Fakaeteete i Malei a te Tiapolo!

“‵Tele keatea mai te malei a te Tiapolo.”​—2 TIMOTEO 2:26.

KA TALI MAI PEFEA NE KOE?

Kafai e fakamasei faeloa ne koe a nisi tino, se a te mea e ‵tau o fai ne koe?

Mai i fakaakoakoga a Pilato mo Petelu, ne a mea e mafai o tauloto ne koe e uiga ki te sē takavale i fakamalosiga sē ‵lei mo te mataku ki tino?

E mafai pefea o ‵teke atu koe ki te mafaufau faeloa ki mea ‵se ne fai?

1, 2. Ne a matāsele a Satani ka mafau‵fau tatou ki ei i te mataupu tenei?

E TAUMAFAI a te Tiapolo o ‵po aka a tavini a Ieova. E se fakamoemoe a ia o tamate latou e pelā mo te tino tuli manu telā e tamate faeloa ne ia a manu kolā e ‵po ne ia. I lō te fai penā, e fakamoemoe eiloa te Tiapolo ke ‵po ne ia te tino kae fakaaoga ke fai a te mea telā e manako a ia ki ei.​—Faitau te 2 Timoteo 2:24-26.

² Kāti e fakaaoga ne se tino fai malei se matāsele ke ‵po aka i ei se manu. Kāti e taumafai tou tagata ke o‵mai a manu ki tua i te koga ateatea telā e mafai o sele ne ia se manu i ei. Io me ‵funa aka ne ia se malei telā e mafai o lave i ei se manu. E fakaaoga ne te Tiapolo ne malei e tai ‵pau penā ke ‵po aka ne ia a tavini a te Atua. Kafai e se ma‵nako tatou ke ‵po ne ia, e ‵tau mo tatou o matapula‵pula kae faka‵logo ki faka‵pulaga kolā e fakaasi mai i ei se malei e tasi a Satani, io me ne matāsele kolā e ‵pili mai fua. I te mataupu tenei, ka sau‵tala eiloa tatou ki auala e mafai ei o puipui tatou mai i malei e tolu kolā ne fakaaoga ne te Tiapolo ke ‵po aka ei a nisi tino o te Atua. A malei konei ko te (1) faipati valevale, (2) mataku mo fakamalosiga sē ‵lei, kae ko te (3) ko tō mafaufau ki mea ‵se. Ka faipati mai a te suā mataupu ki malei fakaopoopo e lua, io me ko matāsele a Satani.

TAMATE A TE AFI O TE FAIPATI VALEVALE

3, 4. A te fakatamala o pule faka‵lei atu ki ‵tou alelo, ne a mea e mafai o iku mai i ei? Tuku mai se fakaakoakoga.

³ Kāti e faka‵ka ne se tino tulimanu se koga o te togāvao ko te mea ke fetuli mai a manu ki tua mo olotou koga ‵muni, ko ‵po ei a manu kolā e taumafai o ‵tele ke ‵sao latou. I se auala fakatusa, e manako te Tiapolo ke faka‵ka ne ia te afi i loto i te fakapotopotoga Kelisiano. Kafai e manumalo tou tagata, e mafai o fai ne ia ke tiakina ne tino o te fakapotopotoga a te koga saogalēmū tenā ko ‵po ei ne ia. E mafai pefea o ga‵lue tasi tatou mo tou tagata e aunoa mo te iloa me ko ‵lave foki tatou i te matāsele a tou tagata?

⁴ Ne fakatusa ne te soko ko Iakopo a te alelo ki se afi. (Faitau te Iakopo 3:6-8.) Kafai e fakata‵mala tatou o pulea ‵tou alelo, e mafai eiloa o kamata ne tatou se afi fakatusa i loto i te fakapotopotoga. Ka tupu pefea a te mea nei? Ke mafaufau ki te mea tenei: I se fakatasiga a te fakapotopotoga, ne fai se faka‵pulaga me ko oti ne talia se tuagane ke fai pelā me se paenia tumau. I te otiga o te fakatasiga, sau‵tala ei se tokolua tuagane e uiga ki te faka‵pulaga tenei. E fakaasi mai ne te tokotasi o lāua a te fiafia kae fai a pati fakamālō e uiga mo te paenia fou. Kae ko te suā tino ne fakafesili ne ia a te manakoga o te paenia kae fai aka ana pati me ne manako fua tou fafine ke takutakua a ia i te fakapotopotoga. Ko oi i tino talai e tokolua konei e manako koe ke fai mo fai tou taugasoa? E se faigata ke iloa a te tino telā ka faka‵ka ne ia te afi i loto i te fakapotopotoga mai te auala e faipati ei a ia.

