Tu ‵Mautakitaki Kae ‵Teke Atu ki Matāsele a Satani!

“Ke ‵tu ‵mautakitaki koutou o ‵teke atu a togafiti ma‵sei a te Tiapolo.”​—EFESO 6:11.

KA TALI MAI PEFEA NE KOE?

E mafai pefea o sē ‵lave se tavini a Ieova i te malei ko te manako malosi ki kope faka-te-foitino?

Se a te mea e mafai o fesoasoani atu ki se Kelisiano avaga ke sē to ki loto i te lua ko te mulilua?

Kaia e talitonu ei koe me se mea aoga ke tu ‵mautakitaki o ‵teke atu ki te manako malosi ki kope faka-te-foitino mo amioga fakatauavaga sē ‵tau?

1, 2. (a) Kaia e seai ei se alofa o Satani ki te kau fakaekegina mo “nisi mamoe”? (e) Ne a malei a Satani ka sau‵tala tatou ki ei i te mataupu tenei?

SATANI te Tiapolo e se alofa ki tino, maise loa a latou kolā e tavini atu ki a Ieova. A te tonuga loa, e fai taua atu a Satani ki te ‵toega o te kau fakaekegina. (Fakaasiga 12:17) Ne takitaki ne Kelisiano a‵lofa fakamaoni konā a te galuega talai o te Malo i aso nei kae fakaasi faka‵sau atu i ei me i a Satani ko te pule o te lalolagi tenei. E se alofa foki te Tiapolo ki “nisi mamoe,” kolā e ‵lago atu ki te kau fakaekegina kae fakamoemoe ke maua te ola se-gata-mai​—se fakamoemoega telā ko sē maua ne Satani. (Ioane 10:16) E setioa eiloa o sauā malosi tou tagata! Faitalia me maua ne tatou a te fakamoemoega i te lagi io me ko te lalolagi, e se fia saga mai a Satani ki te ola ‵lei o tatou. E fakamoemoe fua a ia ke fai tatou mo ana tino.​—1 Petelu 5:8.

² Ko te mea ke taunu a tena fakamoemoega, ko oti ne fai ne Satani a matāsele io me ko malei kese‵kese. Ona la me “ne fakapouli” ne tou tagata a mafaufau o tino sē tali‵tonu, ko sē talia ei ne latou a te tala ‵lei kae ko sē lavea foki ne latou a matāsele konei. E ui i ei, ne malei foki ne te Tiapolo a nisi tino kolā ne talia ne latou a te fekau o te Malo. (2 Kolinito 4:3, 4) Ne fakaasi mai i te mataupu mai mua atu a auala e mafai ei o ‵teke atu tatou ki matāsele e tolu a Satani: (1) te faipati valevale, (2) te mataku mo fakamalosiga sē ‵lei, kae ko te (3) te mafaufau faeloa ki mea ‵se ne fai. Kae ka mafau‵fau nei tatou ki auala e mafai ei o ‵tu ‵mautakitaki tatou i te ‵teke atu ki nisi matāsele io me ko malei a Satani​—te manako ki kope faka-te-foitino mo te fakaosoosoga ke mulilua.

TE MANAKO KI KOPE FAKA-TE-FOITINO​—TE MALEI TELĀ E ‵LAVE I EI TATOU

3, 4. E fakamalosi aka pefea ne te manavase ki mea o te olaga tenei a te manako ki kope faka-te-foitino?

³ I te tala fakatusa e tasi a ia, ne taku mai ne Iesu a fuaga kolā ne ‵toki i va o lakau makai‵kai. Ne fakasino mai a ia me kāti ne lagona ne te tino a te muna, “kae ne ola sai‵tia te muna tenā i loto i a ia ona ko te manavase ki mea o te olaga tenei mo te ‵gali fakaloi‵loi o koloa, telā ko seai ei ne ana fuataga.” (Mataio 13:22) Ao, a te manako malosi ki kope faka-te-foitino se matāsele e tasi ne fakaaoga ne ‵tou fili ko Satani.

⁴ E lua a mea kolā e tuku fakatasi, ko ola sai‵tia ei te muna. A te mea e tasi ko te “manavase ki mea o te olaga tenei.” I “toe taimi faiga‵ta” konei, e uke ‵ki a mea e ‵tau o manavase koe ki ei. (2 Timoteo 3:1) Ona ko te ‵togi ‵mafa o te olaga mo te seai ne galuega, kāti ka faigata ke ‵togi aka a mea kolā e manako koe ki ei. Kāti ka manavase koe ki te taimi mai mua kae fai aka penei, ‘E mata, ka lava aku tupe māfai au ko oti ne li‵taea?’ Ona ko te vaegā manavase tenā, ko oti ne kausaki atu a nisi tino ke maua a koloa e uke, mo te mafaufau me ka maua ne latou a te tokagamālie i tupe.

