolinito 15:33: “Ke se faka‵segina koutou. A taugasoa ma‵sei e fakama‵sei ne latou a amioga ‵lei.”

¹² Ne a akoakoga tāua e mafai o tauloto ne tatou mai tusi fai‵tau konā? (1) E manako a Ieova ke filifili faka‵lei ne tatou a ‵tou taugasoa. E manako a ia o puipui tatou i mea tau amioga mo te feitu faka-te-agaga. (2) E fakama‵losi mai a ‵tou taugasoa ke fai ne tatou a mea ‵lei io me ko mea ma‵sei; a te mea tenā se mea masani fua o te olaga. A te auala ne tusi ei a fuaiupu konā mai luga e fakaasi mai i ei me e taumafai a Ieova ke oko ki ‵tou loto. E pefea la? Onoono la me i fuaiupu konei ne tusi eiloa e pelā me ne muna‵tonu faigofie, kae e se pelā me ne tulafono, e pelā mo te “e se ‵tau o fai ne koe a te mea tenei” io me “e se ‵tau o fai ne koe a te mea tenā.” Ne tusi a mea konei e pelā eiloa me ko faipati mai a Ieova ki a tatou: ‘Konei la a mea ‵tonu. Se a te mea ka fai ne koe? Se a te mea i tou loto?’

¹³ Ona la ko tusi fai‵tau e tolu konei ne tusi e pelā me ne muna‵tonu faigo‵fie, koi tumau eiloa te ‵tonu o mea i ei ke oko mai eiloa ki aso nei kae e mafai o fakaaoga ki tino i feitu e uke. Ke ‵sili ifo ki a koe eiloa a fesili e pelā mo mea konei: Ne a tulaga e mafai ei o fetaui au mo “tino amio ‵pelo”? E mafai pefea o sē fai taugasoa au mo latou? (Faataoto 3:32; 6:12) Ko oi la “tino ‵poto” kolā e manako a Ieova ke fai taugasoa au ki ei? Ko oi a “tino va‵lea” kolā e manako a ia ke ‵kalo kea‵tea au mai ei? (Salamo 111:10; 112:1; Faataoto 1:7) Ne a “amioga ‵lei” ka fakamasei ne au mai te filifiliga o taugasoa ma‵sei? Ka fetaui fua au mo “taugasoa ma‵sei” i te lalolagi? (2 Petelu 2:1-3) Ka tali mai pefea ne koe a fesili konei?

14. E mafai pefea o tai faka‵lei aka a te otou Tapuakiga a Kāiga i afiafi?

¹⁴ I te auala telā ne fatoā mafaufau ei koe ki tusi fai‵tau e tolu konei, e mafai foki o faitau koe ki nisi tusi siki ke malamalama koe i mafaufauga o te Atua e uiga ki mataupu kolā e aoga ki a koe mo tou kāiga.b Mātua, mafau‵fau o sau‵tala ki mataupu konei i te taimi o Tapuakiga a Kāiga i afiafi. Kafai e fai ne koutou a te mea tenei, ke masaua me i te fakamoemoega o koutou ko te fakatau fesoasoani o te suā tino ki te suā tino ke malamalama me i tulafono mo fakatakitakiga a te Atua e fakaasi mai i ei a te lasi o tena alofa ki a tatou. (Salamo 119:72) Kafai e suke‵suke koutou e pelā me se kāiga, ka momea aka te ‵pili o te fesokotakiga o koutou mo Ieova mo te suā tino ki te suā tino.

15. E mafai pefea o iloa ne koe me ko oti ne ati aka ne koe a te poto mo te fakalogo?

¹⁵ E mafai pefea o iloa ne koe me ko oti ne ati aka ne koe te poto mo te fakalogo? E tasi te auala ko te fakatusatusaga o ou mafaufauga mo mafaufauga o tino fakamaoni i aso mua, e pelā mo te tupu ko Tavita, telā ne tusi mai penei: “Toku Atua, e fiafia au o fai tou loto! E tausi ne au au akoakoga i toku loto.” (Salamo 40:8) Ne fai mai foki a te tino ne tusi ne ia a te Salamo e 119 penei: “Au ko oko eiloa i te fiafia ki au tulafono! E mafaufau au ki ei i te aso kātoa.” (Salamo 119:97) E ‵tau o galue malosi koe ke maua a te vaegā alofa tenei. A te alofa tenei e tupu aka fua māfai e sukesuke faka‵lei koe ki te Tusi Tapu, ‵talo, kae mafaufau ‵loto ki ei. E tupu aka foki māfai e matea ne koe i tou olaga totino me i te fakalogo ki mea e manako te Atua ki ei e iku atu ki fakamanuiaga e uke.—Salamo 34:8.