5. Ke tamate a te afi o te faipati valevale, se a te iloiloga totino e ‵tau o fai faka‵lei ne tatou?

⁵ E mafai pefea o tamate ne tatou a te afi o te faipati valevale? Muna a Iesu: “Me e faipati mai ne te gutu a mea kolā e ‵fonu i te loto.” (Mataio 12:34) Tela la, a te mea muamua e ‵tau o fai ko te iloilo o ‵tou loto. E mata, e taumafai tatou ke mo ā e maua ne tatou a lagonaga ma‵sei kolā e fakamalosi aka i ei a te faiga o pati faka‵mae e uiga ki nisi tino? E pelā me se fakaakoakoga, kafai e lagona ne tatou se taina e taumafai ke maua a nisi tauliaga i te taviniga, e mata, e tali‵tonu tatou me e ‵ma eiloa ana lagonaga, io me e ma‵natu aka tatou me e fakaoso fua ne ana manakoga totino? Kafai e nofo faeloa i a tatou a te vāivāiga ko te seai o se loto talitonu, se mea ‵lei ke masaua me ne fakafesili foki ne te Tiapolo a te manakoga o te tavini fakamaoni a te Atua ko Iopu. (Iopu 1:9-11) I lō te māsalosalo e uiga ki ‵tou taina, se mea ‵lei ke mafau‵fau tatou me kaia e fakamasei ei ne tatou a tou tagata. E mata, e maua ne tatou se pogai ‵lei ke fai penā? Io me ko oti ne fakapoisini ‵tou loto ne te agaga sē alofa telā ko lauiloa i aso fakaoti konei?​—2 Timoteo 3:1-4.

6, 7. (a) Ne a nisi pogai e fakamasei ei ne tatou a nisi tino? (e) E ‵tau o tali atu pefea tatou māfai e muna maseigina tatou?

⁶ Ke mafau‵fau ki nisi pogai e mafai ei o fakamasei ne tatou a nisi tino. Se mea e tasi, kāti e ma‵nako tatou ke iloa ne tino katoa a mea kolā e fai ne tatou. I te faiga tenā, kāti ko taumafai tatou o fakaasi atu me e ‵lei atu tatou i nisi tino katoa. Io me kāti ko taumafai tatou o fai se fakamasakoga ki te pogai e seki fai ei a te mea telā ne ‵tau o fai. Faitalia me fakaoso tatou ne te fakamatamata, te loto masei, io me ko te sē tokagamalie, a te ikuga e masei ‵ki eiloa.

⁷ Kāti e ma‵natu aka tatou me e isi ne pogai ‵lei ke fakamasei atu ki se tino. E se taumate ne logo‵mae tatou i te faipati valevale o tou tagata io me ko tou fafine. Kafai e tenā loa te pogai, a te ‵toe taui atu i te auala tenā e se ko te tali ki ei. A te faiga tenā e faopoopo atu fua i ei a fafie ki te afi kae olo tasi mo te mea telā e loto ki ei a te Tiapolo kae e se ko te Atua. (2 Timoteo 2:26) Se mea ‵lei ke fakaakoako atu tatou ki a Iesu i te mea tenei. I te taimi ne muna maseigina ei a ia, “ne seki taui atu ne ia ki pati ma‵sei.” I lō te fai penā, “ne tuku atu faeloa ne ia a ia ki te tausiga a te tino telā e fai ne ia a fakamasinoga ‵tonu.” (1 Petelu 2:21-23) Ne talitonu a Iesu me ka saga atu a Ieova ki mea konā i te auala mo te taimi telā e manako a Ia ki ei. E ‵tau foki o maua ne tatou a te loto talitonu penā ki te Atua. Kafai e fakaaoga ne tatou a ‵tou pati ke fakama‵losi aka ei a nisi tino, e fesoasoani atu eiloa tatou ke fakatumau a te “fusi o te filemu” i ‵tou fakapotopotoga.​—Faitau te Efeso 4:1-3.