5. I te auala fea e mafai ei o ‵gali fakaloiloi a “koloa”?

⁵ Ne faipati foki a Iesu e uiga ki te suā mea​—“te ‵gali fakaloi‵loi o koloa.” E mafai eiloa o ola sai‵tia te muna māfai e tuku fakatasi a te mea tenā mo te manavase. E fai mai te Tusi Tapu me “fai a tupe mo fai se puipuiga.” (Failauga 7:12) E ui i ei, a te kausaki atu ki koloa e sē se faifaiga poto. Ne iloa aka ne tino e tokouke me ko te lasi o te taumafai o latou ke mau‵mea, ko te lasi o te manako malosi ki kope faka-te-foitino. Ko oti foki ne pologa a nisi tino ki koloa.​—Mataio 6:24.

6, 7. (a) I te auala fea e fakamataku ei a te manako ki kope faka-te-foitino i tou koga galue? (e) Ne a mea e ‵tau o mafaufau ki ei se Kelisiano māfai ko tuku atu se avanoaga ke galue fakaovataimi?

⁶ Kāti e kamata mālielie a te manako ki koloa. Pelā me se fakaakoakoga, ke onoono ki te mea tenei. Ko fanatu tou pule ki a koe kae fai atu: “E isi saku tala gali! E isi se galuega lasi ‵ki ko maua ne te kamupane. Ko tena uiga ka galue ovataimi faeloa koe i te fia o masina. Kae fai tonu atu au ki a koe me ka ‵lei ‵ki tou ‵togi.” Se a tau faiga ki se vaegā ofo penā? E tonu, a te manakoga ke tausi atu ki tou kāiga i te feitu faka-te-foitino se tiute ‵mafa ‵ki, kae e se tenā fua tou tiute. (1 Timoteo 5:8) E isi aka foki ne nisi mea kolā e ‵tau o saga koe ki ei. E pefea te uke o ovataimi e aofia i ei? E mata, ka fakalavelave atu a tau galuega ‵togi ki ou tiute faka-te-agaga, e aofia i ei a fakatasiga a te fakapotopotoga mo tau Tapuakiga a Kāiga i te afiafi?

⁷ I te fakaikuga e fai ne koe, se a te mea e fakatulaga muamua ne koe​—ko te magoi o tau tusi tupe i te pagike ona ko te ovataimi io me ko te pokotia o tou feitu faka-te-agaga? E mata, a tou loto naunau ke uke atu au tupe e maua ko taofi ei koe mai te fakamuamua o mea o te Malo i tou olaga? E mata, e matea ne koe a tou pokotia i te manako malosi ki kope faka-te-foitino māfai e fakatamala koe ki tou malosi faka-te-agaga e pelā foki mo tou kāiga? Kafai e tenā te mea ko tupu nei ki a koe, e mafai pefea o tu ‵mautakitaki koe kae taumafai ke sē ‵lave koe i te manako ki kope faka-te-foitino?​—Faitau te 1 Timoteo 6:9, 10.

8. Ne a fakaakoakoga i te Tusi Tapu e mafai o fesoasoani mai ke toe mafau‵fau tatou ki te vaegā olaga e ola ei tatou?

⁸ Ko te mea ke sē ‵lave tatou i te manako malosi ki kope faka-te-foitino, ke toe mafaufau ki te vaegā olaga e ola ei koe. E se manako koe ke fai pelā mo Esau, telā ne manatu fātauvā ki mea faka-te-agaga! (Kenese 25:34; Epelu 12:16) Kae mautinoa me e se ‵tau koe o fai pelā mo te tagata maumea telā ne ‵kami ke fakatau atu ana kope, tuku atu ki tino ma‵tiva, kae tautali i a Iesu. I lō te fai penā, “fano ei a ia keatea mo te fanoanoa, me e uke ana koloa.” (Mataio 19:21, 22) Me ne maleigina ne koloa, ne galo ei i te tagata tenā se tauliaga lasi ‵ki​—ko te tautali atu i te ‵toe tagata sili telā ne ola! Ke fakaeteete mo a e galo i a koe a te tauliaga o te fai mo soko o Iesu Keliso.

9, 10. E ‵tusa mo pati i te Tusi Tapu, se a tau kilokiloga e uiga ki kope faka-te-foitino?