TAUA MŌ TOU SAOLOTOGA FAKAKELISIANO!

16. Kafai e ma‵nako tatou ke manumalo i te taua ke fakatumau ‵tou saolotoga, se a te mea e ‵tau o masaua ne tatou?

¹⁶ I tala fakasolopito katoa, ko oti ne fai ne atufenua a taua fakasauā ke maua te saolotoga. E ‵tau o lasi atu tou loto fiafia o taua atu ke fakatumau a te saolotoga telā ko maua ne koe e pelā me se Kelisiano! Masaua, me i ou fili e se ko Satani fua mo mafaufauga sē aoga o te lalolagi. E ‵tau foki o taua atu koe ki tou tulaga sē ‵lei kātoatoa mo tou loto telā e mafai o fakaloiloi ne ia koe. (Ielemia 17:9; Efeso 2:3) Mai te fesoasoani o Ieova, e mafai eiloa o manumalo koe i te taua. I taimi katoa e filifili ei koe o fai a te mea tonu, e isi eiloa ne ikuga ‵lei e lua e maua i ei. Muamua, ka fai ne koe te loto o Ieova ke fiafia. (Faataoto 27:11) Lua, i taimi katoa e iloa ne koe me i te fakalogo ki te “tulafono ‵lei kātoatoa o te saolotoga” e ‵lei ki a koe, ka momea aka te tumau o koe i te ‘auala mataliki’ ki te ola se-gata-mai. I aso mai mua, ka maua ne koe te saolotoga e lasi atu telā ne tauto a Ieova ki tino katoa kolā e a‵lofa fakamaoni ki a ia.—Iakopo 1:25; Mataio 7:13, 14.

17. Kafai e fai ne tatou a mea ‵se, kaia e se ‵tau ei o loto vāi‵vai tatou, kae e fesoasoani mai pefea a Ieova ki a tatou māfai e fai ne tatou se mea ‵se?

¹⁷ E tonu, e fai ne tatou katoa a mea ‵se i nisi taimi. (Failauga 7:20) Kafai e tupu a te mea tenā, ke mo a e mafaufau i a koe ko sē aoga io me loto vāivāi. Kafai e fai ne koe se mea ‵se, fai a te mea telā e manakogina ke fakatonu aka a te mea ‵se, māfai foki loa e ‵tau o fakamolemole koe ki toeaina mō se fesoasoani. Ne tusi mai a Iakopo me ka fai ne olotou “‵talo o te fakatuanaki ke ‵lei a te tino masaki, kae ka fakamalosi aka a ia ne Ieova. Kafai foki ne fai ne ia se agasala, ka fakamagalo atu eiloa a ia.” (Iakopo 5:15) Ke mo a eiloa e puli me i te Atua e alofa fakamagalo tonu kae manako ke nofo koe i loto i te fakapotopotoga me ne matea ne ia se mea ‵lei i loto i a koe. (Faitau te Salamo 103:8, 9.) Ka fesoasoani atu faeloa a Ieova ki a koe māfai e taumafai koe o tavini atu ki a ia mo te loto kātoa.—1 Nofoaiga Tupu 28:9.

18. E mafai pefea o fakafetaui aka ‵tou mea e fai mo te ‵talo a Iesu i te Ioane 17:15?

¹⁸ I te po mai mua o tena mate, ne ‵talo fakatasi a Iesu mo ana apositolo fakamaoni e toko 11 kae ne fai atu ne Iesu a pati fui fakapuli konei e uiga ki a latou: “Au e se fakatagi atu ki a koe, ke ave latou keatea mai te lalolagi, kae ke tausi ne koe latou ona ko te tino masei.” (Ioane 17:15) E pelā mo te atafai atu o Iesu ki ana apositolo, e atafai mai foki a ia ki ana soko katoa i aso nei. Tela la, e mautinoa ‵lei me ka tali atu a Ieova ki te ‵talo a Iesu e auala i te puipuiga o tatou i taimi faiga‵ta konei. ‘E puipui ne [Ieova] tino fakamaoni kae amiotonu . . . E tausi ne ia a tino kolā e tavini fakamaoni ki a ia.’ (Faataoto 2:7, 8) E se faigofie faeloa ke fakalogo ki mea kolā e manako a Ieova ki ei. Kae ko tino fua kolā e faka‵logo ki a Ieova, ka maua ne latou a te ola se-gata-mai mo te saolotoga tonu. (Loma 8:21) Kāti e ‵kese a mea e mafau‵fau ki ei a nisi tino, kae ke mo a eiloa e fakaloiloi koe ne latou!

[Fakamatalaga fakaopoopo]

[Ata i te itulau e 19]

E mafai pefea o iloa ne tatou a tino pelā mo Apisaloma i aso nei kae puipui tatou mai i a latou?