TELE KEA‵TEA MAI TE MATĀSELE O TE MATAKU MO FAKAMALOSIGA SĒ ‵LEI

8, 9. Kaia ne taku fakamasei ei ne Pilato a Iesu?

⁸ Kafai ko lave se manu i te sele, ko sē mafai ei o fanofano sāle. I se auala tai ‵pau, a te tino telā e takavale i te mataku mo fakamalosiga sē ‵lei ko sē pule kātoatoa atu ki tena olaga. (Faitau te Faataoto 29:25.) Ke mafau‵fau aka tatou ki fakaakoakoga a tāgata e tokolua kolā e ‵kese ‵ki eiloa me ne seki ‵teke atu ki fakamalosiga sē ‵lei mo te mataku ki tino kae onoono aka me ne a mea e mafai o tauloto ne tatou mai i tala o lāua.

⁹ Ne iloa ne te kovana o Loma ko Ponitio Pilato me i a Iesu se tagata e seai sena mea ‵se ne fai kae se manako tou tagata o faka‵mae a ia. A te tonuga loa, ne fai atu a Pilato me e seai se mea ‵se ne fai ne Iesu “e ‵tau ei o tamate” a ia. E tigā te feitu tenā, ne taku fakamasei ne Pilato a ia ke oko eiloa ki te mate. Kaia? Me ne talia ne Pilato a te fakamalosiga mai i te vaitino. (Luka 23:15, 21-25) Ne faimālō ne latou a Pilato ke fai te mea e ma‵nako latou ki ei, ka‵laga atu ei a tino ‵teke konā, “kafai e fakasaoloto ne koe a te tagata tenei, a koe e sē se taugasoa o Kaisala.” (Ioane 19:12) Kāti ne mataku a Pilato i te mea ma galo i a ia a tena tulaga​—io me ko tena ola​—māfai e kau a ia ki te feitu o Keliso. Tenā ne talia ei ne ia a fakamalosiga mai tino kae ne iku atu i ei ki te faiga o te loto o te Tiapolo.

10. Se a te mea ne fai ei ke fakafiti a Petelu e uiga ki te Keliso?

¹⁰ A te apositolo ko Petelu se taugasoa pili e tokotasi o Iesu. Ne fakailoa atu ne ia ki tino me i a Iesu ko te Mesia. (Mataio 16:16) Ne tumau eiloa a Petelu i te alofa fakamaoni i te taimi ne seki malamalama ei a nisi soko i te uiga o se mea ne faipati a Iesu ki ei kae olo kea‵tea mai i a Ia. (Ioane 6:66-69) Kae i te taimi ne o‵mai ei a fili o puke fakapagota a Iesu, ne fakaaoga ne Petelu se pelu ke puipui ei a tena Matai. (Ioane 18:10, 11) Kae fakamuli ifo, ne takavale a Petelu i te mataku kae ne fakafiti me e se iloa ne ia a Iesu Keliso. I se taimi toetoe fua ne lave ei a te apositolo i te malei o te mataku ki tino kae ne taofi aka ei tou tagata mai te tumau i te loto toa.​—Mataio 26:74, 75.