⁹ Ke agai atu ki te manavase malosi e uiga ki mea faka-te-foitino, e ‵tau mo tatou o faka‵logo ki te fakatonuga a Iesu: “Ke mo a e manava‵se koutou kae fai aka, ‘Ne a ‵tou mea ka kai?’ io me, ‘Ne a ‵tou mea ka inu?’ io me ‘Ne a mea ka ‵pei tatou ki ei?’ Me konei katoa a mea e kausaki malosi ki ei a fenua fakaa‵tea. E iloa ne te otou Tamana i te lagi a mea kolā e ma‵nako koutou ki ei.”​—Mataio 6:31, 32; Luka 21:34, 35.

¹⁰ I lō te ‵to atu ki te gali fakaloiloi o koloa, taumafai ke maua ne tatou a te kilokiloga a te tino tusitala o te Tusi Tapu ko Akulu, telā ne tusi mai penei: “Ke mo a foki au e to maumea io me to mativa. Tela la, tuku mai fua a meakai e lava ei au.” (Faataoto 30:8, Contemporary English Version) E manino ‵lei me ne malamalama a Akulu i te puipuiga telā e maua mai i tupe e pelā foki mo te ‵gali fakaloiloi o koloa. Ne iloa ne ia me i te manavase ki mea o te olaga tenei mo te ‵gali fakaloiloi mai o koloa e mafai o iku atu ki fakamaseiga i te feitu faka-te-agaga. E mafai ne te manavase malosi ki mea faka-te-foitino o kai ou taimi, tou malosi, kae ko sē fia kausaki atu koe ki mea o te Malo. Tela la, ke na fakaiku aka ke mo a e ‵lave koe i te malei a Satani ko te manako malosi ki kope faka-te-foitino!​—Faitau te Epelu 13:5.

TE MULILUA​—SE LUA TELĀ KO OTI NE ‵TAO FAKA‵LEI

11, 12. E mafai pefea o ‵lave se Kelisiano i te malei ko te mulilua i te koga galue?

¹¹ Kāti e keli ne se tino tulimanu se lua i te auala telā e olo sāle i ei a manu māfai e manako o ‵po se manu malosi. E masani o ‵tao a te lua ki lakau mo kaulama. E tai ‵pau a te vaegā malei tenā mo te fakaosoosoga e tasi a Satani telā e iku manuia sāle. Ko te agasala i te faiga o amioga sē ‵tau. (Faataoto 22:14; 23:27) E tai isi eiloa ne Kelisiano ko oti ne ‵to ki loto i te lua tenā mai te talia o latou eiloa ke oko ki tulaga kolā e faigofie ke gutugutulua i ei. Ko oti ne taka‵vale a nisi Kelisiano a‵vaga i te mulilua mai tua o te atiakaga o se fesokotakiga fakafamau sē ‵tau.

¹² E mafai eiloa o ati aka se fesokotakiga fakafamau sē ‵tau i tou koga galue. Ne fakaasi mai i se sukesukega ne fai me silia atu mo te āfa o fāfine kae toeitiiti ko te toko 3 mai te toko 4 tāgata ko oti ne fai amioga sē ‵tau mo se tino galue. E mata, a tau galuega ‵togi tenā e manakogina loa ke ga‵lue tasi mo fāfine? Kafai e penā loa, se a te tulaga o tou fesokotakiga ki a latou? E a, e isi ne tapulā ne fai ne koe ko te mea ke sē oko a te fesokotakiga tenā ki se tulaga telā e silia atu? E pelā me se fakaakoakoga, mai tua o te sau‵tala ‵soko mo se tagata galue, kāti ko fai ne te tuagane Kelisiano tou tagata mo fai te tino e fakaasi atu ki ei ana lagonaga, ke oko foki ki ana fakalavelave mo tena avaga. I te suā feitu, mai tua o te fai taugasoa ki se fafine galue, kāti ko fakasako‵sako mai se tagata Kelisiano: “E fakatāua ne tou fafine oku manatu kae fakalogologo faka‵lei mai māfai e faipati atu au ki a ia. Kae amanaia mai a ia ki a au. Aku muna loa ke maua ne au ne faiga penei i te fale!” E mata, e lavea ne koe a te faigofie ke aofia a Kelisiano i te mulilua i vaegā tulaga penei?