11. Ne a fakamalosiga sē ‵lei e ‵tau o taua atu tatou ki ei?

¹¹ E pelā me ne Kelisiano, e ‵tau o ‵teke atu tatou ki fakamalosiga ke fai a mea kolā e fakafanoanoa atu ki te Atua. Kāti e taumafai a pule io me ko nisi tino o fakama‵losi tatou ke sē fakamaoni io me taumafai o fakama‵losi tatou ke aofia i faifaiga fakatauavaga se ‵tau. Kāti e fakafesagai atu a tamaliki a‵koga ki taugasoa kolā e taumafai o fakamalosi latou ke kaisoa a tali i taimi o sukega, ke onoono ki ata ma‵sei, ke ‵pusi, ke fakaaoga a vailakau tapu, ke inu ki meainu ma‵losi, io me fai a amioga fakatauavaga sē ‵lei. Tela la, se a te mea e mafai o fesoasoani mai ke ‵sao tatou mai te malei o te mataku mo fakamalosiga sē ‵lei ke fai a te mea telā e fakafanoanoa atu ki a Ieova?

12. Ne a akoakoga e mafai o tauloto ne tatou mai i a Pilato mo Petelu?

¹² Ke onoono aka me ne a mea e mafai o tauloto ne tatou mai i fakaakoakoga a Pilato mo Petelu. E mu‵tana fua a mea e iloa ne Pilato e uiga ki a Keliso. Ne iloa ne tou tagata me e seai se mea ‵se ne fai ne Iesu kae ko ia e sē se tagata penei mo tatou. Kae ne seki lava te loto maulalo mo te alofa o Pilato ki te Atua tonu. Ne faigofie o ‵po aka tou tagata ne te Tiapolo. Ne maua ne Petelu a te iloaga tonu mo te alofa ki te Atua. I nisi taimi, ko sē lava tena loto maulalo, ko mataku, kae takavale i fakamalosiga sē ‵lei. A koi tuai o puke fakapagota a Iesu, ne fai atu a Petelu mo te fakamatamata: “E ui eiloa e tiaki ne latou konei a koe, kae e se mafai eiloa o tiaki ne au a koe.” (Maleko 14:29) Ne mafai loa o toka ‵lei a te apositolo mō tofotofoga kolā ka fepaki fakamuli mo ia moi fai ne talitonu fakamaoni a ia ki te Atua e pelā mo te faisalamo telā ne usu mai penei: “Au ko se mataku me ‵kau fakatasi māua mo te Aliki [Ieova]; ko sē toe mafai ne tino o fai mai se mea ki a au.” (Salamo 118:6) I te ‵toe po o tena olaga i te lalolagi, ne ave ne Iesu a Petelu mo nisi apositolo aka e tokolua ki loto i te fatoaga o Ketesemane. I lō te tumau i te matapula‵pula, ne ‵to a ‵moe o Petelu mo ana taugasoa. Ne ‵fagu aka latou ne Iesu kae fai atu: “Ke tumau i te matapula‵pula kae ‵talo faeloa, ko te mea ke se fakaosoosogina koutou.” (Maleko 14:38) Ne toe to te moe o Petelu kae fakamuli ifo, ne takavale a ia i te mataku mo fakamalosiga sē ‵lei.

13. E mafai pefea o ‵teke atu tatou ki fakamalosiga ke fai se mea ‵se?

¹³ E maua ne tatou a te suā akoakoga mai i fakaakoakoga a Pilato mo Petelu: Ke iku manuia i te ‵teke atu ki fakamalosiga e aofia i ei a te tuku fakatasi o te iloaga tonu, loto maulalo, nofo filemu, alofa ki te Atua, mo te mataku ki a Ieova, kae e se ki tino. Kafai e ati aka a ‵tou fakatuanaki i luga i te iloaga tonu, ka loto ma‵losi eiloa tatou o fai‵pati atu mo te loto talitonu e uiga ki mea kolā e tali‵tonu tatou ki ei. Ka fesoasoani mai a te mea tenei ke ‵teke atu tatou ki fakamalosiga sē ‵lei kae fakatakavale a te mataku ki tino. E tonu, e se ‵tau lele eiloa o tō fakalago‵lago tatou ki ‵tou malosi totino, e pelā mo te mea ne fai ne Petelu. I lō te fai penā, e ‵tau o iloa ne tatou mo te loto maulalo me e manakogina ne tatou a te malosi o te Atua ko te mea ke mafai ne tatou o ‵teke atu a fakamalosiga sē ‵lei. E manakogina ke ‵talo atu tatou mō te agaga o Ieova kae ‵tau o fakama‵losi aka tatou ne te alofa ki a ia ke fakamaluga a tena igoa mo ana tulaga. E se gata i ei, e ‵tau o toka tatou mō fakamalosiga sē ‵lei a koi tuai o fe‵paki tatou mo se tofotofoga. Pelā me se fakaakoakoga, a te fakatokatoka fakatasi mo te ‵talo e mafai o fesoasoani atu ki ‵tou tamaliki ke magoi a te tali e tuku atu ne latou māfai e taumafai olotou taugasoa o fakama‵losi latou ke fai se mea ‵se.​—2 Kolinito 13:7.a

‵TEKE ATU KI TE MALEI TELĀ E ‵MAFA ‵KI​—TE MAFAUFAU FAELOA KI MEA ‵SE NE FAI

14. E uiga mo ‵tou mea ‵se ne fai i taimi ko ‵teka, se a te mea e manako te Tiapolo ke fakaiku aka ne tatou?

¹⁴ I nisi taimi e ‵sai se potulakau ‵mafa io me se fatu ki se uaea o fakatautau i luga i te auala telā e oloolo sāle i ei a manu. Te taimi loa e poko ei te manu ki te uaea, ko te potulakau loa io me ko te fatu ko tō, ‵tao ei te manu. Kāti e mafai o faka‵tusa a lagonaga ‵mafa ‵ki o mea ‵se ne fai ki te potulakau ‵mafa tenā ne tō ifo. Kafai e mafau‵fau tatou ki se mea ‵se ne fai i taimi ko ‵teka, kāti “ko vāi‵vāi ka ko taka‵vale masei foki” tatou i ei. (Faitau te Salamo 38:3-5, 8.) E manako a Satani ke fakaiku aka ne tatou me e se ‵tau o maua ne tatou a te alofa fakamagalo o Ieova kae ko sē mafai ne tatou o fai Ana manakoga.

15, 16. E mafai pefea o ‵teke atu koe ki te malei ko te mafaufau faeloa ki mea ‵se ne fai?

¹⁵ E mafai pefea o ‵teke atu koe ki te malei tenā e ‵mafa ‵ki? Kafai ne fai ne koe se agasala matagā, gasuesue nei o faka‵lei tou va fakataugasoa mo Ieova. Fesokotaki atu ki toeaina, kae fakamolemole atu ki te fesoasoani o latou. (Iakopo 5:14-16) Fai te mea e mafai ne koe o fakatonu a te mea ‵se. (2 Kolinito 7:11) Kafai e polopoloki koe, sa loto vāivāi. A te polopoloki se fakailoga mautinoa me i a Ieova e alofa ki a koe. (Epelu 12:6) Ke na fakaiku aka ke sē toe fai a auala kolā ne iku atu ki te faiga o te agasala, kae ke gasuesue e ‵tusa mo te faka‵leiga tenā. Kafai koe ko oti ne salamō kae toe foki mai, ke na fakatuanaki me e mafai eiloa o fakamagalogina au agasala e auala i te taulaga togiola a Iesu Keliso.​—1 Ioane 4:9, 14.

¹⁶ Koi tumau eiloa te sē ‵lei o lagonaga o nisi tino i agasala kolā ko oti ne fakamagalogina latou i ei. Kafai e tenā tou lagonaga, masaua me ne fakamagalo ne Ieova a Petelu mo nisi apositolo i te tiakinaga ne latou a Tena Tama fagasele i te taimi eiloa telā ne manako malosi ei a Iesu ki a latou. Ne fakamagalo ne Ieova a te tagata telā ne fakatea mai te fakapotopotoga i Kolinito ona ko ana amioga matagā kae ne salamō fakamuli. (1 Kolinito 5:1-5; 2 Kolinito 2:6-8) E faipati eiloa te Muna a te Atua ki tino agasala kolā ne sala‵mo kae fakamagalogina ne te Atua.​—2 Nofoaiga Tupu 33:2, 10-13; 1 Kolinito 6:9-11.