13. E mafai pefea o ati aka se fesokotakiga fakafamau sē ‵tau i loto i te fakapotopotoga?

¹³ E mafai o ati aka se fesokotakiga fakafamau sē ‵tau i loto i te fakapotopotoga. Mafaufau ki te mea tonu tenei ne tupu. A Tanielu mo tena avaga, ko Sala,a ne paenia tumau. A Tanielu foki “se toeaina telā e se mafai o fai atu, ikai.” E talia faeloa ne ia mo te loto fiafia so se tauliaga e tuku atu ki a ia. E pelā me se vaega o tena taviniga, ne fai ne Tanielu a akoga faka-te-Tusi Tapu mo tamataene e tokolima​—e tokotolu mai i a latou ne papatiso. E manakogina se fesoasoani e lava ki taina papatiso ‵fou konei. Kafai ko fakalavelave a Tanielu i ana tauliaga kese‵kese, e tuku atu faeloa ne Sala a te fesoasoani tenā. E seki leva, ko te mea eiloa ko gasolo o masani malosi. Ne fia maua ne tino a‵koga a Tanielu se ‵lago i te feitu ki lagonaga, kae ne maua ne latou mai ia Sala. Ne manakogina ne tou fafine se tino ke saga tonu atu, kae ne maua ne ia mai i tino a‵koga a Tanielu ki te Tusi Tapu. A te mea tenei se malei e fakamataku ‵ki. “E uke a masina ne tuku atu ei ne taku avaga a te fesoasoani i te feitu faka-te-agaga mo mea tau lagonaga,” ko muna a Tanielu. “A te mea tenei, fakatasi mo toku sē saga tonu atu ki tou fafine, ne iku atu ei ki se ma‵tuga fakalavelave lasi ‵ki. Ne mulilua taku avaga mo se tokotasi o aku tino a‵koga. Ne gasolo ifo o vāivāi tou fafine i te feitu faka-te-agaga i oku mata eiloa, ka ko au ko tō saga malosi ki oku tauliaga, telā ko sē lavea ei ne au.” E mafai pefea o ‵teke atu koe ki se vaegā tulaga fakafanoanoa ‵ki penā?

14, 15. Ne a mea e mafai o fesoasoani atu ki Kelisiano a‵vaga ke sē ‵to atu ki loto i te lua ko te mulilua?

¹⁴ Ko te mea ke sē tō atu koe ki loto i te lua ko te mulilua, mafaufau me se a te uiga o tautoga ne fai i te taimi o te fakaipoipoga. Muna a Iesu: “A lāua kolā ko oti ne fakatasi ne te Atua e se mafai o ‵tala ne se tino.” (Mataio 19:6) Ke mo a eiloa e mafaufau koe me e tāua atu ou tauliaga i te fakapotopotoga i lō tau avaga. Kae sili atu la, ke fakaeteete me i tou fano faeloa o fai a galuega kolā e se manakogina kae tiaki tau avaga, se fakaasiga o te vāivāi o tou olaga avaga kae e mafai o fakaosoosogina koe ke fai se agasala matagā ‵ki.

¹⁵ Kafai koe se toeaina, e fai la pefea a te lafu mamoe? Ne tusi mai te apositolo ko Petelu: “Tausi faka‵lei te lafu mamoe a te Atua tenā e tausi ne koutou, e se i te fai fitoi, kae i te loto fiafia, e se ona ko te fia fai mea i se auala sē tonu, kae i te fiafia tonu.” (1 Petelu 5:2) E mautinoa ‵lei me e se ‵tau o tuku tiaki a tino o te fakapotopotoga kolā ne tuku atu ke tausi ne koe. Kae tigā te feitu tenā, e se ‵tau o fakataunu tou tiute e pelā me se tausi mamoe i te taimi telā e ‵tau ei o fai tou tiute e pelā me se tagata avaga. E seai se aoga​—e fakamataku foki​—ke saga kātoatoa atu koe o fagai a te fakapotopotoga kae telā tau avaga e “fia kai” i te fale. E fai mai a Tanielu, “E se ‵tau o tō fakalavelave koe i ou tiute ko fai ei ke sē saga tonu atu koe ki tou kāiga totino.”

16, 17. (a) Ne a auala aoga e mafai o fai ne Kelisiano a‵vaga i koga ga‵lue ke fakaasi manino atu ei me e se avanoa latou mō faifaiga fakafamau? (e) Tuku mai se fakaakoakoga o mataupu i loto i ‵tou tusi kolā e mafai o fesoasoani mai ki Kelisiano ke ‵kalo kea‵tea mai te mulilua.