17. Ne a mea e mafai o fai ne te togiola ki a tatou?

¹⁷ Ka fakamagalo kae fakapuli ne Ieova au mea ‵se ne fai i taimi ko ‵teka māfai e salamō tonu kae talia ne koe a tena alofa fakamagalo. Ke mo a e mafaufau koe me e se mafai ne te taulaga togiola a Iesu o fakamagalo au agasala. Kafai e mafaufau koe penā, ka lave koe i te suā malei a Satani. Faitalia me se a te mea e manako te Tiapolo ke talitonu koe ki ei, e mafai eiloa ne te togiola o fakamagalo a agasala katoa a tino kolā ne agasala kae ko oti ne sala‵mo. (Faataoto 24:16) A te fakatuanaki ki te togiola e mafai o fakamāmā i ei a te amoga ‵mafa ko te mafaufau faeloa ki mea ‵se, kae mafai o tuku atu ki a koe a te malosi ke tavini atu ki te Atua mo tou loto kātoa, mafaufau, mo tou foitino.​—Mataio 22:37.

E ILOA NE TATOU A MALEI A SATANI

18. E mafai pefea o ‵teke atu tatou ki malei a te Tiapolo?

¹⁸ E se fia saga a Satani me ko te malei fea e ‵lave ei tatou, kae ko te mea fua ke ‵po aka ne ia tatou. Ona ko te mea e iloa ne tatou a malei a Satani, e mafai o ‵teke atu tatou ke mo a e ‵po aka tatou ne te Tiapolo. (2 Kolinito 2:10, 11) Ka sē ‵lave tatou i ana malei, io me ko matāsele, māfai e ‵talo atu tatou ke maua te poto e fakafesagai atu ei ki ‵tou tofotofoga. “Kafai se tino i a koutou e se maua ne ia te poto, ke na fakamolemole atu faeloa a ia ki te Atua, me e tuku atu eiloa ne ia te mea tenā mo te kaimalie ki tino katoa e aunoa mo te mafaufau ki olotou mea ‵se ne fai.” (Iakopo 1:5) E manakogina ke ga‵lue tatou e ‵tusa mo ‵tou talo mai te fai faeloa o sukesukega totino mo te fakagaluegaga o te Muna a te Atua. A tusi faka-te-Tusi Tapu kolā e tuku mai ne te tavini fakamaoni kae poto e fakamaina mai i ei a matāsele kolā e fai ne te Tiapolo kae fesoasoani mai ke ‵teke atu tatou ki ei.

19, 20. Kaia e ‵tau ei o takalia‵lia tatou ki mea ma‵sei?

¹⁹ A te ‵talo mo te sukesuke ki te Tusi Tapu e fakama‵losi aka ei tatou ke a‵lofa ki mea ‵lei. Kae e penā foki te tāua ke takalia‵lia tatou ki mea ma‵sei. (Salamo 97:10) A te mafaufau ‵loto ki ikuga o te kausaki atu ki manakoga kaimanako e mafai o fesoasoani mai ke ‵teke atu tatou ki ei. (Iakopo 1:14, 15) Kafai e takalia‵lia tatou ki mea ma‵sei kae a‵lofa tonu ki mea ‵lei, ka sē aoga a poa a Satani kolā e faka‵piki ki ana malei i a tatou e takalia‵lia ki ei.

²⁰ Ko oko eiloa i te loto fakafetai o tatou me ne fesoasoani mai te Atua ke sē ‵po aka tatou ne Satani! E auala i Tena Muna, agaga, mo te fakapotopotoga, e faka‵sao ei tatou ne Ieova “mai te tino masei.” (Mataio 6:13) I te mataupu telā e ‵soko mai, ka tauloto tatou ki te auala e ‵teke atu ei ki malei e toe lua kolā ne iloa ne te Tiapolo me magoi ke ‵po aka ei a tavini a te Atua.

[Fakamatalaga fakaopoopo]

[Ata i te itulau e 24

A te faipati valevale e māfua mai i ei a fakalavelave e uke i loto i te fakapotopotoga

[Ata i te itulau e 27

E mafai ne koe o tapale keatea a te amoga ‵mafa o te mafaufau faeloa ki mea ‵se ne fai