¹⁶ E tuku mai i Te Faleleoleo Maluga mo te Awake! a fakatakitakiga ‵lei e uke ke fesoasoani atu ki Kelisiano a‵vaga ke mo a e ‵lave i te malei ko te mulilua. E pelā me se fakaakoakoga, ne tuku mai i Te Faleleoleo Maluga o Setema 15, 2006, a te fakatakitakiga tenei: “I te koga galue io me se isi koga aka, ke fakaeteete i tulaga kolā e mafai ei o fai ke tō pili te vā o se tokolua. E pelā mo te galue ovataimi o se tagata mo se fafine e mafai o fai mo fai se fakaosoosoga. E pelā me se tagata io me se fafine avaga, e tau o taku manino atu ne koe i au pati mo au faifaiga me e se avanoa koe mō se vaegā mea penā. E pelā me se tino amioatua, e se manako lele eiloa koe ke ‵saga mai a tino mai te fai famau io me e auala i ou teuga mo ou gatu. . . . Kafai e isi ne ata o tau avaga mo au tamaliki e nofo mo koe i te koga galue, e fai a te mea tenā e pelā me se fakamasauaga ki a koe mo nisi tino me e fakamuamua ne koe tou kāiga. Ke fakaiku aka ke mo a eiloa e fakamalosi​—io me talia​—ne koe a pati fakafamau a nisi tino ki a koe.”

¹⁷ Ne fakailoa mai i te mataupu ko te “Marital Fidelity​—What Does It Really Mean?” i te Awake! o Apelila 2009 ke mo a e maua ne tatou ne mafaufauga fakatauavaga ki so se tino telā e se ko tau avaga. Ne fakaasi mai foki i te mataupu tenei me kafai e maua i a koe a mafaufauga konei ka faigofie o aofia koe i te mulilua. (Iakopo 1:14, 15) Kafai koe ko oti ne avaga, se faiga poto ke sau‵tala sāle koulua mo tau avaga ki vaegā fakamatalaga penā. A te avaga se fakatokaga ne fai tokotasi ne Ieova, kae e ‵malu. A te fakaavanoa ne koulua ne taimi ke fai‵pati e uiga ki te lua avaga se auala ‵lei e fakaasi atu ei me e fakatāua ne koulua a mea tapu.​—Kenese 2:21-24.

18, 19. (a) Ne a ikuga matagā e maua mai te mulilua? (e) Ne a mea aoga e maua mai te fakamaoni o taki tauavaga?

¹⁸ Kafai ko fakaosoosogina koe ke ati aka se fesokotakiga fakafamau se ‵tau, mafaufau ‵loto ki ikuga matagā o te fina lalolagi mo te mulilua. (Faataoto 7:​22, 23; Kalatia 6:7) A latou kolā e fai amioga ma‵sei e fakafanoanoa atu ki a Ieova kae faka‵mae atu ki a latou eiloa mo olotou avaga. (Faitau te Malaki 2:13, 14.) E ‵kese mai i ei, mafaufau ‵loto ki mea aoga e uke kolā ka maua ne latou kolā e tumau i te ‵lei olotou amioga. E se gata fua i te maua ne latou a te fakamoemoega ke ola ki te se-gata-mai kae fia‵fia foki ki te ‵toe olaga gali ko maua ne latou nei, e aofia i ei a te mauaga o se lagonaga ‵ma.​—Faitau te Faataoto 3:1, 2.

¹⁹ Ne usu mai penei a te faisalamo: “E lasi te filemu e maua ne latou kolā e fia‵fia ki au [Atua] tulafono, kae e seai eiloa se fakalavelave ki a latou.” (Salamo 119:165, NW) Tela la, ke a‵lofa ki te munatonu kae “ke fakaeteete faeloa koutou i te auala e sa‵sale ei koutou, e se pelā me ne tino va‵lea kae e pelā mo tino ‵poto” i taimi matagā konei. (Efeso 5:15, 16) E ‵fonu eiloa a auala kolā e oloolo tatou i ei i malei kolā ne fai ne Satani ke ‵lave i ei a tino tapuaki ‵tonu. Kae ko lava ‵lei ‵tou uta ke puipui ei tatou. Ko oti ne tuku mai ne Ieova ki a tatou a mea e manakogina ke “‵tu ‵mautakitaki” kae “ke tamate ne koutou ki ei a matasana ‵ka a te tino masei”!​—Efeso 6:11, 16.

[Fakamatalaga fakaopoopo]

[Ata i te itulau e 29]

E mafai ne te manako malosi ki kope faka-te-foitino o faka‵lave se tino i te feitu faka-te-agaga. Ke mo a e talia ke tupu a te mea tenā ki a koe

[Ata i te itulau e 32]

Fakatāgata io me ko te fakafāfine​—io me ko te tali ki ei​—e mafai o iku atu ki te faiga o te amioga ko te mulilua